Deuteronomio 27

Chꞌen Chꞌen Bꞌey Tzꞌibꞌebꞌilcan Oc Wan Chejbꞌanile Bꞌey Yich Txꞌotxꞌ Wonan Ebal

Jaꞌ naj Moisés yetoj ebꞌ icham winaj yeoc yul conobꞌ jix yal wan chejbꞌanile tiꞌ tet masanil ebꞌ conobꞌ:

Jaꞌ tinaniꞌ xin,

oj je jije masanil ẍejbꞌanil Dios chi wal can ey jex tinaniꞌ.

2 Jaꞌ yet oj jex kꞌaxbꞌo ecꞌtoj bꞌey jaꞌ Jordán,

yet oj jex apnoj oc sat txꞌotxꞌ txꞌotxꞌ oj yakꞌ Jehová cu Diosal tuꞌ ey jex,

oj je waꞌne a latzꞌan wanoj chꞌen mimej chꞌen,

catuꞌ oj je bꞌonon yetoj chꞌen taan,

3 catuꞌ oj je tzꞌibꞌen oc masanil wan chejbꞌanile tiꞌ yin chꞌen.

Queytuꞌ oj je yunne yet oj jex apnoj oc bꞌey jun txꞌotxꞌ txꞌotxꞌ tol caw yaax sat tuꞌ.

Jaꞌton bꞌey txꞌotxꞌ oj yakꞌ Jehová cu Diosal ey jex tuꞌ,

jaxca wal jix yun yakꞌon can stiꞌ tet ebꞌ kichmam.

4 Jaꞌ yet xax jex kꞌaxbꞌo ecꞌtoj bꞌey jaꞌ Jordán tuꞌ,

oj je waꞌne a chꞌen chꞌen jix wal ey jex tuꞌ bꞌey wonan Ebal,

catuꞌ oj je yaon oc chꞌen taan yin chꞌen.

5 Sowalil oj je waꞌne cꞌal pax a junoj yet xaambꞌal tet Jehová cu Diosal.

6 Jaꞌ chꞌen chꞌen oj je yaoc yin tuꞌ,

man oj josle chꞌen.

Yutol jaꞌ yibꞌan chꞌen oj je yakꞌ tzꞌaꞌ je xaambꞌal tet Jehová cu Diosal.

7 Catuꞌ che yakꞌon cꞌal pax je xaambꞌal yet watxꞌcꞌulal.

Jaꞌ tituꞌ oj je yaoc junoj kꞌin,

oj jex low yin tzalacꞌulal sattaj Naj.

8 Jaꞌ yin chꞌen chꞌen tuꞌ,

watxꞌ ojabꞌ chi yun stzꞌibꞌele oc masanil wan chejbꞌanile chi wal can ey jex tiꞌ,

ẍi naj Moisés tet ebꞌ.

9 Jix lawi tuꞌ xin,

jix kꞌanabꞌ naj Moisés tet ebꞌ yet conobꞌ,

jaꞌjun masanil ebꞌ yakꞌomal xaambꞌal yetoj naj,

jaꞌton ebꞌ yicꞌaal Leví.

Jix yalon tet ebꞌ Israel jaxca tiꞌ:

Jex wet Israelal,

tzꞌin ojabꞌ je chi,

abꞌwej tzet oj walaꞌ:

Jaꞌ tinaniꞌ tuxa jix jex oc sconobꞌoj Jehová cu Diosal.

10 Yu tuꞌ xin,

yelcꞌulal ojabꞌ che jijewej cꞌal je bꞌeybꞌalnen wan ẍejbꞌanil cꞌal wan sley Dios chi wal can el ey jex tiꞌ,

ẍi naj Moisés tet ebꞌ.

Jaꞌ Wan Syaꞌtajilal Jix Al-le Can Bꞌey Yich Txꞌotxꞌ Wonan Ebal

11 Jaꞌ yet jun cꞌual tuꞌ,

jix yal wan chejbꞌanile naj Moisés tet ebꞌ conobꞌ Israel:

12 Jaꞌ yet oj jex kꞌaxbꞌo ecꞌtoj bꞌey jaꞌ Jordán,

jaꞌ ebꞌ yicꞌaal Simeón,

Leví,

Judá,

Isacar,

José cꞌal Benjamín,

jaꞌ tituꞌ oj ey bꞌulan ebꞌ bꞌey yich txꞌotxꞌ wonan Guerizim,

yet watxꞌ chi yal watxꞌ kꞌane ebꞌ yibꞌan ebꞌ conobꞌ.

13 Jaxa pax ebꞌ yicꞌaal Rubén,

Gad,

Aser,

Zabulón,

Dan,

cꞌal Neftalí,

jaꞌ ebꞌ tuꞌ chi can bꞌulan ebꞌ bꞌey yich txꞌotxꞌ wonan Ebal,

yet chi skꞌanontej syaꞌtajilal ebꞌ yibꞌan ebꞌ conobꞌ.

14 Jaxa pax ebꞌ Levita xin,

oj yal ebꞌ tet ebꞌ conobꞌ Israel.

Caw wal yin ipeal oj yun yalon wan kꞌane ebꞌ jaxca tiꞌ:

15 Tit ojabꞌ sjowal scꞌul Dios yibꞌan mactxequel chi waꞌnen a junoj echele,

jaxca junoj chꞌen chꞌen waꞌnebꞌil a yu junoj mactxequel,

catuꞌ chi yaon ey bꞌey ewantaj yet chi oc eyilal tet.

Jaꞌ wan tuꞌ,

caw cꞌam chi ẍaꞌ scꞌul Jehová.