2 Al wan tiꞌ tet ebꞌ ja wet Israelal:

Jaꞌ yet oj jex apnoj oc bꞌey jun txꞌotxꞌ txꞌotxꞌ tol oj wakꞌ ey jex yu je caey ecꞌ sat txꞌotxꞌ tuꞌ,

3 che yakꞌwej junoj noꞌ wacax,

ma junoj noꞌ meꞌ,

ma junoj noꞌ chiw yin xaambꞌal jin sattaj an,

yutol caw wal watxꞌ yoc sabꞌ chi wabꞌe,

cꞌal yu je jijen el bꞌey je yakꞌnaj can je tiꞌ je yakꞌoni,

ma tucꞌal chi el yin je cꞌul je yakꞌoni,

ma xin,

yet eyoc junoj kꞌin.

4 Jaꞌ mactxequel chi yakꞌ junoj xaambꞌal tuꞌ ey jin,

sowalil chi yakꞌ cꞌal pax caabꞌoj libra ixim jarina caw wal watxꞌ,

tol calbꞌil yetoj junoj litro aceite olivo.

5 Jaꞌ yetoj wan xaambꞌal chi wal tuꞌ,

che yakꞌ junoj litro an yal uva yin ofrendail yetoj junjun noꞌ achꞌe meꞌ.

6 Ta tol jaꞌ junoj noꞌ icham meꞌ chi akꞌle yin xaambꞌal tuꞌ xin,

ecꞌbꞌan jun litro aceite olivo chi akꞌle yetoj waxajebꞌoj libra ixim jarina caw wal watxꞌ,

yel xacꞌal tol watxꞌ yoc sabꞌ chi wabꞌe;

7 ecꞌbꞌan cꞌal pax jun litro an yal uva che yakꞌ yetoj.

Caw wal watxꞌ yoc sabꞌ jun je yofrenda tuꞌ chi wabꞌe.

8 Ta jaꞌ junoj noꞌ achꞌe wacax tuꞌ che yakꞌ yin xaambꞌal tol chi tzꞌaꞌi,

ma xaambꞌal yet che jije bꞌey je yakꞌnaj can je tiꞌ je yakꞌoni,

ma xaambꞌal yet watxꞌcꞌulal.

9 Sowalil chi akꞌle cꞌal pax lacawebꞌoj libra ixim jarina yetoj caabꞌoj litro aceite olivo,

10 che yakꞌon pax caabꞌoj litro yal uva yin ofrendail.

Jaꞌ jun ofrenda tuꞌ caw watxꞌ yoc sabꞌ chi wabꞌe.

11 Jaꞌ wan tuꞌ sowalil che yakꞌ yetoj junjun noꞌ wacax,

ma yetoj junjun noꞌ icham meꞌ,

ma yetoj junjun noꞌ yuneꞌ meꞌ,

ma yetoj junjun noꞌ yuneꞌ chiw che yakꞌa.

12 Jatacꞌalaꞌ jaycꞌon noꞌ che yakꞌ yin xaambꞌal tuꞌ,

jaxca pax tuꞌ sbꞌisil wanxa ofrenda che yakꞌ tuꞌ.

13 Je masanil jaex Israel jex tiꞌ,

sowalil che jije masanil wan chejbꞌanile tiꞌ yet che yakꞌon tzꞌaꞌ je yofrenda tol watxꞌ yoc sabꞌ chi wabꞌe.

14 Ta ey junoj txꞌoj conobꞌal tucꞌal eyecꞌ je xol,

ma tol junelne caan ecꞌ je yetoj,

ta chi yoche chi yakꞌ tzꞌaꞌ junoj xaambꞌal jin sattaj an,

sowalil chi sjije masanil xolilal jaxca chi yun je jijen jaex tiꞌ.

15 Jaꞌ jun sleyal tiꞌ chi oc yopiso je yu jaex tiꞌ,

cꞌal yu ebꞌ txꞌoj conobꞌal tuꞌ.

