24
Yutol jix naꞌcha el yu naj Balaam tol chi ẍaꞌ scꞌul Jehová chi al-le watxꞌ kꞌane yibꞌan conobꞌ Israel,
yuxan ma xa too skꞌanle naj tet Jehová jaxca taꞌ jix yun naj yet sbꞌabꞌelal,
asan tol jix too tꞌanan naj bꞌey txꞌotxꞌ cusiltaj txꞌotxꞌ.
2 Jaxa yet jix yilontoj conobꞌ Israel naj Balaam,
tol txololi xacꞌal ye ey bꞌulan skꞌap na ebꞌ Israel yin junjun icꞌaaleal,
catuꞌ jix eyol Yespíritu Dios yin naj Balaam,
3 catuꞌ jix oc ian yalon wan kꞌane naj jaxca tiꞌ:
Jaꞌton jin kꞌane jain Balaam jin tiꞌ,
scꞌaal jin naj Beor,
tol caw lemlem wal jin sat,
chi waloni.
4 Jix wabꞌ tzet jix yal Jehová,
yin weyicheal jix yun wilon oc yin Dios,
Naj chi skeꞌ yu masanil.
Cꞌamxa chi naꞌcha taꞌ tzet chi wute jin bꞌa,
catuꞌ jix jin ey xacꞌal noanoj,
catuꞌ jix jin lembꞌan eltej jin sat,
jix naꞌcha el wu tzet sowalil chi wunne.
5 Jex yicꞌaal Jacob,
caw watxꞌ xacꞌal yili je na.
Caw wal watxꞌ xacꞌal yilitoj bꞌey bꞌulan jex eyoj.
6 Jaxca wal kilontoj xolil teꞌ palma,
ma jaxca junoj joyan an cꞌultaj eyoc xumac bꞌey stiꞌlaj jaꞌ jaꞌ.
Jaxca wal junoj xumac teꞌ áloe tol sukꞌukꞌi xacꞌal yoc sabꞌ,
awbꞌil yu Dios,
jaxca wal syaxil xaj teꞌ kꞌuteꞌ ey stiꞌlaj jaꞌ jaꞌ.
7 Jaꞌ bꞌey eyecꞌ ebꞌ Israel tuꞌ,
caw ey jaꞌ jaꞌ watxꞌ yuqꞌuen ebꞌ,
cꞌal yaon oc yaal yawo ebꞌ.
Jaꞌ sreyal ebꞌ,
ecꞌbꞌan yibꞌan naj rey Agag.
Caw miman tzet chi skeꞌ yu jun sreyal ebꞌ tuꞌ.
8 Jaꞌ Jehová jix iꞌon eltej ebꞌ bꞌey txꞌotxꞌ Egipto,
yuxan jaꞌcaw eyoc yipoj scꞌul ebꞌ,
jaxca wal junoj noꞌ wacax tol jaꞌ yucꞌaꞌ eyoc yipoj scꞌul.
Jaꞌ ebꞌ conobꞌ Israel jix yakꞌ eyqꞌuey ebꞌ chi jowi oc yin,
oj smakꞌ kꞌatoj sbꞌajil scajat ebꞌ,
catuꞌ oj yakꞌon eyqꞌuey ebꞌ yetoj sjulbꞌal.
9 Laan wal ebꞌ jaxca junoj noꞌ bꞌalam kupan ey weyoj,
cꞌam junoj mactxequel chi skeꞌ stenon el sweyan cꞌal xꞌemoni.
Al-le ojabꞌ watxꞌ kꞌane yin ebꞌ chi alon watxꞌ kꞌane je yin jaex Israel jex tiꞌ,
jal mactxequel chi alon pena kꞌane yin,
pena oj yun yeloc ebꞌ,
ẍi naj Balaam.
Slawubꞌal Kꞌane Jix Yal Can Naj Balaam
10 Jaꞌ yet jix yabꞌen naj Balac wan kꞌane jix yal naj Balaam tuꞌ,
caw jix tit sjowal naj,
catuꞌ jix smakꞌon ey skꞌabꞌ naj yu sjowal sjolom,
jix yalon naj jaxca tiꞌ:
—Jix jaach wawte yu ja kꞌanontej syaꞌtajilal yibꞌan wan jin cajat tiꞌ,
ilaꞌ wal tol oxelxa pax cha kꞌantej syaaxilal yibꞌan ebꞌ.
11 Yel xacꞌal mi watxꞌ tol chach pax toj bꞌey ja na,
ilaꞌ tol jix wal ey jaach tol miman oj yun ja weloc apnoj wu an,
jaxa Jehová ma yal scꞌul jaxca tuꞌ chi yunne,
ẍi naj Balac.
