Jaꞌ jun libro tiꞌ, jix tzꞌibꞌelecan yet abꞌil 1445-1405 a.C. Jaꞌ naj Moisés jix tzꞌibꞌencan yet eyecꞌ naj bꞌey txꞌotxꞌ wonan Sinaí.

Jaꞌ jun libro tiꞌ chi alontej yu ebꞌ Levita, jaꞌton ebꞌ yicꞌaal Leví. Jaꞌ ebꞌ ey yalon yet yin wan mulnail bꞌey snail scalubꞌal Jehová yet chi oc eyilal tet Dios. Chi colwa pax ebꞌ yet chi oc ebꞌ ánima yin eyilal tet Dios.

Jaꞌ yul jun libro tiꞌ chi yaltej tzet smoo swaꞌnele bꞌey snail scalubꞌal Jehová, yetoj tzet man smoo oj yiꞌontoj ebꞌ yakꞌomal xaambꞌal sattaj Dios. Chi yalon pax tej tzet chi yun sajbꞌanen sbꞌa ebꞌ ánima. Jaꞌ tzet miman yeloc apnoj yul jun libro tiꞌ, jaꞌton swatxꞌcꞌulal Dios yibꞌan conobꞌ Israel.

Chi yoche Dios tol watxꞌ cꞌal chi yute sbꞌeybꞌal ebꞌ, yet watxꞌ cꞌam spenail chi yun ebꞌ. Chi yalon pax tej jantaj chi yun yakꞌle xaambꞌal yetoj wan ofrenda chi akꞌle tet Dios, jaꞌton wan tiꞌ chi yal bꞌey capítulo 1 masantaꞌ bꞌey capítulo 8.

Jaꞌ bꞌey capítulo 9 yetoj capítulo 10, jaꞌ tituꞌ chi yaltej tzet jix yun yoc yopiso naj Aarón yin yakꞌomaloj xaambꞌal.

Jaꞌ bꞌey capítulo 11 chi apni taꞌcꞌal oc bꞌey capítulo 15, jatuꞌ chi yalaꞌ yu tzetyetal watxꞌ yetoj cꞌal tzetyetal man watxꞌoj. Chi yalon pax tej yu tzet chi yun sajbꞌane sbꞌa ebꞌ ánima yu tzet man watxꞌoj chi el yunen ebꞌ.

Jaꞌ bꞌey capítulo 16 chi yaltej tzet chi yun yakꞌle lawoj spenail. Jal wanxa capítulo yul jun libro tiꞌ, chi yaltej yu wanxa ley tol sowalil chi bꞌeybꞌalnele yetoj wan kꞌin sowalil chi yaoc ebꞌ Israel.

Jaꞌ bꞌey 19:18, jaꞌton jun tiꞌ yalnaj can Jesús bꞌey San Mateo 22:39. Chi yalon jaxca tiꞌ: Ey jun chejbꞌanile tol caw miman yeloc apnoj, tol sowalil chi cu camcꞌulne ebꞌ ket animail.