4 Jix el ebꞌ Israel bꞌey yich jun wonan chi yij Hor,

catuꞌ jix too ebꞌ yul jun bꞌe chi ecꞌtoj bꞌey jaꞌ Cajin Mar.

Naat jix ecꞌ sjoy sbꞌa ebꞌ yutol ma chaꞌle ecꞌtoj ebꞌ bꞌey txꞌotxꞌ Edom.

Jaꞌ yet eyoc ebꞌ yul bꞌe tuꞌ xin,

jix jul scaabꞌcꞌulal ebꞌ ánima tuꞌ,

5 caw jix tit sjowal ebꞌ yin Jehová cꞌal yin naj Moisés.

Jix yalon ebꞌ jaxca tiꞌ:

—¿Tzet taꞌ wal yu,

yuxan jix jon ja wiꞌeltej bꞌey Egipto?

¿Tumi cha woche chi cu cam yu wail bꞌey cusiltaj txꞌotxꞌ tiꞌ?

Cꞌam tzet chi cu loꞌ,

cꞌam jaꞌ chi kuqꞌueꞌ.

Cꞌamxa chi techa cu loꞌon wan yintajil loꞌbꞌe tiꞌ,

ẍi ebꞌ.

6 Yu cꞌal tuꞌ xin,

jix aletej wan noꞌ labꞌa yu Jehová caw jow,

jix chiꞌle ebꞌ ánima yu noꞌ;

ecꞌal ebꞌ Israel tuꞌ jix cam yu noꞌ.

7 Jaꞌ yet jix yilon ebꞌ jaxca tuꞌ,

jix too ebꞌ yalon tet naj Moisés jaxca tiꞌ:

—Caw wal jix oc cu penail jon,

caw jix cu bꞌuchwa yin Jehová jon,

cꞌal ja win jaach tiꞌ.

Jaꞌ tinaniꞌ xin,

kꞌan tet Jehová ku jon,

tol chi iꞌle el wan noꞌ labꞌa tiꞌ cu xol yu Naj,

ẍi ebꞌ.

Catuꞌ jix txali naj Moisés tet Jehová yu skꞌanon mimancꞌulal yibꞌan ebꞌ ánima tuꞌ.

8 Jix yalon Jehová tet naj Moisés jaxca tiꞌ:

—Waꞌne junoj yechel labꞌa yin chꞌen bronce,

jaxca cꞌal yili labꞌa cha wute eyoj,

catuꞌ cha tꞌunbꞌan a yin junoj teꞌ teꞌ miman steel,

yet watxꞌ jaꞌ yet chi chiꞌle ebꞌ ánima yu noꞌ labꞌa tuꞌ,

ta chi atoj tꞌanan ebꞌ yin jun yechel labꞌa tuꞌ,

cꞌamxa chi cam ebꞌ yu noꞌ,

ẍi Dios.

9 Catuꞌ jix swaꞌnen jun yechel labꞌa naj Moisés tol chꞌen bronce cꞌal eloj,

jix stꞌunbꞌan a naj yin jun teꞌ teꞌ.

Yuxan,

jaꞌ yet chi chiꞌle ebꞌ ánima yu noꞌ labꞌa tuꞌ,

ta chi oc tꞌanan ebꞌ yin jun chꞌen labꞌa tuꞌ,

queytuꞌ jix yun swaꞌxi can scꞌul ebꞌ.

10 Jix bꞌey cꞌal stoo ebꞌ Israel xin,

jix apni oc ebꞌ bꞌey txꞌotxꞌ Obot.

11 Jix el pax ebꞌ bꞌey Obot,

jix bꞌey cꞌal stoo ebꞌ sattaj,

catuꞌ jix apni oc ebꞌ bꞌey txꞌotxꞌ chi yij sbꞌi Iié-abarim bꞌey cusiltaj txꞌotxꞌ yetcꞌulal bꞌey chi too cꞌu yul yet txꞌotxꞌ Moab.

