Ofrenda Yin Bꞌabꞌel Sat Awo
26
Jaꞌ yet caan jex xa ecꞌ bꞌey txꞌotxꞌ txꞌotxꞌ oj yakꞌ Jehová cu Diosal ey jex tuꞌ,
2 sowalil che yambꞌa el bꞌabꞌel sat je yawo oj el sat txꞌotxꞌ txꞌotxꞌ bꞌey ey jex ecꞌ tuꞌ,
catuꞌ che yiꞌontoj yul junoj xuc bꞌey jun lugar sicꞌbꞌil el yu Jehová cu Diosal bꞌey chex oc yin eyilal tet.
3 Jaꞌ tituꞌ chex apni oc sattaj ebꞌ naj eyoc yin yakꞌomaloj xaambꞌal yet jun tiempoal tuꞌ,
che yalon jaxca tiꞌ:
Chi kal sattaj Jehová cu Diosal tinaniꞌ jon,
tol jix cu apni oc sat txꞌotxꞌ txꞌotxꞌ bꞌey jix yakꞌ can stiꞌ Naj yakꞌon tet ebꞌ kichmam,
je chi,
che yaloni.
4 Chi lawi tuꞌ xin,
catuꞌ chi ẍaꞌon ecꞌ jun xuc naj yakꞌomal xaambꞌal che yiꞌtoj tuꞌ,
catuꞌ chi yaon ey naj sattaj jun yet xaambꞌal tuꞌ.
5 Chi lawi tuꞌ,
catuꞌ che yalon sattaj Jehová cu Diosal wan kꞌane tiꞌ:
Jaꞌ ebꞌ kichmam jon,
Arameo ebꞌ,
jun yaliẍ bꞌulan ebꞌ,
tucꞌal jix ecꞌabꞌtoj ebꞌ.
Ian jix cam ebꞌ yu wail,
yuxan jix toocan ebꞌ bꞌey txꞌotxꞌ Egipto yetoj jaywan yuninal.
Jaꞌ tituꞌ jix oc ebꞌ yin miman conobꞌal,
caw wal ey smey jix yun sbꞌina ebꞌ,
yutol caw miman sbꞌisil ebꞌ.
6 Asan xin,
caw wal okꞌbꞌalcꞌule jix utele ebꞌ yu ebꞌ a Egipto.
Caw jix yil syaꞌtajilal ebꞌ yet jix ale oc ebꞌ yin yakꞌomaloj servil tituꞌ.
7 Yu tuꞌ xin,
yuxan jix skꞌan ebꞌ tet Jehová cu Diosal,
jaꞌton sDiosal ebꞌ kichmam tol chi colwa yetoj ebꞌ.
Jix yabꞌ Dios tzet jix skꞌan ebꞌ,
jix ale cꞌal pax oc ebꞌ yin mulnail caw yaꞌtaj.
Okꞌbꞌalcꞌule xacꞌal yeoc ebꞌ yin yakꞌomaloj servil.
8 Yu tuꞌ xin,
jix xꞌoxon yipalil Dios,
caw qꞌueyubꞌtaj xacꞌal yili ocoj,
caw xiwcꞌulaltaj xacꞌal yili oc yet jix yilon oc ebꞌ a Egipto yet jix cu yiꞌon eltej Naj tituꞌ,
9 cꞌal yu cu yiꞌontej Naj bꞌey jun txꞌotxꞌ txꞌotxꞌ caw wal yaax sat tiꞌ.
10 Yuxan chi kiꞌtej cu bꞌabꞌel sat awo chi kiꞌ bꞌey sat txꞌotxꞌ txꞌotxꞌ jix yakꞌ Naj ey jon tiꞌ,
je chi.
Chi lawi je yalon wan kꞌane tuꞌ xin,
catuꞌ che yaon octoj teꞌ xuc tuꞌ sattaj Jehová cu Diosal,
catuꞌ chex ey kaan sattaj Naj.
