—¡Kꞌojbꞌilxa je meynen je bꞌa tiꞌ!

Yutol cu masanil jaon tiꞌ,

yet xa Dios jon cu masanil.

Eyecꞌ Jehová cu xol cu masanil.

¿Tzet yuxan che yaoc je bꞌa yin yaawilal yibꞌan ebꞌ sconobꞌ Dios tiꞌ?

ẍi ebꞌ.

4 Jaꞌ yet jix yabꞌen naj Moisés wan kꞌane tuꞌ,

catuꞌ jix ey noan naj masantaꞌcꞌal jix ey spalan naj sat txꞌotxꞌ.

5 Jix yalon naj Moisés tet Coré cꞌal tet masanil ebꞌ tzajan oc yintaj jaxca tiꞌ:

—Jaꞌ yet skꞌinibꞌ yecal,

catuꞌ chi xꞌoxon Jehová mactxequel ebꞌ yet,

jaꞌton ebꞌ tuꞌ sicꞌbꞌil el yu,

yet chi skeꞌ yoc ebꞌ yin yakꞌon servil bꞌey yet xaambꞌal.

6 Yuxan,

jaꞌ yet skꞌinibꞌ yecal che yiꞌtej je bꞌatxbꞌal stzakꞌakꞌ,

catuꞌ che yaon eytoj stzakꞌakꞌ tuꞌ yul yetoj teꞌ incienso sukꞌukꞌi yoc sabꞌ,

catuꞌ che yaon oc sattaj Jehová.

7 Jaꞌ mactxequel oj sicꞌle el yu Jehová,

jaꞌton ebꞌ tuꞌ oj skeꞌ yoc yin jun opiso tuꞌ,

kꞌojbꞌilxa je meynen je bꞌa jaex Levita jex tiꞌ,

ẍi naj Moisés tet ebꞌ.

8 Jix yalon cꞌal pax naj Moisés tet naj Coré jaxca tiꞌ:

—¡Jex yicꞌaal Leví,

abꞌwej tzet oj wal ey jex!

9 ¿Tumi cꞌam yeloc apnoj yul je sat,

ilaꞌ tol sicꞌbꞌil jex el yu Jehová cu Diosal xol ebꞌ ket conobꞌ Israel,

cꞌal jex yaon oc Naj bꞌey scawilal yu je teynen snail scalubꞌal cꞌal je yakꞌon servil ebꞌ conobꞌ?

10 Yutol jix el yin scꞌul Jehová tol jaex yicꞌaal jex Leví tiꞌ,

chex oc scawilal Naj,

jaxa tinaniꞌ xin,

che yoche xacꞌal chex oc yin yakꞌomal xaambꞌal.

11 Caxcꞌal jaꞌ yin naj Aarón che yal pena kꞌane tiꞌ je naꞌoni,

man jaxca oj tuꞌ,

yutol jaꞌ yin Jehová che yal pena kꞌane yetoj ebꞌ jaꞌjun je yetoj tiꞌ,

ẍi Moisés tet ebꞌ.

12 Jix lawi tuꞌ xin,

jix yaontoj ẍejabꞌ naj Moisés yet chi too awtele naj Datán yetoj Abiram scꞌaal Eliab,

jaxa wal jix yun yalontej ebꞌ naj jaxca tiꞌ:

—Cꞌam chi cu too jon.

13 ¿Ilaꞌ tol caw chi ketne cu cꞌul ja wu jon,

yutol jix jon ja wiꞌeltej bꞌey txꞌotxꞌ Egipto bꞌey txꞌojxa swatxꞌil yili,

bꞌey caw ey loꞌbꞌe.

Jaxa tinaniꞌ tucꞌal chon ja wiꞌtej cam bꞌey jun cusiltaj txꞌotxꞌ tiꞌ,

chi tocꞌal cha woche pax cha wakꞌ yaawilal kibꞌan jon?

14 Jaach tiꞌ,

manaj bꞌey junoj txꞌotxꞌ txꞌotxꞌ caw ey syaaxil sat bꞌey chon ja wiꞌtoj,

cꞌam niꞌoj cu txꞌotxꞌ cha wakꞌa bꞌey chi kaw niꞌoj kuva.

¿Tumi cꞌamxa cꞌal niꞌoj cu naꞌbꞌal cha wilaꞌ?

¿Tumi cꞌam chi skeꞌ kilwan niꞌoj cha wilaꞌ?

Cꞌamaj,

cꞌam cꞌal chi cu too jon,

ẍi ebꞌ naj.

