6 Jaꞌ Jehová,

Naj cu Diosal jix kꞌanabꞌ ey jon bꞌey Horeb,

jix yalon jaxca tiꞌ:

Mimanxa tiempo ey jex ecꞌ bꞌey jun wonan tiꞌ.

7 Tinaniꞌ meltzaanwejtoj,

catuꞌ chex too caey bꞌey txꞌotxꞌ yet ebꞌ Amorreo,

yetoj cꞌal bꞌey wanxa txꞌotxꞌ ey yinlaj tuꞌ,

bꞌey Arabá,

bꞌey wonanlaj cꞌal bꞌey pananlaj bꞌey Négueb,

cꞌal bꞌey stiꞌlaj jaꞌ mar,

bꞌey txꞌotxꞌ yet ebꞌ Cananeo cꞌal masanil yul-laj yet Líbano masantaꞌcꞌal bꞌey jaꞌ miman jaꞌ Éufrates.

8 Yutol jix waoc txꞌotxꞌ txꞌotxꞌ tuꞌ yul je kꞌabꞌ.

Asiꞌwej,

catuꞌ chex caey sat txꞌotxꞌ,

yutol jix wakꞌcan jin tiꞌ wakꞌon tet ebꞌ je yichmam,

jaꞌton Abraham,

Isaac cꞌal Jacob,

cꞌal tet yicꞌaal ebꞌ,

ẍi Jehová.

9 Jaꞌ yet jun tiempoal tuꞌ,

jix wal ey jex:

Ma jin tzaji jex wilon jin txꞌojli.

10 Yutol caw chi chꞌibꞌ sbꞌisil je yuninal jix akꞌle yu Jehová cu Diosal,

yuxan jaꞌ tinaniꞌ caw miman conobꞌxa je yeocoj,

laan xa je bꞌisil jaxca weycan ey bꞌey satcan.

11 Jaꞌ Jehová cu Diosal,

sDiosal ebꞌ kichmam,

jaꞌ chi akꞌon chꞌibꞌ cu bꞌisil tol yin xa smilal ey cu bꞌisil tinaniꞌ.

Yakꞌ ojabꞌ cꞌal swatxꞌcꞌulal jaxca wal jix yun yakꞌon can stiꞌ.

12 Yuxan ma skeꞌ wu jin txꞌojli jex wiloni,

cꞌal jin waꞌnen yeoc masanil jowal,

cꞌal cajlebꞌail ey je xol.

13 Yuxan sicꞌwej el ebꞌ winaj caw ey sjelanil xol junjun icꞌaaleal,

jaꞌton ebꞌ ey snaꞌbꞌal,

ebꞌ jelan,

ebꞌ yotaj chi swaꞌne yeoc junoj kꞌane,

yet watxꞌ jaꞌ ebꞌ tuꞌ chi waoc yin yaawilal je xol,

jin chi tet ebꞌ.

14 Jaex tiꞌ,

jix jex takꞌwi:

Caw chi ẍaꞌ cu cꞌul jun ja naꞌbꞌal tuꞌ,

je chi ey jin.

15 Queytuꞌ jix yun jin sicꞌon el ebꞌ winaj tol ey snaꞌbꞌal xol junjun icꞌaaleal,

catuꞌ caw miman yeloc apnoj ebꞌ.

Jix waon oc yopiso ebꞌ yin yoc ebꞌ yaawil je xol:

Ey ebꞌ jix waoc yaawilal yin 1,000 ánima,

jal wanojxa ebꞌ jix waoc yaawilal yin 100 ánima,

jal wanojxa yin 50,

jal wanojxa xin,

yin 10,

jal wanojxa xin,

jix waoc ebꞌ yin yaawilal yin junjun icꞌaaleal.

