3 —Ilwejtoj txꞌotxꞌ majbꞌil can a yu conobꞌ Atarot,

Dibón,

Jazer,

Nimrá,

Hesbón,

Elealé,

Sebam,

Nebo,

cꞌal Beón,

4 tol caw wal watxꞌ txꞌotxꞌ,

catuꞌ ey bꞌey chi low masanil noꞌ jobꞌbꞌeal noꞌ.

Jaꞌ Jehová jix iꞌon ecꞌ txꞌotxꞌ tet ebꞌ yu yoc can txꞌotxꞌ ketoj jaon Israel jon tiꞌ.

Je yotaj pax oj tol jaꞌ wan noꞌ noꞌ tiꞌ jobꞌbꞌil ku jon.

5 Yu tuꞌ xin,

toloj wal che yakꞌ wan txꞌotxꞌ txꞌotxꞌ tiꞌ ey jon yet watxꞌ cꞌam chi cu ecꞌ cantoj bꞌey skꞌaxepal ecꞌtoj jaꞌ Jordán tiꞌ,

ẍi ebꞌ.

6 Catuꞌ jix takꞌwi naj Moisés tet ebꞌ jaxca tiꞌ:

—¿Tumi che yoche chex cancan titiꞌ yajbꞌan jaꞌ ebꞌ naj je yet conobꞌ chi too ebꞌ naj yin jowal?

7 ¿Tzet yuxan che yakꞌ scꞌul ebꞌ je yet conobꞌ tiꞌ yet cꞌam chi apni oc ebꞌ bꞌey jun txꞌotxꞌ txꞌotxꞌ bꞌey jix yal Jehová tol oj yakꞌ tet ebꞌ?

8 Queyton wal tuꞌ jix yute sbꞌa ebꞌ je mam icham yet peyxa,

yet jix chejletoj ebꞌ yilon txꞌotxꞌ yet eyecꞌ ebꞌ bꞌey txꞌotxꞌ Cadés-barnea.

9 Jix apni tacꞌal oc ebꞌ yilon jun txꞌotxꞌ tuꞌ,

masantaꞌcꞌal bꞌey skꞌaxepal sjobꞌeal jaꞌ chi yij Escol.

Jix lawi tuꞌ,

jix akꞌle scꞌul ebꞌ ket Israelal yu ebꞌ,

yet cꞌam chi too ebꞌ bꞌey txꞌotxꞌ txꞌotxꞌ tol jix yakꞌ can stiꞌ Jehová yakꞌon tet ebꞌ.

10 Yu cꞌal jun tuꞌ xin,

yuxan jix tit sjowal scꞌul Jehová yet jun cꞌual tuꞌ,

yuxan jix yakꞌ can stiꞌ,

bꞌey jix yal jaxca tiꞌ,

11 tol jaꞌ ebꞌ ánima ey 20 abꞌil skꞌinal chi bꞌey cꞌaltoj,

ebꞌ jix eltej wu bꞌey txꞌotxꞌ Egipto,

man oj yiloc yin txꞌotxꞌ txꞌotxꞌ ebꞌ bꞌey jix wakꞌcan jin tiꞌ wakꞌon tet Abraham,

Isaac cꞌal Jacob,

yutol man jijemoj jix yute sbꞌa ebꞌ ey jin.

12 Asanne naj Caleb scꞌaal naj Jefuné yicꞌaal naj Quenezita,

cꞌal naj Josué scꞌaal Nun,

asanne ebꞌ oj ilon oc yin txꞌotxꞌ txꞌotxꞌ tuꞌ,

yutol jix sjije ebꞌ tzet jix walaꞌ,

ẍi Dios.

13 Yu cꞌal jun tuꞌ xin,

yuxan jix tit sjowal Jehová kin,

yuxan ey 40 abꞌil jix cu ecꞌwej bꞌey txꞌotxꞌ cusiltaj txꞌotxꞌ masantaꞌcꞌal jix qꞌueyle el masanil ebꞌ ma jijen tzet jix yal Jehová,

cꞌamxa junoj ebꞌ jix cancanoj.

14 Jal jaex tiꞌ xin,

jex yuninal wan ánima pit chi yute sbꞌa tuꞌ,

che yoche che bꞌeybꞌalne sbꞌeybꞌal ebꞌ je mam icham tuꞌ.

¿Tumi che yoche che txꞌem pax tej sjowal scꞌul Jehová kibꞌanwej junelxa?

15 Ta jaex tiꞌ cꞌam che yoche chex oc tzajan yintaj Naj,

oj jex sbꞌejcan Naj bꞌey jun txꞌotxꞌ cusiltaj txꞌotxꞌ tiꞌ yetoj masanil jun conobꞌ tiꞌ.

