Sicꞌbꞌil El Ebꞌ Israel Yet Chi Oc Ebꞌ Sconobꞌoj Jehová
7
Jix yalon pax naj Moisés jaxca tiꞌ:
Jaꞌ Jehová cu Diosal,
oj jex iꞌon apnoj bꞌey txꞌotxꞌ txꞌotxꞌ tol oj yakꞌ ey jex,
jaꞌton bꞌey jix yakꞌ can stiꞌ yakꞌon can ey jex,
jaꞌ oj iꞌon el jujebꞌ mimej nación je sattaj,
jaꞌton ebꞌ Heteo,
ebꞌ Gergeseo,
ebꞌ Amorreo,
ebꞌ Cananeo,
ebꞌ Ferezeo,
ebꞌ Heveo cꞌal ebꞌ Jebuseo.
2 Jaꞌ yet oj ale oc wan nación tuꞌ yul je kꞌabꞌ yu Jehová,
oj je yakꞌ qꞌueyel masanil ebꞌ,
cꞌam ojabꞌ che waꞌne junoj je wa kꞌane yetoj ebꞌ,
tam wal yokꞌ je cꞌul yin ebꞌ.
3 Cꞌam ojabꞌ chex nupi yetoj ebꞌ,
cꞌam ojabꞌ pax che yakꞌ nupoj ebꞌ ix je cutzꞌin yetoj scꞌaal ebꞌ,
tam wal scutzꞌin ebꞌ chi nupi yetoj ebꞌ je cꞌaal,
4 jaxa tala chi yunne,
chi ijbꞌaletoj ebꞌ naj je cꞌaal cꞌal ebꞌ ix je cutzꞌin yintaj sdiosal ebꞌ tuꞌ,
catuꞌ chi oc ebꞌ yin eyilal tet,
jaxa tala chi yunne oj tit sjowal scꞌul Jehová je yin,
catuꞌ chex qꞌueyle el yin eymanil yu Naj.
5 Masanil wan comon dios bꞌey chi yiꞌey sbꞌa ebꞌ,
che qꞌueywej eloj,
cꞌal bꞌey chi yakꞌ xaambꞌal ebꞌ,
cꞌal chꞌen chꞌen cꞌal teꞌ teꞌ bꞌey chi oc ebꞌ yin eyilal.
Masanil wan tuꞌ che nus can tzꞌaꞌoj.
6 Yutol jaon tiꞌ,
sconobꞌ jon Jehová,
sicꞌbꞌil jon eltej yu xol wan mimej conobꞌlaj bꞌey sat txꞌotxꞌ txꞌotxꞌ tiꞌ,
yet watxꞌ sconobꞌ Dios keocoj.
Jaꞌ Tzet Sowalil Chi Yun Ebꞌ Israel
7 Jaꞌcaw Jehová jix el yin scꞌul,
jix jex sicꞌle yu,
yu xꞌoxon miman scamcꞌulal je yin,
man yu oj tol mimej conobꞌ je yeocoj,
man yu oj tol yel xacꞌal watxꞌ jex yintaj wanojxa conobꞌ,
yuxan jix yun jaxca tuꞌ,
ilaꞌ tol jaywanne jex yintaj wanojxa conobꞌlaj tuꞌ.
8 Yutol caw ey scamcꞌulal Jehová je yin,
yuxan chi yakꞌ eloc bꞌey yakꞌnaj can stiꞌ tet ebꞌ cu mam icham,
yuxan jix jex yiꞌeltej bꞌey txꞌotxꞌ Egipto bꞌey ey jex oc yin yakꞌomaloj servil.
9 Otajnewej el sicꞌlebꞌil tol jaꞌ Jehová cu Diosal,
asanne Naj yel chi yalaꞌ.
Chi eloc tzet chi yal Naj tet ebꞌ chi camcꞌulnen Naj,
cꞌal sjijen ẍejbꞌanil.
Caw ey scamcꞌulal Naj yin ebꞌ,
cꞌal yin yicꞌaal ebꞌ yet oj bꞌey cꞌaltoj.
10 Catuꞌ chi spajtzen tet ebꞌ chi jowi oc yin Naj;
tol tꞌinan cꞌal sqꞌueyle el ebꞌ yu Naj.
11 Yu tuꞌ xin,
jijewej cꞌal masanil chejbꞌanile tiꞌ cꞌal cuybꞌanile chi wal can ey jex yet jun cꞌu tiꞌ.
Chi Spajtze Jehová Tet Ebꞌ Jijem
12 Ta jaex tiꞌ,
caw yel che bꞌeybꞌalne masanil wan chejbꞌanile tiꞌ,
catuꞌ che jijeni,
jaꞌ Jehová cu Diosal,
oj yun cꞌal tzet bꞌey jix yakꞌ can stiꞌ je yetoj,
catuꞌ oj xꞌoxon scamcꞌulal je yin,
jaxca jix yun yalon can tet ebꞌ kichmam.
13 Oj jex camcꞌulnele yu Naj,
catuꞌ oj yakꞌon syaaxilal je yibꞌan,
oj yakꞌon chꞌibꞌ je bꞌisil.
