Sleyalil Yu Smajul Txꞌotxꞌ Ebꞌ Ix Ix
36
Jaꞌ ebꞌ yaaw yeoc xol junjun tujan ebꞌ yuninal naj Galaad,
jaꞌton ebꞌ yicꞌaal naj Maquir scꞌaal Manasés yitxiquin naj José,
jaꞌton ebꞌ tuꞌ jix bꞌet ilon naj Moisés yetoj cꞌal ebꞌ syaawil yeoc yin junjun tujan ebꞌ yicꞌaal ebꞌ yet Israelal.
Jix yalon ebꞌ jaxca tiꞌ.
2 Jaꞌ Jehová jix aloni,
tol jaach Moisés jaach tiꞌ,
cha poꞌoecꞌ txꞌotxꞌ cu majul txꞌotxꞌ jaon yicꞌaal jon Israel tiꞌ,
jatacꞌalaꞌ bꞌey oj can ket junjun jon.
Jix yalon cꞌal pax Jehová tol jaꞌ jun tujan txꞌotxꞌ smajul xꞌotxꞌ naj Selofhad,
naj camom kuẍtaj jon,
chi skeꞌ yakꞌle can txꞌotxꞌ tet ebꞌ ix scutzꞌin naj.
3 Asan xin,
kꞌinaloj ta chi yiꞌle sbꞌa ebꞌ ix yetoj junoj ebꞌ ket conobꞌ tol txꞌoj icꞌaaleal yeoc cu xol tiꞌ,
cꞌamxa mi yalon yet ebꞌ kicꞌaal jaon tiꞌ yin txꞌotxꞌ,
jaxam yicꞌaal ebꞌ naj yichamil ebꞌ ix tuꞌ eyxa yalon yet yin txꞌotxꞌ,
ta jaxca tuꞌ xin,
chim el yajanil cu majul txꞌotxꞌ chi kiꞌcan oc tiꞌ jon.
4 Chi lawi tuꞌ xin,
jaxa yet chi eyol jun abꞌil yet chi jajcha el junoj tzetyetal,
jaxca mi wal tuꞌ chi yun scan xacꞌal can txꞌotxꞌ xꞌotxꞌ ebꞌ ix tuꞌ tet junojxa icꞌaaleal tuꞌ,
catuꞌ cꞌamxa kalon ket yin txꞌotxꞌ jon,
ẍi ebꞌ naj.
5 Jix lawi tuꞌ,
jix yalon naj Moisés tet ebꞌ,
jatacꞌalaꞌ tzet jix yun yalon Jehová:
—Caw yel chi yal ebꞌ yicꞌaal naj José tiꞌ.
6 Jaꞌ ebꞌ ix scutzꞌin naj Selofhad chi skeꞌ yiꞌlen sbꞌa ebꞌ yetoj ebꞌ naj tol yican to sbꞌa yetoj smam ebꞌ ix.
7 Yet watxꞌ jaꞌ xꞌotxꞌ ebꞌ ix chi ẍaꞌ,
cꞌam chi skeꞌ yoc txꞌotxꞌ smajuloj junojxa txꞌoj icꞌaaleal.
Yuxan masanil ebꞌ Israel tiꞌ,
sowalil chi scolecꞌ xꞌotxꞌ ebꞌ tet junojxa icꞌaaleal.
8 Ta ey junoj ix ix yin yal cꞌal tzet icꞌaaleal tol ey smajul xꞌotxꞌ smam yiꞌnaj can ocoj,
sowalil tol jaꞌ junoj naj winaj tol jacꞌal oc yetoj jun icꞌaaleal tuꞌ chi ioni.
Queytuꞌ chi yun je colon can el smajul txꞌotxꞌ je mam.
9 Cꞌam chi skeꞌ stoo xꞌotxꞌ junoj icꞌaaleal tet junojxa icꞌaaleal.
Junjun cꞌal icꞌaaleal xol ebꞌ Israel chi yiꞌ cꞌal can oc smajul txꞌotxꞌ chi ẍaꞌ.
10-11 Yu jun tuꞌ xin,
jaꞌ ebꞌ ix scutzꞌin naj Selofhad,
jaꞌton ix Mahlá,
ix Tirsá,
ix Hoglá,
ix Milcá cꞌal ix Noá,
jix sjije ebꞌ ix yunen jaxca jix yun yalon Jehová tet naj Moisés;
yuxan jix yiꞌle sbꞌa ebꞌ yetoj ebꞌ naj yican to sbꞌa yetoj smam ebꞌ ix.
12 Jaꞌton ebꞌ yicꞌaal Manasés scꞌaal naj José.
Queytuꞌ jix yun scancan smajul txꞌotxꞌ ebꞌ,
bꞌey titnaj yicꞌaal smam ebꞌ ix.
13 Jaꞌton wan chejbꞌanile tiꞌ,
jix yal Jehová tet naj Moisés,
yet chi sbꞌeybꞌalne ebꞌ Israel.
Jix al-le tet ebꞌ yet eyecꞌ ebꞌ bꞌey yacꞌalil txꞌotxꞌ Moab,
bꞌey stiꞌ jaꞌ Jordán sattaj ecꞌtoj Jericó.