Jix Spajtze Sbꞌa Ebꞌ Israel Tet Ebꞌ A Madián
31
Jix yalon Jehová tet naj Moisés jaxca tiꞌ:
2 Al tet ebꞌ ja wet Israelal,
tol chi spajtze sbꞌa ebꞌ tet ebꞌ a Madián,
chi lawi tuꞌ,
catuꞌ chach cami,
ẍi Dios.
3 Jix lawi tuꞌ,
jix yalon naj Moisés tet ebꞌ conobꞌ jaxca tiꞌ:
—Akꞌwej lista je bꞌa jaywanoj jex,
yet chex too yin jowal,
catuꞌ che yakꞌon jowal yetoj ebꞌ a Madián,
yet che qꞌueyon can el ebꞌ yetoj scolwal Dios.
4 Junjun cꞌal icꞌaaleal,
chi yatoj junoj mil soldado yin jowal.
5 Yu tuꞌ xin,
jix sicꞌle el mil ebꞌ soldado yin jowal.
Yuxan ey 12,000 ebꞌ soldado,
jix too ebꞌ yetoj smitxꞌkꞌabꞌ yin jowal.
6 Catuꞌ jix chejletoj ebꞌ yin jowal yu naj Moisés,
jix too cꞌal pax naj Finees yetoj ebꞌ scꞌaal naj yakꞌomal xaambꞌal tet Dios jaꞌton naj Eleazar,
jaꞌ inen oc wan mitxꞌkꞌabꞌe tol yet Jehová yeocoj,
cꞌal chꞌen trompeta chi xuꞌle yet chi oc ebꞌ yin jowal.
7 Catuꞌ jix yakꞌon jowal ebꞌ yetoj ebꞌ a Madián,
jaxca jix yun yalon Jehová tet naj Moisés.
Queytuꞌ jix yun scam masanil ebꞌ winaj a Madián yu ebꞌ.
8 Jix makꞌle cam jowan ebꞌ sreyal ebꞌ a Madián yu ebꞌ jaꞌton:
Eví,
Réquem,
Sur,
Hur cꞌal Reba,
yetoj cꞌal pax Balaam,
scꞌaal Beor.
9 Jaꞌ masanil ebꞌ ix ix a Madián yetoj yuneꞌ,
jix iꞌletoj ebꞌ yin presowomal yu ebꞌ Israel.
Catuꞌ jix iꞌletoj noꞌ sjobꞌbꞌeal noꞌ ebꞌ,
yetoj wan tzetyetal caw ey stool.
10 Jix snuson can tzꞌaꞌ masanil wan conobꞌ tuꞌ ebꞌ Israel,
yetoj cꞌal yaldeail.
11 Masanil cꞌal tzetyetal,
jix yiꞌecꞌ ebꞌ soldado tet ebꞌ,
yetoj cꞌal noꞌ sjobꞌbꞌeal noꞌ ebꞌ,
12 jix yiꞌtoj ebꞌ sattaj naj Moisés,
cꞌal sattaj naj Eleazar,
naj yakꞌomal xaambꞌal,
cꞌal sattaj ebꞌ conobꞌ Israel;
jatuꞌ bꞌulan ey ebꞌ bꞌey jun acꞌal yul yet Moab,
bꞌey stiꞌ jaꞌ miman jaꞌ chi yij Jordán,
sattaj ecꞌtoj conobꞌ Jericó.
13 Jaxa naj Moisés yetoj naj Eleazar cꞌal masanil ebꞌ ey yopiso xol ebꞌ tuꞌ,
jix eltoj ebꞌ ẍaꞌon sjul ebꞌ soldado tuꞌ bꞌey stiꞌeltoj bꞌey bꞌulan ey ebꞌ tuꞌ.
14 Jaꞌ naj Moisés xin,
caw jix tit sjowal naj yin ebꞌ syaawil junjun mil ebꞌ soldado tuꞌ,
yetoj cꞌal yin junjun ciento ebꞌ jix bꞌet yin jowal tuꞌ.
15 Jix yalon tet ebꞌ jaxca tiꞌ:
—¿Tzet yuxan ma je makꞌ xacꞌal cam wan ebꞌ ix ix tiꞌ?
16 Jaꞌton ebꞌ ix ix,
jix ijbꞌantoj ebꞌ ket conobꞌ yin spenail,
yu tzet jix yal naj Balaam.
Yutol jaꞌ ebꞌ ix,
jix iꞌontoj ebꞌ ket Israelal yet chi oc ebꞌ yin eyilal tet jun comon dios chi yij Baal-peor.
