23
Jix lawi tuꞌ xin,
jix yalon naj Balaam tet naj Balac jaxca tiꞌ:
—Waꞌne a jujebꞌoj yet xaambꞌal titiꞌ,
catuꞌ cha wiꞌontej jujcꞌonoj noꞌ achꞌe wacax yetoj jujcꞌonoj noꞌ icham meꞌ,
ẍi naj Balaam.
2 Jix swaꞌne naj Balac tzet jix yal naj Balaam;
jix swaꞌne wan xaambꞌal tuꞌ ebꞌ scawanil,
catuꞌ jix iꞌletej noꞌ achꞌe wacax yetoj noꞌ icham meꞌ yu ebꞌ,
junjun cꞌal noꞌ bꞌey wan yet xaambꞌal tuꞌ.
3 Jix lawi swaꞌxi yu ebꞌ,
catuꞌ jix yalon naj Balaam tet naj Balac jaxca tiꞌ:
—Watxꞌ ja we scꞌatan wan xaambꞌal tiꞌ,
yajbꞌan chi too wil tituꞌ an ta chi eyol Jehová kꞌanabꞌ wetoj an,
oj lawoj tuꞌ xin catuꞌ oj walon ey jaach tzet oj yal ey jin,
ẍi tet naj Balac.
Jix Yal Can Watxꞌ Kꞌane Naj Balaam Yibꞌan Conobꞌ Israel
Jix lawi tuꞌ,
jix too naj Balaam bꞌey jun miman wonan tol cꞌam steꞌal.
4 Jaꞌ tituꞌ jix xꞌox sbꞌa Jehová tet naj Balaam,
jix yalon naj Balaam jaxca tiꞌ:
—Jix jin waꞌne jujebꞌ yet xaambꞌal.
Jaꞌ yin junjun wan yet xaambꞌal tuꞌ,
jix waoc junjun noꞌ achꞌe wacax yetoj cꞌal junjun noꞌ icham meꞌ yibꞌan junjun wan yet xaambꞌal tuꞌ,
ẍi naj Balaam.
5 Jix lawi tuꞌ xin,
jix yalon Jehová tet naj Balaam tzet oj yun yaloni.
Jix yalon tet jaxca tiꞌ:
—Meltzaan bꞌey eyecꞌ naj Balac tuꞌ,
cha walon tet naj jaxca tzet jix wal ey jaach tiꞌ,
ẍi Dios.
6 Catuꞌ jix meltzo naj Balaam,
jix apni oc bꞌey linan oc naj Balac yetoj ebꞌ icham winaj yul conobꞌ Moab,
bꞌey scꞌatan wan xaambꞌal tuꞌ.
7 Jix lawi tuꞌ xin,
jix oc ian naj Balaam yalon wan kꞌane jaxca tiꞌ:
Jaꞌ tituꞌ ey jin ecꞌ bꞌey jun wonan yetcꞌulal bꞌey chi aol cꞌu,
yul yet Aram,
yet jix jin bꞌet tit yu naj Balac sreyal conobꞌ Moab.
Titan,
catuꞌ cha kꞌanontej syaꞌtajilal yibꞌan ebꞌ conobꞌ Israel;
kꞌantej pena kꞌane yibꞌan ebꞌ yicꞌaal Jacob tuꞌ,
ẍi naj ey jin.
8 Yu tuꞌ xin,
¿tzet wal chi yun walon can pena kꞌane yibꞌan ebꞌ,
ta manaj Jehová chi aloni?
¿Tzet wal chi yun jin kꞌanontej syaꞌtajilal yibꞌan ebꞌ ánima ta manaj Jehová chi aontej junoj syaꞌilal yibꞌan ebꞌ?
9 Caw wal watxꞌ wilontoj jun conobꞌ tuꞌ yet ey jin atoj yibꞌan sjolom chꞌen chꞌen tiꞌ,
caw wal watxꞌ wilontoj bꞌey sjolom wonan bꞌey ey jin ecꞌ tiꞌ.
Jaꞌ jun conobꞌ tuꞌ txꞌoj yeli,
catuꞌ cꞌam chi scaltoj sbꞌa xol wanxa conobꞌ pena sbꞌeybꞌal.
