Jaꞌ Junoj Ánima Chi Cami, Ta Man Txequeloj Mac Jix Makꞌon Camoj
21
Catuꞌ jix yalon cꞌal naj Moisés jaxca tiꞌ:
Ta jaꞌ xol-laj mulnail bꞌey txꞌotxꞌ txꞌotxꞌ oj je majcan oc yu Jehová cu Diosal,
ta chi ilcha a junoj smimanil junoj ánima tol makꞌbꞌil camoj,
ta cꞌam mac otajnen mactxequel jix makꞌon camoj,
2 jaꞌ ebꞌ naj icham winaj yeoc yul conobꞌ,
yetoj cꞌal ebꞌ juez bꞌey wan conobꞌlaj ey je cawil tuꞌ,
jaꞌ ebꞌ chi waꞌnen oc yin,
cꞌal yilon ebꞌ bꞌeytet junoj conobꞌ tuꞌ cawil yeoc bꞌey jix cam jun ánima tuꞌ.
3 Chi lawi tuꞌ xin,
jaꞌ ebꞌ naj icham winaj yeoc yul conobꞌ ey scawilal bꞌey jix cam jun mactxequel tuꞌ,
chi yiꞌtej junoj noꞌ kꞌopo wacax ebꞌ tol cꞌam tocꞌal chi mulna juneloj noꞌ yin kꞌuo txꞌotxꞌ,
4 catuꞌ chi yiꞌontoj ebꞌ bꞌey spananil stiꞌlaj junoj jobꞌe bꞌey cꞌam cꞌaltaꞌ mac chi mulna sat txꞌotxꞌ txꞌotxꞌ tuꞌ,
catuꞌ ey ojabꞌ pax junoj snukꞌ jaꞌ yul junoj jobꞌe tol cꞌam chi tantoj.
Jaꞌ tituꞌ chi makꞌle kꞌa snukꞌ noꞌ wacax tuꞌ.
5 Chi lawi tuꞌ,
jaꞌ ebꞌ yicꞌaal Leví,
ebꞌ yakꞌomal xaambꞌal chi oc ebꞌ scawilal noꞌ wacax jix cam tuꞌ.
Yutol jaꞌ ebꞌ sicꞌbꞌil el yu Jehová cu Diosal yet chi akꞌle servil Naj yu ebꞌ,
yuxan jaꞌ ebꞌ chi kꞌanon swatxꞌcꞌulal Dios je yibꞌan.
Queyton tuꞌ chi yun slawi jun jowal tuꞌ ma jun cajlebꞌail ey yul je conobꞌ tuꞌ.
6 Chi lawi tuꞌ,
masanil ebꞌ icham winaj yeoc yul conobꞌ tuꞌ,
chi xꞌael skꞌabꞌ ebꞌ yibꞌan noꞌ kꞌopo wacax camnajxa tuꞌ,
7 catuꞌ chi yalon can wan kꞌane ebꞌ jaxca tiꞌ:
Jaon tiꞌ,
man jaon oj jon jix cu makꞌ cam jun ánima tiꞌ,
man kotajoj mactxequel jix makꞌon camoj,
8 yuxan cꞌam ojabꞌ cha waoc scamichal jun ánima cꞌam spenail tiꞌ kibꞌan jon.
Jaach Jehová cu Diosal,
akꞌ mimancꞌulal kibꞌan jon,
jaon ja conobꞌ jon tiꞌ.
Caw jaach jix jon ja coleltej,
cꞌam ojabꞌ cha waoc scamichal jun ánima tiꞌ cu penailoj jon,
yet watxꞌ cꞌamxa mac oj akꞌon sowalil jun tiꞌ,
ẍi ojabꞌ ebꞌ.
9 Jal jex jaex tiꞌ xin,
watxꞌ ojabꞌ cꞌal chi yun je jijen tzet chi yal Jehová cu Diosal,
yet watxꞌ cꞌam chex yakꞌ ijtzan Naj yin scamichal jun ánima tuꞌ.
Ley Yibꞌan Ebꞌ Ix Ix Chi Michꞌcha Cantoj Yet Chi Oc Jowal
10 Jaꞌ yet che yakꞌon jowal yetoj ebꞌ je cajat,
jaꞌ Jehová cu Diosal,
oj akꞌon eyqꞌuey ebꞌ yul je kꞌabꞌ,
catuꞌ oj je yiꞌontej ebꞌ preso.
11 Ta ey junoj je xol jaex tiꞌ,
chi yiloc scꞌul yin junoj ix ix tol caw watxꞌ yili oc ix,
catuꞌ chi yiꞌon xacꞌaltoj naj bꞌey sna yet chi oc ix yistiloj naj.
12 Jaꞌ tituꞌ,
chi tzujle el xil sjolom ix,
cꞌal skꞌuple el yiskꞌaj ix,
13 chi qꞌuexle el spichil ix eyoc yet jix michꞌcha ix tuꞌ,
catuꞌ chi skeꞌ scaey ecꞌ ix yetoj naj winaj tuꞌ.
