2 Jaxa yet jix yabꞌen naj Balac sreyal Moab,

scꞌaal Sipor,

yu tzet jix utele ebꞌ Amorreo yu ebꞌ Israel.

3 Caw jix xiwa yetoj ebꞌ ánima ey yul yet Moab,

yutol jix yil ebꞌ tol caw miman sbꞌisil ebꞌ Israel tuꞌ.

4 Yu tuꞌ xin,

jix yalon ebꞌ ánima ey bꞌey Moab tuꞌ tet ebꞌ icham winaj yeoc yul conobꞌ Madián jaxca tiꞌ:

Masanil wan ánima tiꞌ,

oj yakꞌ lawoj ey cu txꞌotxꞌ ebꞌ jaxca chi yun slawi a an cꞌultaj yu noꞌ wacax,

ẍi ebꞌ.

5 Yu jun tuꞌ xin,

jix yaontoj jun ẍejabꞌ naj Balac yet chi too tit naj Balaam,

scꞌaal naj Beor,

caan bꞌey conobꞌ Petor,

bꞌey stiꞌ jaꞌ miman jaꞌ Éufrates yul yet conobꞌ Amav.

Catuꞌ jix yaontoj ẍejabꞌ naj yet chi too al-le tet naj Balaam jix yalon ebꞌ jaxca tiꞌ:

Jaꞌ bꞌey Egipto jix tit jun miman bꞌulan ebꞌ ánima,

tol caw jix noel yul jin conobꞌ yu ebꞌ,

caw jix jul ebꞌ cu cawilal tiꞌ jon.

6 Yu tuꞌ xin,

titan yin eymanil,

yet chi jul ja kꞌanontej sjowal scꞌul Dios yibꞌan wan ánima tiꞌ,

yutol yel xacꞌal miman sbꞌisil ebꞌ ey jon,

jon,

catuꞌ caw jelan ebꞌ.

Jaxta wal oj to skeꞌ wujten eltoj ebꞌ yul jin conobꞌ tiꞌ.

Yutol wotaj an,

tol chi skeꞌ ja wu,

yet cha kꞌanontej syaaxilal,

cꞌal ja kꞌanon pax tej syaꞌtajilal,

ẍi naj.

7 Jaꞌ ebꞌ icham winaj yul conobꞌ Moab cꞌal ebꞌ icham winaj yul yet Madián tuꞌ,

jix too ebꞌ bꞌey eyecꞌ naj Balaam.

Caw wal miman chꞌen tumin jix yiꞌtoj ebꞌ yet chi stoolane ebꞌ yet chi skꞌanontej syaꞌtajilal tuꞌ,

catuꞌ jix yalon ẍejbꞌanil ebꞌ jaxca jix yun yalontoj naj Balac.

8 Jix yalon naj Balaam tuꞌ tet ebꞌ jaxca tiꞌ:

—Jaꞌ tinaniꞌ cananwej wetoj junoj akꞌbꞌal,

jaꞌ titiꞌ oj jex weyoj,

jato yet chi sajbꞌi el yet yecal chi walon ey jex,

jatacꞌalaꞌ tzet oj yun yalon Jehová ey jin yet jun akꞌbꞌal tiꞌ,

jaxca tuꞌ oj yun wakꞌon spaj je kꞌane tuꞌ,

ẍi naj Balaam.

Yu tuꞌ xin,

jix wey ebꞌ icham winaj yet conobꞌ Moab bꞌey sna naj Balaam tuꞌ.

9 Jix xꞌoxon sbꞌa Jehová tet naj Balaam,

jix skꞌanlen tet naj jaxca tiꞌ:

—¿Mactxequel wan winaj eyecꞌ ey jaach tiꞌ?

10 Jix takꞌwi naj Balaam jaxca tiꞌ:

—Jaꞌ ebꞌ naj ẍejabꞌ naj Balac,

naj sreyal conobꞌ Moab,

scꞌaal naj Sipor,

tol chi jul yal ebꞌ naj ey jin,

11 tol ey abꞌ jun conobꞌal ebꞌ ánima jix tit bꞌey Egipto,

tol abꞌ jix noel sat txꞌotxꞌ txꞌotxꞌ tuꞌ yu ebꞌ.

