Wan Conobꞌ Bꞌey Chi Scol Sbꞌa Ebꞌ Ánima
19
Jix yalon pax naj Moisés jaxca tiꞌ:
Jaꞌ yet xax akꞌle lawoj el masanil wan nación tuꞌ yu Jehová cu Diosal,
jaxa je yiꞌon can oc xꞌotxꞌ ebꞌ tuꞌ,
jaex xa oj jex caey ecꞌ bꞌey sconobꞌ ebꞌ tuꞌ,
cꞌal yul-laj sna ebꞌ.
2 Oj je sicꞌ can el oxebꞌoj conobꞌ bꞌey txꞌotxꞌ txꞌotxꞌ oj yakꞌ Jehová cu Diosal tuꞌ ey jex.
3 Oxebꞌ tujan oj yun je poꞌon ecꞌ txꞌotxꞌ.
Jaꞌ bꞌey snan sat junjun tujan txꞌotxꞌ txꞌotxꞌ tuꞌ,
jatuꞌ chi cancan junjun wan conobꞌ tuꞌ.
Oj je waꞌne cꞌal pax sbꞌeal chi too bꞌey wan conobꞌ tuꞌ,
caw wal watxꞌ chi yun scancan wan bꞌe tuꞌ,
yet watxꞌ chi skeꞌ stoo ebꞌ yin ani yal cꞌal mactxequel chi smakꞌ cam junoj yet animail,
jaꞌ tituꞌ chi skeꞌ stoo scolon sbꞌa ebꞌ bꞌey junoj wan conobꞌ tuꞌ.
4 Jaꞌ mac chi smakꞌ cam junoj ánima,
chi skeꞌ stoo scolon sbꞌa ebꞌ tituꞌ,
yet watxꞌ cꞌam chi cami,
ta man yin oj snaꞌbꞌal jix tita,
catuꞌ ta cꞌam jowal snan xol ebꞌ yet yalantoj.
5 Kꞌinaloj ta ey cawanoj chi too xol-laj teꞌ tzokꞌo siꞌ tinaniꞌ,
catuꞌ ta chi eltej junoj chꞌen eche tuꞌ yin steꞌal yet lalan stzokꞌwi siꞌ tuꞌ,
catuꞌ chi low chꞌen yin naj jaꞌjun yetoj tuꞌ,
catuꞌ chi cami;
jaꞌ naj tuꞌ chi skeꞌ yeli,
chi skeꞌ stoo scolon sbꞌa bꞌey junoj wan conobꞌ tuꞌ.
6 Ta tol ey junoj conobꞌ caw naat ye eloj,
ta ey junoj yican naj jix cam tuꞌ chi too tzajan yintaj naj yet chi yaon ecꞌ spaj tet yet chi spajtzen yetoj sjowal scꞌul.
Kꞌinaloj ta chi michꞌcha naj yu,
catuꞌ chi smakꞌon camoj,
ta man pax smoo oj chi cami,
yutol ta cꞌam jowal xol ebꞌ yet yalantoj.
7 Yuxan chi wal ey jex,
tol che poꞌocan el oxebꞌoj conobꞌ bꞌey chi skeꞌ scolon sbꞌa ebꞌ ánima tuꞌ.
8 Ta oj yakꞌ mimanbꞌoj je txꞌotxꞌ Jehová cu Diosal jaxca wal jix yun yakꞌon can stiꞌ tet ebꞌ kichmam,
9 ta jaxca tuꞌ,
oj je sicꞌ can el oxebꞌojxa conobꞌ,
yet chi oc stzꞌajiloj oxebꞌoj conobꞌ bꞌey chi scol sbꞌa ebꞌ ánima tuꞌ.
Oj eloc wan tuꞌ,
ta tol oj je bꞌeybꞌalne wan chejbꞌanile chi wal can ey jex tinaniꞌ,
yutol caw che camcꞌulnewej Jehová cu Diosal,
yuxan ocanwej cꞌal tzajan yintaj Naj.
10 Queyton tuꞌ oj je yunne,
yet watxꞌ man comonoj chi malecꞌ ẍiqꞌuil ebꞌ ánima cꞌam spenail bꞌey sat txꞌotxꞌ txꞌotxꞌ oj yakꞌ Jehová cu Diosal ey jex,
jaxa tala chi yunne,
chi tit can je yibꞌan yu junoj mac chi cam tuꞌ.
