2 Al wan tiꞌ tet ebꞌ ja wet Israelal:

Ta ey junoj mactxequel chi yakꞌ stiꞌ yakꞌon stooloj junoj ánima ey jin,

chi skeꞌ smanon eloj,

jaxca ojabꞌ yalon xolilal tiꞌ.

3 Jaꞌ junoj winaj ey 20 abꞌil skꞌinal,

masantaꞌcꞌal yin 60 abꞌil,

jaꞌ ebꞌ tuꞌ sowalil chi akꞌle 50 siclo chꞌen tumin plata yin smanle eloj,

jatacꞌalaꞌ echbꞌal chi kꞌanbꞌalnele bꞌey snail jin calubꞌal.

4 Ta tol ix,

asan 30 siclo chꞌen tumin plata chi akꞌle yin.

5 Jaxa pax yu ebꞌ eyoc yin joebꞌ abꞌil skꞌinal,

masantaꞌcꞌal yin 20 abꞌil skꞌinal xin,

ta winaj,

20 siclo chꞌen tumin chi akꞌle.

Ta ix,

asanne 10 siclo chꞌen tumin plata chi akꞌle yin.

6 Jaxa yu ebꞌ unin tol jun xꞌaaw skꞌinal,

masantaꞌcꞌal yin joebꞌ abꞌil,

jaꞌ ebꞌ winaj,

joebꞌ siclo chꞌen tumin plata chi akꞌle yin,

jaxa ebꞌ ix unin,

oxebꞌ siclo chꞌen chi akꞌle yin.

7 Jal pax yu ebꞌ icham ánima ecꞌbꞌanxa yin 60 abꞌil skꞌinal xin,

jaꞌ yin ebꞌ winaj,

15 siclo chꞌen plata chi akꞌle yin;

jal ebꞌ ix ix,

10 siclo chꞌen chi akꞌle yin ebꞌ.

8 Ta tol ey junoj ánima yel xacꞌal mebꞌa xin,

cꞌam chi skeꞌ yakꞌon jaxca sbꞌisil chꞌen tol chi akꞌle tuꞌ,

chi iꞌletej ebꞌ sattaj ebꞌ yakꞌomal xaambꞌal,

catuꞌ chi naꞌle jantaj wal chi skeꞌ yakꞌon ebꞌ.

9 Jal pax yu noꞌ noꞌ tol chi akꞌle cꞌaltaꞌ yin xaambꞌaloj ey jin,

jaꞌ masanil noꞌ tol chi akꞌle ey jin tuꞌ,

txequel ojabꞌ chi yun can noꞌ.

10 Cꞌam chi skeꞌ sqꞌuexle noꞌ yetoj junojxa noꞌ,

caxcꞌal watxꞌ noꞌ,

ma pena yili noꞌ.

Ta tol chi qꞌuexle noꞌ xin,

jaꞌ noꞌ qꞌuexele tuꞌ,

chi akꞌle noꞌ yetoj noꞌ txequel xacꞌaltaꞌ yeoc tuꞌ.

11 Jal pax junoj noꞌ tol man watxꞌoj cꞌaltaꞌ yoc yin xaambꞌal ey jin,

jaꞌ noꞌ tuꞌ chi iꞌletej noꞌ sattaj junoj ebꞌ yakꞌomal xaambꞌal,

12 yet watxꞌ chi naꞌle jantaj stool noꞌ,

jatacꞌalaꞌ tzet yili noꞌ.

Jatacꞌalaꞌ jantaj stool noꞌ jix naꞌle yu jun yakꞌomal xaambꞌal tuꞌ,

jaxca cꞌal tuꞌ chi yij stool noꞌ yet chi txonle el noꞌ,

yet watxꞌ chabꞌil stool noꞌ noꞌ tuꞌ wu an.

13 Ta jaꞌ mac ey yet noꞌ noꞌ tuꞌ chi yoche chi sman pax ecꞌoj,

sowalil chi yakꞌ junxa yet sjoꞌ tujan yibꞌan stool noꞌ tol naꞌbꞌilxa tuꞌ.

