Jaꞌ jun libro tiꞌ jix tzꞌibꞌelecan yet abꞌil 1405 a.C. Jaꞌ naj Moisés jix tzꞌibꞌencanoj, yet jix ecꞌabꞌ naj yul yet txꞌotxꞌ Moab.

Deuteronomio sbꞌi jun libro tiꞌ, chi yal yeloc apnoj, chi al-le eltoj ley junelxa. Jaꞌ yul jun libro tiꞌ tzꞌibꞌebꞌilcan wan kꞌane tol miman yeloc apnoj jix yal naj Moisés tet ebꞌ conobꞌ Israel yet cꞌamto chi apni oc ebꞌ bꞌey txꞌotxꞌ Canaán. Jaꞌton wan chejbꞌanile jix yal Dios, yetoj wan tzet jix yun Dios yet jix iꞌle eltej ebꞌ Israel bꞌey txꞌotxꞌ Egipto. Chi yalon pax tej yu cawinaj abꞌil ecꞌnaj joyoj ebꞌ conobꞌ Israel bꞌey txꞌotxꞌ cusiltaj txꞌotxꞌ.

Jaꞌ Jehová jix colon eltej ebꞌ sconobꞌ sicꞌbꞌil el yu, yakꞌnaj pax syaaxilal yibꞌan ebꞌ yet eyecꞌ ebꞌ bꞌey txꞌotxꞌ cusiltaj txꞌotxꞌ tuꞌ. Yu jun tuꞌ, smoo tol caw ey scamcꞌulal ebꞌ yin Dios, chi sjijen ebꞌ tzet chi yalaꞌ, chi yalon swatxꞌ kꞌane ebꞌ tet, yet watxꞌ chi a cꞌal can ẍaꞌon swatxꞌcꞌulal Dios ebꞌ.

Ey wal jayebꞌ versículo caw miman yeloc apnoj yul jun libro tiꞌ, jaꞌton capítulo 6 versículo 4, 5 yetoj 6. Yalnajtej Jesucristo wan versículo tiꞌ yet jix cuywa xol ebꞌ ánima, tol asan wan chejbꞌanile tiꞌ yel miman yeloc apnoj.

Jaꞌ bꞌey capítulo 1 masantaꞌcꞌal bꞌey capítulo 4, jatuꞌ chi yalaꞌ tzet jix yun naj Moisés bꞌey txꞌotxꞌ cusiltaj txꞌotxꞌ.

Jal bꞌey capítulo 5 masantaꞌcꞌal capítulo 26, jatuꞌ chi yaltej yet scaabꞌ tujan skꞌane naj Moisés. Jaꞌ wan kꞌane tiꞌ cuybꞌanile yeoc ebꞌ, jaꞌ xol wan laonebꞌ chejbꞌanile elnajtej ebꞌ. Chi yalon pax tej tol sowalil chi sbꞌeybꞌalne ebꞌ Israel yet oj apnoj oc ebꞌ bꞌey txꞌotxꞌ Canaán.

Jaꞌ bꞌey capítulo 27 yetoj capítulo 28, jatuꞌ chi yaltej yu swatxꞌcꞌulal Dios jix ẍaꞌ ebꞌ.

Jaxa bꞌey capítulo 29 yetoj capítulo 30, jatuꞌ chi yalaꞌ tol chi acꞌbꞌi swa kꞌane Dios yakꞌnaj can yetoj ebꞌ Israel bꞌey txꞌotxꞌ wonan Sinaí.

Jaxa capítulo 31 masantaꞌ bꞌey capítulo 34, jatuꞌ chi yaltej masanil slawubꞌal skꞌane naj Moisés yalnaj can tet ebꞌ yet Israelal. Jix stakꞌele can sbꞌa yetoj ebꞌ, yutol yotaj xa naj tol tuxa oj camoj. Jaꞌ naj Josué jix yaoc sqꞌuexeloj yin yopiso. Jix lawi tuꞌ, jix atoj naj bꞌey sjolom txꞌotxꞌ wonan chi yij Nebo, jaꞌ tituꞌ jix yil cantoj txꞌotxꞌ Canaán naj, bꞌey skꞌaxepal ecꞌtoj jaꞌ Jordán, catuꞌ jix cami.