Yu cꞌal jun tuꞌ,
yuxan jix yatej syaꞌilal Jehová xol ebꞌ ket Israelal tiꞌ.
17 Jaꞌ tinaniꞌ xin,
makꞌwej cam masanil ebꞌ winaj unin,
yetoj cꞌal masanil ebꞌ ix ix tol yiꞌlenajxa winaj.
18 Jal ebꞌ ix kꞌopo ix cꞌamto winaj chi yiꞌle,
cꞌam che makꞌwej cam ebꞌ,
can ojabꞌ ebꞌ ix je yetoj.
19 Jal jex je masanil jaex jix je makꞌ cam ebꞌ ánima tuꞌ,
ma junoj chi mitxꞌon junoj camnaj,
chex cancan jujebꞌoj cꞌual yinlaj eltoj bꞌey bꞌulan jon ey tuꞌ.
Jaex tiꞌ yetoj cꞌal ebꞌ preso yeoc je yu,
sowalil che sajbꞌane je bꞌa yin scaabꞌial,
cꞌal yin sjuj cꞌual.
20 Che sajbꞌane pax masanil je pichil cꞌal masanil tzetyetal tol tzꞌuum cꞌal eloj,
masanil xil noꞌ chiw,
yetoj teꞌ mitxꞌkꞌabꞌe,
ẍi naj Moisés.
21 Jix yalon Eleazar,
naj yakꞌomal xaambꞌal tet masanil ebꞌ jix bꞌetecꞌ yin jowal tuꞌ:
—Jaꞌton jun chejbꞌanile jix yakꞌ can Jehová tet naj Moisés tiꞌ:
22 Jaꞌ masanil tzetyetal tol cꞌam chi tzꞌaꞌ yu kꞌakꞌ,
jaxca chꞌen oro,
plata,
bronce,
hierro,
estaño,
ma plomo,
sowalil chi ale ecꞌ xol kꞌakꞌ,
catuꞌ che txꞌaon el yetoj jaꞌ jaꞌ yet sajbꞌanilal.
23 Jal pax tzetyetal tol chi tzꞌaꞌtoj xin,
asanne yetoj jaꞌ jaꞌ che txꞌaeloj.
24 Jaxa yet sjuj cꞌual tuꞌ xin,
che txꞌawej el je pichil,
jaxca tuꞌ chi yun je sajbꞌican eloj.
Catuꞌ chi xa skeꞌ je yoctoj bꞌey bꞌulan jex ecꞌ tuꞌ,
ẍi naj Eleazar.
Jix Spoꞌoecꞌ Ebꞌ Yin Wan Tzet Jix Yiꞌ Ebꞌ Yin Jowal
25 Jix yalon Jehová tet naj Moisés jaxca tiꞌ:
26 Colwa ojabꞌ naj Eleazar ja wetoj,
yetoj masanil ebꞌ yaaw yeoc xol junjun icꞌaaleal xol ebꞌ conobꞌ.
Che yiꞌa sbꞌisil jantaj ebꞌ ánima,
yetoj noꞌ jobꞌbꞌeal noꞌ jix je yiꞌecꞌ tet ebꞌ a Madián yin jowal tuꞌ.
27 Caabꞌ tujan che yute je poꞌon ecꞌ wan tzetyetal tuꞌ,
laan cꞌal che yute ecꞌoj.
Catuꞌ che poꞌon ecꞌ junoj tujan xol ebꞌ soldado jix bꞌet yin jowal tuꞌ,
jal junxa tujan xin,
chi poꞌole ecꞌ xol ebꞌ conobꞌ.
28 Jaꞌ yin jun tujan chi yiꞌ ebꞌ soldado tuꞌ,
junjun wet che yiꞌel yin junjun 500 ánima,
cꞌal yin junjun 500 noꞌ wacax,
noꞌ bꞌuru,
cꞌal yin noꞌ meꞌ yetoj cꞌal yin noꞌ chiw.
29 Chi lawi tuꞌ,
che yakꞌon tet naj Eleazar naj yakꞌomal xaambꞌal.
Jaꞌ wan tuꞌ,
jaxca tol ofrenda chi yun yakꞌle ey jin an.
30 Jal yin nanxa chi akꞌle tet ebꞌ conobꞌ tuꞌ,
che yiꞌel jun yin junjun 50 ebꞌ ánima yin,
cꞌal yin noꞌ wacax,
yin noꞌ bꞌuru,
yin noꞌ meꞌ,
yin noꞌ chiw,
cꞌal yin wanojxa noꞌ noꞌ,
catuꞌ che yakꞌon tet ebꞌ Levita,
jaꞌton ebꞌ yilomal yeoc bꞌey jin calubꞌal,
ẍi Dios.
