22
Ta ey junoj swacax ma smeꞌ junoj ebꞌ je yet conobꞌ chi qꞌueytoj,
man tucꞌal oj chex oc tꞌanan yin noꞌ,
tol ojabꞌ che yiꞌtoj noꞌ tet ebꞌ je yet conobꞌ tuꞌ bꞌey je na.
2 Ta cawil je xol yetoj jun mactxequel ey yet noꞌ noꞌ tuꞌ,
ma tol man je yotaj oj mac ey yet noꞌ,
che yiꞌtoj noꞌ bꞌey je na,
chi cancan noꞌ bꞌey je na tuꞌ masantaꞌcꞌal chi skꞌanle ecꞌ jun mac ey yet noꞌ tuꞌ,
catuꞌ che yakꞌon meltzo noꞌ noꞌ tuꞌ tet.
3 Quey cꞌal pax tuꞌ che yun yetoj junoj noꞌ bꞌuru,
ma junoj an pichile,
ma junojxa tzetyetal chi qꞌueytoj.
Ta ey junoj jex che yilaꞌ,
man tucꞌal oj che yil can oc yin.
4 Ta ey junoj sbꞌuru ma swacax junoj je yet conobꞌ chi telcꞌotoj yul-laj bꞌe,
man tucꞌal oj che yilocoj,
tol ojabꞌ chex colwa je yiꞌon a noꞌ yetoj ebꞌ.
5 Jaꞌ ebꞌ ix ix,
cꞌam chi skeꞌ yaon oc spichil winaj ebꞌ ix,
tam wal ebꞌ winaj cꞌam chi skeꞌ yaon oc spichil ix ebꞌ naj,
yutol jaꞌ ebꞌ chi bꞌeybꞌalnen jun tuꞌ,
caw yaabꞌil el ebꞌ yu Jehová cu Diosal.
6 Ta ey junoj mactxequel chi ilcha junoj sweyubꞌ tzꞌiquin yu bꞌey skꞌabꞌlaj junoj teꞌ,
ma sat txꞌotxꞌ eeyoj,
ta eyoc noꞌ txutxe tuꞌ yibꞌan yuneꞌ,
ma yibꞌan sjos,
cꞌam che yiꞌtoj noꞌ txutxe tuꞌ yetoj yuneꞌ tuꞌ.
7 Chi skeꞌ je yiꞌontoj noꞌ yuneꞌ tuꞌ,
jal noꞌ txutxe tuꞌ xin che jaj cantoj noꞌ,
ta jaxca tuꞌ oj je yunne,
watxꞌ oj jex elocoj,
oj naatbꞌoj je kꞌinal yul yibꞌankꞌinal tiꞌ.
8 Ta ey junoj jex che waꞌne a junoj je na,
che waꞌnewej cꞌal pax a smuroal stiꞌlaj bꞌey yibꞌan atoj tuꞌ,
yet watxꞌ cꞌam mactxequel chi titqꞌuey yibꞌan jun na tuꞌ.
Ta jaxca tuꞌ cꞌam bꞌey oj ijtzan ebꞌ je yuninal yu junoj mactxequel tala chi titqꞌuey yibꞌan na,
catuꞌ chi cami.
9 Cꞌam ojabꞌ che yaw junojxa tujan teꞌ awbꞌeal teꞌ bꞌey awbꞌilxa ey je yuva,
tala chi akꞌle sowalil ey jex,
naꞌbꞌa xacꞌal mi je yinat tuꞌ,
ta cꞌamxa che loꞌ pax sat je yuva tuꞌ.
10 Jaꞌ yet chex kꞌuwi txꞌotxꞌ yetoj kakꞌon oj noꞌ noꞌ,
cꞌam ojabꞌ che yaoc junoj noꞌ wacax yetoj junoj noꞌ bꞌuru yin kꞌuo txꞌotxꞌ tuꞌ.
11 Cꞌam ojabꞌ che yaoc an pichile chembꞌil yetoj lana cꞌal yetoj an lino.
12 Che yaoc yelawil cꞌal xꞌanil scanebꞌal xiquin an je xotil che yaocoj.
Sleyal Yibꞌan Amulal
13 Ta ey junoj winaj chi yiꞌ junoj ix ix yistiloj,
jaxa chi yunne ta cꞌamxa scamcꞌulal naj yin ix,
14 catuꞌ chi yalon a naj tol eyxa bꞌey chi mulwi ix ix tuꞌ yetoj junoj winaj,
chi snaꞌon xacꞌal a kꞌane naj yin ix,
chi yaloni:
Jix wiꞌ jun ix ix tiꞌ,
jaxa yet jix jin wey yetoj ix,
jix wilon an tol manxa kꞌopo ix oj ix,
ta ẍi naj.
15 Jaxa smam cꞌal xutx ix kꞌopo tuꞌ chi iꞌontoj yechel yet skꞌopo ixal ix tuꞌ bꞌey sdespacho ebꞌ naj icham winaj yeoc yul conobꞌ tuꞌ,
16 catuꞌ chi yalon smam xutx ix kꞌopo tuꞌ tet ebꞌ naj icham winaj yeoc yul conobꞌ tuꞌ jaxca tiꞌ:
Jain tiꞌ jix wakꞌ ix jin cutzꞌin tiꞌ yistiloj jun winaj tiꞌ.
Jaxa tinaniꞌ,
cꞌamxa chi yoche naj chi oc yistiloj,
17 yutol caw miman tzet chi xij yal naj yin ix.
