Jix Yal Can Naj Moisés Tet Ebꞌ Israel Tol Jijem Chi Yute Sbꞌa Ebꞌ
4
Jix yalon pax Moisés tet ebꞌ yet Israelal jaxca tiꞌ:
Jaꞌ tinaniꞌ jex wet conobꞌ,
abꞌwej wan chejbꞌanile cꞌal wan ley tol oj wal ey jex tiꞌ,
yet watxꞌ oj je jije cꞌal je bꞌeybꞌalneni,
yet oj jex apnoj oc caey bꞌey txꞌotxꞌ txꞌotxꞌ oj yakꞌ Jehová,
jaꞌton sDiosal ebꞌ kichmam je yetoj.
2 Cꞌam ojabꞌ che yaoc stzꞌajil wan kꞌane oj wal ey jex tiꞌ,
cꞌam ojabꞌ che yiꞌ pax eloj,
tol oj je jije ẍejbꞌanil Jehová cu Diosal jaxca wal chi yun walon can ey jex.
3 Jix je yil wal tzet jix yun Jehová yetoj ebꞌ jix oc yin eyilal tet jun comon dios chi yij Baal-peor;
je sattaj wal jix qꞌueyle el ebꞌ yu Naj.
4 Jal masanil ebꞌ jix jijen tzet chi yalaꞌ,
ebꞌ watxꞌ snaꞌbꞌal,
ilaꞌ tol iquisto cꞌal ecꞌ ebꞌ tinaniꞌ.
5 Jix wakꞌ wan ley cꞌal wan chejbꞌanile yet Jehová cu Diosal je cuyuꞌ,
chi walon can el ey jex,
yet watxꞌ oj je bꞌeybꞌalne bꞌey sat txꞌotxꞌ txꞌotxꞌ oj yakꞌ ey jex.
6 Jijewej xin,
catuꞌ che yaon oc wan chejbꞌanile tiꞌ yin yopiso,
yutol jaꞌ yu wan tuꞌ,
yuxan jelan oj jex elocoj,
catuꞌ ey je naꞌbꞌal,
yintaj wanojxa mimej conobꞌlaj.
Jaꞌ yet oj yabꞌen ebꞌ,
catuꞌ oj yalon ebꞌ jaxca tiꞌ:
Caw yel,
caw jelan ton ebꞌ,
caw ey snaꞌbꞌal jun conobꞌ tiꞌ,
caw miman conobꞌ ton yeocoj,
ẍi ebꞌ,
oj yalon ebꞌ je yin.
7 Tumi ey junojxa miman nación eyecꞌ sdiosal scawilal ma scꞌatan,
jaxca wal yeecꞌ Jehová cu Diosal cu xol jaxca jon tiꞌ.
Jaꞌ yet chi cu kꞌanonwej junoj tzetyetal tet,
chi yakꞌ ey jon.
8 ¿Tumi ey junoj nación tol ey sley ma junojxa chejbꞌanile tol caw jichan jaxca jun chi wal can ey jex tinaniꞌ?
9 Yu tuꞌ xin,
cꞌam ojabꞌ chi too qꞌueycꞌulal wan cuybꞌanile tiꞌ yin je naꞌbꞌal,
cꞌal jantaj tzet jix je yilaꞌ.
Catuꞌ cꞌam ojabꞌ che yiꞌel wan tiꞌ yin je naꞌbꞌal yet iquis jex ecꞌoj.
Jaꞌ tiꞌ je yet,
tol sowalil che yal tet ebꞌ je yuninal cꞌal tet ebꞌ je yi je txiquin.