31 Jix sjije naj Moisés yetoj naj Eleazar jaxca jix yun yalon Jehová.
32 Jaꞌton sbꞌisil masanil tzetyetal jix yiꞌtej ebꞌ soldado tuꞌ,
txꞌoj pax tzetyetal jix yiꞌtej junjun ebꞌ.
Ey 675,000 noꞌ meꞌ,
33 ey 72,000 noꞌ wacax,
34 ey 61,000 noꞌ bꞌuru,
35 yetoj 32,000 ebꞌ ix kꞌopo.
36 Jaꞌton jaxca tuꞌ xin,
nan cꞌal wan tuꞌ jix yiꞌ ebꞌ soldado.
Ey 337,500 noꞌ meꞌ.
37 Jaꞌ yin wan tuꞌ,
jix yakꞌ 675 ebꞌ tet Jehová.
38 Jaꞌ yin noꞌ 36,000 wacax jix yiꞌ ebꞌ soldado tuꞌ,
jix akꞌle jun 72 tet Jehová.
39 Jaꞌ yin noꞌ 30,500 bꞌuru yet ebꞌ soldado tuꞌ,
jix akꞌle jun 61 tet Jehová.
40 Jaꞌ yin ebꞌ ix 16,000 kꞌopo ix yet ebꞌ soldado tuꞌ,
jix akꞌle jun 32 ebꞌ ix tet Jehová.
41 Jix lawi tuꞌ,
jix yakꞌon naj Moisés masanil wan tuꞌ tet Eleazar naj yakꞌomal xaambꞌal,
jaxca wal jix yun yalon Jehová.
42 Jaxca wal sbꞌisil jix yiꞌ ebꞌ soldado,
jaxca cꞌal pax tuꞌ jix yakꞌ naj Moisés tet ebꞌ conobꞌ.
43 Ey 337,500 noꞌ meꞌ,
44 ey 36,000 noꞌ wacax,
45 ey 30,500 noꞌ bꞌuru,
46 ey 16,000 ebꞌ ix kꞌopo.
47 Jaꞌ yin nanxa tujan tuꞌ,
jatuꞌ jix yiꞌel naj Moisés jun yin junjun 50 ebꞌ ánima cꞌal noꞌ noꞌ.
Jix lawi tuꞌ,
jix yaontoj tet ebꞌ eyoc steynemaloj scalubꞌal Jehová,
jix sjije naj jaxca jix yun yalon Jehová.
48 Jix lawi tuꞌ,
jaxa ebꞌ syaawil yeoc yin junjun mil cꞌal yin junjun 100 ebꞌ soldado tuꞌ,
jix too ebꞌ scꞌatan naj Moisés.
49 Jix yalon ebꞌ jaxca tiꞌ:
Jaon tiꞌ jix cu bꞌis ebꞌ soldado eyoc yul cu kꞌabꞌ jon,
cꞌam cꞌal junoj ebꞌ jix qꞌuey cantoj,
tzꞌajan cꞌal ebꞌ.
50 Jaꞌ tinaniꞌ iꞌbꞌil oc masanil chꞌen oro jix ilcha ku jon,
chꞌen brazalete,
pulsera,
kolkꞌabꞌe,
ome,
cꞌal yetoj wanxa chꞌen chꞌen watxꞌ yili.
Jaꞌ wan tiꞌ chi kakꞌ tet Jehová yutol jix colwa Naj ketoj,
yuxan jix cu meltzo yin tzalacꞌulal cu masanil,
ẍi ebꞌ.
51 Catuꞌ jix ẍaꞌon ecꞌ naj Moisés yetoj naj Eleazar masanil wan chꞌen oro tuꞌ tet ebꞌ.
52 Jaꞌ masanil chꞌen oro jix yakꞌ ebꞌ syaawil ebꞌ soldado tuꞌ,
ey 368 libra yalil chꞌen.
53 Junjun cꞌal ebꞌ soldado ey cꞌal niẍtej oj tzetyetal jix yiꞌcan ecꞌ ebꞌ tet wan scajat tuꞌ.
54 Jaꞌ yet jix lawi ẍaꞌon ecꞌ wan chꞌen oro naj Moisés cꞌal naj Eleazar,
jantaj wan jix yiꞌtej ebꞌ syaawil soldado tuꞌ,
jix yiꞌontoj ebꞌ bꞌey snail scalubꞌal Jehová,
bꞌey chi ẍaꞌle sbꞌa ebꞌ yetoj,
yet watxꞌ chi naꞌletej ebꞌ Israel yu Dios.