2 Al tet ebꞌ ja wet Israelal jaxca tiꞌ:

Jaꞌ yin xꞌotxꞌ ebꞌ jix ẍaꞌ,

jatuꞌ oj yiꞌ yet ebꞌ Levita yin jayebꞌoj conobꞌal bꞌey oj caey ecꞌ ebꞌ;

catuꞌ cha wakꞌon cꞌal pax txꞌotxꞌ colan yin bꞌey yinlaj eltoj conobꞌ tuꞌ,

bꞌey oj skeꞌ slow sjobꞌbꞌeal noꞌ ebꞌ.

3 Jaꞌ bꞌey wan conobꞌ tuꞌ oj caey ecꞌ ebꞌ,

yuxan jaxa yinlaj eltoj conobꞌ tuꞌ oj low sjobꞌbꞌeal noꞌ ebꞌ.

4 Jaꞌ txꞌotxꞌ bꞌey oj low noꞌ sjobꞌbꞌeal noꞌ ebꞌ,

ey ojabꞌ 450 metro chi yun stoo yinlaj smuroal conobꞌ.

5 Jaꞌ yin masanil jun txꞌotxꞌ tuꞌ ey 900 metro bꞌey junjun spacꞌul,

laan cꞌal yechel scanpaqꞌuil.

Jaxa snanecꞌtoj sat txꞌotxꞌ txꞌotxꞌ tuꞌ,

jaꞌ tituꞌ chi ey junjun conobꞌ.

6 Jaꞌ xol wan conobꞌ chi akꞌle tet ebꞌ Levita tuꞌ,

ey ojabꞌ wajebꞌoj conobꞌ bꞌey chi skeꞌ stoo scolon sbꞌa junoj mactxequel chi makꞌwi cam ánima.

Txꞌoj pax chi yun je yakꞌon can junojxa 42 conobꞌ tet ebꞌ.

7 Jaꞌ yin masanil sowalil chi akꞌle junoj 48 conobꞌ tet ebꞌ Levita yetoj txꞌotxꞌ txꞌotxꞌ yinlaj bꞌey chi low noꞌ sjobꞌbꞌeal noꞌ ebꞌ.

8 Jaꞌ yin smajul xꞌotxꞌ ebꞌ yet Israelal ebꞌ,

jatuꞌ chi el wan conobꞌ chi akꞌle tet ebꞌ Levita.

Yu jun tuꞌ xin,

yuxan junjun cꞌal icꞌaaleal chi yakꞌ jayebꞌoj wan conobꞌ tuꞌ.

Jaꞌ wan icꞌaale mimej xꞌotxꞌ,

ecꞌal pax conobꞌ chi akꞌle tet ebꞌ yu ebꞌ Levita tuꞌ,

jal pax wan icꞌaale txenne yeoc xꞌotxꞌ,

txenne pax conobꞌ che yakꞌ tet ebꞌ,

ẍi Dios.

9 Jix yalon pax Jehová tet naj Moisés jaxca tiꞌ:

10 Al wan tiꞌ tet ebꞌ ja wet Israelal jaxca tiꞌ:

Jaꞌ yet chex kꞌaxbꞌo ecꞌtoj bꞌey yul jaꞌ Jordán tuꞌ,

catuꞌ oj jex oc yin conobꞌal bꞌey sat txꞌotxꞌ Canaán tuꞌ,

11 oj je sicꞌ el jayebꞌoj conobꞌ bꞌey oj skeꞌ scolon sbꞌa junoj mactxequel chi makꞌon cam junoj ánima,

ta man yin oj snaꞌbꞌal chi tita catuꞌ chi yuneni.

12 Jaꞌ tituꞌ chi skeꞌ scolon sbꞌa junoj mactxequel,

caxcꞌal chi seyle ecꞌ yu junojxa mactxequel eyto yu sbꞌa yetoj jun jix cam tuꞌ,

cꞌam chi skeꞌ scami,

ta cꞌamto chi oc kꞌanlebꞌal tet yu ebꞌ syaawil conobꞌ.

13 Jaꞌ wan conobꞌ bꞌey chi scol sbꞌa ebꞌ tuꞌ,

ey wajebꞌ conobꞌal chi skeꞌ scolon sbꞌa ebꞌ ánima tuꞌ.

14 Oxebꞌ chi can bꞌey skꞌaxepal ecꞌtoj jaꞌ Jordán,

jal oxebꞌxa xin,

chi can bꞌey Canaán.

15 Jaꞌ bꞌey wajebꞌ conobꞌ tuꞌ chi scol sbꞌa ebꞌ chi makꞌon cam junoj ánima,

ebꞌ je yet Israelal cꞌal ebꞌ man je yet conobꞌoj je bꞌa yetoj,

ebꞌ tol tucꞌal caan ecꞌ je xol,

ma ebꞌ tucꞌal chi ecꞌabꞌtoj yin posadail.

Jaꞌ tituꞌ chi scol sbꞌa ebꞌ ta man yin oj snaꞌbꞌal chi tita catuꞌ chi smakꞌon cam junoj yet animail.

16-18 Ta ey junoj mactxequel chi makꞌon junoj ánima yetoj junoj chꞌen mitxꞌkꞌabꞌe yet jowal,

ma yetoj junoj comon chꞌen,

ma yetoj junoj teꞌ,

ta chi cam jun ánima tuꞌ yu,

jaꞌ jun chi makꞌwa tuꞌ,

makꞌom cam ánima ton jun tuꞌ,

sowalil chi makꞌle cꞌal pax camoj.

