Wan Conobꞌ Bꞌey Chi Scol Sbꞌa Ebꞌ Makꞌom Cam Ánima
20
Jix lawi tuꞌ xin, catuꞌ jix yalon Jehová tet naj Josué jaxca tiꞌ: 2 Al tet ebꞌ ja wet Israelal, tol chi sicꞌ can el jayebꞌoj conobꞌ ebꞌ bꞌey chi skeꞌ scolon sbꞌa ebꞌ ánima, jaxca jix yun walon can tet naj jin chejabꞌ Moisés. 3 Ta ey junoj mactxequel chi smakꞌ cam junoj yet animail yin tol man yin oj snaꞌbꞌal chi tita, chi skeꞌ stoo scolon sbꞌa bꞌey junoj wan conobꞌ tuꞌ, yet watxꞌ cꞌam chi makꞌle cam yu junoj yican jun jix cam tuꞌ. 4 Jaꞌ mactxequel chi too scol sbꞌa bꞌey junoj wan conobꞌ tuꞌ, sowalil chi apni oc bꞌey spuertail conobꞌ, catuꞌ chi yalon sbꞌa sattaj ebꞌ icham winaj yeoc yul conobꞌ tuꞌ, tzet yu, yuxan chi apni oc scol sbꞌa. Ta jaxca tuꞌ, jaꞌ ebꞌ chi chaꞌon octoj jun ánima tuꞌ yul jun conobꞌ tuꞌ, catuꞌ chi txꞌoxle sattaj conobꞌ yet chi skeꞌ scaey ecꞌoj. 5 Ta chi ujtele ecꞌ naj yu junoj yican jun jix cam tuꞌ, jaꞌ ebꞌ naj icham winaj yeoc yul conobꞌ tuꞌ chi colon eloj, cꞌam chi ale oc naj yul skꞌabꞌ camich yu ebꞌ. Chi col-le el naj, yutol man wal yin oj snaꞌbꞌal jix tita, yutol man scajatoj sbꞌa naj yetoj jun ánima jix cam yu tuꞌ. 6 Jaꞌ jun mactxequel chi too scol sbꞌa tuꞌ, chi cancan tituꞌ, masantaꞌcꞌal chi naꞌle oc yin sattaj masanil conobꞌ, catuꞌ chi yalon ebꞌ tol cꞌam spenail, asan xin chi too cancan naj tituꞌ, masantaꞌcꞌal chi to camtoj naj sat yakꞌomal xaambꞌal jix naꞌon oc yin jun mactxequel tuꞌ. Chi lawi tuꞌ, chi xa skeꞌ smeltzo naj bꞌey sna ma bꞌey sconobꞌ tuꞌ, ẍi Dios tet naj Josué.7 Yu tuꞌ xin, jix sicꞌon el wan conobꞌ ebꞌ Israel bꞌey chi too scol sbꞌa ebꞌ ánima tuꞌ, jaꞌton Quedes bꞌey Galilea, bꞌey tzalquiltaj txꞌotxꞌ yul yet txꞌotxꞌ Neftalí, cꞌal Siquem bꞌey tzalquiltaj yul yet Efraín, cꞌal Quiriat-arbá, jaꞌ chi yij cꞌal pax Hebrón, jatuꞌ ey bꞌey txꞌotxꞌ tzalquiltaj txꞌotxꞌ yul yet Judá. 8 Jal junxa ey bꞌey skꞌaxepal ecꞌtoj jaꞌ Jordán, bꞌey spananil txꞌotxꞌ cusiltaj txꞌotxꞌ yetcꞌulal bꞌey chi aol cꞌu sattajto conobꞌ Jericó, jatuꞌ jix sicꞌ el wan conobꞌ tuꞌ ebꞌ, jaꞌton: Béser bꞌey yet ebꞌ yicꞌaal Rubén. Jaxa yul yet Galaad, jix sicꞌ el conobꞌ Ramot ebꞌ, jatuꞌ ey bꞌey xꞌotxꞌ ebꞌ yicꞌaal Gad. Jaxa bꞌey yul yet Basán, jix sicꞌ el conobꞌ Golán ebꞌ, bꞌey xꞌotxꞌ ebꞌ yicꞌaal Manasés. 9 Jaꞌton wan conobꞌ tuꞌ jix sicꞌ el ebꞌ, bꞌey chi scol sbꞌa ebꞌ Israel, cꞌal ebꞌ txꞌoj conobꞌal caan ecꞌ xol ebꞌ tuꞌ. Jaꞌ tituꞌ chi skeꞌ scolon sbꞌa junoj mactxequel chi smakꞌ cꞌam junoj ánima yin tol man yin oj snaꞌbꞌal chi tita. Asan xin, sowalil chi naꞌle oc yin yu ebꞌ conobꞌ. Ta tol yel man yin oj xacꞌal snaꞌbꞌal jix tita yet jix cam jun ánima tuꞌ yu, yuxan cꞌam chi skeꞌ smakꞌle cam naj yu yican jun jix cam tuꞌ.