7 Jaꞌ Jehová oj akꞌon eyqꞌuey ebꞌ je cajat yul je kꞌabꞌ yet oj oc ebꞌ yakꞌon jowal je yetoj.

Caxcꞌal txololi xacꞌal chi yun stit ebꞌ je yin,

jaxa yet oj ela ebꞌ je yujteni sajleminaj xacꞌal oj yun yel ebꞌ ey jex.

8 Jaꞌ Jehová cu Diosal,

oj yakꞌ syaaxilal yibꞌan je cꞌunaꞌ,

cꞌal yibꞌan masanil tzet oj je yunne.

Jaxca wal tuꞌ oj yun je caey ecꞌ yin tzalacꞌulal bꞌey jun conobꞌ oj akꞌle ey jex yu tuꞌ.

9 Ta oj je jije masanil ẍejbꞌanil Naj,

cꞌal je yoc tzajan yintaj,

jaꞌ Jehová cu Diosal,

oj jex yal cꞌal oc sconobꞌoj,

yutol sicꞌbꞌil jex el yu jaxca jix yun yalon canoj.

10 Masanil conobꞌlaj bꞌey yul yibꞌankꞌinal tiꞌ oj yotajne el ebꞌ tol sicꞌbꞌil jex el yu Jehová,

yutol caw che yiꞌa can sbꞌi,

yuxan caw oj xiw ebꞌ ey jex.

11 Oj xꞌox wal scamcꞌulal Naj ey jex:

Caw oj chꞌibꞌ sbꞌisil je yuninal,

caw oj chꞌibꞌ sbꞌisil yuneꞌ noꞌ je jobꞌbꞌeal noꞌ,

caw miman sat je yawo oj je yiꞌ bꞌey sat txꞌotxꞌ txꞌotxꞌ tol jix yakꞌ can stiꞌ Naj tet ebꞌ kichmam tol oj yakꞌ ey jex.

12 Oj yakꞌ masanil sbꞌeomal Naj ey jex,

oj tit cꞌal nabꞌ bꞌey satcan catuꞌ oj eyqꞌuey yibꞌan txꞌotxꞌ txꞌotxꞌ tiꞌ yin stiempoal,

jatacꞌalaꞌ jantaj chi oc yopiso je yu.

Caw wal watxꞌ xacꞌal oj yun masanil je mulnail.

Caw wal oj chꞌibꞌ sbꞌisil masanil tzetyetal ey yul je kꞌabꞌ,

tol oj skeꞌ je yakꞌon maanil tet wanojxa nación.

Jal jex jaex tiꞌ,

cꞌam bꞌey oj je maane junoj tzetyetal tet junojxa mactxequel.

13 Ta tol oj je jije masanil ẍejbꞌanil Jehová cu Diosal,

jaꞌton masanil wan chi wal can ey jex tinaniꞌ,

oj jex yaoc Naj yin sattaj oj,

catuꞌ man yintajiloj je yun canoj.

Caw miman oj yun je yeloc apnoj yibꞌan wanojxa nación,

cꞌam bꞌakꞌin oj jex can yintajiloj.

14 Queytuꞌ oj yun je yeloc apnoj ta cꞌam che yiꞌel je naꞌbꞌal yin wan cuybꞌanile tiꞌ,

cꞌam ojabꞌ chex oc tzajan yintaj comon dios,

cꞌam ojabꞌ chex oc yin eyilal tet wan tuꞌ.

15 Ta man oj je jije masanil wan chejbꞌanile tiꞌ,

jaꞌton sley Jehová cu Diosal,

wan lalan walon can ey jex tinaniꞌ,

ta jaxca tuꞌ oj jul wan syaꞌtajilal je yibꞌan:

16 Caw wal cꞌam niꞌoj syaaxilal Dios oj je chaꞌ bꞌey yul je conobꞌ,

cꞌal yin je mulnail.

17 Cꞌam syaaxilal yul je xuc,

cꞌal bꞌey chi cal-le a ixim jarina.

18 Cꞌam syaaxilal yibꞌan ebꞌ je yuninal,

cꞌam swatxꞌil oj yun sat je yawo.

Cꞌam pax syaaxilal yibꞌan noꞌ yuneꞌ je wacax,

cꞌal yetoj yuneꞌ je meꞌ,

yetoj cꞌal yibꞌan masanil noꞌ je jobꞌbꞌeal noꞌ.

19 Cꞌam syaaxilal je yibꞌan yet chex eltoj yul-laj bꞌe cꞌal yet chex pax tej bꞌey je na.

20 Jaꞌ Jehová cu Diosal,

oj yatej syaꞌtajilal,

somcꞌulal cꞌal bꞌiscꞌulal je yibꞌan.

