2 Jix yalon Jehová ey jin jaxca tiꞌ:

Cꞌam ojabꞌ chex xiw tet naj,

yutol oj waoc naj yul je kꞌabꞌ yetoj cꞌal ebꞌ soldado cꞌal snación naj,

jaxca wal jix yun je yakꞌon eyqꞌuey naj Sihón,

sreyal ebꞌ Amorreo caan bꞌey Hesbón,

ẍi Dios ey jin.

3 Queytuꞌ jix yun yeyqꞌuey naj Og tuꞌ ku,

yutol jaꞌ Jehová jix aon oc naj yul cu kꞌabꞌ yetoj ebꞌ soldado,

cꞌamxa junoj ebꞌ jix colcha can eloj.

4 Yetoj cꞌal pax oj,

jix kakꞌ eyqꞌuey masanil wan conobꞌlaj.

Cꞌamxa junoj wan conobꞌ tuꞌ jix cu bꞌejcan eloj;

ey 60 wan conobꞌ tuꞌ yin masanil,

chi yal yeloc apnoj masanil yul yet conobꞌ Argob,

bꞌey chi yakꞌ yaawilal naj rey Og,

bꞌey Basán.

5 Masanil wan conobꞌlaj tuꞌ,

joyan oc smuroal yinlaj,

caw naat eya steel,

yetoj spuertail tol chꞌen cꞌatan oc yin smitxꞌbꞌaniloj.

Ey cꞌal pax wan conobꞌ tol cꞌam smuroal eyocoj,

jix kakꞌ cꞌal pax qꞌueyle eloj.

6 Masanil wanxa conobꞌ jix cu qꞌueyel ebꞌ,

jaxca jix yun cu qꞌueyon el naj Sihón,

sreyal Hesbón.

Jix cu qꞌueyel masanil ebꞌ winaj cꞌal ebꞌ ix ix yetoj cꞌal ebꞌ unin.

7 Asanxane noꞌ sjobꞌbꞌeal noꞌ ebꞌ cu cajat tuꞌ,

yetoj cꞌal masanil stzetyetal ebꞌ jix can yul cu kꞌabꞌ.

8 Queytuꞌ jix yun yeyqꞌuey xꞌotxꞌal ebꞌ Amorreo yul cu kꞌabꞌ yet jun tiempoal tuꞌ,

jaꞌton ebꞌ caan bꞌey yetcꞌulal jaꞌ Jordán,

chi too taꞌcꞌal bꞌey jaꞌ Arnón,

masantaꞌcꞌal chi apni oc bꞌey txꞌotxꞌ wonan Hermón.

9 (Jaꞌ jun wonan tuꞌ,

jaꞌ ebꞌ a Sidonio,

Sirión jix yij sbꞌi yu ebꞌ,

jaxa ebꞌ Amorreo xin,

Senir sbꞌi yu ebꞌ.)

10 Masanil wan conobꞌlaj bꞌey panan yeeyoj,

cꞌal bꞌey wonanlaj,

masanil yul yet Galaad cꞌal Basán,

masantaꞌcꞌal bꞌey Salcá cꞌal Edrei,

jix eyqꞌuey ku.

Jaꞌton masanil wan conobꞌ tuꞌ,

eyoc yalan ẍejbꞌanil bꞌey chi yakꞌ yaawil naj Og,

bꞌey Basán.

11 (Asanxane cꞌal naj Og tuꞌ,

slawubꞌal yicꞌaal ebꞌ Refaíta.

Jaꞌ xꞌat naj,

chꞌen cꞌal eloj.^a

Ey canebꞌ metro steel,

txenxane man caabꞌoj metro sat,

chi to skeꞌ yil-le bꞌey conobꞌ Rabá tinaniꞌ yul yet ebꞌ Amonita.)

