Jaꞌ Sleyalil Tzet Chi Yun Yoc Jowal
20
Jaꞌ yet oj toj je yakꞌon jowal yetoj ebꞌ je cajat,
oj je yilaꞌ ta tol ecꞌal sbꞌisil ẍe ebꞌ,
cꞌal scarruaje yet jowal ebꞌ iꞌbꞌil ocoj,
yetoj cꞌal soldado ebꞌ,
caxcꞌal miman sbꞌisil ebꞌ je yintaj,
cꞌam ojabꞌ chex xiwa tet ebꞌ,
yutol jaꞌ Jehová cu Diosal,
jaꞌton Naj jix jex iꞌon eltej bꞌey txꞌotxꞌ Egipto,
jaꞌ oj oc je yetoj.
2 Jaꞌ yet chi apni xacꞌal oc yorail yoc jowal tuꞌ,
jaꞌ naj yakꞌomal xaambꞌal oj kꞌanabꞌ tet ebꞌ soldado,
3 catuꞌ oj yalon jaxca tiꞌ:
Abꞌwej jex wet Israelal,
jaꞌ tinaniꞌ tuxa oj jex toj je yakꞌ jowal yetoj ebꞌ je cajat,
cꞌam ojabꞌ che yakꞌ caabꞌcꞌulal,
cꞌam cꞌal chex xiwi.
Cꞌam cꞌal chex bꞌilwi a yu xiwcꞌulal,
4 yutol jaꞌ Jehová cu Diosal eyoc je yetoj.
Jaꞌ oj yakꞌ jowal yetoj ebꞌ je cajat tuꞌ,
yuxan oj eyqꞌuey ebꞌ je yu,
ẍi ojabꞌ naj yakꞌomal xaambꞌal tuꞌ.
5 Chi lawi tuꞌ,
chi yalon ebꞌ yaaw jaxca tiꞌ:
Ta ey junoj mactxequel tol to jix swaꞌne a junoj sna,
ta cꞌam tocꞌal chi caey ecꞌ yul,
yel xacꞌal watxꞌ tol chi too caey yul sna tuꞌ tinaniꞌ,
jaxa tala chi yunne chi cam yin jowal tuꞌ,
txꞌojxa tala mactxequel chi caey yul sna tuꞌ.
6 Ta ey junoj jex tol to jix je yaw je yuva sat je txꞌotxꞌ,
ta cꞌamto che yakꞌ tzalabꞌoj je cꞌul yetoj je mulnail tuꞌ,
chi skeꞌ je paxtoj bꞌey je na tinaniꞌ.
Ta cꞌamaj,
jex cam tala yin jowal tuꞌ,
jaxa chi yunne,
txꞌojxa tala mac chi yambꞌan oc sat je yuva tuꞌ.
7 Ta ey junoj jex eyxa je wa kꞌane tol chex nupi,
chi skeꞌ chex paxtoj bꞌey je na yet chex nupi.
Ta cꞌamaj,
jex cam tala yin jowal tuꞌ,
jaxa chi yunne,
txꞌojxa tala mac chi nupi yetoj ix ix tuꞌ,
ẍi ojabꞌ ebꞌ.
8 Chi lawi tuꞌ xin,
catuꞌ chi yalon pax ebꞌ syaawil ebꞌ soldado tuꞌ,
jaxca tiꞌ:
Ta ey junoj jex chex xiwi,
chi skeꞌ je paxtoj bꞌey je na,
yet watxꞌ cꞌam chi somcha scꞌul ebꞌ ket soldadoal tiꞌ je yu,
ẍi ojabꞌ ebꞌ.
9 Jaꞌ yet chi lawi skꞌanabꞌ masanil ebꞌ yaaw tuꞌ xin,
catuꞌ chi ale oc yopiso junjun ebꞌ chi iꞌon bꞌey junjun bꞌulan ebꞌ soldado tuꞌ.
10 Ta chex apni oc scawilal junoj conobꞌ yin je yakꞌon jowal yetoj ebꞌ,
bꞌabꞌel che yatoj junoj je chejabꞌ yet chi skꞌanlen tet ebꞌ jaxca tiꞌ:
¿Chim je yoche chi oc watxꞌcꞌulal ma chi kakꞌwej jowal?
