Wan Ánima Chi Iꞌle El Xol Conobꞌ
23
Ta ey junoj winaj tol makꞌbꞌil poꞌo sbꞌakꞌ,
ma tol kꞌupbꞌil eltej swinajil,
cꞌam chi skeꞌ yoc xol ebꞌ conobꞌ yet chi syambꞌan oc sbꞌa ebꞌ yin eyilal sattaj Jehová.
2 Taꞌ ey junoj unin tol man txequeloj yeoc smam,a
cꞌam chi skeꞌ yoc xol ebꞌ sconobꞌ Jehová yetoj cꞌal yicꞌaal ebꞌ masantaꞌcꞌal yet slaonebꞌ tujan icꞌaale yet bꞌakꞌin.
3 Jaꞌ ebꞌ Amonita,
yetoj ebꞌ Moabita yetoj cꞌal yicꞌaal ebꞌ,
cꞌam oxlaj jon bꞌakꞌin chi skeꞌ yoc ebꞌ yet slaonebꞌ tujan icꞌaale tuꞌ xol ebꞌ sconobꞌ Jehová.
4 Yutol jaꞌ yet jix jex ecꞌtej bꞌey sat xꞌotxꞌ ebꞌ,
yet jix jex eltej bꞌey txꞌotxꞌ Egipto,
tumi jix yakꞌ niꞌoj jaꞌ ebꞌ je yuqꞌueꞌ cꞌal je loꞌbꞌe.
Jaꞌ jun jix yun ebꞌ,
tol jix toolanele naj Balaam yu ebꞌ,
naj scꞌaal Beor,
jix tit tacꞌal naj bꞌey conobꞌ Petor yul yet Mesopotamia,
yet chi jul yalon can el pena kꞌane naj je yibꞌan jaex tiꞌ.
5 Jaxa Jehová cu Diosal,
ma takꞌwoj tet naj Balaam tuꞌ,
yuxan jaꞌ wan pena kꞌane tꞌinan yalon naj tuꞌ,
yin xa alo watxꞌ kꞌaneal jix yun can aoj,
yutol caw ey scamcꞌulal Jehová cu Diosal kin.
6 Yu tuꞌ xin,
cꞌam ojabꞌ bꞌakꞌin chex oc yin watxꞌcꞌulal yetoj ebꞌ.
Cꞌam ojabꞌ cꞌal chex colwa yetoj ebꞌ yin tzet chi oc swatxꞌiloj ebꞌ.
7 Asan xin,
cꞌam che yintajne can el ebꞌ Edomita,
yutol je yican to je bꞌa yetoj ebꞌ.
Cꞌam ojabꞌ che yintajne cꞌal pax el ebꞌ Egipcio,
yutol jix jex ecꞌ caan jun tiempoal sat xꞌotxꞌ ebꞌ.
8 Jaxa yin ebꞌ yox tujan yicꞌaal ebꞌ oj el xin,
chi xa skeꞌ yoc ebꞌ tuꞌ cu xol jaon sconobꞌ jon Jehová tiꞌ.
Xolilal Tzet Chi Yun Sajbꞌanele Bꞌey Chi Ey Bꞌulan Ebꞌ
9 Jaꞌ yet chex too akꞌo jowal yetoj ebꞌ je cajat,
yet chex ecꞌ cꞌal xol-laj cꞌultaj,
cꞌam ojabꞌ che yun tzetyetal tol quixwiltaj yili jatacꞌalaꞌ yalon ley.
10 Ta ey junoj winaj chi el yinatil yet lalan sweyi,
sowalil chi elcantoj yinlaj bꞌey bꞌulan jex ecꞌ tuꞌ yin masanil cꞌu.
11 Jaxa yet yeycꞌualil,
watxꞌ chi yun xꞌaon el sbꞌa,
jaxa yet chi too cꞌu,
catuꞌ chi oc pax cantoj junelxa bꞌey bꞌulan jex ecꞌ tuꞌ.
12 Yuxan sowalil che waꞌnewej junoj bꞌey chex txuli yinlaj bꞌey bꞌulan jex ecꞌ tuꞌ.
13 Sowalil che yiꞌtoj junoj teꞌ teꞌ jaxca junoj teꞌ estaca tol patxan ye xam yul je pa,
yuxan jaꞌ yet chex too txuloj,
che jotwej can junoj jolan yin sbꞌabꞌelal,
catuꞌ chex txuli eytoj yul.
Jaxa yet chi lawi je txuli tuꞌ xin,
catuꞌ che mujon can yetoj txꞌotxꞌ.
