5 Jix lawi tuꞌ xin,

catuꞌ jix ey noan naj Moisés yetoj Aarón sat txꞌotxꞌ sattaj masanil ebꞌ conobꞌ tuꞌ.

6 Jaxa pax Josué,

scꞌaal Nun cꞌal yetoj naj Caleb,

scꞌaal Jefuné,

jaꞌton ebꞌ jix bꞌet ilon ecꞌ txꞌotxꞌ txꞌotxꞌ tuꞌ,

jix oc ian stzilontoj spichil ebꞌ yu xꞌoxon el ebꞌ tol chi cus scꞌul ebꞌ.

7 Jix yalon ebꞌ xol masanil ánima jaxca tiꞌ:

—Ja jun txꞌotxꞌ txꞌotxꞌ jix bꞌet kilecꞌ tuꞌ jon,

caw wal watxꞌ txꞌotxꞌ.

8 Ta chi el yin scꞌul Jehová tol oj colwa ketoj,

oj kil cꞌaltaꞌ oc yin txꞌotxꞌ,

jaꞌ Naj oj akꞌon txꞌotxꞌ ey jonwej.

Jaꞌ jun txꞌotxꞌ tuꞌ,

caw wal yaax sat txꞌotxꞌ.

9 Yuxan cꞌam ojabꞌ che yiꞌel je naꞌbꞌal yin Jehová,

catuꞌ cꞌam ojabꞌ chex xiw tet ebꞌ ánima caan bꞌey jun txꞌotxꞌ tuꞌ.

Jaxca wal cu loꞌon junoj ixim pan,

queytuꞌ oj yun sqꞌueyel ebꞌ naj tuꞌ ku.

Tumi ey mactxequel oj colon ecꞌ ebꞌ ey jon,

jal jon pax jaon tiꞌ xin,

eyoc Jehová ketoj.

Cꞌam chex xiw tet ebꞌ,

ẍi ebꞌ naj.

10 Caxcꞌal mi jaxca tuꞌ yalon ebꞌ,

jaxa pax ebꞌ conobꞌ tuꞌ chi yoche xacꞌal ebꞌ tol chi kꞌojchꞌennele cam ebꞌ.

Jaꞌ yet jun txolan tuꞌ,

jix xꞌoxon a sbꞌa yipalil Jehová yetoj bꞌey stiꞌ scalubꞌal,

masanil ebꞌ conobꞌ Israel jix iloni.

11 Jix yalon Jehová tet naj Moisés jaxca tiꞌ:

—¿Bꞌakꞌin oj sbꞌej wan ánima tiꞌ jin yintajnen eloj?

¿Bꞌakꞌin oj sbꞌejcan ebꞌ yakꞌon caabꞌcꞌulal win,

ti wal lalan jin txꞌoxon wan milagro tiꞌ tet ebꞌ?

12 Jaꞌ tinaniꞌ xin,

oj watoj junoj miman yaꞌ jolom yibꞌan jun conobꞌ tiꞌ,

yet chi qꞌueyle el ebꞌ yu.

Jaxa ja win jaach tiꞌ oj el junoj conobꞌ wu tol yel miman sbꞌisil,

catuꞌ tol ey yip yintaj ebꞌ naj tiꞌ,

ẍi Dios tet naj Moisés.

13 Catuꞌ jix takꞌwi naj Moisés tet Jehová jaxca tiꞌ:

—Caw wal yotaj ebꞌ ánima bꞌey Egipto tuꞌ jantaj yeoc ja wipalil yet jix eltej jun conobꞌ tiꞌ xol ebꞌ tituꞌ;

yuxan jaꞌ yet oj yabꞌen oc ebꞌ ánima bꞌey Egipto tol cha qꞌueyel wan ánima tiꞌ,

14 oj mi yal ja kꞌumal ebꞌ xol ebꞌ ánima ey yul yet Canaán.

Jaꞌ ebꞌ tuꞌ jix yabꞌoc ebꞌ tol jaach tiꞌ,

Dios jaach,

ey jaach ecꞌ cu xol,

catuꞌ tol yin jaccombꞌa satil chi yun cu kꞌanabꞌ ja wetoj.