Chi yal naj tol abꞌ eyxa smul ix yetoj winaj.
Chi yalon naj tol manxa kꞌopo ix oj ix,
yuxan tiꞌ ey yechel xꞌoxbꞌanil skꞌopoal ix jin cutzꞌin tiꞌ,
ẍi smam ix kꞌopo tuꞌ.
Jaꞌ yet lalan yalon naj jaxca tuꞌ,
catuꞌ chi sjenbꞌantoj junoj an sábana naj sattaj ebꞌ icham winaj yeoc yul conobꞌ tuꞌ.
18 Catuꞌ chi mitxꞌle ey naj winaj tuꞌ yu ebꞌ naj,
catuꞌ chi ale oc syaꞌilal yibꞌan naj yu ebꞌ icham winaj yeoc yul conobꞌ tuꞌ.
19 Chi lawi tuꞌ xin,
chi chejle naj winaj tuꞌ yakꞌ junoj 100 siclo chꞌen tumin plata yin smultaoj naj,
yutol chi yal naj yin ix kꞌopo a Israel tuꞌ,
tol eyxa smul ix chi oqui.
Jaꞌ jun tumin tuꞌ chi akꞌle tet smam ix kꞌopo tuꞌ.
Man yu oj tuꞌ cꞌamxa chi oc ix ix tuꞌ yistiloj naj,
tol sowalil chi oc cꞌaltaꞌ ix yistiloj naj,
masantaꞌcꞌal camich.
20 Asan ta caw yel xin,
tol xax mulwi ix ix tuꞌ yetoj junoj winaj,
manxa kꞌopo ix oj ix yet jix nupi ix yetoj naj tuꞌ,
cꞌamxa txꞌoxbꞌanile yin ix,
21 chi iꞌle eltoj ix bꞌey spuertail sna smam tuꞌ,
catuꞌ chi kꞌojchꞌennele cam ix yu masanil ebꞌ winaj a conobꞌ tuꞌ,
yutol jix yaoc jun miman mule ix tuꞌ yul sconobꞌ,
cꞌal yu yiꞌon el sqꞌuixwil smam ix.
Queytuꞌ chi yun slawi spenail tuꞌ yul je conobꞌ.
22 Ta ey junoj winaj chi yun mul yetoj junoj ix ix tol eyxa yichamil,
catuꞌ chi ilcha el ebꞌ scawanil,
chi cam ebꞌ scawanil,
queytuꞌ chi yun sqꞌueyle el spenail yul je conobꞌ tuꞌ.
23 Ta ey junoj ix kꞌopo tol xax yakꞌ stiꞌ,
tol oj nupoj yetoj junoj winaj,
catuꞌ txꞌojxa pax junojxa winaj chi yun mul yetoj ix bꞌey yul conobꞌ tuꞌ,
24 chi iꞌletoj ebꞌ scawanil sattaj despacho bꞌey conobꞌ tuꞌ.
Jaꞌ tituꞌ chi kꞌojchꞌennele cam ebꞌ scawanil,
yutol yul conobꞌ eyecꞌ ix kꞌopo tuꞌ,
yutol ma el yaw ix kꞌopo tuꞌ,
jacꞌalaꞌ cꞌal pax jun winaj tuꞌ,
yu cꞌal tol jix smitxꞌoc yistil junxa yet winajil tuꞌ.
Queytuꞌ chi yun sqꞌueyle el spenail ey je xol.
25 Ta ey junoj winaj chi ẍaꞌle sbꞌa yetoj junoj ix ix bꞌey cꞌam ánima chi eqꞌui,
ta ey bꞌey xax yakꞌ stiꞌ ix tet junoj winaj yu yoc ix yistiloj naj,
catuꞌ chi etnele ix yu junojxa winaj tuꞌ,
ta jaxca tuꞌ xin,
asanne naj winaj jix akꞌon pural ix ix tuꞌ,
smoo chi cami.
26 Jal ix kꞌopo tuꞌ,
cꞌam cꞌal tzet chi utele ix,
yutol cꞌam spenail ix jix yaocoj.
Jaꞌ jun jix yun naj winaj tuꞌ,
laan jaxca junoj winaj chi smakꞌ cam junoj yet animail;
27 yutol jix chaꞌlo el ix kꞌopo tuꞌ yu naj bꞌey cꞌam ánima chi eqꞌui.
Caxcꞌal jix el yaw ix,
yutol cꞌam junoj mactxequel chi colon ix.
28 Ta ey junoj winaj chi ẍaꞌle sbꞌa yetoj junoj ix kꞌopo tol cꞌamto bꞌey chi yakꞌ stiꞌ yin nupil,
catuꞌ chi yakꞌon pural junoj winaj yetneni,
catuꞌ chi ilchatej ebꞌ,
29 jaꞌ jun winaj tuꞌ sowalil chi yakꞌ junoj 50 siclo chꞌen tumin plata naj tet smam ix kꞌopo tuꞌ,
yutol tucꞌal jix akꞌle pural ix ix tuꞌ yu naj.
Yu tuꞌ xin,
sowalil chi oc xacꞌal ix yistiloj naj,
cꞌamxa chi spoꞌole sbꞌa naj yetoj ix masantaꞌcꞌal camich.
30 Cꞌam ojabꞌ mactxequel chi yun mul yetoj yistil smam.
Ta ey mactxequel chi yun jaxca tuꞌ cꞌam yeloc apnoj smam yul sat chi yal tuꞌ.