12 Jix yalon pax Moisés jaxca tiꞌ:

Jaꞌ txꞌotxꞌ txꞌotxꞌ jix cu majcan oc yetoj sconobꞌal yet jun tiempoal tuꞌ,

jix wakꞌcan txꞌotxꞌ tet ebꞌ yicꞌaal Rubén,

cꞌal tet ebꞌ yicꞌaal Gad,

jaꞌton txꞌotxꞌ chi too tacꞌal bꞌey Aroer,

bꞌey stiꞌlaj jaꞌ Arnón,

masantaꞌcꞌal jix apni oc bꞌey snan xol txꞌotxꞌ wonan yet Galaad.

13 Jaxa wanxa txꞌotxꞌ jix cancan bꞌey Galaad tuꞌ,

masanil txꞌotxꞌ Basán,

jaꞌton txꞌotxꞌ yet taꞌ naj Og yet yalantoj,

yetoj cꞌal pax txꞌotxꞌ Argob,

otajbꞌil tol xꞌotxꞌ ebꞌ a Refaíta.

Jaꞌ txꞌotxꞌ txꞌotxꞌ tuꞌ jix wakꞌ tet nan tujan ebꞌ yicꞌaal Manasés.

14 (Jaꞌ naj Jaír,

yicꞌaal Manasés,

jaꞌ jix iꞌon can oc txꞌotxꞌ Argob,

masantaꞌcꞌal bꞌey chi ecꞌtoj smoonal txꞌotxꞌ Guesur,

cꞌal Maacá.

Jaꞌ naj jix qꞌuexon sbꞌi yin Basán,

yuxan Havot-jaír jix yakꞌ yij sbꞌi.

Jacꞌalaꞌ jun sbꞌi tuꞌ tinaniꞌ.)

15 Jaꞌ tet Maquir jix wakꞌ txꞌotxꞌ Galaad.

16 Jaꞌ tet ebꞌ yicꞌaal Rubén,

cꞌal ebꞌ yet Gad jix wakꞌcan txꞌotxꞌ ey snan xol Galaad yetoj jaꞌ Arnón tet ebꞌ.

Jaꞌ bꞌey spananil stiꞌlaj jobꞌe ey smoonal,

masantaꞌcꞌal chi apni oc bꞌey jaꞌ Jaboc,

jaꞌton bꞌey smoonal yet ebꞌ Amonita.

17 Jaꞌ smoonal,

jatuꞌ ey yetcꞌulal bꞌey chi too cꞌu,

jaꞌton jaꞌ Jordán,

chi too tacꞌal bꞌey jaꞌ naabꞌ jaꞌ chi yij sbꞌi Quinéret,

masantaꞌcꞌal chi apni oc bꞌey jaꞌ mar yet Arabá,

jaꞌton jaꞌ Camnaj Mar,

jaꞌton bꞌey yich txꞌotxꞌ wonan yet Pisgá,

bꞌey yetcꞌulal ecꞌtoj jaꞌ Camnaj Mar.

18 Jaꞌ yet jun tiempoal tuꞌ jix wakꞌ wan chejbꞌanile tiꞌ tet ebꞌ yicꞌaal Rubén,

tet ebꞌ yet Gad,

cꞌal tet nanxa tujan ebꞌ yet Manasés.

Jix walon tet ebꞌ jaxca tiꞌ:

Jaꞌ Jehová cu Diosal jix akꞌon jun txꞌotxꞌ tiꞌ yul je kꞌabꞌ.

Jaꞌ masanil ebꞌ winaj chi skeꞌ yakꞌwi jowal je xol,

sowalil chi yiꞌa smitxꞌkꞌabꞌ yet jowal ebꞌ,

catuꞌ chi bꞌabꞌi ebꞌ sattaj ebꞌ ket Israelal tiꞌ.

19 Asanxane ebꞌ ix je yistil cꞌal ebꞌ je yuninal chi cancan bꞌey je conobꞌ jix wakꞌ ey jex tiꞌ,

yetoj noꞌ je jobꞌbꞌeal noꞌ.