Ey jaach cꞌal ecꞌ xol jun asun eyecꞌ kibꞌan;

yet cꞌualil ey jaach oc xol jun miman bꞌocꞌan asun tuꞌ,

catuꞌ chach bꞌey cꞌaltoj cu sattaj.

Jaxa yet akꞌbꞌalil xin,

xol jun miman kꞌakꞌ ey jaach ocoj,

catuꞌ chach bꞌey cu sattaj jaon ja conobꞌ jon tiꞌ.

15 Ta junelne cha makꞌ cam wan ánima tiꞌ yin junne txolan,

jaꞌ ebꞌ ánima oj abꞌen ja kꞌumal,

miman tzet oj yal ebꞌ ja win.

Oj mi yal ebꞌ jaxca tiꞌ:

16 Jaꞌ Jehová ma skeꞌ yu yiꞌon apnoj ebꞌ ánima bꞌey sat txꞌotxꞌ txꞌotxꞌ bꞌey jix yakꞌ can stiꞌ yakꞌon tet ebꞌ,

yuxan jix makꞌle can cam ebꞌ yu bꞌey txꞌotxꞌ cusiltaj txꞌotxꞌ tiꞌ,

ẍi mi ebꞌ,

oj yalon ebꞌ.

17 Yuxan jaꞌ tinaniꞌ xin,

jaach jin Diosal,

chin oc tean ja win,

chi walon ey jaach tol cha txꞌoxel ja wipalil tinaniꞌ,

jaxca bꞌey jix ja wakꞌcan ja tiꞌ,

yet jix ja walon canoj,

18 tol man comonoj chi tit ja jowal yin eymanil,

yutol ey ja camcꞌulal cꞌal ja mimancꞌulal yibꞌan ebꞌ pena chi yute sbꞌa,

cꞌal ebꞌ pit chi yute snaꞌbꞌal,

caxcꞌal yin cꞌuancꞌulal cha waon oc syaꞌilal yibꞌan mactxequel ey spenail,

cꞌal yibꞌan yuninal ebꞌ cꞌal yitxiquin ebꞌ cꞌal yuninal yitxiquin ebꞌ.

19 Akꞌ wal mimancꞌulal yibꞌan wan ánima tiꞌ,

jatacꞌalaꞌ jantaj yeoc ja miman camcꞌulal yin ebꞌ yet tax cꞌal jix ja wiꞌon eltej ebꞌ bꞌey txꞌotxꞌ Egipto,

masantaꞌcꞌal yet lalan jon ja wiꞌon jul bꞌey txꞌotxꞌ cusiltaj txꞌotxꞌ tiꞌ,

ẍi naj Moisés.

20 Catuꞌ jix takꞌwi Jehová tet naj Moisés jaxca tiꞌ:

—Yun ojabꞌi,

chi wakꞌ mimancꞌulal yibꞌan ebꞌ ánima tiꞌ jaxca ja walon tuꞌ.

21 Caw wal yel iquis jin cꞌal,

caw nonaj el masanil yul yibꞌankꞌinal tiꞌ yu jin tzejejial,

22 jaꞌ ebꞌ jix ilon yin jin tzejejial tiꞌ,

yetoj wan qꞌueyubꞌtaj yili jix jin txꞌox tet ebꞌ bꞌey Egipto,

jix jin txꞌox pax yil ebꞌ bꞌey txꞌotxꞌ cusiltaj txꞌotxꞌ tiꞌ,

ilaꞌ tol laonel xa chin yakꞌ porobꞌal ebꞌ,

catuꞌ cꞌam cꞌal chi sjije niꞌoj ebꞌ tzet chi walaꞌ.

23 Yu jun tuꞌ xin,

chi walon canoj tol cꞌam junoj ebꞌ oj ilon oc yin jun txꞌotxꞌ bꞌey jix wakꞌ jin tiꞌ wakꞌon can tet yichmam ebꞌ.

Cꞌam cꞌal junoj ebꞌ chin intajnen can eloj,

oj yiloc yin jun txꞌotxꞌ txꞌotxꞌ tuꞌ ebꞌ.

24 Asanne naj jin chejabꞌ Caleb,

oj apnoj oc bꞌey sat txꞌotxꞌ txꞌotxꞌ tuꞌ,

yutol jijem cꞌal naj ey jin an,

watxꞌ cꞌal snaꞌbꞌal naj;

jaꞌ oj iꞌon can oc jun txꞌotxꞌ txꞌotxꞌ tuꞌ yetoj ebꞌ yuninal,

jaꞌton txꞌotxꞌ jix bꞌet yilecꞌ tuꞌ.