10 Caw wal watxꞌ snaꞌbꞌal ebꞌ,
laan sbꞌisil jun conobꞌ tuꞌ jaxca spojojal txꞌotxꞌ txꞌotxꞌ.
¿Cꞌam junoj mactxequel chi skeꞌ sbꞌisoni?
Toloj wal quey jin tuꞌ jaxca ebꞌ tuꞌ,
toloj wal chin cam jaxca ebꞌ ánima watxꞌ snaꞌbꞌal tuꞌ,
ẍi naj Balaam sattaj ebꞌ tuꞌ.
11 Jaxa yet jix yabꞌen naj Balac tol jaxca tuꞌ jix yun yalon naj Balaam,
catuꞌ jix oc ian naj yalon tet naj Balaam jaxca tiꞌ:
—¿Tzet to wal ja wei?
Jix jaach wawte an yu jul ja kꞌanontej syaꞌtajilal yibꞌan ebꞌ jin cajat tiꞌ,
jaxa pax tinaniꞌ tol jaꞌ watxꞌ kꞌane jix ja kꞌantej yibꞌan ebꞌ,
ẍi naj Balac.
12 Jix takꞌwi naj Balaam,
jix yalon naj jaxca tiꞌ:
—Asan tzetyetal oj yal Dios ey jin,
jaꞌ oj walaꞌ,
ẍi tet naj Balac.
13 Caw wal jix oc cꞌal ian naj Balac tuꞌ yalon tet Balaam jaxca tiꞌ:
—Toon wal wetoj junelxa tituꞌ,
bꞌey chi skeꞌ kilontoj niꞌoj stiꞌlaj bꞌey bꞌulan ecꞌ ebꞌ jin cajat tuꞌ,
jaꞌ ojabꞌ niꞌan cha wiltoj tuꞌ cha kꞌantej syaꞌtajilal yibꞌan ebꞌ jin kꞌanaꞌ,
ẍi naj Balac.
14 Jix lawi tuꞌ,
catuꞌ jix ijbꞌaletoj naj Balaam yu naj Balac bꞌey jun acꞌal bꞌey Sofim,
bꞌey sjolom jun wonan chi yij Pisgá.
Jaꞌ tituꞌ jix swaꞌne a jujebꞌ yet xaambꞌal,
catuꞌ jix smakꞌon cam jujcꞌon noꞌ achꞌe wacax yetoj cꞌal jujcꞌon noꞌ icham meꞌ yibꞌan junjun wan yet xaambꞌal tuꞌ.
15 Jix yalon naj Balaam tet naj Balac jaxca tiꞌ:
—Watxꞌ ja we scꞌatan wan xaambꞌal tiꞌ,
yajbꞌan chin too kꞌanabꞌ yetoj Jehová.
16 Yet cꞌal jun txolan tuꞌ jix eyol Jehová scꞌatan naj Balaam,
catuꞌ jix yaloni,
tzet sowalil chi yunne:
—Asiꞌ bꞌey eyecꞌ naj Balac,
catuꞌ cha walon tet jaxca chi yun walon ey jaach,
ẍi Jehová.
17 Jix meltzo naj Balaam scꞌatan naj Balac bꞌey linan can oc scꞌatan wan yet xaambꞌal tuꞌ,
yetoj cꞌal ebꞌ icham winaj tol ey yopiso bꞌey conobꞌ Moab,
catuꞌ jix skꞌanlen naj Balac tet naj Balaam jaxca tiꞌ:
—¿Tzet jix yun yalon Jehová ey jaach?
18 Catuꞌ jix oc ian naj Balaam yalon jaxca tiꞌ:
Jaach Balac,
scꞌaal naj Zipor,
chi cam wal ja wabꞌen tzet oj wal ey jaach.
19 Jaꞌ Jehová man laan oj jaxca ebꞌ ánima.
Cꞌam chi yakꞌ lekꞌtiꞌal,
cꞌam chi skꞌex snaꞌbꞌal.