16 Jix lawi tuꞌ,

jix wakꞌon snaꞌbꞌal ebꞌ je yaawilal tuꞌ,

jix walon tet jaxca tiꞌ:

Watxꞌ chi yun je yilon je yopiso,

watxꞌ che yute je waꞌnen yeoc masanil ebꞌ ket conobꞌ tiꞌ,

yetoj cꞌal ebꞌ txꞌoj conobꞌal.

17 Jaꞌ yet che naꞌon oc yibꞌan ebꞌ,

jun laan ojabꞌ cꞌal chi yun je naꞌon oc yin ebꞌ,

ebꞌ yeynajil ánima cꞌal ebꞌ miman yeloc apnoj.

Cꞌam ojabꞌ cꞌal chex xiw tet junoj mactxequel,

yutol jaꞌ jun opiso che yun tuꞌ,

man je yetoj,

yutol yet Dios.

Ta ey wal tzetyetal tol caw wal miman yeoc xin,

che yatej yul jin kꞌabꞌ,

jain xa oj jin waꞌne yeoc jun kꞌane tuꞌ,

ẍi naj Moisés.

18 Jaꞌ yet jun tiempoal tuꞌ,

caw miman tzetyetal jix wakꞌ yotajne el ebꞌ,

cꞌal tzet sowalil chi yun ebꞌ.

19 Jix yalon pax Moisés jaxca tiꞌ:

Jaꞌ yet jix cu el bꞌey txꞌotxꞌ wonan chi yij Horeb,

jix cu too caey bꞌey txꞌotxꞌ txꞌotxꞌ yul yet ebꞌ Amorreo,

yu cu jijen tzet jix yal Jehová cu Diosal.

Jix cu ecꞌ cꞌal bꞌey jun miman cusiltaj txꞌotxꞌ tol eyxa smey yili,

jaex wal caw jix je yilaꞌ,

masantaꞌcꞌal jix cu apni oc bꞌey Cadés-barnea.

20 Jix walon jaxca tiꞌ:

Jaꞌ tinaniꞌ xin,

tuxa jix cu jul sat xꞌotxꞌ ebꞌ Amorreo tiꞌ,

jaꞌton jun txꞌotxꞌ jix yakꞌ Jehová cu Diosal ey jon.

21 Ocanwej xin,

iꞌwej oc txꞌotxꞌ,

cananwej caan sat txꞌotxꞌ jaxca jix yun yalon Jehová,

jaꞌton Naj cu Diosal yetoj ebꞌ kichmam.

Cꞌam ojabꞌ chex xiwi,

cꞌam ojabꞌ che yakꞌ caabꞌcꞌulal,

jin chi ey jex.

22 Jaxa jex jaex tiꞌ,

jix jul je yal ey jin an:

Yel xacꞌal mi watxꞌ,

ta ey jaywanoj jon chi cu bꞌabꞌitoj yet chi too kilon jun nación tuꞌ,

catuꞌ chi cu meltzo yu jul kaloni,

tzet bꞌeal bꞌey chi kakꞌ cu too oc jon,

cꞌal tzet conobꞌal bꞌey watxꞌ cu caeyi,

je chi ey jin an.

23 Jaꞌ tzet jix je yal tuꞌ,

caw watxꞌ jix wabꞌe.

Yuxan jix jin sicꞌ el lacawan ebꞌ winaj je xol,

junjun cꞌal yin junjun icꞌaale.

24 Jaꞌton ebꞌ tuꞌ jix too bꞌey sjolomlaj wonan,

catuꞌ jix apni oc ebꞌ bꞌey spananil stiꞌlaj sjobꞌeal yul yet Escol,

jix ecꞌ cꞌal ebꞌ yil jun txꞌotxꞌ txꞌotxꞌ tuꞌ.

25 Jaꞌ yet jix lawi ecꞌ yilon jun txꞌotxꞌ tuꞌ ebꞌ,

jix yiꞌontej jayebꞌoj sat awbꞌeal teꞌ ebꞌ ey sat txꞌotxꞌ tuꞌ.