Je yu cꞌal jaex tiꞌ catuꞌ oj cu qꞌueyle eloj,

ẍi naj Moisés tet ebꞌ.

16 Yu jun tuꞌ xin,

jix sjitzontej sbꞌa ebꞌ scꞌatan naj Moisés,

jix yalon ebꞌ jaxca tiꞌ:

—Jaꞌ tzet chi koche jon,

tol chi cu waꞌne a scolal noꞌ cu meꞌ tiꞌ jon,

cꞌal scolal noꞌ cu wacax tiꞌ jon,

cꞌal cu waꞌnen a sna ebꞌ kuninal tiꞌ jon.

17 Jal jon jaon tiꞌ jon xin,

oj kakꞌ lista cu bꞌa jon,

catuꞌ oj cu bꞌabꞌoj sattaj ebꞌ ket conobꞌ tiꞌ,

masantaꞌcꞌal oj cu apnoj oc yetoj ebꞌ bꞌey jun txꞌotxꞌ txꞌotxꞌ tuꞌ.

Yet watxꞌ jaꞌ ebꞌ ix kistil jon cꞌal ebꞌ kuninal jon chi cancan ebꞌ bꞌey jun conobꞌ tol joybꞌil eyoj,

yet chi can ebꞌ yin tzalacꞌulal,

yet watxꞌ cꞌam cꞌal tzet chi utele ebꞌ.

18 Cꞌam tocꞌal chi cu meltzo bꞌey cu na jon,

masantaꞌcꞌal chi cancan ebꞌ ket conobꞌ tiꞌ bꞌey sat txꞌotxꞌ txꞌotxꞌ tuꞌ.

19 Yutol jaꞌ txꞌotxꞌ bꞌey jun pacꞌ tiꞌ ket chi yun can oc txꞌotxꞌ txꞌotxꞌ jon,

jaꞌton yetcꞌulal bꞌey chi aol cꞌu;

yuxan jaꞌ bꞌey skꞌaxepal ecꞌtoj jaꞌ miman Jordán tuꞌ,

man oj cu kꞌan cu txꞌotxꞌ jaon tiꞌ jon,

ẍi ebꞌ.

20 Catuꞌ jix takꞌwi naj Moisés tet ebꞌ:

—Chi skeꞌ che yiꞌcan oc txꞌotxꞌ txꞌotxꞌ tiꞌ,

ta yel che yalaꞌ chex bꞌabꞌi yin jowal tuꞌ,

asan yet chi yalon Jehová,

catuꞌ chex too yin jowal tuꞌ.

21 Ta je masanil jaex tiꞌ iꞌbꞌil oc je mitxꞌkꞌabꞌ yet jowal,

oj jex ecꞌtoj bꞌey jaꞌ miman Jordán jaxca wal chi yun yalon Jehová,

catuꞌ chex can cꞌal tituꞌ masantaꞌcꞌal chi akꞌle eyqꞌuey ebꞌ je cajat tuꞌ yu Jehová.

22 Queytuꞌ oj yun je yiꞌon can oc txꞌotxꞌ txꞌotxꞌ tiꞌ yu Jehová.

Yet xax eyqꞌuey ebꞌ ánima tuꞌ,

catuꞌ chex meltzotej.

Jaxca tuꞌ oj yun je jijen je yunen bꞌey che yakꞌ can je tiꞌ tet Jehová,

cꞌal tet ebꞌ je yet conobꞌ tiꞌ.

23 Ta cꞌam chi eloc jaxca je yalon can tuꞌ,

che yotajnewej eloj tol chi oc je penail tet Jehová,

ey jun cꞌual oj ale oc syaꞌilal je yibꞌan.

24 Jaꞌ tinaniꞌ xin,

waꞌnewej a je conobꞌ,

yu swatxꞌiloj ebꞌ je yuninal,

catuꞌ che waꞌnen pax a scolal noꞌ je meꞌ,

asan xin,

tol sowalil che jije je yunen bꞌey che yakꞌ can je tiꞌ,

ẍi naj Moisés.

25 Jix lawi tuꞌ xin,

jix takꞌwi ebꞌ yicꞌaal naj Rubén,

cꞌal ebꞌ yicꞌaal naj Gad jaxca tiꞌ:

—Jaon tiꞌ,

jaon ja chejabꞌ jon tiꞌ,

oj cu jije masanil tzet jix ja walaꞌ.

26 Jaꞌ ebꞌ ix kistil tiꞌ jon,

yetoj ebꞌ cu yaliẍ unin tiꞌ jon,

yetoj cꞌal masanil noꞌ cu jobꞌbꞌeal noꞌ,

oj cancan bꞌey txꞌotxꞌ Galaad tiꞌ.

27 Jal jon jaon ja chejabꞌ jon tiꞌ,

oj cu toj yin jowal bꞌey oj yal Jehová ey jon,

jaxca jix yun ja waloni,

ẍi ebꞌ.