12 Jix too cꞌal ebꞌ xin,

catuꞌ jix apni oc ebꞌ bꞌey stiꞌ jaꞌ jaꞌ chi yij Zéred.

13 Jix bꞌey cꞌal stoo ebꞌ,

jix apni oc ebꞌ bꞌey skꞌaxepal ecꞌtoj jaꞌ jaꞌ chi yij Arnón.

Jaꞌ jun jaꞌ tuꞌ,

chi ecꞌ bꞌey cusiltaj txꞌotxꞌ,

bꞌey smajul txꞌotxꞌ ebꞌ Amorreo.

Jaꞌton jun jaꞌ jaꞌ tuꞌ eyoc yin smoonal ebꞌ a Moab yetoj ebꞌ Amorreo.

14 Jaꞌton wan txꞌotxꞌ tuꞌ chi bꞌina sbꞌi yul slibroal bꞌey chi yaltej skꞌaneal wan jowal yet Jehová bꞌey chi yal jaxca tiꞌ:

16 Jix el ebꞌ bꞌey jaꞌ jaꞌ bꞌey Arnón,

jix too cꞌal ebꞌ masantaꞌcꞌal jix apni oc ebꞌ bꞌey Beer,

jaꞌton tituꞌ ey jun jaꞌ ucꞌbꞌal jaꞌ bꞌey jix yal Jehová tet naj Moisés jaxca tiꞌ:

Yambꞌa oc masanil ebꞌ ánima,

jain oj wakꞌ jaꞌ jaꞌ yucꞌ ebꞌ,

ẍi.

17 Jaꞌton yet jun tiempoal tuꞌ jix sbꞌitne jun bꞌit ebꞌ Israel,

bꞌey chi yal jaxca tiꞌ:

Jix bꞌey cꞌal stoo ebꞌ Israel bꞌey cusiltaj txꞌotxꞌ masantaꞌcꞌal jix apni oc ebꞌ bꞌey Mataná.

19 Jix el ebꞌ bꞌey txꞌotxꞌ Mataná,

catuꞌ jix apni oc ebꞌ bꞌey Nahaliel.

Jix el ebꞌ bꞌey Nahaliel tuꞌ,

jix apni cꞌal oc ebꞌ bꞌey Bamot.

20 Jix el ebꞌ bꞌey Bamot,

jix apni oc ebꞌ bꞌey jun jobꞌe bꞌey yul yet txꞌotxꞌ Moab,

bꞌey yetcꞌulaltoj jun miman wonan chi yij Pisgá,

jaꞌ tituꞌ txequel kilontoj txꞌotxꞌ cusiltaj txꞌotxꞌ.

21 Jaꞌ ebꞌ Israel,

jix yatoj ẍejabꞌ ebꞌ bꞌey naj Sihón sreyal ebꞌ Amorreo,

jix yalontoj ebꞌ jaxca tiꞌ:

22 Jaꞌ tinaniꞌ xin,

chi cu kꞌan ey jaach jon,

tol chon ja chaꞌ cu kꞌaxbꞌo ecꞌtoj yul ja nación tiꞌ.

Cꞌam cꞌal chi cu too xol je yawo,

man cꞌal oj kucꞌ jaꞌ jaꞌ che yuqꞌueꞌ;

asan cꞌal yul miman bꞌe chi cu too jon.

Cꞌam cꞌal bꞌey oj cu el stiꞌlaj miman bꞌe tiꞌ jon,

masantaꞌcꞌal chi cu kꞌaxbꞌo ecꞌtoj yul ja nación tiꞌ,

ẍi ebꞌ.

23 Jaꞌ naj rey Sihón tuꞌ,

ma yal scꞌul naj tol chi ecꞌtoj ebꞌ Israel tuꞌ bꞌey yul sconobꞌ tuꞌ.

Jaꞌ jun jix yun naj rey tuꞌ,

tol jix syambꞌa oc masanil ebꞌ soldado naj,

catuꞌ jix eltoj ebꞌ yakꞌon jowal yetoj ebꞌ Israel bꞌey txꞌotxꞌ cusiltaj txꞌotxꞌ;

jaꞌ bꞌey Jahas jix yakꞌ jowal ebꞌ.