Jix Kꞌanabꞌ Dios Bꞌey Sjolom Txꞌotxꞌ Wonan Horeb
10 Naꞌwejtej yet jun cꞌual yet ey jon ecꞌ sattaj Jehová cu Diosal bꞌey txꞌotxꞌ wonan Horeb,
yet jix yalon Naj ey jin jaxca tiꞌ:
Yambꞌa oc masanil ebꞌ ja wet conobꞌ yet watxꞌ,
oj wakꞌ jin kꞌane yotajne el ebꞌ,
cꞌal jin cuyun can ebꞌ,
yet watxꞌ ey weloc apnoj yul sat ebꞌ yet iquis ecꞌ ebꞌ sat txꞌotxꞌ txꞌotxꞌ tiꞌ,
cꞌal scuyon can yuninal ebꞌ,
ẍi Dios ey jin.
11 Jaꞌ yet tuꞌ,
yaman jon ecꞌ bꞌey yich txꞌotxꞌ wonan tuꞌ,
jaxa bꞌey yinlaj wonan tuꞌ,
caw naat chi a chulna xaj kꞌakꞌ cꞌal ya topopoj smucꞌal satcan,
kꞌej jolinaj xacꞌal yili satcan yu.
12 Jix kꞌanabꞌ Jehová ey jon bꞌey snan xol jun xaj kꞌakꞌ tuꞌ.
Jix kabꞌ wal yoc yul snukꞌ Dios yetoj skꞌane,
asan xin,
asan cꞌal skꞌane jix kabꞌe,
ma kiloc yin Naj.
13 Yet jix yalon can Naj bꞌey jix yakꞌ can stiꞌ ey jon,
jix yalaꞌ tol chi cu jijewej wan laonebꞌ chejbꞌanile jix stzꞌibꞌe oc yin caabꞌ jenan chꞌen chꞌen.
14 Jix yalon cꞌal pax Jehová ey jin tol chex jin cuy yin ẍejbꞌanil cꞌal yin sley,
yet watxꞌ che jije cꞌal je bꞌeybꞌalnen bꞌey sat txꞌotxꞌ txꞌotxꞌ oj je yiꞌcan oc bꞌey skꞌaxepal ecꞌtoj jaꞌ Jordán tuꞌ.
Cuybꞌanile Yet Watxꞌ Cꞌam Chi Oc Eyilal Tet Echele
15 Jaꞌ yet jix kꞌanabꞌ eltej Jehová snan xol jun kꞌakꞌ ey jon bꞌey txꞌotxꞌ wonan Horeb,
jaꞌ yet tuꞌ cꞌam mac jix je yiloc yin.
16 Yuxan che yil cꞌal je bꞌa,
cꞌam ojabꞌ che yetnetoj je bꞌa cꞌal je waꞌnen a junoj echele je diosaloj,
yechel winaj ma yechel ix,
17 ma yechel noꞌ noꞌ ey sat txꞌotxꞌ txꞌotxꞌ tiꞌ,
ma yechel noꞌ tzꞌiquin,
18 ma yechel junoj noꞌ noꞌ chi sjutx sbꞌa bꞌey sat txꞌotxꞌ txꞌotxꞌ tiꞌ,
ma yechel noꞌ pescado,
ma junojxa tujan noꞌ noꞌ ey yul-laj jaꞌ jaꞌ.
19 Jaꞌ yet chex atoj tꞌanan satcan,
catuꞌ che yilon atoj cꞌu cꞌal xꞌaaw cꞌal masanil jantaj weycan,
yetoj cꞌal masanil tzet ey bꞌey satcan,
cꞌam ojabꞌ bꞌey chi somcha el je naꞌbꞌal,
catuꞌ che yalon je bꞌa ma je yoc yin eyilal tet;
yutol jaꞌ Jehová cu Diosal,
jaꞌ jix waꞌnen wan tuꞌ,
yet watxꞌ chi oc swatxꞌiloj masanil conobꞌ caan sat txꞌotxꞌ txꞌotxꞌ tiꞌ.
20 Yutol jaon tiꞌ,
jaꞌ Jehová jix cu iꞌon eltej bꞌey jun conobꞌ tol jaxca junoj jorna bꞌey chi akꞌle uloj chꞌen chꞌen,
jaꞌton bꞌey Egipto.