15 Yu jun tuꞌ xin,

jix tit sjowal naj Moisés,

jix yalon tet Jehová jaxca tiꞌ:

—Manche ja chaꞌ yofrenda wan ánima tiꞌ.

Jain tiꞌ,

cꞌam tzet chi wute ebꞌ naj,

cꞌam junoj sbꞌuru ebꞌ naj chin tokꞌecꞌoj,

ẍi naj tet Dios.

16 Jix lawi tuꞌ xin,

jix yalon Moisés tet naj Coré jaxca tiꞌ:

—Jaꞌ yet yecal chach jul sattaj Jehová yetoj ebꞌ jaꞌjun ja wetoj.

17 Junjun mactxequel chi yiꞌtej xayibꞌ chꞌen yet stzakꞌakꞌ,

catuꞌ che yaon eytoj teꞌ incienso sukꞌukꞌi yoc sabꞌ yul,

jacꞌalaꞌ queytuꞌ chi yun cꞌal pax ebꞌ 250 jaꞌjun ja wetoj tiꞌ,

catuꞌ che yakꞌon tzꞌaꞌ sattaj Jehová,

ẍi naj Moisés.

18 Jaxa yet junxa cꞌual tuꞌ,

junjun cꞌal ebꞌ jix yiꞌtoj xayibꞌ chꞌen ebꞌ,

jix yaon eytoj stzakꞌakꞌ ebꞌ yul yetoj teꞌ incienso,

catuꞌ jix syambꞌan oc sbꞌa ebꞌ sattaj naj Moisés cꞌal sattaj naj Aarón bꞌey sattaj jun Kꞌap Na bꞌey chi ẍaꞌle sbꞌa ebꞌ yetoj Dios.

19 Jaxa naj Coré jix syambꞌa oc masanil ebꞌ conobꞌ,

jaꞌton ebꞌ chi jowi oc yin naj Moisés.

Yet wal jun txolan tuꞌ,

catuꞌ jix xꞌoxon a sbꞌa stzejejial Jehová sattaj ebꞌ ánima tuꞌ.

20 Jix yalon Jehová tet naj Moisés cꞌal tet naj Aarón jaxca tiꞌ:

21 —Elanwej xol wan ánima tiꞌ,

yutol oj jin qꞌueyel ebꞌ yet jun txolan tiꞌ,

ẍi Dios.

22 Jix lawi tuꞌ xin,

catuꞌ jix ey noan ebꞌ naj sat txꞌotxꞌ masantaꞌcꞌal jix ey spalan ebꞌ sat txꞌotxꞌ,

jix yalon ebꞌ jaxca tiꞌ:

—Jaach cu Diosal,

jaach tiꞌ cha wakꞌ scawil masanil ebꞌ ánima,

¿tumi oj tit ja jowal yin ebꞌ conobꞌ yu spenail junoj winaj?

ẍi ebꞌ naj.

23 Catuꞌ jix takꞌwi Jehová tet Moisés:

24 —Jaꞌ tinaniꞌ al tet masanil ebꞌ Israelita tiꞌ,

tol chi spoꞌoel sbꞌa ebꞌ masanil yinlaj bꞌey eya skꞌap na naj Coré,

Datán,

cꞌal Abiram,

ẍi Dios.

25 Yuxan yin eyman jix too naj Moisés bꞌey eyecꞌ naj Datán cꞌal Abiram,

jaꞌjun ebꞌ icham winaj yul conobꞌ Israel yetoj.

26 Jix yalon naj tet masanil ebꞌ ánima jaxca tiꞌ:

—Elanwej scawilal skꞌap na wan ánima pena snaꞌbꞌal tiꞌ,

catuꞌ cꞌam cꞌal che mitxꞌ junoj stzetyetal ebꞌ,

jaxa tala chi yunne,

jaex jun chex cam yetoj ebꞌ,

ẍi naj Moisés.

27 Yuxan jix spoꞌoel sbꞌa masanil ebꞌ ánima yinlaj skꞌap na naj Coré,

Datán cꞌal Abiram.

Jaxa naj Datán cꞌal Abiram tuꞌ jix eltej linan ebꞌ bꞌey stiꞌ skꞌap na yetoj yistil cꞌal yuninal junjun ebꞌ.

28 Catuꞌ jix cꞌoli yalon naj Moisés jaxca tiꞌ:

—Jaꞌ tinaniꞌ jaxca tiꞌ oj yun je yotajnen eloj tol jaꞌ Jehová chi chejon wunen masanil wan tiꞌ,

tol man yul oj wet yuxan chi wunne.

