3 Jaꞌ yet 15 yoc bꞌabꞌel xꞌaaw yul abꞌil,

catuꞌ jix el ebꞌ bꞌey Ramsés,

yet yewial xacꞌal kꞌin Pascua.

Yetoj wal masanil yip ebꞌ jix yun yeltej ebꞌ sattaj ebꞌ a Egipto,

4 yajbꞌan lalan smujon can eytoj wan sbꞌabꞌel unin ebꞌ a Egipto jix cam yu Jehová.

Jix low cꞌal pax yin wan comon sdiosal ebꞌ a Egipto tuꞌ yu Jehová.

5 Jaꞌ yet jix el ebꞌ Israel bꞌey Ramsés,

catuꞌ jix apni oc ebꞌ bꞌey txꞌotxꞌ Sucot.

6 Jix el ebꞌ bꞌey Sucot,

catuꞌ jix apni oc ebꞌ bꞌey Etam,

bꞌey stiꞌlaj eltoj txꞌotxꞌ cusiltaj txꞌotxꞌ.

7 Jix el ebꞌ bꞌey txꞌotxꞌ Etam,

catuꞌ jix ecꞌtoj ebꞌ bꞌey Pi-hahirot,

bꞌey yin scꞌul txꞌotxꞌ Baal-sefón,

catuꞌ jix caey ecꞌ ebꞌ bꞌey sattaj ecꞌtoj txꞌotxꞌ Migdol.

8 Jix el ebꞌ bꞌey Pi-hahirot,

catuꞌ jix kꞌaxbꞌo ecꞌtoj ebꞌ yul jaꞌ mar,

jix apni oc ebꞌ bꞌey txꞌotxꞌ cusiltaj txꞌotxꞌ.

Oxebꞌ cꞌual jix bꞌey ebꞌ bꞌey cusiltaj txꞌotxꞌ bꞌey yul yet txꞌotxꞌ Etam,

catuꞌ jix apni oc ebꞌ bꞌey txꞌotxꞌ chi yij Mará.

9 Jix el ebꞌ bꞌey Mará,

catuꞌ jix apni oc ebꞌ bꞌey Elim,

bꞌey ey lacawebꞌ snukꞌ jaꞌ jaꞌ,

ey cꞌal pax 70 teꞌ palma.

Jaꞌ tituꞌ jix caey ecꞌ ebꞌ.

10 Jix el ebꞌ bꞌey txꞌotxꞌ Elim,

jix apni oc ebꞌ bꞌey scawilal jaꞌ Cajin Mar.

11 Jix el ebꞌ bꞌey jaꞌ Cajin Mar,

catuꞌ jix apni oc ebꞌ bꞌey txꞌotxꞌ cusiltaj txꞌotxꞌ yul yet txꞌotxꞌ Sin.

12-36 Jaꞌ yet jix el ebꞌ bꞌey txꞌotxꞌ cusiltaj txꞌotxꞌ chi yij Sin,

jix ecꞌtoj ebꞌ bꞌey txꞌotxꞌ Dofcá,

Alús,

cꞌal bꞌey Refidim,

bꞌey cꞌam jaꞌ jaꞌ jix yucꞌ ebꞌ.

Jix ecꞌ cꞌal pax toj ebꞌ bꞌey txꞌotxꞌ cusiltaj txꞌotxꞌ chi yij Sinaí,

bꞌey Quibrot-hataavá,

bꞌey Hazerot,

bꞌey Ritmá,

bꞌey Rimón-peres,

bꞌey Libná,

bꞌey Risá,

bꞌey Quehelata,

bꞌey txꞌotxꞌ wonan Séfer,

bꞌey Haradá,

bꞌey Maselot,

bꞌey Táhat,

bꞌey Térah,

bꞌey Mitcá,

bꞌey Hasmoná,

bꞌey Moserot,

bꞌey Bene-jaacán,

bꞌey Hor,

bꞌey txꞌotxꞌ wonan Guidgad,

bꞌey Jotbata,

bꞌey Abroná,

bꞌey Esión-guéber cꞌal bꞌey txꞌotxꞌ cusiltaj txꞌotxꞌ chi yij Sin,

chi yal yeloc apnoj jaꞌton txꞌotxꞌ Cadés.

37 Jix el ebꞌ bꞌey txꞌotxꞌ Cadés,

catuꞌ jix apni oc ebꞌ bꞌey yich txꞌotxꞌ wonan Hor,

bꞌey smoonal txꞌotxꞌ Edom.

38 Jaꞌ yet eyecꞌ ebꞌ bꞌey yich txꞌotxꞌ wonan Hor,

catuꞌ jix yalon Jehová tet naj Aarón,

tol chi atoj naj bꞌey sjolom jun wonan tuꞌ.