Yet watxꞌ sconobꞌ xa Dios jix kun can ocoj,
jaxca ton keoc tinaniꞌ.
21 Jix tit sjowal scꞌul Jehová win,
je yu cꞌal jaex tiꞌ.
Jix yaloni tol manxa oj jin ecꞌtoj skꞌaxepal jaꞌ Jordán,
catuꞌ manxa oj jin apnoj oc bꞌey sat txꞌotxꞌ txꞌotxꞌ tol oj yakꞌ Naj ey jex.
22 Yuxan jaꞌ titiꞌ oj jin camoj,
manxa oj jin kꞌaxbꞌo ecꞌtoj bꞌey jaꞌ Jordán tuꞌ.
Jal jex jaex tiꞌ,
oj jex kꞌaxbꞌo ecꞌtoj yul jaꞌ,
yutol oj jex caey bꞌey jun txꞌotxꞌ txꞌotxꞌ tol caw watxꞌ tuꞌ.
23 Jijewej xin,
cꞌam ojabꞌ chi too qꞌueycꞌulal jun bꞌey jix yakꞌ can stiꞌ Jehová cu Diosal ey jex.
Cꞌam ojabꞌ junoj echele tol chi al-le oc diosal che waꞌne aoj,
yutol caw ey sjowal scꞌul Dios yin.
24 Caw jow Dios yin mactxequel chi oc yin eyilal tet junoj tzetyetal chi al-le oc diosal.
Laan wal sjowal Naj jaxca kꞌakꞌ kꞌakꞌ chi tzꞌaꞌtoj masanil tzetyetal yu.
25 Jaꞌ yet eyxa je yuninal cꞌal je yi je txiquin,
yet caan jex xa ecꞌ bꞌey sat txꞌotxꞌ txꞌotxꞌ tuꞌ,
tala che yute je bꞌa jaxca ebꞌ cꞌam snaꞌbꞌal,
catuꞌ che waꞌnen a junoj echele je diosaloj,
catuꞌ che yaon oc je penail sattaj Jehová cu Diosal,
catuꞌ che txꞌemontej sjowal scꞌul je yibꞌan.
26 Chi wa can oc satcan cꞌal txꞌotxꞌ txꞌotxꞌ tiꞌ yin testigoaloj je yin,
ta tol jaxca tuꞌ oj je yunne,
yin eymanil oj jex qꞌueyle eloj.
Manxa oj jex iquisbꞌoj ecꞌ sat txꞌotxꞌ txꞌotxꞌ oj yakꞌ Jehová ey jex bꞌey skꞌaxepal ecꞌtoj jaꞌ Jordán tuꞌ,
oj jex qꞌueyle el yin junelne.
27 Jaꞌ Jehová,
oj jex akꞌon sajlemtoj xol-laj wanxa nación,
jaywanxane jex oj jex cancan yu Jehová.
28 Jaꞌ tituꞌ oj je yakꞌ servil comon dios tol waꞌnebꞌil yu ebꞌ ánima,
teꞌ teꞌ cꞌal chꞌen chꞌen,
tol cꞌam chi skeꞌ yilwani,
cꞌam chi skeꞌ yabꞌeni,
cꞌam chi skeꞌ sloꞌon junoj tzetyetal,
cꞌam pax chi skeꞌ yiꞌon skaꞌeꞌ.
29 Ta jaꞌ yet ey jex xa ecꞌ tituꞌ,
catuꞌ oj je seyon ecꞌ Dios yetoj masanil je pixan,
oj colwa Naj je yetoj.
30 Jaꞌ yet oj lawoj je yecꞌ xol wan mimej syaꞌtajilal tuꞌ,
ta oj je ya cꞌal oc Jehová cu Diosal yipoj je cꞌul junelxa,
catuꞌ oj je jijen tzet chi yalaꞌ,
31 man oj jex bꞌejlecan yu Naj.
