—Yambꞌatej masanil ebꞌ icham winaj ey yopiso yul conobꞌ,

catuꞌ chi jul ebꞌ jin sattaj,

cꞌal sattaj ebꞌ conobꞌ tiꞌ,

catuꞌ cha tꞌunbꞌa a ebꞌ.

Jaxca tuꞌ oj yun yecꞌ el sjowal jin cꞌul yin conobꞌ Israel tiꞌ,

ẍi Jehová.

5 Jix lawi tuꞌ xin,

jix yalon naj Moisés jun chejbꞌanile tiꞌ tet ebꞌ yaaw yeoc xol ebꞌ conobꞌ Israel,

jix yalon ebꞌ jaxca tiꞌ:

—Junjun jex jaex tiꞌ,

sowalil che makꞌ cam ebꞌ winaj jix ijbꞌaletoj yu ebꞌ ix ix yet jix bꞌet ebꞌ yin eyilal tet jun comon dios chi yij Baal-peor.

6 Jaꞌ yet lalanto yalon naj Moisés wan kꞌane tuꞌ,

ey jun naj a Israel jix ecꞌtoj scawilal sattaj scalubꞌal Jehová,

sattaj wal naj Moisés yetoj ebꞌ conobꞌ yaman oc tituꞌ,

jix iꞌletoj jun ix a Madián yu naj bꞌey yul skꞌap na,

jal ebꞌ conobꞌ caw chi okꞌ ebꞌ sicꞌlebꞌil sattaj scalubꞌal Jehová.

7 Jaꞌ yet jix yilon naj Finees scꞌaal naj Eleazar,

yitxiquin naj Aarón,

jix eltej naj xol ebꞌ ánima yaman oc tuꞌ,

catuꞌ jix yilontoj naj,

8 masantaꞌcꞌal jix apni oc tzajan yintaj naj a Israel cꞌal ix a Madián bꞌey yul skꞌap na bꞌey eyecꞌoj,

catuꞌ jix stejon octoj chꞌen slanza naj yul scꞌul naj a Israel cꞌal yin ix a Madián tuꞌ,

queytuꞌ jix yun yoc tucan scam ebꞌ ánima yu syaꞌilal ey xol conobꞌ Israel yu Jehová.

9 Eyxa 24,000 ebꞌ ánima xax cam yu jun syaꞌilal tuꞌ.

10 Jix lawi tuꞌ xin,

jix yalon pax Jehová tet naj Moisés jaxca tiꞌ:

11 —Jaꞌ naj Finees jix iꞌon oc tucan sjowal jin cꞌul yibꞌan conobꞌ Israel tiꞌ,

yutol jaꞌ jun naj jix yabꞌ syaꞌil wetoj;

ta ma yun naj jaxca tuꞌ,

masanil mi jun conobꞌ tiꞌ jix lawi eloj.

12 Yuxan jaꞌ tinaniꞌ xin,

al tet naj tol chin waꞌne can ye junoj jin wa kꞌane yet watxꞌcꞌulal yetoj naj.

13 Tol chi wa can oc jun yopiso naj yetoj ebꞌ scꞌaal,

cꞌal ebꞌ yicꞌaal naj,

yet chi oc can ebꞌ yin yakꞌomaloj xaambꞌal ey jin yin junelne.

Yutol jaꞌ jun naj jix yaoc sbꞌa wetoj an,

jaꞌ naj jix iꞌon oc tucan sjowal jin cꞌul yibꞌan conobꞌ Israel,

ẍi Jehová tet naj Moisés.

14 Jaꞌ naj Israel jix cam yetoj ix a Madián tuꞌ,

chi yij sbꞌi Zimrí,

scꞌaal Salú,

yaaw yeoc xol ebꞌ yicꞌaal Simeón.

15 Jal pax ix a Madián tuꞌ,

Cozbí,

sbꞌi ix,

scutzꞌin naj Sur,

yaaw yeoc naj xol jun tujan ánima bꞌey conobꞌ Madián.

16 Jix yalon pax Jehová tet naj Moisés jaxca tiꞌ:

17 —Jaꞌ tinaniꞌ akꞌwej jowal yetoj ebꞌ naj a Madián,

catuꞌ che qꞌueyon el ebꞌ.

18 Yutol jix jul jun syaꞌilal je yibꞌan yu ebꞌ.

Catuꞌ jix jex ijbꞌaletoj yu ebꞌ yet chex oc yin eyilal tet jun comon dios chi yij Baal,

yetoj cꞌal tzet jix jex utele yu ix Cozbí,

scutzꞌin naj syaawil ebꞌ tuꞌ,

jaꞌton ix jix cam yu chꞌen lanza,

yet caw eyecꞌ syaꞌilal je xol,

yutol yu cꞌal ebꞌ ix yuxan jix jex oc yin eyilal tet jun comon dios chi yij Baal-peor,

ẍi Dios.