14 Ta ey mactxequel chi yakꞌ junoj sna ey jin,

ta watxꞌ scawxi,

ma pena wal yili,

jaꞌ junoj ebꞌ yakꞌomal xaambꞌal chi naꞌoni jantaj wal stool;

queytuꞌ chi yun yoc can stool tuꞌ yin junelne.

15 Ta jaꞌ jun mactxequel ey yet jun na tuꞌ chi yoche chi smanecꞌ junelxa,

sowalil chi yakꞌ junxa yet sjoꞌ tujan yibꞌan stool albꞌilxa tuꞌ,

catuꞌ chi yiꞌon pax oc sna jun mactxequel tuꞌ junelxa.

16 Ta ey mactxequel chi yakꞌ junoj tujan xꞌotxꞌ ey jin,

chi naꞌle jantaj stool txꞌotxꞌ txꞌotxꞌ tuꞌ,

jatacꞌalaꞌ jantaj jinat chi awle ey sat txꞌotxꞌ.

Ta tol bꞌalonebꞌ arroba ixim cebada chi awle ey sat txꞌotxꞌ,

50 siclo chꞌen tumin plata stool txꞌotxꞌ.

17 Ta tol chi akꞌle txꞌotxꞌ txꞌotxꞌ tuꞌ yul abꞌil yet chi jajle el junoj tzetyetal,

chi can xacꞌal can stool txꞌotxꞌ,

jaxca cꞌal jix yun snaꞌle tuꞌ.

18 Ta jaꞌ yet xax ecꞌtoj jun abꞌil yet chi jajle el junoj tzetyetal,

catuꞌ chi akꞌle txꞌotxꞌ ey jin,

jaꞌ jun yakꞌomal xaambꞌal tuꞌ chi skeꞌ snaꞌoni jantaj chꞌen tumin plata chi skeꞌ yakꞌle yin.

Chi iꞌle eytej niꞌojxa stool,

jatacꞌalaꞌ jayebꞌto abꞌil yet chi eyol abꞌil yet chi jajle el junoj tzetyetal.

19 Ta jaꞌ jun mactxequel chi yakꞌ xꞌotxꞌ tuꞌ ey jin,

catuꞌ ta chi yoche pax chi smanecꞌ junelxa,

sowalil chi yakꞌ junxa yet sjoꞌ tujan yibꞌan stool naꞌbꞌilxa tuꞌ.

Catuꞌ chi skeꞌ yiꞌon pax oc xꞌotxꞌ tuꞌ junelxa.

20 Ta cꞌam chi sman pax ecꞌ xin,

ma tol chi xontoj tet junojxa ánima,

ta jaxca tuꞌ,

cꞌamxa chi skeꞌ smanon ecꞌ junelxa.

21 Jaꞌ yet chi colcha el txꞌotxꞌ txꞌotxꞌ tuꞌ yet chi jajcha el junoj tzetyetal,

jaꞌ jun txꞌotxꞌ tuꞌ,

wet chi yun can ocoj,

jaxa ebꞌ yakꞌomal xaambꞌal chi iꞌon can ocoj.

22 Ta ey mactxequel chi el yin scꞌul yakꞌon smanbꞌeal txꞌotxꞌ ey jin jain Jehová jin tiꞌ,

ta manaj smam xutx akꞌnen tet,

23 jaꞌ junoj ebꞌ yakꞌomal xaambꞌal chi naꞌon stool yetoj jun mactxequel tuꞌ,

masantaꞌcꞌal yet chi jul jun abꞌil yet chi jajle el junoj tzetyetal.

Jaꞌ yet jun cꞌual tuꞌ chi yakꞌ stool txꞌotxꞌ jun mactxequel tuꞌ,

jatacꞌalaꞌ jantaj jix yun snaꞌlei,

wet chi yun can oc chꞌen tumin tuꞌ.

24 Jaxa yet abꞌil yet chi jajle el junoj tzetyetal,

chi meltzo pax txꞌotxꞌ tet jun chi txonon el tuꞌ,

chi yal yeloc apnoj jaꞌton tet jun mactxequel ey cꞌaltaꞌ yet txꞌotxꞌ txꞌotxꞌ tuꞌ yet yalantoj.