Man oj jex qꞌueyle el yu,
man oj toj qꞌueycꞌulal yu bꞌey jix yakꞌ can stiꞌ tet ebꞌ kichmam,
yutol caw chi okꞌ scꞌul Jehová cu Diosal je yin.
32 Naꞌwejtej wan tiempo xax ecꞌ el yet tax peyxa,
yet tax jix waꞌnele ebꞌ ánima yu Dios bꞌey sat txꞌotxꞌ txꞌotxꞌ tiꞌ,
catuꞌ chi too je kꞌanlen ecꞌ bꞌey chi apni oc ian masanil yul yibꞌankꞌinal tiꞌ,
ta eyxa bꞌey jix yunne,
ma eyxa bꞌey jix abꞌle junoj tzetyetal caw miman yeloc apnoj jaxca jun chi yun cu xol tinaniꞌ.
33 ¿Eyxam wal junojxa conobꞌ jix abꞌen yoc yul snukꞌ Jehová,
yet chi kꞌanabꞌ eltej xol xaj kꞌakꞌ,
jaxca wal jix yun kabꞌen jaon tiꞌ,
catuꞌ ma cu camwej pax oj?
34 ¿Tumi ey junojxa dios tol chi skeꞌ yiꞌon eltej conobꞌ xol junojxa conobꞌ jaxca wal jix yun cu yiꞌon eltej Jehová bꞌey txꞌotxꞌ Egipto?
Caw miman tzet jix yun yet jun tiempoal tuꞌ.
Jix je yil wan tzet qꞌueyubꞌtaj yili,
cꞌal jowal,
yetoj xiwcꞌulal.
Yetoj wal yipalil catuꞌ jix cu yiꞌon eltej bꞌey txꞌotxꞌ Egipto tuꞌ.
35 Jaꞌ wan tiꞌ,
jix txꞌoxle kilaꞌ,
yet watxꞌ chi kotajne eloj tol cꞌam junojxa Dios,
yutol asanne Jehová.
36 Jata cꞌal bꞌey satcan jix kabꞌ skꞌanabꞌ eytej Dios yet jix cu scuyoni.
Jaxa bꞌey sat txꞌotxꞌ tiꞌ xin,
jix xꞌox mimej kꞌakꞌ ey jon,
jix kabꞌen wal skꞌanabꞌ eltej bꞌey xol kꞌakꞌ kꞌakꞌ tuꞌ.
37 Jaꞌ Naj jix camcꞌulnen ebꞌ kichmam,
yuxan jix cu sicꞌle can eltej yu.
Jix cu col-le eltej bꞌey txꞌotxꞌ Egipto yu Naj yetoj yipalil.
38 Jix yiꞌel wan mimej nación Naj cu sattaj,
wan tol ecꞌbꞌan yipalil ey jon,
jaon xa tiꞌ jix cu majcan oc xꞌotxꞌ ebꞌ,
yet chi oc can ketoj jaxca wal lalan yunen tinaniꞌ.
39 Yu tuꞌ xin,
can ojabꞌ jun tiꞌ yin je naꞌbꞌal tol asanne Jehová,
sDiosal satcan cꞌal sat txꞌotxꞌ txꞌotxꞌ tiꞌ,
cꞌam junojxa.
40 Yuxan,
jijewej sley cꞌal ẍejbꞌanil chi wal can ey jex yet jun cꞌual tiꞌ,
yet watxꞌ,
watxꞌ cꞌal oj yun je bꞌeytoj jaex tiꞌ yetoj cꞌal ebꞌ je yicꞌaal,
catuꞌ oj naatbꞌoj je kꞌinal bꞌey sat txꞌotxꞌ txꞌotxꞌ jix yakꞌ Jehová ey jex yin junelne,
ẍi naj Moisés tet ebꞌ conobꞌ Israel.