Wotaj an,

tol caw miman noꞌ jobꞌbꞌil je yu.

20 Colwaanwej yetoj ebꞌ ket Israelal,

masantaꞌcꞌal oj yiꞌcan oc txꞌotxꞌ txꞌotxꞌ ebꞌ oj yakꞌ Jehová,

jaꞌton bꞌey yetcꞌulal ecꞌtoj jaꞌ Jordán.

Jato cꞌal yet oj yakꞌon swatxꞌcꞌulal Jehová tet ebꞌ,

jaxca jix yun yakꞌon ey jex,

catuꞌ oj skeꞌ je meltzotej bꞌey je txꞌotxꞌ jix wakꞌ ey jex tiꞌ,

jin chi tet ebꞌ.

21 Jaꞌ tet naj Josué jix wakꞌ jun chejbꞌanile tiꞌ:

Jix ja wil tzetyetal jix yun Jehová cu Diosal yetoj cawan ebꞌ rey tiꞌ.

Queytuꞌ oj yun Dios yetoj masanil ebꞌ rey bꞌey yul-laj wan conobꞌ bꞌey oj jaach ecꞌ cꞌaltoj.

22 Cꞌam cꞌal chach xiw yetoj ebꞌ ja wet conobꞌ tiꞌ,

yutol jaꞌ Jehová cu Diosal,

oj colwa je yetoj,

jin chi tet naj.

23 Jaꞌ yet jun tiempoal tuꞌ,

jix walon tet cu Diosal jaxca tiꞌ:

24 Jaach jin Diosal,

jaꞌ ey jin ja chejabꞌ jin tiꞌ,

jix ja chaꞌel yich ja txꞌoxon ja mimanbꞌilal cꞌal ja wipalil.

Yutol cꞌam junojxa Dios bꞌey satcan,

cꞌal sat txꞌotxꞌ txꞌotxꞌ tiꞌ tol chi skeꞌ yunen tzetyetal tol qꞌueyubꞌtaj yoqui jaxca jun cha wun tiꞌ.

25 Yuxan chi wal ey jaach an,

tol chin ja chaꞌ ecꞌtoj bꞌey junxa skꞌaxepal ecꞌtoj jaꞌ Jordán tiꞌ,

yutol chi woche chi wiloc yin jun txꞌotxꞌ txꞌotxꞌ tol txꞌojxa swatxꞌil yili cꞌal bꞌey txꞌotxꞌ wonan yet Líbano,

jin chi tet Dios.

26 Jaxa Jehová cu Diosal tol jix tit sjowal win,

je yu cꞌal jaex tiꞌ.

Ma yakꞌ Dios jaxca tzet jix jin kꞌan tet,

yutol jix yal ey jin jaxca tiꞌ:

Kꞌojbꞌilxa tuꞌ,

cꞌam ojabꞌxa cha wal wan kꞌane tuꞌ ey jin.

27 Tinaniꞌ,

aantoj bꞌey sjolom txꞌotxꞌ wonan Pisgá tiꞌ,

catuꞌ cha wilon cantoj bꞌey norte,

cꞌal bꞌey sur,

bꞌey chi aol cꞌu,

yetoj cꞌal bꞌey chi too cꞌu.

Jaxa pax sattaj ecꞌtoj jaꞌ Jordán,

cꞌam ojabꞌ chach kꞌaxbꞌo ecꞌtoj.

28 Jaꞌ tinaniꞌ,

caw cha wakꞌ snaꞌbꞌal Josué sicꞌlebꞌil,

catuꞌ cha wiptzeni,

yutol jaꞌ oj ijbꞌan jun conobꞌ tiꞌ,

catuꞌ jaꞌ oj poꞌon can ecꞌ jun txꞌotxꞌ cha wilcantoj yin tuꞌ,

ẍi Jehová ey jin.

29 Queytuꞌ jix yun cu cancan bꞌey spananil stiꞌ jun jobꞌe,

sattaj Bet-peor.