Jaꞌ yet jix yalon ebꞌ naj ey jon,

queytuꞌ jix kotajne eloj tol caw watxꞌ txꞌotxꞌ txꞌotxꞌ oj yakꞌ Jehová cu Diosal ey jon.

26 Jal jex jaex tiꞌ xin,

ma yal je cꞌul jix jex too bꞌey jun txꞌotxꞌ tuꞌ,

yutol ma je jije tzet jix yal Jehová cu Diosal.

27 Jaꞌ bꞌey je na bꞌey caan jex tuꞌ,

jix kꞌoli je yalon skꞌumal Jehová,

jix je yalon jaxca tiꞌ:

Jaꞌ Jehová cꞌam chi cu yoche,

yuxan jix jon yiꞌeltej bꞌey Egipto;

asanne yu cu yaon oc Naj yul skꞌabꞌ ebꞌ Amorreo,

yet chi cu cam yu ebꞌ.

28 Jaxa tinaniꞌ xin,

¿bꞌeytuꞌ oj kakꞌ cu toocoj?

Jaꞌ ebꞌ ket conobꞌ chi aloni,

tol jaꞌ bꞌey jun txꞌotxꞌ tuꞌ ey ebꞌ mimej winaj,

ey ebꞌ mimej steel,

caw miman conobꞌ yeoc ebꞌ,

catuꞌ caw mimej yea smuroal yinlaj sconobꞌ ebꞌ.

Jix yilon cꞌal pax oc ebꞌ wan mimej winaj yicꞌaal naj Anac.

Jaꞌ yet jix kabꞌen oc jun kꞌane tuꞌ,

yuxan jix jul cu caabꞌcꞌulal cu masanil,

je chi.

29 Yu jun tuꞌ,

yuxan jix jin takꞌwi jaxca tiꞌ:

Cꞌam ojabꞌ chex xiwa yu wan tuꞌ.

30 Jaꞌ Jehová cu Diosal,

oj bꞌabꞌoj cu sattaj,

jaꞌ Naj oj yakꞌ jowal cu,

jaxca jix yun je yilon tzet jix yun Naj ku bꞌey Egipto,

31 cꞌal bꞌey txꞌotxꞌ cusiltaj txꞌotxꞌ.

Yetoj wal yipalil,

catuꞌ jix cu yiꞌontej yul-laj bꞌe,

masantaꞌcꞌal jix cu jul bꞌey jun txꞌotxꞌ tiꞌ,

jaxca wal junoj mame tol chi slactej yuninal,

jin chi tet ebꞌ.

32 Jaxa jix je yun xin,

caw wal ma je yaoc je cꞌul yin tzet jix yal Jehová cu Diosal,

33 jaꞌcaw Naj bꞌabꞌel stoo cu sattaj.

Jaꞌ yet akꞌbꞌalil jaꞌ jun kꞌakꞌ jix cu iꞌon bꞌeyoj,

jaxa yet cꞌualil xin,

jaꞌ jun asun jix cu iꞌon bꞌeyoj,

ẍi naj Moisés.

34 Jaꞌ yet jix yabꞌen Jehová tzet jix je yalaꞌ,

caw wal jix tit sjowal,

jix yakꞌon can stiꞌ jaxca tiꞌ:

35 Cꞌam wal junoj wan ánima pena snaꞌbꞌal tiꞌ,

oj ilon yin txꞌotxꞌ txꞌotxꞌ bꞌey jix wakꞌcan jin tiꞌ wakꞌon tet ebꞌ je yichmam.

36 Asan naj Caleb,

scꞌaal Jefuné oj ilon oc txꞌotxꞌ,

yuxan jaꞌ tet naj oj wakꞌ txꞌotxꞌ yetoj tet ebꞌ yicꞌaal,

jaꞌton txꞌotxꞌ bꞌet ilbꞌil ecꞌ yu naj,

yutol caw jix sjije naj tzet jix walaꞌ,

ẍi Jehová.