Jaꞌ jun ley tiꞌ oj sbꞌeybꞌalne cꞌal ebꞌ je yicꞌaal.

16 Junne jun ley oj je kꞌanbꞌalne jaex tiꞌ,

yetoj cꞌal ebꞌ txꞌoj conobꞌal,

ẍi Dios.

17 Jix yalon pax Jehová tet naj Moisés jaxca tiꞌ:

18 Al masanil wan tiꞌ tet ebꞌ ja wet Israelal:

Jaꞌ yet oj apnoj oc ebꞌ bꞌey txꞌotxꞌ txꞌotxꞌ bꞌey oj wiꞌtoj ebꞌ tuꞌ,

19 oj je yaw ixim tiriw chi yakꞌ sat txꞌotxꞌ txꞌotxꞌ tuꞌ,

catuꞌ sowalil chi spoꞌocan el niꞌoj ixim ebꞌ yin ofrendail yet chi yakꞌon ebꞌ ey jin.

20 Jaxca chi yun je yakꞌon ixim bꞌabꞌel sat tiriw tuꞌ,

quey pax tuꞌ chi yun je yakꞌon jun bꞌabꞌel pan chi waꞌxi yin ixim acꞌ jarina tuꞌ,

yet chi akꞌle yin ofrendail ey jin.

21 Jaꞌ wan ofrenda tuꞌ,

oj je yakꞌ cꞌal ey jin.

22 Tala cꞌuxan chi too qꞌueycꞌulal je yu cꞌal je yunen wan tzetyetal jix wal can tet naj Moisés yet tax sbꞌabꞌelal,

23 naꞌwejtej,

cꞌal je jijen yetoj ebꞌ je yicꞌaal yet bꞌakꞌin,

sowalil oj je jije masanil wan chi wal can ey jex tiꞌ:

24 Ta tol ey junoj chejbꞌanile chi too qꞌueycꞌulal yu masanil ebꞌ conobꞌ tiꞌ,

oj je yakꞌ tzꞌaꞌ junoj noꞌ achꞌe wacax yin xaambꞌalil,

yutol sukꞌukꞌi yoc sabꞌ chi wabꞌe,

yetoj cꞌal ixim tiriw che yakꞌ cꞌaltaꞌ yin ofrendail yetoj xaambꞌal,

jaxca yalon sleyalil.

Txꞌoj pax chi yun je yakꞌon junoj noꞌ icham chiw yin xaambꞌaloj yu yakꞌle tan je penail.

25 Jaꞌ junoj ebꞌ yakꞌomal xaambꞌal chi waꞌnen jun tuꞌ,

jaxca cꞌaltaꞌ yeoc yin xolilal,

yet watxꞌ chi tancan el je penail je yibꞌan.

Oj wakꞌ mimancꞌulal je yibꞌan,

yutol man yin oj je naꞌbꞌal chi tita,

yuxan ma je yunne.

Sowalil che yakꞌ je yofrenda cꞌal je xaambꞌal yu stooloj je penail.

26 Jaꞌ yu je xaambꞌal tuꞌ,

yuxan chi tancan el je penail tuꞌ je yibꞌan jaex Israel jex tiꞌ,

cꞌal ebꞌ txꞌoj conobꞌal eyecꞌ je xol,

yutol je masanil jix oc je penail jin sattaj.

27 Ta ey junoj ánima chi oc spenail,

yutol chi too qꞌueycꞌulal yu,

cꞌal sjijen jun chejbꞌanile tiꞌ,

jaꞌ yu spenail jun mactxequel tuꞌ,

sowalil chi yakꞌ junoj noꞌ kꞌopo chiw jun abꞌil skꞌinal yin xaambꞌaloj yu spenail jix oc tuꞌ.

28 Jaxa junoj ebꞌ yakꞌomal xaambꞌal tuꞌ,

chi aon oc yibꞌan jun yet xaambꞌal tuꞌ jaxca yalon sleyalil,

queytuꞌ chi yun stancan el spenail jun ánima tuꞌ yibꞌan.