Tuxa cꞌal oj jex somcha el yin masanil tzetyetal oj je yunne.

Yin txenne tiempoal,

catuꞌ oj jex qꞌueyle el je masanil,

yu cꞌal tol jix je bꞌejcan cu Diosal yu je pena bꞌeybꞌal.

21 Jaꞌ Naj oj aontej junoj syaꞌilal caw jow je yibꞌan.

Jaꞌ oj jex qꞌueyon el bꞌey sat txꞌotxꞌ txꞌotxꞌ bꞌey oj jex caey ecꞌ tuꞌ.

22 Oj ya cꞌal pax tej wan syaꞌilal Naj je xol.

Ey syaꞌilal tol chex bꞌajbꞌitoj yu,

ey kꞌakꞌ yaꞌbꞌil caw jow,

ey pax yaꞌbꞌil tol oj mala je mimanil yu,

catuꞌ oj yaontej waresma Naj caw wal jow,

oj tajtoj je yawo yu.

Manxa oj yakꞌ nabꞌ,

tuxa cꞌal oj tajeloj.

Oj low tzꞌabꞌ yin,

masantaꞌcꞌal oj jex lawoj el yu.

23 Manxa oj yakꞌ nabꞌ je yibꞌan.

Jaxa txꞌotxꞌ txꞌotxꞌ tiꞌ manxa oj yakꞌ sat je yawo sat txꞌotxꞌ.

24 Cꞌamxa nabꞌ oj eyqꞌueyoj.

Jaxa pojoj,

cꞌal arena oj eytej je yibꞌan yu Jehová cu Diosal,

masantaꞌcꞌal oj jex lawoj el yu.

25 Jaꞌ Naj oj jex akꞌon eyqꞌuey yul skꞌabꞌ ebꞌ je cajat.

Caxcꞌal txololi xacꞌal oj yun je too yin ebꞌ je cajat tuꞌ,

jaxa oj yun xin,

sajleminaj xacꞌal oj yun je yel tet ebꞌ.

Tuxa cꞌal oj xiwa wanojxa nación bꞌey yul yibꞌankꞌinal tiꞌ,

yet oj yilon ebꞌ je yeyqꞌueyi.

26 Jaxa noꞌ miij,

cꞌal noꞌ xol-laj teꞌal noꞌ oj chiꞌontoj je mimanil camnajxa tuꞌ.

Cꞌam mac oj xibꞌten el noꞌ je yin.

27 Jaꞌcaw Jehová oj akꞌon kꞌaꞌtoj je mimanil yu yaꞌbꞌil tol cꞌamxa yanil,

caw oj je yabꞌ syaꞌil yu,

jaxca wal jix yun ebꞌ a Egipto.

Oj elol malilal yaꞌbꞌil je yin,

oj pitzcꞌu a snoꞌal je mimanil cꞌal cꞌajach yaꞌbꞌil je yin,

catuꞌ manxa oj ancha jun yaꞌbꞌil tuꞌ.

28 Yetoj cꞌal pax oj,

oj oc joybꞌinaj sat je yin,

oj somcha el je cꞌul,

manxa oj skeꞌ je yilwani.

29 Tuxa cꞌal oj jex ecꞌ matxatxoj yet cꞌualil,

jaxca chi yun yecꞌ matxatxoj ebꞌ cꞌam cꞌaltaꞌ chi skeꞌ yilwani.

Jaxa yin masanil tzet oj je yunne,

manxa oj eloc yin watxꞌ.

Caw wal oj jex etex eloj;

okꞌbꞌalcꞌule xacꞌal oj je yunne.

Cꞌamxa cꞌal junoj mactxequel oj jex colonoj.

30 Oj je yakꞌ je tiꞌ je nupi yetoj junoj ix ix,

txꞌojxa pax junoj winaj oj wey yetoj ix ix cha woche oc tuꞌ.

Oj je waꞌne a junoj je na,

manxa oj jex caey ecꞌ yul.

Oj je yaw junoj je yuva,

manxa oj je loꞌ pax sat.

31 Je sattaj wal catuꞌ oj smakꞌon cam je wacax ebꞌ,

catuꞌ man oj je chiꞌ niꞌoj ẍiꞌbꞌeal noꞌ tuꞌ.

Je sattaj wal oj yiꞌontoj noꞌ je bꞌuru ebꞌ,

manxa oj yakꞌ meltzo ebꞌ ey jex junelxa.

Oj iꞌletoj noꞌ je meꞌ yu ebꞌ je cajat,

cꞌamxa mactxequel oj to skeꞌ scolon el noꞌ tet ebꞌ.