12 Jix takꞌwi naj Balaam jaxca tiꞌ:
—Jichan cꞌal jix yun walon tet ebꞌ ja chejabꞌ:
13 Caxcꞌal mi nonaj yul na bꞌey cha wakꞌ yaawilal tiꞌ yu chꞌen oro ma yu chꞌen plata,
catuꞌ cha wakꞌon chꞌen ey jin an,
caw ma skeꞌ tol man oj jin jije tzet chi yal Jehová,
yutol cꞌam chi skeꞌ wunen junoj tzetyetal yul wet jin txꞌojli.
Yutol jaꞌ tzet chi yoche Jehová chi waleloj,
sowalil jaꞌ chi walaꞌ.
14 Caw wal watxꞌ tol chin meltzo bꞌey jin conobꞌ;
asan xin,
yet cꞌamto chin pax toj an,
chi wal can ey jaach tzet oj utele jun ja conobꞌ tiꞌ yu jun conobꞌal ebꞌ ánima tuꞌ yet bꞌakꞌin,
ẍi naj Balaam.
15 Jix lawi tuꞌ xin,
catuꞌ jix oc ian naj yalon can wan kꞌane jaxca tiꞌ:
Jaꞌton jin kꞌane chi wal can jain Balaam jin tiꞌ,
scꞌaal jin naj Beor,
tol caw lemlem jin sat catuꞌ chi walon canoj.
16 Jix wabꞌ tzet jix yal Jehová,
jaxca yin weyicheal jix yun wilon oc yin Dios,
Naj chi skeꞌ yu masanil.
Cꞌamxa chi naꞌcha taꞌ tzet chi wute jin bꞌa,
catuꞌ jix jin ey wal noanoj,
catuꞌ jix jin lembꞌan eltej jin sat,
queytuꞌ jix yun snaꞌcha el wu tzet sowalil chi wunne.
17 Ey jun mactxequel tol naat ey,
chi xa skeꞌ pax wilon sjuli;
ey jun rey oj txeclo a xol ebꞌ yicꞌaal naj Jacob,
caw chi tzejeji jaxca weycan.
Jaꞌ jun rey tuꞌ,
oj yakꞌ yaawil xol ebꞌ yicꞌaal Israel.
Jaꞌ oj qꞌueyon el ebꞌ conobꞌ Moab,
catuꞌ oj qꞌueyle pax el ebꞌ yicꞌaal naj Set.
18 Catuꞌ oj yakꞌon qꞌueyle el ebꞌ yicꞌaal Edom caan yul yet txꞌotxꞌ Seír;
catuꞌ oj yiꞌon can oc txꞌotxꞌ txꞌotxꞌ ebꞌ.
Jaꞌ conobꞌ Israel tuꞌ oj yiꞌ wal yip sicꞌlebꞌil.
19 Jaꞌ xol ebꞌ yicꞌaal Jacob tuꞌ,
oj eltej jun mactxequel oj oc yin yaawil.
Jaꞌ oj qꞌueyon can el jantaj to mactxequel oj can yul jun conobꞌ tuꞌ,
ẍi naj Balaam.
20 Jix lawi tuꞌ xin,
catuꞌ jix too tꞌanan naj Balaam yin conobꞌ Amalec,
jix yalon can wan kꞌane naj jaxca tiꞌ:
Jaꞌ conobꞌ Amalec caxcꞌal yel xacꞌal ey smey yintaj wanojxa conobꞌ,
oj qꞌueyle cꞌal pax el yin junelne,
ẍi naj Balaam.
21 Catuꞌ jix too tꞌanan naj yin jun conobꞌ bꞌey ey ebꞌ Quenita,
catuꞌ jix yalon naj jaxca tiꞌ:
Jex yicꞌaal naj Caín,
caxcꞌal caw jelan jex je colon je bꞌa,
caxcꞌal yibꞌanlaj chꞌen chꞌen,
che waꞌne a je na,
caxcꞌal ey je nachꞌen bꞌey che col je bꞌa yetoj ebꞌ je yuninal,
22 jantaj to jaex Quenita jex tiꞌ,
cꞌam chi ecꞌtoj je qꞌueyle eloj,
oj jex yiꞌ cantoj ebꞌ naj Asiria yin ẍejabꞌoj,
ẍi naj Balaam.
23 Jix lawi tuꞌ xin,
catuꞌ jix yalon naj jaxca tiꞌ:
¡Ay!
¿Tumi eyto mactxequel oj iquisbꞌoj can yet oj yunen Dios wan tuꞌ?
24 Ey ebꞌ ánima oj tit bꞌey Chipre yul barco,
oj jul ebꞌ bꞌey stiꞌ jaꞌ mar yet chi jul yakꞌon jowal yin conobꞌ Asiria cꞌal yin conobꞌ Éber,
jaꞌ ebꞌ tuꞌ oj eyqꞌuey cꞌal pax ebꞌ,
ẍi naj Balaam.
25 Jix lawi yalon wan kꞌane naj tuꞌ,
catuꞌ jix meltzo naj bꞌey sconobꞌ,
catuꞌ jix smeltzo pax cantoj naj Balac bꞌey sna.