Cꞌam chi ecꞌ tzet chi yalaꞌ,
chi cꞌal yun tzet chi yalaꞌ;
yet chi yakꞌon can stiꞌ yin junoj tzetyetal,
chi cꞌal yun tzet chi yalaꞌ.
20 Jix yal Jehová ey jin,
tol chi wal watxꞌ kꞌane yibꞌan jun conobꞌ tuꞌ.
Jaꞌ tzet chi yalaꞌ,
sowalil chi wunne.
21 Jaꞌ Jehová jaꞌton sreyal ebꞌ Israel,
jaꞌ ey cꞌal ecꞌ yetoj ebꞌ.
Cꞌam chi yoche chi yun spenail ebꞌ,
catuꞌ cꞌam chi yaoc syaꞌilal yibꞌan ebꞌ.
22 Jaꞌ Jehová,
jix iꞌon eltej ebꞌ bꞌey txꞌotxꞌ Egipto,
yuxan jaꞌ Naj eyoc yipoj scꞌul ebꞌ,
jaxca junoj noꞌ wacax cꞌam chi xiwi,
tol jaꞌ yucꞌaꞌ eyoc yipoj scꞌul,
queyton tuꞌ yeoc ebꞌ conobꞌ tuꞌ.
23 Jaꞌ xol ebꞌ yicꞌaal Jacob,
cꞌam yeloc apnoj ebꞌ txumlom,
cꞌal ebꞌ naꞌom el kꞌane yul sat ebꞌ.
Yuxan jaꞌ tinaniꞌ,
sowalil chi al-le yin Israel jaxca tiꞌ:
Qꞌueyubꞌtaj xacꞌal jix yun xꞌoxon scolwal Jehová yin ebꞌ,
ẍi ojabꞌ ánima yin ebꞌ.
24 Jaꞌ jun conobꞌ tiꞌ,
caw wal ey smey jaxca noꞌ bꞌalam,
cꞌam cꞌal chi xewi masantaꞌcꞌal chi yiꞌ ẍiꞌbꞌe,
catuꞌ chi yuqꞌuen eytoj ẍiqꞌuil noꞌ noꞌ chi michꞌcha ey yu,
ẍi naj Balaam.
25 Jix lawi tuꞌ,
jix yalon naj Balac tet naj Balaam jaxca tiꞌ:
—Ta cꞌam chi skeꞌ ja kꞌanontej syaꞌtajilal yibꞌan jun conobꞌ tuꞌ,
cꞌam ojabꞌ pax cha kꞌantej syaaxilal Dios yibꞌan ebꞌ,
ẍi naj Balac.
26 Catuꞌ jix takꞌwi naj Balaam jaxca tiꞌ:
—¿Tumi ma wal ey jaach an,
asan tzet chi yal Jehová ey jin,
sowalil jaꞌ chi walaꞌ?
ẍi naj Balaam.
27 Yu tuꞌ xin,
jix yalon pax naj Balac jaxca tiꞌ:
—Titan xin,
toon wetoj tituꞌ an.
Tala cꞌuxan jaꞌ tituꞌ oj ẍaꞌ scꞌul Dios oj skeꞌ ja kꞌanontej syaꞌtajilal yibꞌan ebꞌ Israel tuꞌ.
28 Yuxan jix ijbꞌaletoj naj Balaam yu naj Balac bꞌey sjolom wonan chi yij Peor,
bꞌey txequel kilontoj txꞌotxꞌ cusiltaj txꞌotxꞌ.
29 Jaꞌ yet eyecꞌ ebꞌ tituꞌ,
jix yalon naj Balaam tet naj Balac jaxca tiꞌ:
—Waꞌne a jujebꞌoj yet xaambꞌal titiꞌ,
catuꞌ cha makꞌon cam jujcꞌonoj noꞌ achꞌe wacax cꞌal jujcꞌonoj noꞌ icham meꞌ,
ẍi naj Balaam.
30 Jaꞌ yet jix lawi swaꞌxi wan yet xaambꞌal tuꞌ yu naj Balac,
jaxa naj Balaam jix akꞌon tzꞌaꞌ noꞌ achꞌe wacax yetoj noꞌ icham meꞌ yibꞌan wan yet xaambꞌal tuꞌ.