Números sbꞌi jun libro tiꞌ, jix tzꞌibꞌelecan yet abꞌil 1445-1405 a.C. Jaꞌ naj Moisés jix el yich tzꞌibꞌencan yet eyecꞌ naj bꞌey wonan Sinaí. Jaꞌ yul jun libro tiꞌ chi yaltej yu sbꞌisil ebꞌ conobꞌ Israel yet jix iꞌle eltej ebꞌ bꞌey txꞌotxꞌ Egipto. Ey pax junxa sbꞌisil ebꞌ jix iꞌle a yet abꞌil 38 yet cꞌamto chi apni oc ebꞌ Israel bꞌey txꞌotxꞌ Canaán. Chi yalontej jun libro tiꞌ yu tzet jix el yunen ebꞌ Israel yul cawinaj abꞌil yet eyecꞌ ebꞌ bꞌey txꞌotxꞌ cusiltaj txꞌotxꞌ yet jix eltej ebꞌ yich txꞌotxꞌ miman wonan Sinaí, masantaꞌcꞌal yet jix apni oc ebꞌ bꞌey smoonal txꞌotxꞌ Canaán tol yakꞌ can stiꞌ Dios yakꞌon tet ebꞌ. Jaꞌ yet jix eltej ebꞌ bꞌey yich wonan Sinaí tuꞌ, jix apni oc ebꞌ bꞌey txꞌotxꞌ Quedes-barnea. Tuxa wal chi apni oc ebꞌ bꞌey jun txꞌotxꞌ txꞌotxꞌ tol tꞌinan yakꞌle tet ebꞌ, catuꞌ jix oc spenail ebꞌ sattaj Dios, yu jun tuꞌ, yuxan tucꞌal jix ecꞌ joyoyoj ebꞌ bꞌey txꞌotxꞌ cusiltaj txꞌotxꞌ yul yet Quedes-barnea tuꞌ. Jix lawi tuꞌ xin, jix too ebꞌ bꞌey scꞌaxepal ecꞌtoj jaꞌ Jordán. Ey wan ebꞌ jix caey ecꞌ tituꞌ, jal wanxa ebꞌ xin, jix yakꞌ xacꞌal lista sbꞌa ebꞌ yet chi too ebꞌ bꞌey txꞌotxꞌ Canaán. Jaꞌ yul jun libro tiꞌ chi yaltej skꞌaneal jun conobꞌal ebꞌ ánima tol ey scaabꞌcꞌulal, yel xacꞌal ey xiwcꞌulal yu jantaj syaꞌtajilal jix ẍaꞌle sbꞌa ebꞌ yetoj. Caw miman ebꞌ jix tit sjowal yin Dios cꞌal yin Moisés, jaꞌton naj sicꞌbꞌil el yu Dios yet chi ijbꞌale ebꞌ conobꞌ tuꞌ. Caxcꞌal caw pit jix yute sbꞌa ebꞌ, jacꞌalaꞌ cꞌal yakꞌon swatxꞌcꞌulal Dios yibꞌan ebꞌ, teynebꞌil cꞌal ebꞌ yu. Chi yalon pax tej jun libro tiꞌ tol caw ey smimancꞌulal naj Moisés, yutol jaꞌ Dios chi yakꞌ servil.