Jun xꞌaaw chi okꞌ ix yu smam,
cꞌal yu xutx.
Chi lawi tuꞌ,
catuꞌ chi yiꞌon xacꞌal naj je yet Israelal tuꞌ yistiloj cꞌal yoc naj winaj tuꞌ yichamiloj ix ix tuꞌ.
14 Ta jaxa yet chi bꞌey cꞌaltoj tiempo xin,
ta cꞌamxa chi yal scꞌul naj tol ey cꞌal oc ix ix tuꞌ yistiloj naj,
chi skeꞌ sjajletoj ix yu naj.
Asan xin,
cꞌam chi skeꞌ xonle el ix yin tuminal,
tam wal yoc ix yin yakꞌomaloj servilal,
yutol ocnaj xa ix yistiloj naj.
Xolilal Bꞌey Ey Yalon Yet Ebꞌ Bꞌabꞌel Cꞌaale
15 Ta ey junoj winaj ey cawanoj yistil,
caw wal ey scamcꞌulal naj yin junoj ix,
jal yin junxa ix xin,
cꞌam wal scamcꞌulal naj yin ix,
ta chi ali yuneꞌ ebꞌ ix scawanil,
ta jaꞌ junoj ix man wal camcꞌulnebꞌil oj tuꞌ chi bꞌabꞌi ali yuneꞌ,
16 jaꞌ yet chi apni oc scꞌual yet chi spoꞌon ecꞌ stzetyetal naj winaj tuꞌ xol ebꞌ yuninal,
tumi chi skeꞌ yoc yuneꞌ ix camcꞌulnebꞌil tuꞌ yin bꞌabꞌel uninal.
Yutol ta chi yute jaxca bꞌabꞌel unin,
pena xacꞌal mi chi yun yin naj bꞌabꞌel unin yet ix man ochebꞌiloj tuꞌ,
yutol jaꞌ naj tuꞌ bꞌabꞌel unin cꞌaltaꞌ yeoc naj.
17 Sowalil tol jaꞌ naj tuꞌ,
tol bꞌabꞌel unin cꞌaltaꞌ oj yun naj.
Jaꞌ naj tuꞌ caabꞌ tujan chi yun yakꞌle smajul txꞌotxꞌ naj ma wanojxa tzetyetal,
yutol jaꞌton naj bꞌabꞌel cꞌaale,
yuxan ey yalon yet naj ẍaꞌon smajul yet sbꞌabꞌel uninal.
Syaꞌilal Chi Oc Yibꞌan Ebꞌ Uninale Cꞌam Chi Sjije Tzet Chi Yal Smam Xutx
18 Ta ey junoj mactxequel ey junoj scꞌaal caw cꞌam chi sjije niꞌoj,
ma pit chi yute sbꞌa,
cꞌamxa chi ẍaꞌ yabꞌ tzet chi yal smam,
cꞌal xutx,
tam wal chi sjije yet chi akꞌle cuenta,
19 jaꞌ ebꞌ mame txutxe tuꞌ,
sowalil chi yiꞌtoj jun yuninal ebꞌ tuꞌ sattaj sdespacho ebꞌ naj icham winaj yeoc yul conobꞌ,
20 catuꞌ chi yalon ebꞌ jaxca tiꞌ:
Jaꞌ jun kuninal tiꞌ jon,
caw wal pit,
cꞌam niꞌoj swatxꞌil.
Cꞌamxa chi sjije niꞌoj tzet chi kal jon,
junelne pena xacꞌal tzet chi swaꞌne,
asan uqꞌue an chi yunne,
ẍi ebꞌ.
21 Chi lawi tuꞌ xin,
masanil ebꞌ winaj ey yul conobꞌ tuꞌ chi kꞌojchꞌenen camoj.
Queytuꞌ chi yun yakꞌle lawoj jantaj spenail ey yul je conobꞌ tuꞌ.
Jaꞌ yet oj yabꞌen oc ebꞌ je yet Israelal jun tuꞌ,
oj xiwa ebꞌ.
Ey Wanxa Ley
22 Ta ey junoj winaj chi makꞌle cam yu spenail chi el yuneni,
ta tol chi locbꞌale a naj yin junoj teꞌ teꞌ,
23 jaꞌ smimanil tuꞌ,
cꞌam chi cancan tituꞌ masanil akꞌbꞌal,
sowalil chi mujle eytoj smimanil yet jun cꞌual tuꞌ,
yet watxꞌ man oj yetnetoj txꞌotxꞌ txꞌotxꞌ oj yakꞌ Jehová cu Diosal ey jex tuꞌ,
yutol eyoc sjowal scꞌul Dios yibꞌan junoj mactxequel chi locbꞌale a yin junoj teꞌ teꞌ.