Cꞌam ojabꞌ che waꞌne a junoj echele je diosaloj.

Cꞌam ojabꞌ che waꞌne a chꞌen chꞌen bꞌey eyoc yechel wan comon dios.

Cꞌam ojabꞌ che latzꞌbꞌa a chꞌen chꞌen je diosaloj,

cꞌam ojabꞌ chex ey noan yin eyilal tet,

yutol jain Jehová je Diosal jin chi walaꞌ.

2 Jijewej scꞌual xewilal,

ey ojabꞌ yeloc apnoj yul je sat.

Miman ojabꞌ yeloc apnoj snail jin calubꞌal yul je sat,

tol jain caw Jehová jin chi walaꞌ.

3 Ta oj je bꞌeybꞌalne catuꞌ che jijen jin chejbꞌanil tiꞌ,

4 ta jaxca tuꞌ,

oj waeytej nabꞌ yin stiempoal,

catuꞌ oj yakꞌon sat je yawo sat je txꞌotxꞌ,

catuꞌ oj yakꞌon cꞌal pax sat teꞌ teꞌ.

5 Lalantocꞌal yoc kꞌupo tiriw je yu,

catuꞌ stiempoal xa pax yoc uxo uva.

Lalantocꞌal yoc uxo uva je yu,

catuꞌ chi jul pax stiempoal yawle ixim tiriw junelxa,

yuxan caw watxꞌ oj yun je lowi,

tzalacꞌulal cꞌal oj yun je caey ecꞌ yul je conobꞌ.

6 Oj wakꞌon jin watxꞌcꞌulal ey jex bꞌey yul je conobꞌ tiꞌ.

Oj jex wey yin tzalacꞌulal,

cꞌam mactxequel oj jex xibꞌtenoj.

Oj jex jin colel tet noꞌ xol-laj teꞌal noꞌ ey smey,

cꞌal yul skꞌabꞌ jowal.

7 Oj el ebꞌ je cajat ey jex;

oj jex tzajlo yintaj ebꞌ,

catuꞌ oj eyqꞌuey ebꞌ je yu yetoj chꞌen je yespada.

8 Jaꞌ jowanoj jex,

oj ela junoj 100 ebꞌ ey jex.

Jaꞌ junoj 100 jex,

oj ela 10,000 ebꞌ ey jex.

Jaꞌ ebꞌ je cajat tuꞌ,

oj eyqꞌuey ebꞌ je yu yetoj chꞌen je yespada.

9 Caw wal oj jex jin camcꞌulne,

oj wakꞌon cꞌal jin watxꞌcꞌulal ey jex.

Caw oj wiꞌa can je bꞌisil,

catuꞌ oj eloc jaxca bꞌey jix wakꞌcan jin tiꞌ ey jex.

10 Lalantocꞌal je loꞌon ixim tiriw jix je yambꞌa a yet tax junabꞌi,

tucꞌal oj toj je bꞌoscan el ixim yet oj je latzꞌon pax can ixim acꞌ tiriw junelxa.

11 Oj jin eecꞌal ecꞌ je yetoj,

cꞌam cꞌal bꞌey oj jex wintajne eloj.

12 Oj jin eecꞌal ecꞌ je xol jain je Diosal jin tiꞌ,

jal jex jaex tiꞌ,

oj jex oc jin conobꞌoj.

13 Jain Jehová je Diosal jin chi walaꞌ,

jain jix jex wiꞌeltej bꞌey txꞌotxꞌ Egipto,

yet watxꞌ cꞌam cꞌal chex cancan yin akꞌo servilal tituꞌ.

Jain jix wiꞌel jun mulnail caw yaꞌtaj eyoc je yibꞌan.

Yuxan manxa noanoj jex eyoj chex eqꞌui.

14 Ta tol man oj je jije tzet chi wal can ey jex tiꞌ,

catuꞌ man oj je bꞌeybꞌalne jin chejbꞌanil,

15 ta oj je yintajne el tzet chi walaꞌ,

catuꞌ man oj je jije wan jin chejbꞌanil tiꞌ,

catuꞌ oj je yetnentoj jun bꞌey jix wakꞌcan jin tiꞌ ey jex,

16 jain tiꞌ,

ey cꞌal pax tzet oj jex wute.

Oj watoj xiwcꞌulal je yibꞌan,

oj watoj jow yaꞌ jolom je yibꞌan,

oj watoj kꞌakꞌ yaꞌbꞌil je yibꞌan,

cꞌal yaꞌ sat,

catuꞌ oj pax yip je mimanil.

Naꞌbꞌa xacꞌal oj je yaw je yawo,

yutol jaꞌ ebꞌ je cajat oj loꞌon eytoj sat je yawo tuꞌ.

17 Jain tiꞌ oj jex jin bꞌejcanoj,

catuꞌ oj jex eyqꞌuey yul skꞌabꞌ ebꞌ je cajat tuꞌ.

Oj jex can yalan yu ebꞌ.

Tuxa cꞌal oj jex el ecꞌoj,

caxcꞌal cꞌam mactxequel oj jex ujten ecꞌoj.