Yuxan chi yoche naj Balac tuꞌ chin too bꞌey sconobꞌ,

yet chin too jin kꞌanontej syaꞌtajilal yibꞌan wan ánima tuꞌ,

yet watxꞌ chi skeꞌ yujten el ebꞌ yul sconobꞌ tuꞌ yaloni,

ẍi naj tet Dios.

12 Jix yalon Dios tet Balaam:

—Cꞌam chi skeꞌ ja too tituꞌ,

cꞌam chi skeꞌ ja kꞌanontej syaꞌtajilal yibꞌan jun conobꞌ tuꞌ,

yutol jain caw jix wakꞌ jin yaxilal yibꞌan jun conobꞌ tuꞌ,

ẍi Dios.

13 Jaꞌ yet jix kꞌinibꞌi a yet junxa cꞌu,

jix a waan naj Balaam,

jix yalon naj tet ebꞌ ẍejabꞌ naj Balac tuꞌ jaxca tiꞌ:

—Jaꞌ tinaniꞌ,

paxanwejtoj bꞌey je conobꞌ.

Cꞌam chi skeꞌ jin too je yetoj,

yutol jix yal Jehová ey jin tol cꞌam chi skeꞌ jin too an,

ẍi naj Balaam.

14 Jix meltzo ebꞌ naj icham winaj yet conobꞌ Moab,

bꞌey eyecꞌ naj Balac tuꞌ,

jix yalon ebꞌ jaxca tiꞌ:

—Jaꞌ naj Balaam tuꞌ,

ma yal scꞌul naj jix tit ketoj jon,

ẍi ebꞌ naj.

15 Jaꞌ naj Balac tuꞌ,

ma cꞌal ẍaꞌ yabꞌe,

yuxan jix yatoj wanxa ebꞌ tol miman yeloc apnoj yin yopiso yintaj ebꞌ jix bꞌetecꞌ yet sbꞌabꞌelal tuꞌ,

catuꞌ ecꞌbꞌan sbꞌisil ebꞌ yintaj ebꞌ yet sbꞌabꞌelal.

16 Jix too ebꞌ scꞌatan naj Balaam;

jix yalon ebꞌ tet naj jaxca tiꞌ:

—Jix cu ẍejtej naj Balac scꞌaal Sipor ey jaach tiꞌ.

Chi yal naj tol cꞌam ojabꞌ mactxequel chach mitxꞌon oc tucanoj,

tol chach too ketoj tinaniꞌ jon;

17 yutol chi yaltej naj ey jaach jaxca tiꞌ,

caw miman oj yun ja weloc apnoj,

masanil tzet oj ja kꞌanaꞌ,

oj wakꞌ ey jaach.

Yuxan chi wal ey jaach tol chach tita,

yet chi jul ja kꞌanontej syaꞌtajilal yibꞌan wan ánima tiꞌ.

18 Jix takꞌwi naj Balaam jaxca tiꞌ:

—Caxcꞌal nonaj yul sdespacho naj Balac tuꞌ yu chꞌen oro ma yu chꞌen plata catuꞌ chi yakꞌon masanil naj ey jin,

cꞌam chi skeꞌ wunen jaxca jun chi yal naj tuꞌ,

yutol oj jin jije tzet chi yal Dios,

jaꞌton sDiosal Israel.

19 Asan xin,

ta chi skeꞌ je can pax wetoj junxa akꞌbꞌal tiꞌ,

yet watxꞌ oj wabꞌ pax tzet oj yun yalon Dios ey jin junelxa,

ẍi naj Balaam.

20 Jix xꞌoxon sbꞌa Jehová tet naj Balaam yet akꞌbꞌalil junelxa,

jix yalon tet naj jaxca tiꞌ:

—Ta tol ja wu yuxan jix jul wan winaj tiꞌ,

chi skeꞌ chach too yetoj ebꞌ,

asan xin,

asan cꞌal tzet oj wal ey jaach,

jaꞌ chi too ja walaꞌ,

ẍi Dios tet naj Balaam.