Wan Conobꞌ Bꞌey Chi Scol Sbꞌa Ebꞌ Ánima
41 Jix sicꞌon el oxebꞌ conobꞌ naj Moisés bꞌey skꞌaxepal ecꞌtoj jaꞌ Jordán yetcꞌulal bꞌey chi aol cꞌu.
42 Jaꞌ tituꞌ chi skeꞌ scolon sbꞌa junoj mac chi smakꞌ cam junoj yet animail tol man yin oj snaꞌbꞌal chi tita,
cꞌam bꞌey chi yakꞌ jowal yetoj yet yalantoj.
Jaꞌ jun tuꞌ chi skeꞌ scolon sbꞌa bꞌey junoj wan conobꞌ tuꞌ.
43 Jaꞌ oxebꞌ conobꞌ tuꞌ,
jaꞌton Béser,
bꞌey spananil txꞌotxꞌ cusiltaj txꞌotxꞌ bꞌey eyecꞌ jun bꞌulan ebꞌ yicꞌaal Rubén;
cꞌal Ramot,
bꞌey yul yet Galaad,
bꞌey eyecꞌ jun bꞌulan ebꞌ yicꞌaal Gad;
jal junxa conobꞌ xin,
jaꞌton Golán,
ey yul yet Basán,
bꞌey eyecꞌ jun bꞌulan ebꞌ yicꞌaal Manasés.
Jix Yal Wan Chejbꞌanile Naj Moisés
44 Jaꞌton wan chejbꞌanile tiꞌ jix yal naj Moisés tet ebꞌ yet conobꞌ Israel.
45 Jantaj wan cuybꞌanile,
cꞌal chejbꞌanile yetoj wan ley,
masanil jix yal naj tet ebꞌ yet jix eltej ebꞌ bꞌey txꞌotxꞌ Egipto.
46 Catuꞌ jix yalon junelxa yet eyecꞌ ebꞌ skꞌaxepal ecꞌtoj jaꞌ Jordán,
bꞌey spananil stiꞌ jun jobꞌe bꞌey sattaj conobꞌ Bet-peor,
bꞌey txꞌotxꞌ majbꞌil oc yu naj Sihón sreyal ebꞌ Amorreo.
Jaꞌ naj Sihón tuꞌ,
jaꞌ bꞌey conobꞌ Hesbón caan naj,
jix eyqꞌuey naj yu Moisés yetoj cꞌal ebꞌ conobꞌ Israel,
yet xax eltej ebꞌ bꞌey txꞌotxꞌ Egipto.
47 Jaꞌ ebꞌ Israel jix majon can oc txꞌotxꞌ txꞌotxꞌ majbꞌil oc yu naj Sihón tuꞌ,
cꞌal txꞌotxꞌ majbꞌil oc yu naj Og,
sreyal Basán yet yalantoj.
Jaꞌ ebꞌ cawan tuꞌ,
sreyal ebꞌ Amorreo yeoc ebꞌ bꞌey skꞌaxepal ecꞌtoj jaꞌ Jordán yetcꞌulal bꞌey chi aol cꞌu.
48 Jaꞌ txꞌotxꞌ txꞌotxꞌ tuꞌ chi too tacꞌal bꞌey conobꞌ Aroer bꞌey stiꞌlaj jaꞌ Arnón,
masantaꞌcꞌal chi apni oc txꞌotxꞌ bꞌey miman wonan yet Sirión,
jacꞌal oc chi yij cꞌal pax Hermón;
49 yetoj cꞌal masanil txꞌotxꞌ yul yet Arabá,
bꞌey skꞌaxepal ecꞌtoj jaꞌ Jordán,
masantaꞌcꞌal bꞌey jaꞌ Camnaj Mar bꞌey yich txꞌotxꞌ wonan chi yij Pisgá.