18 Ta cꞌam cꞌal che jije jin chejbꞌanil tiꞌ,

ta cꞌam cꞌal che jije tzet chi walaꞌ,

oj waoc syaꞌilal je yibꞌan,

ta jaxca tuꞌ oj waoc jujebꞌojxa tujan syaꞌilal je yibꞌan yu je penail tuꞌ.

19 Cꞌamxa niꞌoj je yeloc apnoj yu je meynebꞌail tuꞌ.

Manxa oj yakꞌ nabꞌ yibꞌan je txꞌotxꞌ,

oj cawbꞌoj el sat txꞌotxꞌ txꞌotxꞌ jaxca junoj chꞌen chꞌen.

20 Naꞌbꞌa xacꞌal oj je yetne je cꞌul yin je mulnail,

cꞌamxa tzet oj yakꞌ sat txꞌotxꞌ txꞌotxꞌ,

manxa oj yakꞌ sat teꞌ awbꞌeal teꞌ.

21 Ta jacꞌalaꞌ pit che yute je bꞌa ey jin,

ta man cꞌal oj je jije tzet chi walaꞌ,

ta jaxca tuꞌ oj wa cꞌal oj jujebꞌojxa tujan syaꞌilal je yibꞌan yu je penail tuꞌ.

22 Oj watoj noꞌ xol-laj teꞌal noꞌ tol ey smey,

oj chiꞌle eytoj ebꞌ je yuninal yu noꞌ,

cꞌal ẍiꞌle eytoj noꞌ je jobꞌbꞌeal noꞌ,

jaxa yeytej je bꞌisil tuꞌ,

yuxan cꞌamxa mactxequel oj ecꞌabꞌ bꞌey yul-laj bꞌe.

23 Ta jaꞌ yu wan tuꞌ man cꞌal oj snaꞌ sbꞌa je cꞌul,

ta jacꞌalaꞌ pit oj je yute je bꞌa ey jin an,

24 jain xa oj wakꞌ jowbꞌoj syaꞌilal je xol,

ta jaxca tuꞌ oj wa cꞌal oc jujebꞌojxa tujan jun syaꞌilal tiꞌ je yibꞌan yu je penail tuꞌ.

25 Oj watoj jowal je xol,

yu jin pajtzen ey jex,

yu cꞌal tol cꞌam che jije jun bꞌey wakꞌnaj can jin tiꞌ ey jex.

Tuxa cꞌal oj jex el jininoj je colon je bꞌa yul je conobꞌ,

jaꞌ tituꞌ oj watoj jow syaꞌilal je yibꞌan,

queytuꞌ oj yun je yeyqꞌuey yu ebꞌ je cajat.

26 Jaꞌ yet tuꞌ,

oj wakꞌ lawoj a je loꞌbꞌe,

ey ojabꞌ laonwan ebꞌ ix ix,

junne chi swaꞌne loꞌbꞌe stiꞌ junoj kꞌakꞌ.

Yin xacꞌal yechel oj yun yecꞌ je loꞌbꞌe tuꞌ je yin.

Oj jex lowoj,

manxa pax oj no je cꞌul.

27 Ta man cꞌal oj snaꞌ sbꞌa je cꞌul yu wan tuꞌ,

ta pit cꞌal oj je yute je bꞌa,

28 jacꞌalaꞌ oj watoj sjowal jin cꞌul je yibꞌan,

ta jaxca tuꞌ oj wa cꞌal oc jujebꞌojxa tujan jun syaꞌilal tiꞌ je yibꞌan,

yu je penail tuꞌ.

29 Jaꞌton wal yet tuꞌ bꞌian,

oj je chiꞌon eytoj ebꞌ je cꞌaal cꞌal ebꞌ je cutzꞌin yu wail.

30 Oj jin makꞌon poꞌo wan je diosal bꞌey che yiꞌey je bꞌa,

oj jin makꞌon poꞌo jun yet je xaambꞌal yet teꞌ incienso.

Tuxa cꞌal oj jin yambꞌa oc bꞌulan je mimanil yibꞌan wan je diosal man iquis oj tuꞌ,

yutol cꞌamxa chex woche.

31 Tuxa cꞌal oj wuchcantoj je conobꞌ,

cꞌal snail je diosal tuꞌ.

Cꞌamxa cꞌal yopiso wan je xaambꞌal tol sukꞌukꞌi yoc sabꞌ tuꞌ wu an.

32 Oj wakꞌ lawoj ey je conobꞌ tuꞌ,

jaxa ebꞌ je cajat tuꞌ oj caey ecꞌoj.

Tuxa cꞌal oj qꞌueycan a scꞌul ebꞌ je cajat tuꞌ.

33 Catuꞌ oj jex wakꞌon sajlemtoj xol masanil nación,

tol tzajan chꞌen wespada je yintaj.

Jaꞌ je nación tuꞌ,

tzꞌinini xacꞌal oj yun canoj,

cusiltaj txꞌotxꞌ xacꞌal oj yun canoj,

caw xiwcꞌulal xacꞌal oj yun yuchle ey je conobꞌ tuꞌ.