Jaꞌ tituꞌ jix cam naj,

yet sbꞌabꞌel cꞌual yet sjoꞌ xꞌaaw yet scawinaj abꞌil.

Chi chaꞌle el yich sbꞌisle yet tax scꞌual jix eltej ebꞌ bꞌey txꞌotxꞌ Egipto.

39 Ey 123 abꞌil skꞌinal naj Aarón yet jix cam naj bꞌey jun wonan chi yij sbꞌi Hor.

40 Jaꞌ naj sreyal ebꞌ Cananeo chi yij Arad,

jatuꞌ caan naj bꞌey Négueb yul yet Canaán.

Jix yotajne el naj tzet jix yun yapni oc ebꞌ Israel tuꞌ.

41-44 Jaꞌ yet jix el ebꞌ bꞌey txꞌotxꞌ wonan chi yij Hor,

jix ecꞌ ebꞌ bꞌey txꞌotxꞌ Salmoná,

bꞌey Punón,

bꞌey Obot,

cꞌal bꞌey Ije-abarim,

bꞌey smoonal txꞌotxꞌ Moab.

45-47 Jix ecꞌ cꞌal pax ebꞌ bꞌey Dibón-gad,

bꞌey Almón-diblataim,

cꞌal bꞌey wonanlaj yul yet Abarim yetcꞌulal bꞌey chi aol cꞌu bꞌey txꞌotxꞌ Nebo.

48 Jix el ebꞌ bꞌey swonanil txꞌotxꞌ Abarim,

jix apni oc ebꞌ bꞌey yacꞌalil txꞌotxꞌ Moab bꞌey stiꞌ jaꞌ miman jaꞌ Jordán,

bꞌey sattaj ecꞌtoj conobꞌ Jericó.

49 Jaꞌ tituꞌ jix ey bꞌulan ebꞌ stiꞌ jaꞌ Jordán,

jix too tacꞌal ebꞌ bꞌey Bet-jesimot masantaꞌcꞌal bꞌey Abel-sitim,

bꞌey yacꞌalil txꞌotxꞌ Moab.

50 Jaꞌ bꞌey yacꞌalil txꞌotxꞌ Moab,

bꞌey stiꞌ jaꞌ Jordán,

bꞌey sattaj ecꞌtoj conobꞌ Jericó,

jix kꞌanabꞌ Jehová tet naj Moisés,

jix yalon jaxca tiꞌ:

51 Al wan tiꞌ tet ebꞌ ja wet conobꞌ Israel:

Jaꞌ yet oj jex ecꞌtoj bꞌey jaꞌ Jordán yet oj jex octoj bꞌey txꞌotxꞌ Canaán,

52 che yujte el masanil ebꞌ ánima caan bꞌey jun nación tuꞌ,

catuꞌ che yuchon can lawoj masanil wan echele waꞌnebꞌil a yu ebꞌ,

wan comon chꞌen josbꞌil ey yu ebꞌ,

cꞌal chꞌen chꞌen tol waꞌnebꞌil yul smolteal,

catuꞌ che yuchon can lawoj wan txabꞌal waꞌnebꞌil a yu ebꞌ bꞌey sjolomlaj wonan bꞌey chi oc ebꞌ yin eyilal,

53 yet chi eyqꞌuey jun nación tuꞌ je yu,

yin eymanil che majbꞌa oc je bꞌa sat txꞌotxꞌ txꞌotxꞌ tuꞌ,

yet chex caey ecꞌoj,

yutol jain chi wakꞌ txꞌotxꞌ ey jex yet chex caey can ecꞌ sat txꞌotxꞌ.

54 Asan xin,

sowalil yin xolilal chi yun je poꞌon ecꞌ txꞌotxꞌ yin junjun tujan ebꞌ,

cꞌal yin junjun icꞌaaleal.

Jaꞌ junoj tujan miman sbꞌisil,

miman txꞌotxꞌ chi akꞌle can tet.

Jal ebꞌ txenne sbꞌisil xin,

txenne cꞌal pax txꞌotxꞌ chi akꞌle can tet ebꞌ.

Junjun cꞌal tujan chi cancan bꞌey chi yal sbꞌa bꞌey chi cancanoj.

55 Ta tol man oj je yujte el masanil ebꞌ ánima caan bꞌey txꞌotxꞌ txꞌotxꞌ tuꞌ xin,

oj jex yetne ebꞌ jaxca junoj kꞌalem chi octoj yul je sat,

ma jaxca junoj qꞌuix chi octoj yul je chiꞌbꞌeal,

jaxca tuꞌ oj jex yute ebꞌ yet oj jex caey ecꞌ tituꞌ,

56 yuxan oj watej syaꞌilal je yibꞌan jaex tiꞌ,

wan tzetyetal tol tꞌinan cꞌaltaꞌ sjul yibꞌan ebꞌ wu an,

ẍi Dios.