2 Jaꞌ tituꞌ caw cꞌam jaꞌ jaꞌ watxꞌ yuqꞌuen ebꞌ ánima,

yuxan jix syambꞌa oc sbꞌa ebꞌ ánima yin naj Moisés cꞌal yin naj Aarón.

3 Jix yalon ebꞌ tet naj Moisés jaxca tiꞌ:

—Toloj wal taꞌ jix cu cam can yetoj ebꞌ ket conobꞌ jix akꞌle can cam yu Jehová.

4 ¿Tzet taꞌ wal yu,

yuxan chon ja wiꞌtej bꞌey jun cusiltaj txꞌotxꞌ tiꞌ?

¿Tumi cha woche chi cu cam pax jaon tiꞌ yetoj noꞌ cu jobꞌbꞌeal noꞌ tiꞌ?

5 ¿Tzet wal yu,

yuxan jix jon ja wiꞌeltej bꞌey yul yet Egipto,

catuꞌ chon ja wiꞌontej bꞌey jun txꞌotxꞌ cꞌam niꞌoj swatxꞌil tiꞌ?

Jaꞌ titiꞌ cꞌam chi skeꞌ kawon cu tiriw,

cꞌam steꞌal teꞌ higo,

cꞌam an uva,

cꞌam teꞌ granada,

cꞌam pax niꞌoj jaꞌ jaꞌ chi skeꞌ kuqꞌueni,

ẍi ebꞌ.

6 Jaꞌ yet jix yabꞌen naj Moisés cꞌal naj Aarón wan kꞌane tuꞌ,

catuꞌ jix sjitzon el sbꞌa ebꞌ,

catuꞌ jix too ebꞌ bꞌey smajil snail scalubꞌal Jehová,

jaꞌ tituꞌ jix bꞌet ey noan ebꞌ txaloj masantaꞌ jix ey spalan ebꞌ naj sat txꞌotxꞌ;

jaxa yet jun txolan tuꞌ jix xꞌoxon sbꞌa stzejejial Jehová scawilal ebꞌ naj.

7 Jix yalon Jehová tet naj Moisés jaxca tiꞌ:

8 —Iꞌtoj ja kꞌojoch tiꞌ,

catuꞌ cha walon tet naj ja wuẍtaj Aarón tol chi colwa ja wetoj yet che yambꞌan oc ebꞌ ánima.

Catuꞌ chex too bꞌey jun chꞌen miman chꞌen,

cha walon tet chꞌen tol chi elol jaꞌ jaꞌ sat chꞌen chꞌen tuꞌ,

jaxa sattaj masanil ebꞌ ánima tuꞌ oj elol jaꞌ,

jaxa yuqꞌuen jaꞌ ebꞌ yetoj cꞌal sjobꞌbꞌeal noꞌ ebꞌ,

ẍi Dios.

9 Jix lawi tuꞌ,

jix yiꞌon eltej teꞌ skꞌojoch naj Moisés eey sattaj Jehová,

jaxca wal jix yun yaloni.

10 Catuꞌ jix yambꞌale oc ebꞌ ánima yu naj Moisés cꞌal yu naj Aarón jix yalon tet ebꞌ jaxca tiꞌ:

—¡Abꞌwej tzet oj wal ey jex jaex cꞌam swatxꞌil je naꞌbꞌal tiꞌ!

¿Tumi jaꞌ sat jun chꞌen miman chꞌen tiꞌ chi kiꞌeltej jaꞌ jaꞌ,

catuꞌ chi kakꞌon jaꞌ je yuqꞌueꞌ?

ẍi naj Moisés tet ebꞌ.

11 Jaꞌ yet jix lawi yalon jaxca tuꞌ,

jix yiꞌon a skꞌabꞌ naj Moisés yetoj skꞌojoch,

cael jix smakꞌoc naj yin sat jun chꞌen chꞌen tuꞌ,

catuꞌ jix elol secna jaꞌ jaꞌ tituꞌ;

jix yuqꞌuen jaꞌ ebꞌ ánima tuꞌ yetoj noꞌ sjobꞌbꞌeal noꞌ ebꞌ.

12 Jix lawi tuꞌ xin,

catuꞌ jix yalon Jehová tet naj Moisés cꞌal tet naj Aarón jaxca tiꞌ:

—Yutol jaex tiꞌ ma jin je yaoc yin je cꞌul,

ma je yiꞌa can jin bꞌi sattaj ebꞌ conobꞌ Israel tiꞌ,

yutol asanxane jin ocoj,

yu jun tuꞌ xin,

man oj je yiꞌtoj wan ánima tiꞌ bꞌey sat txꞌotxꞌ txꞌotxꞌ tuꞌ,

bꞌey jix walaꞌ tol oj wakꞌ ey jex,

ẍi Dios.

13 Meribá^a sbꞌi jun txꞌotxꞌ tuꞌ bꞌey jix xꞌem sbꞌa ebꞌ Israel yin Jehová,

jaꞌ tituꞌ jix xꞌox yipalil Jehová,

yutol asanxane miman yeloc apnoj.

14 Jaꞌ yet eyecꞌ naj Moisés bꞌey txꞌotxꞌ Cadés,

jix yatoj ẍejabꞌ naj yu stoo yalon tet naj sreyal conobꞌ Edom yet chi too yaloni:

Jaon Israel jon tiꞌ,

caw kotaj cu bꞌa je yetoj,

tejan che yabꞌ cu kꞌumal jon yu tzet chi cu utele bꞌey conobꞌ Egipto jon.