28 Catuꞌ jix yun yalon naj Moisés tet Eleazar naj sat yakꞌomal xaambꞌal,

cꞌal tet naj Josué yetoj cꞌal tet ebꞌ syaawil yeoc xol junjun tujan ebꞌ yicꞌaal Israel:

29 —Ta masanil ebꞌ naj yicꞌaal Gad cꞌal Rubén tol bꞌejan scꞌul ebꞌ stoo yin jowal,

catuꞌ chi ecꞌtoj ebꞌ bꞌey yul jaꞌ Jordán jaxca jix yun yalon Jehová,

masantaꞌcꞌal che yiꞌcan ecꞌ txꞌotxꞌ txꞌotxꞌ tuꞌ,

catuꞌ che yakꞌon can txꞌotxꞌ Galaad tiꞌ smajuloj ebꞌ.

30 Ta cꞌam chi too ebꞌ yin jowal tuꞌ je yetoj xin,

jaꞌ tituꞌ oj yiꞌ smajul txꞌotxꞌ ebꞌ je yetoj bꞌey txꞌotxꞌ Canaán tuꞌ,

ẍi naj Moisés.

31 Catuꞌ jix takꞌwi ebꞌ yicꞌaal naj Gad cꞌal Rubén jaxca tiꞌ:

—Oj cu jije cꞌal masanil tzetyetal chi yal Jehová.

32 Oj toj kakꞌ jowal yetoj cu mitxꞌkꞌabꞌ tiꞌ bꞌey txꞌotxꞌ Canaán tuꞌ.

Oj cu jije tzet chi yal Jehová,

asan xin,

chi kiꞌcan oc txꞌotxꞌ txꞌotxꞌ ey yetcꞌulal bꞌey chi aol cꞌu tiꞌ,

ẍi ebꞌ.

33 Yu tuꞌ xin,

jaꞌ tet ebꞌ yicꞌaal Gad,

yetoj tet ebꞌ yet Rubén,

cꞌal yetoj nanxa tujan ebꞌ yicꞌaal Manasés scꞌaal naj José,

jix can ebꞌ bꞌey txꞌotxꞌ ecꞌnaj can tet naj Sihón,

naj sreyal ebꞌ Amorreo,

cꞌal txꞌotxꞌ yet naj Og,

sreyal Basán,

yetoj cꞌal jantaj conobꞌ majbꞌil a yu,

yetoj cꞌal jantaj txꞌotxꞌ joyan oc yin wan conobꞌ tuꞌ.

34 Jaxa ebꞌ yicꞌaal naj Gad,

jix scaꞌ waꞌne a wan conobꞌ ebꞌ,

jaꞌton Dibón,

Atarot,

Aroer,

35 Atarot-sofán,

Jazer,

Jogbehá,

36 Bet-nimrá cꞌal Bet-arán.

Catuꞌ jix sjoyon ey ebꞌ,

jix swaꞌne a scolal smeꞌ ebꞌ tituꞌ.

37 Jal pax ebꞌ yicꞌaal naj Rubén xin,

jix scaꞌ waꞌne a wan conobꞌ ebꞌ chi yij Hesbón,

Elealé,

Quiriataim,

38 Nebo,

Baal-meón,

cꞌal Sibmá.

Catuꞌ jix sqꞌuexon sbꞌi wan conobꞌ ebꞌ jix scaꞌ waꞌne a ebꞌ tuꞌ.

39 Jal pax ebꞌ yicꞌaal Maquir scꞌaal naj Manasés,

jix yiꞌ cꞌal pax can oc txꞌotxꞌ Galaad ebꞌ.

Jaxa ebꞌ jix majon can oc txꞌotxꞌ.

Yutol jaꞌ ebꞌ Amorreo pilan jix ujtele el ebꞌ sat txꞌotxꞌ.

40 Jaxca tuꞌ jix yun yakꞌon can txꞌotxꞌ Galaad naj Moisés tet ebꞌ yicꞌaal naj Maquir,

jaꞌ tituꞌ jix caey ecꞌ ebꞌ.

41 Jal naj Jaír yicꞌaal cꞌal pax naj Manasés,

jaꞌ jix majon can oc wanxa xꞌotxꞌ ebꞌ Amorreo,

catuꞌ jix yakꞌon yij sbꞌi ebꞌ,

Havot-jaír.

42 Jaxa jun naj chi yij Nóbah yetoj cꞌal wanxa ebꞌ jaꞌjun yetoj,

jaꞌ jix akꞌon eyqꞌuey conobꞌ Quenat,

yetoj cꞌal wanxa conobꞌ joybꞌil a yu.

Jix yakꞌon yij sbꞌi Nóbah.