37 Je yu cꞌal jaex tiꞌ,

yuxan jix tit cꞌal pax sjowal Jehová win,

jix yalon ey jin jaxca tiꞌ:

Man oj jaach apnoj oc sat jun txꞌotxꞌ tuꞌ jaach tiꞌ.

38 Jaꞌ naj Josué scꞌaal Nun,

naj chi colwa ja wetoj,

jaꞌ naj oj oc can ja qꞌuexeloj;

yet chi yiꞌon bꞌey jun bꞌulan conobꞌ tiꞌ,

caw cha wiptze can naj Josué tuꞌ,

yutol jaꞌ naj oj ijbꞌantoj ebꞌ Israel tiꞌ bꞌey jun txꞌotxꞌ tuꞌ,

ẍi Jehová ey jin.

39 Caxcꞌal jix je yaoc yin je cꞌul jaex tiꞌ,

tol jaꞌ ebꞌ je yuninal cꞌal ebꞌ ix je yistil oj iꞌle ecꞌ ebꞌ yu ebꞌ je cajat tuꞌ,

yuxan jaꞌ ebꞌ je yuninal tol cꞌamto snaꞌbꞌal tinaniꞌ,

jaꞌ ebꞌ oj octoj bꞌey jun txꞌotxꞌ txꞌotxꞌ tuꞌ.

Yutol jain oj wakꞌ txꞌotxꞌ tet ebꞌ.

40 Yajbꞌan cꞌamto chi apni stiempoal wakꞌon txꞌotxꞌ tet ebꞌ an,

paxanwejtoj bꞌey txꞌotxꞌ cusiltaj txꞌotxꞌ,

catuꞌ chex too yul jun bꞌe chi apni bꞌey jaꞌ Cajin Mar,

ẍi Jehová.

41 Jaex tiꞌ jix je yal ey jin jaxca tiꞌ:

Jix oc cu penail tet Jehová cu Diosal,

yuxan jaꞌ tinaniꞌ xin,

toonwej,

kakꞌwej kip jaxca wal jix yun yalon Naj ey jon,

je chi.

Jix je yiꞌontoj je mitxꞌkꞌabꞌ yet jowal,

jix je naꞌ tol subꞌo xacꞌal oj yun je yiꞌon oc txꞌotxꞌ sjolomlaj wonan tuꞌ.

42 Yuxan jaꞌ Jehová jix aloni tol chi wal ey jex:

Manche je yakꞌ jowal,

manche jex oc sattaj ebꞌ je cajat tuꞌ,

jaxa tala chi yunne,

chex eyqꞌuey yu ebꞌ,

yutol man eyoj jin oj oc je yetoj,

ẍi Dios.

43 Jix wakꞌ je yotajne el wan tuꞌ,

ma je chaꞌ je yabꞌ tzet jix walaꞌ.

Yutol ma je jije tzet jix yal Jehová,

jix je yaon oc je yet jaxca wal che yoche,

jix jex a xacꞌaltoj sjolomlaj wonan jaxca chi yun stoo lelon kaꞌeꞌ.

44 Yuxan jaꞌ ebꞌ Amorreo caan bꞌey tituꞌ,

jix eltej ebꞌ je yin,

jix oc tzajan ebꞌ je yintaj,

jaxca chi yun yeltej somna noꞌ snoꞌal xuux,

masantaꞌcꞌal jix jex eyqꞌuey yu ebꞌ bꞌey Seír,

jix apni taꞌcꞌal oc bꞌey Hormá.

45 Jaxa yet jix jex meltzotej,

jix cꞌoli je yokꞌa sattaj Jehová,

ma xacꞌaltaꞌ takꞌwoj Naj ey jex.

46 Yu cꞌal jun tuꞌ,

yuxan caw wal miman tiempoal jix cu caey ecꞌ bꞌey yul yet txꞌotxꞌ Quedes tiꞌ.