21 Jaxa yet jix kꞌinibꞌi a yet junxa cꞌual,

jix a waan naj Balaam,

jix yaon oc stzꞌuum noꞌ xutx sbꞌuru naj,

catuꞌ jix too yetoj ebꞌ naj icham winaj yet conobꞌ Moab.

22 Jix oc naj yibꞌan sbꞌuru,

catuꞌ jix yiꞌontoj cawan yakꞌomal servil naj yetoj.

Jaꞌ Jehová caw jix tit sjowal yin naj,

yu cꞌal tol jix too naj yetoj ebꞌ,

yuxan jix yatej jun yángel Jehová yet chi mitxꞌle oc tucan naj yul bꞌe,

yet watxꞌ cꞌam chi skeꞌ stoo naj.

23 Jaꞌ noꞌ bꞌuru tuꞌ,

jix sbꞌosel sbꞌa noꞌ tet jun ángel linan oc yul bꞌe tuꞌ,

eyoc jun espada yul skꞌabꞌ.

Yuxan jix sbꞌosel sbꞌa noꞌ yul bꞌe tuꞌ,

catuꞌ jix cꞌoli stoo noꞌ xol-laj teꞌ.

Catuꞌ jix oc wal ian naj Balaam smakꞌon noꞌ bꞌuru tuꞌ,

yet watxꞌ chi oc noꞌ yul bꞌe junelxa.

24 Jaxa jun yángel Jehová tuꞌ,

jix oc pax linan yul jun yaliẍ bꞌe bꞌey xol an uva,

yutol latzꞌbꞌil a chꞌen chꞌen yin scolalil stiꞌlaj bꞌe tuꞌ.

25 Jaꞌ yet jix yilon pax noꞌ bꞌuru tol linan oc jun yángel Jehová tuꞌ junelxa bꞌey snan yul bꞌe tuꞌ,

catuꞌ chi ẍilon oc sbꞌa noꞌ yinlaj chꞌen chꞌen eyoc stiꞌlaj bꞌe tuꞌ.

Jix chil-le oc xubꞌ naj Balaam tuꞌ yu noꞌ yinlaj chꞌen,

catuꞌ jix oc wal ian naj smakꞌon noꞌ sbꞌuru tuꞌ.

26 Jix lawi tuꞌ,

jix sjitzontoj sbꞌa jun yángel Jehová tuꞌ sattajto,

catuꞌ jix oc pax linan bꞌey yel xacꞌal yaliẍ sat bꞌe,

bꞌey cꞌamxa chi skeꞌ yelcan junoj mactxequel stiꞌlaj bꞌe yet chi ẍaꞌlen sbꞌa.

27 Jix yilon pax noꞌ bꞌuru jun yángel Jehová junelxa,

tol linan oc snan yul bꞌe,

tuxa cꞌal jix ey kupan noꞌ yalan naj Balaam tuꞌ,

yuxan caw jix tit sjowal naj yin noꞌ,

jix cꞌoli smakꞌon oc skꞌojoch naj yin noꞌ.

28 Jaꞌ yet jun txolan tuꞌ,

jix kꞌanabꞌ a noꞌ bꞌuru tuꞌ yu Jehová,

jix yalon noꞌ tet naj Balaam jaxca tiꞌ:

—¿Tzet jix jaach wute an?

Oxelxa chin ja makꞌ tinaniꞌ,

ẍi noꞌ bꞌuru tet naj.

29 —Jix yalon naj Balaam jaxca tiꞌ:

Yel xacꞌal chin ja wetne chi wabꞌe.

¡Toloj wal ey junoj chꞌen espada eyoc yul jin kꞌabꞌ,

caw chach jintej cam tinaniꞌ an!

ẍi naj Balaam.