29 Ta yaꞌ jolom chi iꞌon cam wan ánima tiꞌ,

jaxca cꞌaltaꞌ chi yun scam ánima,

chi yal yeloc apnoj tol manaj Dios chin aon oc yin jun wopiso tiꞌ.

30 Yuxan,

ta ey junoj tzetyetal tol qꞌueyubꞌtaj oj yun Jehová xin,

ta oj sjaj sbꞌa txꞌotxꞌ txꞌotxꞌ tiꞌ,

catuꞌ yin yiquisal ebꞌ ánima tiꞌ catuꞌ oj bꞌukꞌle eytoj ebꞌ yu txꞌotxꞌ,

yetoj cꞌal masanil stzetyetal ebꞌ,

ta queytuꞌ oj yun ebꞌ,

oj je yotajne eloj tol jaꞌ wan ánima tiꞌ jix intajnen el Dios,

ẍi naj Moisés.

31 Jaꞌ yet jix lawi yalon naj Moisés wan kꞌane tuꞌ,

catuꞌ jix sjajon sbꞌa txꞌotxꞌ txꞌotxꞌ yalan ebꞌ.

32 Catuꞌ jix bꞌukꞌle eytoj ebꞌ ánima tuꞌ yu txꞌotxꞌ,

jaꞌton ebꞌ jix sjunbꞌane ey sbꞌa yetoj naj Coré cꞌal masanil yuninal ebꞌ cꞌal jantaj stzetyetal ebꞌ.

33 Yin yiquisal ebꞌ catuꞌ jix bꞌukꞌle eytoj ebꞌ yu txꞌotxꞌ txꞌotxꞌ tuꞌ,

cꞌal masanil stzetyetal ebꞌ.

Jaxca tuꞌ jix yun sqꞌueyle can el ebꞌ xol ebꞌ yet Israelal.

34 Jaꞌ yet jix yabꞌen ebꞌ conobꞌ yel yaw ebꞌ ánima tuꞌ,

jix el jininoj ebꞌ,

catuꞌ jix yalon ebꞌ:

Man ojabꞌ jaxca tuꞌ chi kun jaon tiꞌ,

ẍi ebꞌ.

35 Jacꞌalaꞌ cꞌal pax oj,

jix yatej Jehová jun kꞌakꞌ yibꞌan ebꞌ 250 tuꞌ,

jaꞌton ebꞌ jix yakꞌ tzꞌaꞌ incienso sattaj Jehová,

jaꞌton ebꞌ jix sjunbꞌane sbꞌa yetoj naj Coré,

Datán cꞌal Abiram.

36 Catuꞌ jix kꞌanabꞌ Jehová tet naj Moisés jaxca tiꞌ:

37 Al tet naj Eleazar,

scꞌaal naj Aarón naj yakꞌomal xaambꞌal,

tol chi yiꞌeltej chꞌen txayibꞌ chꞌen tol bronce cꞌal eloj bꞌey xol ebꞌ jix stzꞌaꞌtoj tuꞌ,

catuꞌ chi secon el jantaj stzakꞌakꞌ ebꞌ eeytoj yul.

38 Jaꞌ wan txayibꞌ chꞌen yet stzakꞌakꞌ ebꞌ ánima tuꞌ,

jaꞌton ebꞌ jix camtoj yu spenail jix oqui,

wet xa chi yun can ocoj,

yutol jix kꞌanle ebꞌ yet jix yakꞌon tzꞌaꞌ incienso ebꞌ ey jin.

Yu tuꞌ xin,

jaꞌ wan mitxꞌkꞌabꞌe tuꞌ che waꞌne oc yin laminail,

catuꞌ chi oc smajiloj jun yet xaambꞌal,

yet watxꞌ chi oc jun tiꞌ txꞌoxbꞌanilal tet ebꞌ je yet Israelal,

catuꞌ chi snaꞌon cꞌaltej ebꞌ jun jix ecꞌ eltoj tiꞌ,

ẍi Dios.

39 Jaxa Eleazar naj yakꞌomal xaambꞌal,

jix syambꞌa a masanil wan txayibꞌ chꞌen tol bronce cꞌal eloj,

wan jix skꞌan ebꞌ jix tzꞌaꞌtoj yu kꞌakꞌ tuꞌ.

Catuꞌ jix yaloni tol chi akꞌle waꞌxoj yin laminail yet chi oc yeneloj jun yet xaambꞌal tuꞌ.

