Sleyalil Yibꞌan Poꞌolebꞌail
24
Ta ey junoj winaj chi nupi yetoj junoj ix ix,
ta eyxa jayebꞌoj cꞌual catuꞌ chi yabꞌen oc naj tol eyxa tzet qꞌuixwiltaj jix el yunen ix,
ta cꞌamxa chi yoche naj tol ey cꞌal oc ix yistiloj naj,
catuꞌ chi spoꞌolen xacꞌal sbꞌa naj yetoj ix,
chi yakꞌon can yuunal yet poꞌolebꞌail naj tet ix,
catuꞌ chi ujtele eltoj ix yu naj bꞌey sna naj.
2 Jaꞌ yet xax spoꞌole sbꞌa ix yetoj naj tuꞌ,
chi skeꞌ yiꞌon junojxa winaj ix ix tuꞌ.
3 Asan xin,
ta jaꞌ naj yet scaabꞌ yichamil ix tuꞌ,
ta cꞌamxa pax chi ẍaꞌ scꞌul naj chi oc cꞌal ix yistiloj,
catuꞌ chi yakꞌon pax can an yuunal yet poꞌolebꞌail naj tet ix,
catuꞌ chi yujten eltoj naj yul sna tuꞌ,
ma xin tol chi cam naj yet scaabꞌ yichamil ix tuꞌ,
4 ta jaxca tuꞌ,
cꞌamxa chi skeꞌ yiꞌle ix yu naj bꞌabꞌel ichamile tuꞌ junelxa,
yutol man watxꞌoj ta chi yiꞌ naj junelxa.
Jaxca tuꞌ pena xa yul sat Jehová cu Diosal.
Yuxan cꞌam ojabꞌ che yetnetoj txꞌotxꞌ txꞌotxꞌ oj yakꞌ Naj ey jex.
Wanxa ley
5 Ta tol to chi nupi junoj naj winaj yetoj yistil,
cꞌam chi skeꞌ yaletoj naj yin jowal.
Cꞌam cꞌal pax chi skeꞌ yoc naj yin junojxa tzet opisoal.
Cꞌam cꞌal junoj tzetyetal chi akꞌle yun naj,
jun abꞌil chi can naj bꞌey sna yet chi yakꞌon tzalabꞌoj scꞌul naj yetoj yistil.
6 Cꞌam ojabꞌ che kꞌanecꞌ smolino ma scaꞌ junoj mactxequel chi maanen tumin ey jex,
ma junojxa tzetyetal yu smaanbꞌanil oj tuꞌ.
Yutol jaꞌ jun tuꞌ laan jaxca yet chi cu tenoc tucan junoj ánima yin sloꞌbꞌe.
7 Ta ey junoj winaj tol a Israel naj,
catuꞌ chi yelkꞌanetoj junoj yet conobꞌ yet chi yaoc yin yakꞌomaloj servil,
ma tol chi xoneloj,
sowalil chi akꞌle cam jun mactxequel tuꞌ,
catuꞌ chi el jun spenail tuꞌ je xol.
8 Ta ey bꞌey chi pitzcꞌu a jun yaꞌbꞌil chi yij lepra je yin,
sowalil che jijewej jaxca yalon sleyal chi yal ebꞌ naj yakꞌomal xaambꞌal,
jaꞌton ebꞌ yicꞌaal Leví.
Sowalil che jijewej masanil chejbꞌanile jix wal can ey jex.
9 Naꞌwejtej tzet jix utele ix María bꞌey yul-laj bꞌe yu Jehová cu Diosal,
yet jix jex eltej bꞌey txꞌotxꞌ Egipto.
10 Ta ey chꞌen tumin che yatoj maanil tet junoj je yet animail,
cꞌam ojabꞌ chex oc yul sna ebꞌ catuꞌ che yiꞌon eltej spichil ebꞌ yu smaanbꞌanil chꞌen tumin tuꞌ.
11 Jaꞌ tzet smoo che yunne,
jatuꞌ chex cancan bꞌey sattaj eltoj stiꞌ sna ebꞌ tuꞌ,
catuꞌ che yechbꞌanen yiꞌle eltej tzetyetal oj akꞌle ey jex yu smaanbꞌanil oj chꞌen tumin tuꞌ.
12 Ta caw wal mebꞌa jun ánima bꞌey che yakꞌ chꞌen tumin tuꞌ maanil,
catuꞌ che yiꞌon ecꞌ ẍumpa syaꞌiloj smaan tumin tuꞌ,
cꞌam ojabꞌ chi can yul je kꞌabꞌ yet chi ecꞌ akꞌbꞌal.