25 Jaꞌ masanil stool junoj tzetyetal chi snaꞌ ebꞌ yakꞌomal xaambꞌal tuꞌ,

jaꞌ chꞌen tumin chi kꞌanbꞌalnele bꞌey snail jin calubꞌal tuꞌ chi kꞌanle 20 gera,^a

chi yal yeloc apnoj jun siclo chꞌen tumin plata tuꞌ.

26 Jaꞌ noꞌ bꞌabꞌel yuneꞌ je wacax,

noꞌ meꞌ,

cꞌal noꞌ chiw,

wet cꞌaltaꞌ yeoc noꞌ jain Jehová jin tiꞌ,

yuxan cꞌam mactxequel chi skeꞌ yaloni tol cꞌam chi yakꞌ cꞌaltaꞌ noꞌ yin ofrendail ey jin.

27 Ta jaꞌ sbꞌabꞌel yuneꞌ junoj noꞌ tol man cꞌaltaꞌ watxꞌoj jatacꞌalaꞌ yalon ley,

chi skeꞌ smanon pax ecꞌoj,

jatacꞌalaꞌ jantaj stool noꞌ jix naꞌlei,

catuꞌ chi akꞌle junojxa yet sjoꞌ tujan yibꞌan stool noꞌ noꞌ tuꞌ.

Ta tol manaj jun ey yet tuꞌ chi manon ecꞌoj,

jaxca cꞌal stool tol naꞌbꞌilxa tuꞌ queytuꞌ chi yun xonle el noꞌ yu ebꞌ yakꞌomal xaambꞌal tuꞌ.

28 Jaꞌ mactxequel chi akꞌon junoj tzetyetal yin junelne ey jin,

jain Jehová jin tiꞌ,

yal cꞌal tzetyetal,

ta junoj ánima,

ma junoj jobꞌbꞌeal noꞌ,

ma junoj txꞌotxꞌ tol akꞌbꞌil can tet yu smam xutx,

jaꞌ wan tuꞌ chi akꞌle can ey jin,

cꞌam chi skeꞌ xonle eloj,

cꞌam pax chi skeꞌ smanon ecꞌ jun mactxequel chi akꞌon tuꞌ.

29 Jal pax junoj ánima tol tꞌinan xacꞌal yoc camich yibꞌan cꞌam chi skeꞌ smanle eloj.

Jaꞌ jun tuꞌ sowalil chi cami.

30 Jal jun yet slaonebꞌ tujan sat awo chi yakꞌ txꞌotxꞌ txꞌotxꞌ,

wet cꞌaltaꞌ chi yun yakꞌlei.

31 Ta ey junoj mactxequel chi yoche chi manon el jun yet slaonebꞌ tujan tuꞌ,

sowalil chi yakꞌ junojxa yet sjoꞌ tujan yibꞌan stool tuꞌ.

32 Ta ey laoncꞌon noꞌ wacax,

ma noꞌ meꞌ,

ma noꞌ chiw,

jaꞌ yin noꞌ tuꞌ chi iꞌle el junoj noꞌ yin sdiezmoal chi akꞌle ey jin.

33 Cꞌam chi skeꞌ sicꞌle el noꞌ,

cꞌam pax chi skeꞌ sqꞌuexle ecꞌ noꞌ yetoj junojxa noꞌ txꞌoj yili.

Ta tol ey mactxequel chi yoche chi qꞌuexon ecꞌ noꞌ xin,

jaꞌ noꞌ bꞌabꞌel tuꞌ,

cꞌal yetoj noꞌ chi akꞌle yin sqꞌuexel noꞌ tuꞌ,

chi can xacꞌal can noꞌ scacꞌonal.

Cꞌam cꞌal pax chi skeꞌ smanle ecꞌ noꞌ,

ẍi Jehová tet naj Moisés.

34 Jaꞌ wan chejbꞌanile tiꞌ jix yal can Jehová tet naj Moisés,

yet eyecꞌ naj bꞌey sjolom wonan Sinaí,

yet chi oc scuybꞌaniloj ebꞌ conobꞌ Israel.