40 Jaꞌ jun tiꞌ,

cuybꞌanile jix yun can oc tet ebꞌ Israel,

cꞌal yotajnen el ebꞌ tol asan ebꞌ yicꞌaal Aarón chi skeꞌ yakꞌon tzꞌaꞌ incienso yibꞌan yet xaambꞌal sattaj Jehová.

Ta ey junojxa comon cꞌal chi yun jaxca tuꞌ,

chi cam jaxca jix yun scam ebꞌ jix oc spenail yetoj naj Coré.

Jaxca jix yun yalon Dios tet naj Moisés,

jaxca wal tuꞌ jix yute naj Eleazar swaꞌneni.

41 Jaꞌ yet junxa cꞌu,

masanil ebꞌ conobꞌ Israel,

jix oc ian yalon pena kꞌane ebꞌ yin naj Moisés cꞌal yin naj Aarón,

jix yalon ebꞌ jaxca tiꞌ:

—Jaex tiꞌ ipan je makꞌon cam ebꞌ sconobꞌ Dios tiꞌ,

ẍi ebꞌ ánima tuꞌ.

42 Masanil ebꞌ ánima tuꞌ,

jix syambꞌa sbꞌa ebꞌ yin naj Moisés cꞌal yin naj Aarón,

catuꞌ jix too tꞌanan ebꞌ yin jun Kꞌap Na bꞌey chi ẍaꞌle sbꞌa ebꞌ yetoj Dios.

Yet wal jun txolan tuꞌ,

catuꞌ jix oc jotan asun yibꞌan jun na tuꞌ,

catuꞌ jix xꞌoxon sbꞌa stzejejial Jehová.

43 Jix lawi tuꞌ xin,

jix too naj Moisés yetoj Aarón bꞌey sattaj jun na bꞌey chi ẍaꞌle sbꞌa ebꞌ yetoj Jehová.

44 Jix yalon Jehová tet naj Moisés jaxca tiꞌ:

45 —¡Elanwej scꞌatan wan ánima tiꞌ,

yutol oj jin qꞌueyel ebꞌ yet jun txolan tiꞌ!

ẍi Dios.

Jaꞌ yet jix yabꞌen naj Moisés yetoj Aarón jaxca tuꞌ,

catuꞌ jix ey noan ebꞌ masantaꞌcꞌal jix ey spalan ebꞌ sat txꞌotxꞌ.

46 Jix yalon naj Moisés tet naj Aarón jaxca tiꞌ:

—Iꞌtej ja txayibꞌ yet stzakꞌakꞌ,

catuꞌ cha wakꞌon no yetoj stzakꞌakꞌ bꞌey sattaj yet xaambꞌal,

catuꞌ cha waon eytoj teꞌ incienso yul,

catuꞌ chach too xol ebꞌ ánima yin eymanil,

yet cha kꞌanon mimancꞌulal yu spenail ebꞌ,

yutol caw jix tit sjowal scꞌul Jehová,

tuxa jix je yilaꞌ tol jix cam ebꞌ ánima.

47 Jaꞌ naj Aarón tuꞌ,

jix sjije tzet jix yal naj Moisés tuꞌ,

yin eymanil jix yun stoo naj bꞌey yaman ecꞌ ebꞌ ánima tuꞌ.

Yutol jaꞌ jun syaꞌilal jix yatej Jehová tuꞌ xax michꞌcha oc scam ebꞌ ánima tuꞌ.

Jaꞌ yet jun txolan tuꞌ,

jix yakꞌon tzꞌaꞌ teꞌ incienso naj Aarón yu skꞌanon mimancꞌulal tet Jehová yu spenail ebꞌ ánima tuꞌ.

48 Jix lawi tuꞌ xin,

catuꞌ jix too naj Aarón xol ebꞌ ánima jix cam yu jun yaꞌbꞌil tuꞌ yetoj cꞌal ebꞌ iquisto,

queytuꞌ jix yun yoc tucan scam ebꞌ ánima tuꞌ.

49 Jaꞌ yet jun txolan tuꞌ xax cam jun 14,700 ebꞌ;

txꞌoj pax yeoc ebꞌ jix camtoj yetoj naj Coré yutol jix tit sjowal ebꞌ yin Moisés cꞌal yin naj Aarón.

50 Jaꞌ yet jix oc tucan scam ebꞌ ánima tuꞌ,

catuꞌ jix meltzotej naj Aarón bꞌey eyecꞌ naj Moisés.