32 Je sattaj wal oj aletoj ebꞌ je cꞌaal,

cꞌal ebꞌ ix je cutzꞌin yul skꞌabꞌ ebꞌ txꞌoj conobꞌal.

Caw wal oj jex cꞌuumbꞌoj a je majon sjul ebꞌ,

cꞌamxa tzet oj skeꞌ je yuneni.

33 Masanil jantaj sat je yawo,

cꞌal jantaj je mulnail oj sloꞌeytoj wan ánima man otajbꞌiloj je yu tuꞌ,

jal jex jaex tiꞌ,

caw wal oj jex etex oj,

caw okꞌbꞌalcꞌule oj je yunne.

34 Jaꞌ yet oj je yilon masanil wan tuꞌ,

tuxa cꞌal oj a joyna je sat.

35 Oj je yabꞌ wal syaꞌil yu Jehová,

yu wan yaax yaꞌbꞌil oj a yin sjolom je penec,

cꞌal yinlaj je xubꞌ,

cꞌal yin masanil je mimanil.

Manxa oj ancha wan syaꞌilal tuꞌ.

36 Jaꞌ Dios oj jex yakꞌ iꞌletoj yetoj naj je reyal sicꞌbꞌil oc je yu,

oj jex iꞌletoj bꞌey junojxa nación tol man je yotaj oj jaex tiꞌ,

man pax yotaj oj ebꞌ je yichmam.

Jaꞌ tituꞌ oj je yakꞌ servil wan comon dios,

tol waꞌnebꞌil yetoj teꞌ ma yetoj chꞌen chꞌen.

37 Caw oj qꞌueya scꞌul wanojxa nación je yin.

Tuxa cꞌal oj yal je kꞌumal ebꞌ cꞌal je bꞌuchle yu wan conobꞌ bꞌey oj jex iꞌletoj yu Jehová tuꞌ.

38 Caw wal miman jinat oj je yawaꞌ,

catuꞌ txenne pax chꞌan sat je yawo tuꞌ oj je yambꞌa aoj,

jaxa cꞌal noꞌ kochiꞌ noꞌ oj etnen eloj.

39 Oj je yaw je yuva,

catuꞌ oj je teyneni,

catuꞌ man oj je yambꞌa el sat je yuva tuꞌ,

man oj je yucꞌ yal je yuva tuꞌ;

yutol jaxa cꞌal snoꞌal sat txꞌotxꞌ txꞌotxꞌ tuꞌ oj qꞌueyon eloj.

40 Ey teꞌ olivo bꞌey sat je txꞌotxꞌ,

manxa pax oj je bꞌon je bꞌa yetoj yaceiteal teꞌ,

yutol tucꞌal oj pujel sat teꞌ je yolivo tuꞌ.

41 Jaꞌ ebꞌ je cꞌaal,

cꞌal ebꞌ je cutzꞌin,

manxa oj eyecꞌ ebꞌ je yetoj,

yutol oj iꞌletoj ebꞌ yin yakꞌomaloj servil bꞌey wanojxa txꞌoj conobꞌal.

42 Masanil teꞌ teꞌ chi yakꞌ sat bꞌey sat je txꞌotxꞌ tuꞌ,

pilan oj lawoj el teꞌ yu noꞌ kochiꞌ noꞌ.

43 Jaꞌ ebꞌ txꞌoj conobꞌal caan ecꞌ je xol,

yel xacꞌal oj chꞌibꞌ sbꞌeomal ebꞌ,

jal jex jaex tiꞌ xin,

oj lawoj ey je bꞌeomal tuꞌ,

catuꞌ oj jex can yin mebꞌail.

44 Jaꞌ ebꞌ tuꞌ ey tzetyetal oj skeꞌ yakꞌon ebꞌ yin maanil,

jal jex jaex tiꞌ,

cꞌamxa tzetyetal oj skeꞌ je yakꞌon yin maanil.

Caw miman oj yun yeloc apnoj ebꞌ,

jal jex jaex tiꞌ xin,

cꞌamxa cꞌal niꞌoj je yeloc apnoj yintaj ebꞌ.

45 Masanil wan syaꞌtajilal tiꞌ oj jul je yibꞌan.

Oj oc xacꞌal ian je yin masantaꞌcꞌal oj jex qꞌueyle el yu,

yu cꞌal tol ma je jije masanil ẍejbꞌanil,

cꞌal sley Jehová cu Diosal jix yalcanoj.