11 Catuꞌ che yaon oc junoj kꞌin yetoj ebꞌ je yuninal yetoj masanil tzet jix je chaꞌ tet Naj.
Che yawten cꞌal pax ebꞌ Levita yin jun je tzalacꞌulal tuꞌ yetoj cꞌal ebꞌ txꞌoj conobꞌal eyecꞌ je xol.
Sdiezmoal Masanil Tzetyetal
12 Jaꞌ yet chi tzꞌajna oxebꞌ abꞌil,
catuꞌ che yakꞌon sdiezmoal jantaj tzet che yiꞌ yin je yawo tet ebꞌ Levita,
cꞌal tet ebꞌ txꞌoj conobꞌal eyecꞌ yul je conobꞌ,
cꞌal tet ebꞌ mebꞌa unin,
cꞌal tet ebꞌ ix ix camnajxa yichamil,
yet watxꞌ ey tzet chi sloꞌ ebꞌ je yetoj yul je conobꞌ.
13 Catuꞌ che yalon junjun jex sattaj Jehová cu Diosal jaxca tiꞌ:
Tuxa jix jin poꞌocan el bꞌey jin na,
masanil tzetyetal ja wet yeocoj,
jaꞌton masanil tzet jix wiꞌ yin jin mulnail bꞌey sat jin txꞌotxꞌ.
Jix jin poꞌocan el yet ebꞌ Levita cꞌal yet ebꞌ txꞌoj conobꞌal eyecꞌ cu xol jon,
cꞌal ebꞌ mebꞌa unin camnajxa smam xutx,
yetoj cꞌal ebꞌ ix ix camnajxa yichamil.
Jix jin jije masanil tzet jix ja walaꞌ,
cꞌam bꞌey jix too qꞌueycꞌulal ja chejbꞌanil tuꞌ wu,
cꞌal jin jijeni.
14 Cꞌam niꞌoj wan tuꞌ jix jin loꞌ yet ey jin oc yin cuscꞌulal yu camich,
cꞌal yet scꞌual man watxꞌoj weoc jaxca yalon ley,
cꞌam bꞌey jix wakꞌ tzetyetal tet ebꞌ camnaj.
Jix jin jije masanil tzet jix ja walaꞌ.
15 Ilon eytej bꞌey satcan,
bꞌey jun lugar tol ja wet yeocoj,
akꞌ ja yaxilal kibꞌan jaon ja conobꞌ Israel jon tiꞌ,
cꞌal yibꞌan txꞌotxꞌ txꞌotxꞌ tol caw yaax sat bꞌey caan jon ecꞌ tiꞌ,
jaxca wal jix yun ja wakꞌon can ja tiꞌ tet ebꞌ kichmam jon,
je chi che yaloni.
Jaꞌ Conobꞌ Israel Yet Jehová Yeocoj
16 Jaꞌ Jehová cu Diosal jix alon masanil wan chejbꞌanile chi wal can el ey jex tiꞌ tol sowalil che jije,
cꞌal je bꞌeybꞌalneni.
Che jije yetoj masanil je cꞌul,
cꞌal yetoj masanil je pixan.
17 Tuxa jix je yal tinaniꞌ tol jaꞌ Jehová je Diosal yeocoj.
Jix je yakꞌon can je tiꞌ je jijen je yoc tzajan yintaj cꞌal je jijen ẍejbꞌanil,
cꞌal scuybꞌanil,
cꞌal sley.
18 Jix yal Jehová tinaniꞌ tol jaon Israel jon tiꞌ,
tol sconobꞌ jon xa jaxca jix yun yaloni,
yuxan sowalil che jije ẍejbꞌanil.
19 Jaꞌ Naj oj jex aon oc yin miman conobꞌal,
tol oj jex bꞌina yin swatxꞌilal caw miman je yeloc apnoj yintaj wanojxa nación jix swaꞌne,
catuꞌ sconobꞌ jex Naj,
jaxca jix yun yaloni,
ẍi naj Moisés.