13 Jaꞌ yet lalanto stoo cꞌu,
catuꞌ che yakꞌon pax tet,
tala cꞌuxan cꞌam tzet chi yaoc yibꞌan yet chi ecꞌ akꞌbꞌal.
Ta jaxca tuꞌ che yute,
jaꞌ jun ánima tuꞌ oj yal watxꞌ kꞌane je yibꞌan.
Jaxca tuꞌ watxꞌ jex sattaj Jehová cu Diosal.
14 Cꞌam ojabꞌ che yetne junoj ebꞌ mebꞌa chi mulna je yetoj,
ebꞌ je yet conobꞌ ma ebꞌ txꞌoj conobꞌal eyecꞌ je xol.
Yin ojabꞌ eymanil che yakꞌ stool scꞌu ebꞌ yet jun cꞌual tuꞌ.
15 Toolanewej scꞌu ebꞌ je maan yet junjun yeycꞌualil,
yutol jaꞌ ebꞌ mebꞌa sowalil oj sman ebꞌ tzet oj sloꞌ yet jun cꞌual tuꞌ.
Ta cꞌamaj,
oj a yaw ebꞌ tet Jehová,
catuꞌ chi oc jun tuꞌ je penailoj sattaj Naj.
16 Cꞌam chi skeꞌ yakꞌle cam ebꞌ mame txutxe yu spenail yuninal chi oqui.
Jacꞌalaꞌ pax ebꞌ uninale tuꞌ,
cꞌam chi skeꞌ scam ebꞌ yu spenail smam xutx chi oqui.
Junjun cꞌal ánima chi cam yu spenail.
17 Cꞌam ojabꞌ che yun tzetyetal man watxꞌoj yin ebꞌ txꞌoj conobꞌal eyecꞌ je xol,
tam wal yin ebꞌ camnajxa smam xutx.
Cꞌam ojabꞌ che kꞌanecꞌ spichil ebꞌ ix ix camnajxa yichamil yin smaanbꞌanil junoj tzetyetal.
18 Cꞌam ojabꞌ chi too qꞌueycꞌulal je yu,
ilaꞌ tol jix jex ecꞌwej yin yakꞌomaloj servil bꞌey txꞌotxꞌ Egipto,
jaxa Jehová cu Diosal jix cu iꞌon eltej tituꞌ.
Yuxan chi wal ey jex tol che jijewej masanil chejbꞌanile tiꞌ.
19 Ta jaꞌ yet lalan je kꞌupon a ixim je tiriw,
catuꞌ chi cancan junoj topan ixim je yu,
ma chi too qꞌueycꞌulal je yu,
cꞌam ojabꞌxa chex meltzotoj je seyoni,
can ojabꞌ xacꞌal ixim jaxca tuꞌ.
Jaꞌ ebꞌ txꞌoj conobꞌal eyecꞌ je xol,
cꞌal ebꞌ camnajxa smam,
xutx,
ma ebꞌ ix ix camnajxa yichamil,
jaxa ebꞌ oj ecꞌ sicꞌon aoj,
yet watxꞌ oj yakꞌ syaaxilal Jehová cu Diosal je yibꞌan yin masanil tzet che yunne.
20 Jaꞌ yet che yambꞌan el sat teꞌ olivo,
man ojabꞌ pilan oj che yute je yambꞌan el sat teꞌ yinlaj skꞌabꞌ.
Jaꞌ teꞌ chi cancan tuꞌ,
cꞌam ojabꞌxa chex meltzo je yambꞌan eloj.
Yet xa ebꞌ txꞌoj conobꞌal chi yun can ocoj,
cꞌal ebꞌ mebꞌa unin camnajxa smam,
xutx,
cꞌal ebꞌ ix ix camnajxa yichamil.
21 Jaꞌ yet che yuxon el sat an uva awbꞌil je yu,
cꞌam ojabꞌxa chex meltzo je yiꞌon el an chi cani.
Jaꞌ wan tuꞌ yet xa ebꞌ txꞌoj conobꞌal eyecꞌ je xol chi yun can ocoj,
cꞌal ebꞌ mebꞌa unin camnajxa smam xutx,
cꞌal ebꞌ ix ix camnajxa yichamil.
22 Cꞌam ojabꞌ chi too qꞌueycꞌulal je yu,
ilaꞌ tol jaex tiꞌ jix jex ecꞌwej yin yakꞌomaloj servil bꞌey txꞌotxꞌ Egipto.
Yu tuꞌ xin,
chi wal ey jex tol che jijewej masanil wan chejbꞌanile tiꞌ.