19 Jaꞌ junoj eyto yu sbꞌa yetoj naj jix cam tuꞌ,

jaꞌ chi makꞌon pax cam naj makꞌom cam ánima tuꞌ,

yal cꞌal bꞌeytuꞌ chi ẍaꞌle sbꞌa yetoj.

20 Ta ey junoj mactxequel chi tenontoj pacꞌna junoj ánima yutol chi chichon oc scꞌul yin,

ma chi stentoj junoj tzetyetal yibꞌan junojxa yu chichoncꞌulal,

21 ma chi smakꞌ yetoj skꞌabꞌ yutol scajat sbꞌa ebꞌ,

jaxa chi yunne chi cꞌamxa cꞌal jun chi makꞌle tuꞌ,

sowalil chi makꞌle cam jun mactxequel tuꞌ,

yutol makꞌom cam ánima xa jaxca tuꞌ.

Yuxan jaꞌ junoj eyto yu sbꞌa yetoj naj jix cam tuꞌ,

jaꞌ chi makꞌon cꞌal pax camoj.

22 Asan xin,

ta ey junoj mactxequel chi tenontoj junoj ánima,

catuꞌ man wal yin oj snaꞌbꞌal chi tita,

tam wal tol ey jowal xol ebꞌ,

ma xin,

chi stentoj junoj tzetyetal yibꞌan,

23 yetoj cꞌal pax oj,

ta ma yilaꞌ catuꞌ chi skꞌojontoj junoj chꞌen ta cꞌuxan chi apni yibꞌan junoj mactxequel,

catuꞌ chi cꞌamxa cꞌal eloj,

ta man scajatoj sbꞌa ebꞌ,

man yu oj xacꞌal sjowal scꞌul yuxan queytuꞌ jix yunne;

24 ta jaxca tuꞌ,

jaxa ebꞌ conobꞌ bꞌey chi yoche chi scol sbꞌa tuꞌ,

jaꞌ ebꞌ chi naꞌon oc yin jun chi makꞌon cam jun ánima tuꞌ,

jatacꞌalaꞌ tzet chi yun yalon ley yibꞌan jun ey spenail tuꞌ,

cꞌal jun eyto yu sbꞌa yetoj jun jix cam tuꞌ.

25 Jaꞌ ebꞌ ánima jix iloni,

jaꞌ ebꞌ chi colon el naj makꞌom cam ánima tuꞌ yul skꞌabꞌ naj eyto yu sbꞌa yetoj jun jix cam tuꞌ.

Jaxa ebꞌ jix ilon tuꞌ chi akꞌon meltzo naj junelxa bꞌey jun conobꞌ bꞌey jix bꞌetle scol sbꞌa naj tuꞌ.

Jaꞌ jun mactxequel tuꞌ chi can cꞌal can tituꞌ masantaꞌcꞌal chi cam naj sat yakꞌomal xaambꞌal sicꞌbꞌil oc yin yopiso yet tuꞌ.

26 Asan xin,

ta chi eltoj naj yinlaj conobꞌ bꞌey eyecꞌ scolon sbꞌa tuꞌ,

27 catuꞌ chi ẍaꞌlen sbꞌa yetoj jun mactxequel eyto yu sbꞌa yetoj naj camom tuꞌ,

catuꞌ chi makꞌle cam naj yu naj tuꞌ,

cꞌam chi oc spenailoj naj,

yutol yinlaj na eeltoj naj chi scol sbꞌa tuꞌ.

28 Yu jun tuꞌ xin,

jaꞌ naj jix makꞌon cam naj tuꞌ,

sowalil chi can bꞌey yul conobꞌ tuꞌ,

masantaꞌcꞌal chi cam naj sat yakꞌomal xaambꞌal.

Catuꞌ chi xa skeꞌ stoo naj bꞌey xꞌotxꞌal bꞌey caan.

29 Jaꞌ wan tiꞌ chejbꞌanile chi yun can je xol,

cꞌal xol ebꞌ je yicꞌaal yal cꞌal bꞌeytuꞌ ey jex ecꞌoj.

30 Ta ey cawanoj ma oxwanoj chi yakꞌ testigoal sbꞌa yin junoj mactxequel chi makꞌwi cam ánima,

jaꞌ jun tuꞌ ey sleyal tol chi cami.

Ta asan jun testigo xin,

cꞌam chi skeꞌ scami.

31 Cꞌam chi skeꞌ ẍaꞌle chꞌen tumin ta xax cawxi oc spenail junoj makꞌom cam ánima tuꞌ yibꞌan,

sowalil tol chi cam xacꞌal.

32 Cꞌam chi skeꞌ ẍaꞌle tumin tet naj makꞌom cam ánima tuꞌ yu yel bꞌey conobꞌ bꞌey eyecꞌ scolon sbꞌa tuꞌ,

cꞌam cꞌal chi skeꞌ smeltzo bꞌey sconobꞌ,

yet cꞌamto chi cam naj sat yakꞌomal xaambꞌal tuꞌ.

33 Cꞌam ojabꞌ che yetnetoj txꞌotxꞌ txꞌotxꞌ bꞌey oj jex caey ecꞌ tuꞌ yu ẍiqꞌuil junoj ánima chi makꞌle camoj.

Yuxan ta ey chicꞌ chi maley sat txꞌotxꞌ,

cꞌam junoj tzetyetal chi skeꞌ yakꞌon tanoj,

asan tol chi cam jun jix makꞌwi cam ánima tuꞌ.

34 Yu jun tuꞌ xin,

cꞌam ojabꞌ che yetnetoj sat txꞌotxꞌ txꞌotxꞌ bꞌey caan jex ecꞌ tuꞌ,

tol jain Jehová jin tiꞌ,

ey jin cꞌal ecꞌ je xol bꞌey caan jex ecꞌoj,

ẍi Dios.