25
Ta ey cawanoj ánima chi yakꞌ jowal,
sowalil chi too ebꞌ sattaj yaaw yet chi waꞌxi yeoc jun jowal ey xol ebꞌ tuꞌ.
Jaꞌ mactxequel cꞌam spenail chi colcha can eloj,
jal mactxequel ey spenail xin,
chi oc xacꞌal can yibꞌan.
2 Ta jaꞌ naj ey spenail tuꞌ smoo tol chi makꞌlei,
jaꞌ naj juez chi aloni catuꞌ chi ey telan naj sat txꞌotxꞌ sattaj naj,
catuꞌ chi makꞌle naj jatacꞌalaꞌ jantaj yeoc spenail naj jix oc tuꞌ.
3 Jaꞌ yet chi makꞌle junoj winaj tuꞌ,
cꞌam ojabꞌ chi ecꞌbꞌantoj 40 el chi yun yoc sbꞌisil tzꞌuum yin,
yutol ta chi ecꞌbꞌantoj sbꞌisil,
caw qꞌuixwiltaj xacꞌal chi yun can naj sattaj ebꞌ ánima.
4 Cꞌam ojabꞌ che yaoc spail stiꞌ noꞌ wacax yet chi tecꞌwi tiriw noꞌ.
Sleyalil Tet Junoj Winaj Chi Nupi Yetoj Smuꞌ
5 Ta ey cawanoj winaj yuẍtaj sbꞌa ebꞌ,
ta junne nail bꞌey caan ebꞌ,
jaxa chi yunne chi cam junoj naj,
cꞌamto pax yuninal naj chi elcan yetoj yistil tuꞌ,
cꞌam chi skeꞌ yiꞌon junojxa txꞌoj winajil ix ix tuꞌ.
Yuxan,
jaꞌ naj yuẍtaj naj camom yichamil ix tuꞌ,
jaꞌ naj chi oc can yichamiloj ix.
Queytuꞌ chi yun sjijen sleyalil naj yet chi oc ix smuꞌ naj tuꞌ yistiloj.
6 Jaꞌ sbꞌabꞌel unin ebꞌ chi ali,
jaꞌ sbꞌi naj camom yichamil ix tuꞌ chi oc yin jun unin tuꞌ,
yet watxꞌ cꞌam chi qꞌueyel sbꞌi naj xol ebꞌ ket conobꞌ.
7 Asan ta cꞌam chi ẍaꞌ scꞌul naj tol chi oc ix smuꞌ tuꞌ yistiloj xin,
chi skeꞌ stoo ix yalon sattaj ebꞌ juez cꞌal sattaj ebꞌ icham winaj yeoc yul conobꞌ,
chi yalon ix jaxca tiꞌ:
Jaꞌ naj jin muꞌ tiꞌ an cꞌam chi yal scꞌul naj chi bꞌina can sbꞌi naj camom yuẍtaj xol cu conobꞌ tiꞌ.
Cꞌam chi yoche naj chi nupi wetoj an jaxca yalon sleyalil,
ẍi ojabꞌ ix ix tuꞌ tet ebꞌ juez.
8 Chi lawi tuꞌ xin,
chi awtele naj yu ebꞌ icham winaj yeoc yul conobꞌ tuꞌ,
catuꞌ chi skꞌanlen el ebꞌ tet naj tzet wal ẍi naj.
Ta yel cꞌam chi yal scꞌul naj chi oc ix smuꞌ tuꞌ yistiloj,
9 catuꞌ chi jul ix scꞌatan naj bꞌey sattaj ebꞌ naj icham winaj yeoc yul conobꞌ tuꞌ,
catuꞌ chi yiꞌon el ix ix tuꞌ junoj xanabꞌ naj,
catuꞌ chi tzubꞌli can oc ix yin sat naj,
chi yalon ix jaxca tiꞌ:
Jaxca ton tiꞌ chi utele ebꞌ naj tol cꞌam chi yal scꞌul chi yakꞌ can bꞌina sbꞌi yuẍtaj xol sconobꞌ,
ẍi ojabꞌ ix.
10 Yu tuꞌ xin,
jaxa chi yun yal-le yin ebꞌ yuninal naj xol ebꞌ yet conobꞌ,
jaꞌ ebꞌ yuninal naj tol iꞌbꞌil eltej xanabꞌ tiꞌ.
Jaꞌ Wanxa Ley
11 Ta ey cawanoj winaj chi yakꞌle jowal,
catuꞌ chi jul yistil junoj ebꞌ naj tuꞌ yu scolon el yichamil tuꞌ yaloni,
chi stzacꞌontej ix swinajil junxa naj winaj tuꞌ,
12 ta jaxca tuꞌ chi yute ix,
chi tzokꞌle el skꞌabꞌ ix ix tuꞌ,
cꞌamxa cꞌal chi okꞌ je cꞌul yin ix.
13 Cꞌam ojabꞌ che kꞌan echbꞌal man tzꞌajanoj yet chex txonwi,
14 cꞌam ojabꞌ echbꞌal yaliẍ eyecꞌ bꞌey je na,
cꞌal echbꞌal man pax tzꞌajanoj eyecꞌ bꞌey je na,
15 tol ojabꞌ caw tzꞌajan je yechbꞌal che kꞌanbꞌalne,
yet watxꞌ caw oj naatbꞌoj je kꞌinal bꞌey txꞌotxꞌ txꞌotxꞌ oj yakꞌ Jehová cu Diosal ey jex,
16 yutol man watxꞌoj yul sat Dios yu ebꞌ chi kꞌanbꞌalnen echbꞌal man tzꞌajanoj.
Sowalil Chi Qꞌueyle El Ebꞌ Amalecita
17 Naꞌwejtej jaex tiꞌ,
tzet jix cu utele yu ebꞌ caan bꞌey conobꞌ Amalec,
yet ey jon oc yul-laj bꞌe yet jix cu elwejtej bꞌey txꞌotxꞌ Egipto.
18 Naꞌwej cꞌal pax tej,
tol cꞌam niꞌoj xiwcꞌulal ebꞌ tet Dios.
Jix oc tzajan ebꞌ kintaj yul-laj bꞌe yet caw chi cu cꞌuumbꞌi cu bꞌeyi,
jix jul makꞌle cam ebꞌ ket conobꞌ yu ebꞌ,
ebꞌ tol naat tzajan can kintaj,
yutol chi pax yip ebꞌ.
19 Yuxan jaꞌ yet oj jex col-le el yu Jehová cu Diosal tet ebꞌ je cajat joyan oc yinlaj txꞌotxꞌ txꞌotxꞌ oj akꞌle ey jex tuꞌ,
sowalil che yakꞌ qꞌueyel ebꞌ yicꞌaal Amalec bꞌey sat txꞌotxꞌ txꞌotxꞌ tuꞌ yin junelne.
Cꞌam ojabꞌ chi too qꞌueycꞌulal jun chejbꞌanile tiꞌ je yu.