29 Jaꞌ jun ley tiꞌ chi oc can yin yopiso je xol jaex Israel jex tiꞌ,

cꞌal yu ebꞌ txꞌoj conobꞌal eyecꞌ je xol,

yet chi oc je penail yin tol man naꞌanoj je yu catuꞌ che yuneni.

30 Ta tol ey junoj mactxequel chi oc spenail,

yin tol yin wal snaꞌbꞌal chi tita catuꞌ chi yuneni,

ta jaex Israelal jex tiꞌ,

ma junoj ebꞌ txꞌoj conobꞌal eyecꞌ je xol,

jaꞌ ey jin chi oc spenail tuꞌ,

yuxan jaꞌ jun ánima tuꞌ sowalil chi qꞌueyle el je xol,

31 yutol chi yintajne el jin chejbꞌanil,

catuꞌ yotaj pax oj,

yu cꞌal tol chi ecꞌ xacꞌal yibꞌan jin chejbꞌanil,

yuxan jacꞌal oc chi sloctej camich yibꞌan,

ẍi Dios.

32 Jaꞌ yet eyecꞌ ebꞌ Israel bꞌey txꞌotxꞌ cusiltaj txꞌotxꞌ,

ey jun naj winaj lalan syambꞌan siꞌ yet scꞌual xewilal.

33 Jaꞌ ebꞌ jix ilon yin jun winaj tuꞌ,

jix iꞌletoj naj sattaj naj Moisés cꞌal sattaj Aarón yu ebꞌ,

cꞌal sattaj masanil ebꞌ conobꞌ.

34 Jix teynele naj yu ebꞌ,

yutol cꞌamto chi yal sbꞌa tzet oj utele naj.

35 Yuxan jix yalon Jehová tet naj Moisés:

Jaꞌ jun winaj tiꞌ sowalil chi cami;

masanil ebꞌ ja wet conobꞌ chi kꞌojchꞌenen cam naj bꞌey stiꞌeltoj bꞌey bꞌulan jex ecꞌ tuꞌ,

ẍi Dios.

36 Yuxan jix iꞌle eltoj naj yu ebꞌ,

bꞌey stiꞌeltoj bꞌey bꞌulan ecꞌ ebꞌ tuꞌ.

Jaꞌ tituꞌ jix kꞌojchꞌennele cam naj yu ebꞌ,

jaxca jix yun yalon Dios tet naj Moisés.

37 Jix yalon Jehová tet naj Moisés jaxca tiꞌ:

38 Al yabꞌ ebꞌ ja wet conobꞌ Israel jaxca tiꞌ:

Jaex tiꞌ,

yetoj cꞌal ebꞌ je yicꞌaal yet bꞌakꞌin,

sowalil tol chi oc yelawil yin xiquinlaj an je pichil.

Jaꞌ wan yelawil je pichil tuꞌ,

che waꞌne oc yetoj an kꞌejweinaj txꞌal.

39 Yuxan jaꞌ yet oj je yilon oc wan yelawil je pichil tuꞌ,

jaxa je naꞌontej masanil wan jin chejbꞌanil jix wal can ey jex.

Che bꞌeybꞌalnewej,

yet watxꞌ man comonoj chex ijbꞌaletoj yin pena bꞌeybꞌale,

ma je yilon oc je cꞌul yetoj je pena ochwanilal yin junoj tzetyetal,

yutol jaꞌ yu wan tuꞌ chi oc je penail jin sattaj.

40 Queytuꞌ oj yun je naꞌontej masanil jin chejbꞌanil tiꞌ,

yet che bꞌeybꞌalne cꞌal je jijeni,

yutol jin conobꞌ che yun can ocoj,

jain xa je Diosal jin.

41 Jain Jehová je Diosal jin tiꞌ,

jain jix jex wiꞌeltej bꞌey txꞌotxꞌ Egipto yet chin oc je Diosaloj.

Jain ton wal Jehová je Diosal jin chi walaꞌ,

ẍi Dios.