25 Jaꞌ ebꞌ Amalecita cꞌal ebꞌ Cananeo,

jatuꞌ caan ebꞌ bꞌey spananil txꞌotxꞌ txꞌotxꞌ tuꞌ.

Jal jex jaex tiꞌ xin,

sowalil chex meltzo yet yecal,

txꞌojxa bꞌeal bꞌey chex tita.

Jaxa tuꞌ chex ecꞌ too bꞌey txꞌotxꞌ cusiltaj txꞌotxꞌ yetcꞌulaltoj jaꞌ Cajin Mar,

ẍi Dios.

26 Jix yalon pax Jehová tet naj Moisés cꞌal tet Aarón jaxca tiꞌ:

27 —¿Jantaj tocꞌal tiempoal oj techa wan ánima cꞌam swatxꞌil snaꞌbꞌal tiꞌ wu an?

Jix wabꞌ yalon jin kꞌumal ebꞌ.

28 Asiꞌ,

al tet ebꞌ tol jain chi wal jaxca tiꞌ:

Jain Jehová jin tiꞌ,

chi wakꞌ jin tiꞌ tol oj yun jaxca wal jix yun wabꞌen je yalon tuꞌ.

29 Masanil ebꞌ winaj tol ecꞌbꞌanxa 20 abꞌil skꞌinal,

ebꞌ jix ja wiꞌa slistail,

jaꞌton ebꞌ tuꞌ pena skꞌanabꞌ win,

oj cam ebꞌ catuꞌ oj can kꞌotlabꞌoj smimanil ebꞌ bꞌey txꞌotxꞌ cusiltaj txꞌotxꞌ tiꞌ.

30 Asanne naj Caleb,

scꞌaal Jefuné,

yetoj Josué scꞌaal Nun,

jaꞌ ebꞌ tiꞌ oj skeꞌ yapni oc ebꞌ bꞌey jun txꞌotxꞌ txꞌotxꞌ tuꞌ,

bꞌey jix wakꞌcan jin tiꞌ wakꞌon txꞌotxꞌ ey jex.

Jaxa je masanil jaex tiꞌ,

cꞌam junoj jex oj skeꞌ je yapni oc sat txꞌotxꞌ txꞌotxꞌ tuꞌ,

jaꞌton txꞌotxꞌ walnaj can ey jex.

31 Jaxa pax ebꞌ je yuninal tol jix je yalaꞌ tol oj oc can ebꞌ yul skꞌabꞌ je cajat tuꞌ,

jain oj wiꞌoctoj ebꞌ bꞌey txꞌotxꞌ ma je yoche tuꞌ;

jaꞌ ebꞌ tuꞌ oj yakꞌ tzalabꞌoj scꞌul sat txꞌotxꞌ txꞌotxꞌ tuꞌ.

32 Jal jex jaex tiꞌ xin,

oj can cꞌotlabꞌoj je mimanil bꞌey txꞌotxꞌ cusiltaj txꞌotxꞌ tiꞌ.

33 Jaꞌ ebꞌ je yuninal tiꞌ,

oj ecꞌ ebꞌ teyne meꞌ bꞌey txꞌotxꞌ cusiltaj txꞌotxꞌ tiꞌ yin 40 abꞌil,

jaxca tuꞌ oj yun stoolanen el ebꞌ je penail jix oc jin sattaj,

masantaꞌcꞌal oj lawoj je cam je masanil bꞌey jun txꞌotxꞌ cusiltaj txꞌotxꞌ tiꞌ.

34 Yin cawinaj cꞌu jix yun bꞌet je yilon ecꞌ jun txꞌotxꞌ txꞌotxꞌ tuꞌ tzet wal yili txꞌotxꞌ,

yuxan cawinaj abꞌil oj oc syaꞌtajilal je yibꞌan,

chi yal yeloc apnoj junjun abꞌil yin junjun cꞌu.

Jaxca tuꞌ oj yun je yotajne eloj tol ey sjowal jin cꞌul je yin.