11 Asan ta ey mactxequel tol scajat sbꞌa xin,
jaꞌ jun chi makꞌon junxa tuꞌ,
jaxa chi yunne chi smakꞌon xacꞌal camoj,
catuꞌ chi too scolon sbꞌa bꞌey junoj wan conobꞌ tuꞌ.
12 Jaꞌ ebꞌ naj icham winaj yeoc yul conobꞌ bꞌey chi oc jun camich tuꞌ,
jaꞌ ebꞌ chi akꞌon iꞌletoj jun makꞌom cam ánima tuꞌ,
chi lawi tuꞌ,
chi ale oc naj yul skꞌabꞌ junoj yican jun jix cam tuꞌ,
jaxa jun yican naj jix cam tuꞌ chi makꞌon cam jun makꞌom cam ánima tuꞌ.
13 Cꞌam cꞌal mimancꞌulal yin,
yet watxꞌ man comonoj cꞌal chi makꞌle cam ebꞌ ánima cꞌam spenail bꞌey xol ebꞌ je yet conobꞌ tuꞌ.
Ta jaxca tuꞌ,
watxꞌ cꞌal oj yun je yelocoj.
14 Jaꞌ bꞌey txꞌotxꞌ txꞌotxꞌ oj yakꞌ Jehová cu Diosal ey jex tuꞌ,
sowalil ey ojabꞌ yeloc apnoj smoonal txꞌotxꞌ yul je sat,
jaxca mactxequel ey yet stiꞌ je txꞌotxꞌ tuꞌ,
jaxca wal ye can ey smoonal yet yalantoj.
Ley Yibꞌan Ebꞌ Lekꞌtiꞌ Testigo
15 Ta asan junoj mac chi yaoc sbꞌa testigoal yin junoj ánima ey spenail chi oqui,
cꞌam chi skeꞌ yoc xacꞌal yibꞌan.
Masantaꞌcꞌal ey cawanoj ma oxwanoj testigo,
catuꞌ chi oc spenail tuꞌ yibꞌan.
16 Ta ey junoj mac pena snaꞌbꞌal catuꞌ chi yaon oc sbꞌa yin lekꞌtiꞌ testigoal yin junoj mactxequel,
ta chi stecꞌbꞌa xacꞌal sbꞌa yaloni tol ey spenail jun ánima tuꞌ,
17 ta jaxca tuꞌ,
sowalil chi iꞌletoj ebꞌ cawan tuꞌ sattaj Jehová,
cꞌal bꞌey sattaj ebꞌ yakꞌomal xaambꞌal,
cꞌal sattaj ebꞌ juez,
jaꞌton ebꞌ eyoc yin yopiso yu yilon tzet chi yunne.
18 Jaꞌ ebꞌ eyoc yin yaawil tuꞌ,
jaꞌ ebꞌ chi cam yiloni ta yel jun kꞌane tuꞌ.
Ta lekꞌtiꞌal kꞌane chi yal jun testigo tuꞌ xin,
19 jaꞌ yibꞌan chi toocan tzet chi skꞌan yin jun ánima tuꞌ.
Queytuꞌ chi yun slawi jun lekꞌtiꞌal tuꞌ je xol.
20 Jaꞌ yet oj yabꞌen ebꞌ ánima jaxca tuꞌ,
oj xiwa ebꞌ,
ta jaxca tuꞌ manxa oj yun jun spenail tuꞌ ebꞌ.
21 Cꞌam ojabꞌ chi cus je cꞌul yin junoj queytuꞌ chi yunne.
Jaxca wal tzet chi skꞌan jun lekꞌtiꞌ testigo yin junoj ánima,
queytuꞌ oj utele pax oj.
Ta chi skꞌanaꞌ tol chi makꞌle camoj,
ma chi iꞌle eltej sbꞌakꞌ sat,
ma chi makꞌle eltej junoj yee,
ma chi tzokꞌle el skꞌabꞌ,
ma yajan,
jaxca wal tzet jix skꞌan tuꞌ,
quey pax tuꞌ chi yun yoc yibꞌan jun mac chi kꞌanon tuꞌ.