Oj yakꞌon syaaxilal yibꞌan ebꞌ je yuninal cꞌal masanil tzet ey,
ey jex;
yibꞌan je tiriw,
je yal uva,
teꞌ je yolivo,
je wacax,
cꞌal yibꞌan noꞌ je meꞌ,
jaꞌton bꞌey txꞌotxꞌ txꞌotxꞌ bꞌey jix yakꞌ can stiꞌ Dios yakꞌon tet ebꞌ kichmam.
14 Caw ey swatxꞌcꞌulal Naj je yibꞌan yintaj masanil wanojxa conobꞌ.
Cꞌam junoj ix ix tol cꞌam yuneꞌ je xol,
tam wal junoj winaj tol cꞌam yuninal bꞌey yul je conobꞌ tiꞌ,
tam wal junoj je jobꞌbꞌeal noꞌ tol man oj uneꞌwoj.
15 Jaꞌ Jehová oj jex colon el tet syaꞌilal jaxca wan syaꞌilal jix je yil yet jix jex ecꞌ bꞌey Egipto.
Jal pax ebꞌ chi jowi oc je yin xin,
oj ale oc syaꞌilal yibꞌan ebꞌ yu Jehová.
16 Yuxan sowalil tol oj je qꞌueyel masanil wan conobꞌ tuꞌ.
Jaꞌ Jehová cu Diosal,
oj aon oc ebꞌ yul je kꞌabꞌ,
cꞌam ojabꞌ chi okꞌ je cꞌul yin ebꞌ,
tam wal je yiꞌon ey je bꞌa tet sdiosal ebꞌ,
ta cꞌam che jije,
oj jex eyqꞌuey yu ebꞌ.
17 Ta che naꞌ yin je naꞌbꞌal:
Jaꞌ wan nación tiꞌ caw wal miman yipal ebꞌ ey jon,
¿tzet wal oj yun kakꞌon eyqꞌuey wan conobꞌ tiꞌ bꞌey sat txꞌotxꞌ txꞌotxꞌ tiꞌ?
ta je chi.
18 ¡Cꞌam ojabꞌ chex xiw tet ebꞌ ánima tuꞌ!
Naꞌwejtej tzet jix yun Jehová yin ebꞌ ánima bꞌey Egipto yetoj sreyal.
19 Naꞌwejtej masanil wan syaꞌilal,
cꞌal wan tzet qꞌueyubꞌtaj xacꞌal yili,
yetoj wan milagro,
cꞌal yipal Jehová jix xꞌox bꞌey Egipto yet jix cu yiꞌon eltej tituꞌ.
Jaxca tuꞌ oj yun Naj yin wan conobꞌ bꞌey chex xiw tet tuꞌ.
20 Jaꞌ Jehová oj aontoj jun miman xiwcꞌulal xol ebꞌ,
masantaꞌcꞌal oj qꞌueyel masanil ebꞌ oj cancanoj,
cꞌal ebꞌ oj yewbꞌa el sbꞌa ey jex.
21 Yuxan cꞌam ojabꞌ chex xiw tet ebꞌ ánima tuꞌ,
yutol jaꞌ Jehová cu Diosal eyecꞌ je yetoj,
yutol caw ey smey,
catuꞌ caw miman yeloc apnoj Naj.
22 Jaꞌ Naj oj iꞌon el wan nacionlaj tiꞌ je sattaj yin cꞌuancꞌulal.
Man junne tiempoal oj yun je qꞌueyon el ebꞌ,
yet watxꞌ cꞌam chi a can noꞌ chiꞌwawom noꞌ,
ta cꞌamaj oj jex chiꞌle pax yu noꞌ.
23 Jaꞌ Jehová cu Diosal,
jaꞌ oj aon oc ebꞌ ánima tuꞌ yul je kꞌabꞌ,
catuꞌ oj oc ebꞌ yin xiwcꞌulal masantaꞌcꞌal chi qꞌueyel ebꞌ je yu.
24 Jaꞌ Naj oj aon oc sreyal ebꞌ yul je kꞌabꞌ,
catuꞌ oj je qꞌueyon can el ebꞌ,
cꞌamxa bꞌey oj bꞌina ecꞌ ebꞌ yul yibꞌankꞌinal tiꞌ.
Cꞌamxa mactxequel oj skeꞌ stecꞌbꞌan sbꞌa je sattaj,
yutol oj lawoj el ebꞌ je yu.
25 Che nus can tzꞌaꞌ sdiosal ebꞌ.
Cꞌam ojabꞌ che yoche oc chꞌen plata cꞌal chꞌen oro eyoc yin,
cꞌam ojabꞌ che yiꞌtoj,
yet watxꞌ cꞌam chex eyqꞌueyi yu wan tzetyetal eyoc yin wan echele tuꞌ,
tam wal je yetnentoj je bꞌa,
yutol jaꞌ wan tuꞌ chi tit sjowal Jehová cu Diosal yin.
26 Yuxan cꞌam ojabꞌ junoj tzetyetal tol yaabꞌetaj yili yul sat Jehová che yiꞌtoj bꞌey je na,
yet watxꞌ cꞌam chex qꞌueyle pax el yu Naj,
yutol jaꞌ masanil wan tuꞌ oj qꞌueyle el yu Naj,
yuxan sowalil che yaacan el jaex tiꞌ.