34 Queytuꞌ oj yun scancan txꞌotxꞌ je txꞌotxꞌ xꞌojli yin masanil tiempo yet ey jexto ecꞌ bꞌey wan nacionlaj tuꞌ.

35 Queytuꞌ oj yun xew txꞌotxꞌ je txꞌotxꞌ tuꞌ,

jaxca stiempoal yet tol ma xew txꞌotxꞌ je yu yet yalantoj,

yet caan jex ecꞌ tituꞌ.

36 Jaꞌ ebꞌ je yicꞌaal iquisto ecꞌ bꞌey xꞌotxꞌ ebꞌ chi jowi oc je yin tuꞌ,

jain oj watoj junoj xiwcꞌulal yin ebꞌ.

Tuxa cꞌal oj el jininoj ebꞌ naj yet oj yabꞌen ebꞌ yeyqꞌuey kꞌotna junoj xaj teꞌ.

Comon xacꞌal oj el jininoj ebꞌ jaxca xacꞌal tol ey junoj mactxequel tzajan oc yintaj ebꞌ yetoj espada.

Tuxa cꞌal oj telcꞌotoj ebꞌ,

cꞌam pax mactxequel tzajan oc yintaj ebꞌ.

37 Tuxa cꞌal oj stenle telcꞌotoj sbꞌa junjun ebꞌ jaxca xacꞌal tol jowal eyocoj,

caxcꞌal cꞌam mactxequel chi ujten ebꞌ.

Cꞌamxa cꞌal junoj ebꞌ oj stecꞌbꞌa sbꞌa sattaj junoj jowal.

38 Oj lawoj ey ebꞌ xol-laj wanxa nacionlaj tuꞌ,

jaxca tol jaꞌ xꞌotxꞌal ebꞌ chi jowi oc je yin tuꞌ oj qꞌueyon el ebꞌ.

39 Jaxa ebꞌ je yicꞌaal chi to cancan bꞌey sat xꞌotxꞌ ebꞌ chi jowi oc je yin tuꞌ,

jaꞌ tituꞌ oj cam xacꞌal ebꞌ yu spenail,

cꞌal yu spenail yichmam ebꞌ.

40 Yutol jix oc spenail ebꞌ ey jin,

yu jun tuꞌ oj waoc cajlebꞌail xol ebꞌ,

catuꞌ oj waon cantoj ebꞌ bꞌey sconobꞌ ebꞌ chi jowi oc yin ebꞌ tuꞌ,

yutol jix oc spenail ebꞌ jin sattaj,

41 ta jaꞌ yet tuꞌ oj snaꞌ sbꞌa scꞌul ebꞌ je yicꞌaal tuꞌ yu jantaj bꞌey pit jix yute sbꞌa ebꞌ ey jin,

catuꞌ oj yiꞌon ey sbꞌa ebꞌ jin sattaj yet oj yalon atej spenail ebꞌ cꞌal je penail jaex tiꞌ,

42 catuꞌ oj jin naꞌontej jin kꞌane bꞌey jix wakꞌcan jin tiꞌ tet Jacob,

tet Isaac,

cꞌal tet Abraham,

catuꞌ oj jin naꞌontej yin wakꞌon pax txꞌotxꞌ txꞌotxꞌ tet ebꞌ.

43 Caxcꞌal mi jaꞌ yet yalantoj tuꞌ elnaj ebꞌ bꞌey sconobꞌ,

cannaj can tzꞌinan xꞌotxꞌ ebꞌ yu,

yutol chi xew txꞌotxꞌ yet cꞌam ebꞌ eyecꞌ sat txꞌotxꞌ tuꞌ,

caw oj yabꞌ syaꞌil ebꞌ yu stoolanen el spenail ebꞌ,

yu cꞌal tol jix je yintajne el jin ley cꞌal jin chejbꞌanil.

44 Caxcꞌal mi jaxca tuꞌ oj jex wute,

jaxa yet eyecꞌ ebꞌ je yicꞌaal bꞌey xꞌotxꞌ ebꞌ chi jowi oc yin ebꞌ tuꞌ,

man oj wintajne el ebꞌ,

man cꞌal oj jin chaꞌ qꞌueyle el ebꞌ.

Man oj ecꞌ jin kꞌane bꞌey jix wakꞌcan jin tiꞌ yetoj ebꞌ,

yutol jain Jehová je Diosal jin,

chi walaꞌ.

45 Yu swatxꞌiloj ebꞌ,

catuꞌ oj jin naꞌtej jin wa kꞌane jix jin waꞌne can je yetoj yet jix jex wiꞌon eltej bꞌey txꞌotxꞌ Egipto.

Sattaj wal wanxa nacionlaj jix jex wiꞌon eltej,

yet watxꞌ chin oc je Diosaloj.

Jain ton Jehová jin chi walaꞌ.

46 Jaꞌton wan ley tiꞌ,

yetoj chejbꞌanile cꞌal cuybꞌanile jix yal can Jehová tet naj Moisés yet eyecꞌ naj sjolom wonan Sinaí,

yet chi oc scuybꞌaniloj ebꞌ conobꞌ Israel.