30 Jaxa noꞌ bꞌuru tuꞌ jix takꞌwi noꞌ tet naj jaxca tiꞌ:

—Ja che jin cꞌaltaꞌa,

catuꞌ chach oc cꞌaltaꞌ wibꞌan yal cꞌal bꞌey chach toocoj,

ja wotajxa cꞌam juneloj queytuꞌ chach wute,

ẍi noꞌ.

—Yel toni,

ẍi naj Balaam.

31 Jaxa Jehová jix txꞌoxon yil naj Balaam jun ángel tuꞌ.

Linan oc snan yul bꞌe,

eyoc chꞌen espada yul skꞌabꞌ.

Jaꞌ yet jix yilon oc yin jun ángel tuꞌ naj,

jix ey caan naj masantaꞌcꞌal jix ey spalan naj sat txꞌotxꞌ.

32 Jix yalon jun ángel tuꞌ tet naj jaxca tiꞌ:

—¿Tzet yuxan oxelxa cha makꞌ noꞌ ja bꞌuru tiꞌ?

Yutol jain jix jin majche el ja bꞌe,

yutol cꞌam chi yal jin cꞌul chach too yetoj wan ánima tiꞌ.

33 Ta ma jin yil noꞌ ja che tiꞌ,

ma mi oc tucan noꞌ oxeloj,

ta jaxca tuꞌ xax mi jaach wakꞌ cam tinaniꞌ,

jal noꞌ ja che tiꞌ ma cam noꞌ,

ẍi jun ángel tuꞌ.

34 Jix yalon naj Balaam tet jun yángel Jehová jaxca tiꞌ:

—Jix oc jin penail,

man wotaj oj ta jaach cha majche el jin bꞌe;

yuxan ta cꞌam chi ẍaꞌ ja cꞌul chin too,

chi skeꞌ jin meltzo tinaniꞌ,

ẍi naj.

35 Jix takꞌwi jun ángel tuꞌ tet naj jaxca tiꞌ:

—Chi skeꞌ chach too yetoj wan ánima tiꞌ,

asan xin,

asan cꞌal tzet oj wal ey jaach,

jaꞌ oj ja wunne,

ẍi jun ángel tuꞌ.

Yuxan jix too cꞌal naj Balaam yetoj ebꞌ ẍejabꞌ naj Balac tuꞌ.

36 Jaxa yet jix yabꞌen oc naj Balac tol tuxa chi apni oc naj Balaam tuꞌ,

jix too chaꞌle naj bꞌey yul-laj bꞌe bꞌey jun conobꞌ yul yet Moab bꞌey stiꞌ jaꞌ miman jaꞌ chi yij Arnón,

bꞌey yul smoonal jun conobꞌ tuꞌ.

37 Jix yalon naj Balac jaxca tiꞌ:

—Caw yelcꞌulal jix jaach wawte,

¿tzet yuxan ian cꞌam cha woche chach tita?

¿Tumi cha naꞌ tol cꞌam chi tzaji wakꞌon jantaj tzet cha woche?

ẍi naj Balac tuꞌ tet.

38 Jix takꞌwi Balaam,

jix yalon tet Balac jaxca tiꞌ:

—Cꞌam tzet cha naꞌ,

ey jin xa ecꞌ ja wetoj,

cꞌam chi skeꞌ waloni tzet chi yoche jin cꞌul;

asan tzetyetal chi yal Jehová,

jaꞌ oj walaꞌ,

ẍi naj Balaam.

39 Jix lawi tuꞌ xin,

jix too naj Balaam yetoj naj Balac bꞌey conobꞌ Quiriat-husot.

40 Jaꞌ tituꞌ jix yal naj Balac tol chi makꞌle cam noꞌ wacax cꞌal noꞌ meꞌ yet chi ẍiꞌon naj Balaam yetoj cꞌal ebꞌ icham winaj ey yopiso jaꞌjun yetoj.

41 Jaxa yet junxa cꞌual,

jix iꞌletoj naj Balaam yu naj Balac bꞌey sjolom wonan chi yij Bamot-baal;

jaꞌ tituꞌ chi skeꞌ yilontoj ebꞌ bꞌey bꞌulan ey ebꞌ Israel.