24 Jix scol sbꞌa ebꞌ Israel tuꞌ,

jix eyqꞌuey ebꞌ Amorreo tuꞌ yu ebꞌ.

Catuꞌ jix smajon can oc txꞌotxꞌ txꞌotxꞌ ebꞌ Israel tuꞌ,

jaꞌton txꞌotxꞌ chi too tacꞌal bꞌey stiꞌ jaꞌ miman jaꞌ chi yij Arnón,

masantaꞌcꞌal chi apni oc txꞌotxꞌ bꞌey stiꞌ jaꞌ chi yij Jaboc,

jaꞌton jaꞌ chi ecꞌtoj yin smoonal xꞌotxꞌ ebꞌ Amonita.

Caw watxꞌ jix yun yaon oc steynemal jun txꞌotxꞌ tuꞌ ebꞌ.

25 Queytuꞌ jix yun yiꞌon can oc ebꞌ Israel txꞌotxꞌ xꞌotxꞌ ebꞌ Amorreo tuꞌ.

Jix caey ecꞌ ebꞌ Israel bꞌey conobꞌ Hesbón yetoj cꞌal wanxa conobꞌ ey scawilal.

26 Jaꞌ bꞌey conobꞌ Hesbón,

jaꞌ tituꞌ caan naj Sihón sreyal ebꞌ Amorreo.

Jaꞌ naj Sihón tuꞌ,

yakꞌnaj jowal naj yetoj ebꞌ sreyal conobꞌ Moab yet yalantoj.

Jix yiꞌecꞌ jun tujan txꞌotxꞌ txꞌotxꞌ tet ebꞌ,

chi apni taꞌcꞌal oc txꞌotxꞌ bꞌey stiꞌ jaꞌ chi yij Arnón.

27 Yu jun tuꞌ,

yuxan chi yalon ebꞌ chi kꞌanabꞌ yin poesía jaxca tiꞌ:

31 Jaxca tuꞌ jix yun yiꞌle can ecꞌ xꞌotxꞌ ebꞌ Amorreo yu ebꞌ Israel.

32 Jix lawi tuꞌ xin,

catuꞌ jix yaontoj ẍejabꞌ naj Moisés,

yet chi too yilon ecꞌ conobꞌ Jazer ebꞌ tzet yili.

Jix yakꞌ jowal ebꞌ Israel yetoj ebꞌ ánima tuꞌ,

jix eyqꞌuey ebꞌ yu ebꞌ Israel,

catuꞌ jix ujtele el ebꞌ Amorreo tuꞌ yu ebꞌ yetoj cꞌal masanil wan conobꞌ joyan oc yinlaj ebꞌ tuꞌ.

33 Jix lawi tuꞌ xin,

catuꞌ jix xolbꞌan oc sbꞌa ebꞌ Israel bꞌey yetcꞌulal txꞌotxꞌ Basán,

jaxa naj Og sreyal conobꞌ Basán jix eltoj yetoj masanil ebꞌ soldado yakꞌon jowal yetoj ebꞌ bꞌey Edrei.

34 Yu tuꞌ xin,

jix yalon Jehová tet naj Moisés:

Cꞌam ojabꞌ chex xiw tet naj Og;

jain oj waoc naj yul je kꞌabꞌ,

yetoj cꞌal ebꞌ soldado cꞌal snación tiꞌ.

Jaxca wal jix je yute naj Sihón,

naj sreyal ebꞌ Amorreo ey bꞌey Hesbón,

queytuꞌ oj je yute naj Og tuꞌ,

ẍi Dios.

35 Jaxca tuꞌ jix yun scam naj Og yetoj yuninal cꞌal masanil ebꞌ soldado yu ebꞌ Israel,

cꞌamxa junoj ebꞌ jix cani,

jaxa xꞌotxꞌ ebꞌ jix yiꞌcan oc ebꞌ Israel.