ẍi ojabꞌ ebꞌ je chejabꞌ tuꞌ tet ebꞌ.
11 Ta chi ẍaꞌ scꞌul ebꞌ ánima bꞌey junoj conobꞌ tuꞌ,
tol chi oc ebꞌ yin watxꞌcꞌulal je yetoj,
catuꞌ chex ẍaꞌon oc ebꞌ yul sconobꞌ tuꞌ,
sowalil che yakꞌ pural yoc ebꞌ yin je yakꞌomaloj servilal.
12 Ta tol cꞌam chi ẍaꞌ scꞌul ebꞌ je cajat tuꞌ chi oc yin watxꞌcꞌulal je yetoj xin,
ta jaꞌ jowal chi yoche ebꞌ,
ta jaxca tuꞌ,
chex joymo oc yinlaj sconobꞌ ebꞌ tuꞌ,
catuꞌ chex oc je yakꞌon jowal yetoj ebꞌ.
13 Jaꞌ Jehová cu Diosal,
oj akꞌon eyqꞌuey ebꞌ yul je kꞌabꞌ,
catuꞌ oj je makꞌon cam masanil ebꞌ winaj ey tituꞌ yetoj espada.
14 Jal ebꞌ ix ix xin,
ebꞌ unin,
noꞌ jobꞌbꞌeal noꞌ yetoj cꞌal masanil tzetyetal ey bꞌey jun conobꞌ tuꞌ,
je yet chi yun can ocoj,
catuꞌ che yakꞌon tzalabꞌoj je cꞌul yetoj masanil tzetyetal oj ẍaꞌ scꞌul Jehová cu Diosal tol chi cancan yul je kꞌabꞌ,
jaꞌton tzetyetal oj ecꞌ can tet ebꞌ je cajat tuꞌ je yu.
15 Queytuꞌ oj je yun yetoj wanojxa nación tol naat yeel bꞌey caan jex tuꞌ.
16 Jantaj wan conobꞌ oj yaoc Jehová cu Diosal yul je kꞌabꞌ,
pilan che makꞌwej can cam ebꞌ ánima masanil,
cꞌamxa junoj mactxequel che colcan eloj.
17 Jaꞌ ebꞌ oj je qꞌueycan el tuꞌ jaꞌton conobꞌ:
Hitita,
Amorreo,
Cananeo,
Ferezeo,
Heveo,
cꞌal ebꞌ Jebuseo,
jaxca wal jix yun yalon Jehová ey jex.
18 Queytuꞌ che yute ebꞌ,
yet watxꞌ cꞌam che cuytoj je yet yin sbꞌeybꞌal ebꞌ,
jaꞌton yin bꞌeybꞌale tol caw yaabꞌetaj chi el yunen ebꞌ tuꞌ,
yu yiꞌon a can sbꞌi sdiosal ebꞌ,
masanil che qꞌueyle can eloj,
yet watxꞌ cꞌam chi oc je penail sattaj Jehová cu Diosal yetoj ebꞌ.
19 Jaꞌ yet chex oc yul junoj conobꞌ,
tol mimanxa tiempo chex caey ecꞌ yinlaj tuꞌ,
cꞌam ojabꞌ che kꞌajey teꞌ awbꞌeal teꞌ chi yakꞌ sat yetoj chꞌen eche,
yutol oj je loꞌ sat teꞌ.
Jaꞌ teꞌ awbꞌeal teꞌ tuꞌ,
cꞌam ojabꞌ che qꞌueywej el teꞌ,
yutol man laan oj teꞌ yetoj ánima,
cꞌam chi skeꞌ stit teꞌ je yin yet chi yakꞌon jowal teꞌ je yetoj.
20 Jal pax teꞌ comon teꞌ xin,
tol cꞌam sat chi yakꞌa,
chi skeꞌ je kꞌajon ey teꞌ yu yoc teꞌ je waalubꞌoj yinlaj jun conobꞌ tuꞌ,
masantaꞌcꞌal chi eyqꞌuey jun conobꞌ tuꞌ yul je kꞌabꞌ.