14 Yutol jaꞌ Jehová cu Diosal,
eyecꞌ Naj je xol,
eyecꞌ Naj je yetoj bꞌey bꞌulan jex ecꞌ tuꞌ.
Jaꞌ Naj chex teyneni,
chi colwa cꞌal pax Naj je yetoj yet che yakꞌon eyqꞌuey ebꞌ je cajat.
Yuxan jaꞌ bꞌey bꞌulan jex ecꞌ tuꞌ,
saj ojabꞌ cꞌal yili,
cꞌam ojabꞌ junoj tzetyetal tzꞌiltaj ey je xol,
ta cꞌamaj,
ey smey chi yiꞌel sbꞌa Dios je xol tuꞌ.
Jaꞌ Wanxa Ley
15 Ta tol ey junoj patrón chi ela junoj yakꞌomal servil yintaj,
catuꞌ chi yalon ey jex tol chi eecꞌal ecꞌ je yetoj,
cꞌam ojabꞌ che yakꞌ meltzo tet spatrón tuꞌ.
16 Can ojabꞌ can je xol tuꞌ,
jaꞌ ojabꞌ caw chi sicꞌlen junoj conobꞌ bꞌey chi yal scꞌul chi caey ecꞌoj.
Jaꞌ jun conobꞌ bꞌey chi yoche chi caey ecꞌ tuꞌ,
jaꞌ tituꞌ chi eecꞌal ecꞌoj.
Cꞌam ojabꞌ mac chi txꞌemon tituꞌ.
17 Cꞌam ojabꞌ junoj winaj ma junoj ix tol je yet Israelal chi yaoc sbꞌa yin amulal cꞌal yoc yin eyilal tet comon dios.
18 Jaꞌ chꞌen tumin chi ẍaꞌ ebꞌ ix ix ma ebꞌ winaj,b
yin stooloj yin amulal,
cꞌam ojabꞌ che chaꞌ yakꞌ chꞌen ebꞌ bꞌey jix yakꞌ can stiꞌ ebꞌ yakꞌon tet Jehová.
Yutol jaꞌ jun bꞌeybꞌale tuꞌ caw yaabꞌil el yu Dios.
19 Jaꞌ yet che yakꞌon chꞌen tumin yin maanil tet junoj je yet conobꞌ,
cꞌam ojabꞌ che kꞌan yuneꞌ chꞌen,
ma junojxa tzet tol chi loꞌlei,
cꞌal junojxa tzet chi skeꞌ yakꞌle yin maanil.
20 Jaꞌ tet junoj txꞌoj conobꞌal eyecꞌ je xol chi skeꞌ che kꞌan yuneꞌ junoj tzetyetal che yakꞌ maanil tuꞌ.
Jal pax tet junoj ebꞌ je yet conobꞌ xin,
cꞌam che kꞌanaꞌ,
yet watxꞌ oj yakꞌ cꞌal syaaxilal Jehová je yibꞌan bꞌey sat txꞌotxꞌ txꞌotxꞌ tol oj yakꞌ ey jex tuꞌ.
21 Jaꞌ yet che yakꞌon can je tiꞌ je yakꞌon junoj tzetyetal tet Jehová cu Diosal,
cꞌam ojabꞌ chi ecꞌ tiempo je yakꞌoni.
Ta cꞌamaj,
jaꞌ Naj oj kꞌanon ey jex,
ta jaxca tuꞌ chi oc je penail tet.
22 Ta cꞌam tzetyetal bꞌey che yakꞌ je tiꞌ je yakꞌon tet Naj xin,
cꞌam bꞌey chi oc je penail chi yal tuꞌ,
23 ta ey pax bꞌey che yakꞌ je tiꞌ je yakꞌon xin,
sowalil che yakꞌ jaxca wal bꞌey chi el yin je cꞌul je yakꞌoni.
24 Jaꞌ yet chex oc xol yawo junoj ebꞌ je yet conobꞌ,
chi skeꞌ je loꞌon sat an uva masantaꞌcꞌal chi no je cꞌul,
asan xin cꞌam ojabꞌ niꞌoj che yiꞌtoj yul je pa.
25 Ta chex oc xol stiriw junoj ebꞌ je yet conobꞌ,
chi skeꞌ je tokꞌon atej jayebꞌoj ixim yet che kꞌuxuni,
asan xin cꞌam chi skeꞌ je kꞌupon xacꞌal a ixim yetoj chꞌen je jooxbꞌal tuꞌ.