46 Jaꞌ wan syaꞌilal tiꞌ,

jaꞌ chi txꞌoxon el sjowal scꞌul Dios je yin jaex tiꞌ,

cꞌal yin ebꞌ je yicꞌaal yin junelne.

47 Yutol ma je yakꞌ servil Jehová cu Diosal yin tzalacꞌulal cꞌal yin masanil je cꞌul,

caxcꞌal ecꞌalxa tzetyetal watxꞌ jix yakꞌ Naj ey jex,

48 yu tuꞌ xin,

sowalil oj je yakꞌ servil ebꞌ je cajat,

yuxan jaꞌ Jehová oj yatej wan syaꞌilal tuꞌ je yibꞌan,

jaꞌton:

Wail,

tajin tiꞌal,

catuꞌ oj lawoj el je pichil,

cꞌamxa niꞌoj tzetyetal oj can ey jex.

Jaꞌ Jehová oj jex yaoc yin syaꞌilal cꞌal yin yakꞌomaloj servil,

masantaꞌcꞌal oj jex qꞌueyle eloj.

49 Jaꞌ junoj nación caw naat yeel je yin,

jaꞌ ebꞌ oj iꞌletej yu Dios yet chi oc ebꞌ je cajatoj,

caw yin eymanil oj yun stit ebꞌ je yin,

jaxca wal sbꞌey noꞌ chii.

Txꞌoj yel stiꞌ jun nación tuꞌ,

man oj je yabꞌ tzet oj yal ebꞌ.

50 Caw wal akꞌom jowal ebꞌ.

Cꞌam yeloc apnoj ebꞌ icham ánima yul sat ebꞌ,

cꞌam pax yeloc apnoj ebꞌ unin yul sat ebꞌ.

51 Oj ẍiꞌeytoj yuneꞌ je jobꞌbꞌeal noꞌ ebꞌ,

cꞌal sloꞌon eytoj sat je yawo ebꞌ,

caw wal oj jex etex yu ebꞌ.

Cꞌamxa cꞌal je tiriw,

cꞌal je yuva,

je yaceite,

tam wal yuneꞌ noꞌ je wacax,

cꞌal noꞌ yuneꞌ je meꞌ oj to can yu ebꞌ,

asan tol oj jex cam yu wail.

52 Tuxa cꞌal oj oc joyan ebꞌ je cajat tuꞌ yinlaj je conobꞌ,

catuꞌ oj jul ebꞌ je yin,

masantaꞌcꞌal oj eyqꞌuey bꞌulna smuroal tol naat eyaoj,

cꞌal je cuartel tol eyoc yipoj je cꞌul.

Oj oc joyan ebꞌ yinlaj je conobꞌ tuꞌ,

catuꞌ oj jex qꞌueyle el yu ebꞌ bꞌey je conobꞌ jix yakꞌ Jehová cu Diosal ey jex.

53 Jaꞌ yet oj oc xacꞌal joyan ebꞌ je cajat tuꞌ yin je conobꞌ tuꞌ,

jaxa yu wail oj je chiꞌon eytoj ebꞌ je cꞌaal,

cꞌal ebꞌ je cutzꞌin oj yakꞌ Jehová cu Diosal.

54 Caxcꞌal ey junoj winaj je xol caw wal watxꞌ snaꞌbꞌal,

yetoj junoj naj caw ey smey,

pena xacꞌal oj yute sat naj yin yuẍtaj,

cꞌal yin yistil tol camcꞌulnebꞌil yu,

cꞌal yin ebꞌ je yuninal oj to cancanoj.

55 Manxa oj yakꞌ niꞌoj ẍiꞌbꞌeal yuninal ebꞌ tuꞌ tet wanojxa,

yutol cꞌamxa tzet watxꞌ sloꞌon ebꞌ ánima yet eyecꞌ ebꞌ je cajat tuꞌ yakꞌon jowal je yetoj.

Jaꞌton wal jun miman cuscꞌulal tiꞌ oj jul yul je conobꞌ yu ebꞌ je cajat tuꞌ.

56 Quey cꞌal pax tuꞌ oj yun junoj ix ix caw wal watxꞌ snaꞌbꞌal je xol tuꞌ,

ix caw bꞌeom,

tam wal chi yoche ix chi yaey yajan sat txꞌotxꞌ,

yet cꞌam xanabꞌ ix eyocoj,

caw pena xacꞌal oj yute sat ix yin yichamil tol camcꞌulnebꞌil yu,

cꞌal yin yuneꞌ.

57 Tol manxa oj yakꞌ niꞌoj yuneꞌ ix lalanto yali ẍiꞌ ebꞌ,

ma smoo yuneꞌ tuꞌ tet ebꞌ.