35 Jain Jehová jin chi walaꞌ.

Jaxca tuꞌ oj wute wan ánima tol jix syambꞌa ey sbꞌa yalon pena kꞌane ebꞌ win,

yuxan jaꞌ bꞌey txꞌotxꞌ cusiltaj txꞌotxꞌ tiꞌ oj lawoj scam ebꞌ,

ẍi Dios.

36 Jaꞌ ebꞌ jix bꞌetecꞌ ilon txꞌotxꞌ txꞌotxꞌ tuꞌ yu naj Moisés,

man watxꞌoj jix yun yalon ebꞌ tzet utbꞌil yili oc jun txꞌotxꞌ txꞌotxꞌ tuꞌ,

yuxan yu cꞌal jun tuꞌ,

yuxan jix bꞌuchwa a ebꞌ ánima yin Dios.

37 Jix lawi tuꞌ xin,

jix tit jun syaꞌilal yibꞌan ebꞌ naj ilom txꞌotxꞌ tuꞌ yu Jehová,

yuxan jix cam ebꞌ naj yu slekꞌtiꞌal tuꞌ.

38 Asanxane naj Josué scꞌaal Nun,

yetoj Caleb,

scꞌaal Jefuné,

ma camoj.

39 Jaꞌ yet jix yalon naj Moisés tet ebꞌ Israel,

jaxca tzet jix yun yalon Jehová,

yuxan caw jix cusa scꞌul masanil ebꞌ ánima tuꞌ yet jix yabꞌen oc ebꞌ.

40 Jaxa yet jix sajbꞌi a yet junxa cꞌual,

jix pet a waan ebꞌ,

catuꞌ jix snaꞌon ebꞌ tol chi too yakꞌ jowal ebꞌ yetoj ebꞌ ánima caan bꞌey sjolom jun wonan tuꞌ.

Yuxan jix yal ebꞌ tet naj Moisés jaxca tiꞌ:

—Jaꞌ tinaniꞌ ey jonwej ecꞌ titiꞌ,

toonwej bꞌey sat txꞌotxꞌ txꞌotxꞌ bꞌey jix yakꞌ can stiꞌ Jehová tol oj yakꞌ ey jon tuꞌ.

Yel toni,

jix oc cu penail,

ẍi ebꞌ naj.

41 Jix yalon naj Moisés tet ebꞌ jaxca tiꞌ:

—¿Tzet yuxan chex ecꞌ yibꞌan jaxca tzet jix yal Jehová?

Jaꞌ jun je naꞌbꞌal tuꞌ,

man oj eloc yin watxꞌ.

42 Cꞌam ojabꞌ chex toi,

yutol man eyoj oc Jehová je yetoj.

Oj jex eyqꞌuey yu ebꞌ je cajat tuꞌ.

43 Majbꞌil jex xacꞌal yu ebꞌ Amalecita cꞌal yu ebꞌ Cananeo tuꞌ,

tol oj yakꞌ jowal ebꞌ naj je yetoj,

catuꞌ oj jex smakꞌon cam ebꞌ,

yutol jaex tiꞌ,

jix je yiꞌel je naꞌbꞌal yin Jehová,

yuxan manxa oj colwa Naj je yetoj,

ẍi naj Moisés.

44 Caw ma ẍaꞌ yabꞌ niꞌoj ebꞌ tzet jix yal naj Moisés tuꞌ,

yutol caw pit jix yute sbꞌa ebꞌ,

catuꞌ jix too ebꞌ bꞌey sjolom jun wonan tuꞌ.

Jaxa teꞌ Scaẍail Swa Kꞌane Dios xin,

yetoj naj Moisés,

ey cꞌal can octoj teꞌ bꞌey bꞌulan ecꞌ ebꞌ tuꞌ.

45 Jaxa yet jix too ebꞌ naj tuꞌ xin,

majbꞌil yaapnoj ebꞌ yu ebꞌ Amalecita cꞌal yu ebꞌ Cananeo tuꞌ,

catuꞌ jix yakꞌon jowal ebꞌ.

Jaxa wal jix yun xin,

ma techa yu ebꞌ Israel tuꞌ,

jix ujtele ebꞌ masantaꞌcꞌal jix apni oc ebꞌ bꞌey jun txꞌotxꞌ chi yij Hormá.