Masanil wan tuꞌ,

yin xacꞌal ewantajil oj yun ẍiꞌon eytoj ix,

yutol cꞌamxa tzet chi sloꞌ ix yet eyecꞌ ebꞌ je cajat tuꞌ yakꞌon jowal yinlaj je conobꞌ tuꞌ.

58 Ta man oj je jije cꞌal je bꞌeybꞌalne masanil wan chejbꞌanile tzꞌibꞌebꞌil ey yul jun libro tiꞌ,

catuꞌ ta tol cꞌam yeloc apnoj Jehová cu Diosal yul je sat,

Naj tol miman yeloc apnoj,

tol qꞌueyubꞌtaj yoc sbꞌi,

caw ey smey,

jaꞌton Naj cu Diosal.

59 Oj yatej mimej syaꞌilal Naj je yibꞌan,

cꞌal yibꞌan ebꞌ je yicꞌaal.

Jaꞌ wan syaꞌilal yel xacꞌal jow oj yatej je yibꞌan tol cꞌamxa chi anchai.

60 Oj tit wan syaꞌilal tuꞌ je yibꞌan,

jaxca wal wan syaꞌilal jix oc yibꞌan ebꞌ a Egipto,

jaꞌton wan bꞌey caw jix jex xiw yu;

man xacꞌal oj el wan syaꞌilal tuꞌ je yibꞌan.

61 Eyto cꞌal wanojxa syaꞌilal tol cꞌamxa chi bꞌina bꞌey yul jun libro yet cuybꞌanile tiꞌ,

jaꞌton wanojxa tuꞌ oj yatej Jehová je yibꞌan yu jex yakꞌon qꞌueyle eloj.

62 Jal jex jaex Israel jex tiꞌ,

tol caw mimanxa je bꞌisil jaxca weycan bꞌey satcan,

caw oj jex qꞌueyle eloj.

Cꞌamxa txꞌial oj yun can je bꞌisil,

yu cꞌal tol ma je jije ẍejbꞌanil Jehová cu Diosal.

63 Jaxca wal jix yun stzala scꞌul Naj je yin yet jix yakꞌon chꞌibꞌ je bꞌisil;

queytuꞌ oj yun stzala pax scꞌul yet oj jex etex oj,

cꞌal je qꞌueyle eloj.

Yin xacꞌal eymanil oj yun je yiꞌle el bꞌey jun nación bꞌey tuxa oj jex apnoj oc caan tuꞌ.

64 Jaꞌ Jehová oj jex akꞌon sajlemtoj bꞌey xol-laj wanojxa nación,

masantaꞌcꞌal bꞌey chi apni oc slawubꞌal txꞌotxꞌ txꞌotxꞌ yul yibꞌankꞌinal tiꞌ.

Jaꞌ tituꞌ oj jex oc yin eyilal tet comon dios,

jaꞌton wan dios waꞌnebꞌil yetoj teꞌ ma chꞌen,

tol man je yotaj oj jaex tiꞌ,

tam wal ebꞌ kichmam jix otajnen eloj.

65 Jaꞌ yet oj jex iꞌletoj bꞌey wan nación tuꞌ,

cꞌam bꞌey oj jex xew niꞌoj,

yutol jaꞌ Jehová oj jex aon oc yin xiwcꞌulal.

Cusiltaj xacꞌal yili oc je sat yu bꞌiscꞌulal.

66 Xiwcꞌulal xacꞌal je yeoc masanil tiempo.

Oj jex xiw yet cꞌualil,

cꞌal yet akꞌbꞌalil.

Cꞌam bꞌakꞌin oj jex eecꞌ yin tzalacꞌulal.

67 Caw miman xiwcꞌulal oj jul je yin.

Caw wal eyxa smey tzetyetal oj je yilaꞌ.

Jaꞌ yet skꞌinibꞌalil oj je yal jaxca tiꞌ:

Eyman ojabꞌ wal chi kꞌejbꞌi eyoj,

je chi.

Jaxa yet akꞌbꞌalil xin,

oj je yalon pax oj:

Eyman ojabꞌ wal chi sajbꞌi eloj,

je chi.

68 Caxcꞌal jix yal Jehová,

tol cꞌam chex meltzo junelxa bꞌey sbꞌeal txꞌotxꞌ Egipto,

jacꞌaltaꞌ Naj oj jex chejontoj junelxa yul teꞌ barco.

Oj je txonon el je bꞌa yin yakꞌomaloj servilal tet ebꞌ je cajat tuꞌ,

cꞌamxa pax mactxequel oj jex manon eloj,

ẍi naj Moisés tet ebꞌ.