15 Jaꞌ ebꞌ cu mam icham yet peyxa jon,

jix caey ecꞌ jun tiempoal ebꞌ tituꞌ,

caw naatil ecꞌnaj ebꞌ bꞌey jun conobꞌ tuꞌ.

Caw ecꞌom yaꞌ jix utele ebꞌ yu ebꞌ a Egipto tuꞌ,

jacꞌalaꞌ pax tinaniꞌ caw chi cu yetne ebꞌ jon.

16 Yu jun tuꞌ xin,

yuxan jix cu kꞌan scolwal Jehová jon;

jix yabꞌ Jehová tzet chi cu kꞌan tet jon,

yuxan jix ẍejtej jun yángel Naj yet jix cu yiꞌon eltej bꞌey Egipto tuꞌ.

Yuxan jaꞌ tinaniꞌ ey jon ecꞌ bꞌey conobꞌ Cadés,

bꞌey smoonal jaꞌ txꞌotxꞌ tiꞌ.

17 Yuxan chi kal ey jaach jon,

tol chon ja chaꞌ cu kꞌaxbꞌonen ecꞌtoj yul jaꞌ nación tiꞌ.

Cꞌam cꞌal chi cu too xol je yawo,

man oj kucꞌ pax jaꞌ jaꞌ che yuqꞌueꞌ;

asan cꞌal yul miman bꞌe chi cu too jon.

Cꞌam cꞌal bꞌey oj cu el stiꞌlaj miman bꞌe tiꞌ jon,

masantaꞌcꞌal chi cu ecꞌtoj yul ja nación tiꞌ,

ẍi naj Moisés.

18 Jix takꞌwi naj sreyal conobꞌ Edom jaxca tiꞌ:

—Cꞌam cꞌal chex ecꞌtoj yul jin nación tiꞌ.

Ta tol man oj je yabꞌ tzet chi walaꞌ,

ta comon cꞌal oj jex ecꞌtoj,

oj jin eltoj yetoj ebꞌ jin soldado,

yu jex wujten eloj.

19 Jix yalon pax ebꞌ Israel jaxca tiꞌ:

—Cꞌamaj,

jaon tiꞌ asan cꞌal yul miman bꞌe oj cu toj jon.

Ta ey bꞌey oj kucꞌ niꞌoj jaꞌ je yucꞌbꞌal jaꞌ yetoj noꞌ cu jobꞌbꞌeal noꞌ tiꞌ,

oj cu toolane ey jaach.

Asan jun chi yoche cu cꞌul tol chi cu kꞌaxbꞌo ecꞌtoj bꞌey sat ja txꞌotxꞌ tiꞌ,

ẍi ebꞌ.

20 Catuꞌ jix takꞌwi pax naj sreyal conobꞌ Edom jaxca tiꞌ:

—Cꞌamaj,

cꞌam cꞌal chex jin chaꞌ ecꞌtoj,

ẍi naj.

Jaxa jix yunne,

jix eltoj naj rey yetoj ebꞌ cuywinaj yin jowal yet chi ujtele el ebꞌ Israel tuꞌ,

yetbꞌi oc smitxꞌkꞌabꞌ yet jowal ebꞌ masanil.

21 Yutol ma yal scꞌul naj sreyal Edom tuꞌ chi ecꞌtoj ebꞌ Israel sat xꞌotxꞌ,

yuxan jix sey junxa bꞌe ebꞌ Israel bꞌey jix too ebꞌ.

22 Masanil ebꞌ Israel jix el ebꞌ bꞌey txꞌotxꞌ Cadés,

catuꞌ jix bꞌet xolbꞌan ey sbꞌa ebꞌ bꞌey yetcꞌulal jun wonan chi yij Hor,

bꞌey sattaj ecꞌtoj smoonal txꞌotxꞌ Edom.

23 Jaꞌ tituꞌ jix yal Jehová tet naj Moisés yu naj Aarón jaxca tiꞌ:

24 Jaꞌ tinaniꞌ xin,

tuxa oj cam naj Aarón tiꞌ,

manxa oj apnoj oc naj sat txꞌotxꞌ txꞌotxꞌ bꞌey jix walaꞌ tol oj wakꞌ ey jex,

yutol ma je jije jin chejbꞌanil jix wal ey jex bꞌey stiꞌ jaꞌ Meribá.

25 Jaꞌ tinaniꞌ xin,

iꞌtoj naj Aarón tiꞌ yetoj scꞌaal chi yij Eleazar bꞌey sjolom txꞌotxꞌ wonan chi yij Hor.

26 Jaꞌ tituꞌ cha wiꞌel spichil Aarón chi skꞌan yin yopiso yet chi yakꞌon xaambꞌal,

catuꞌ cha waon can oc an yin naj Eleazar,

yutol jaꞌ Aarón tiꞌ oj cam xacꞌal tituꞌ,

ẍi Dios tet naj Moisés.

27 Catuꞌ jix sjijen naj Moisés tzet jix yal Jehová;

sattaj wal masanil ebꞌ ánima,

catuꞌ jix iꞌletoj Aarón cꞌal Eleazar yu naj Moisés,

bꞌey sjolom wonan chi yij Hor.

28 Jaꞌ tituꞌ jix iꞌle el spichil naj Aarón yu naj Moisés,

catuꞌ jix ale oc yin naj Eleazar yu naj bꞌey sjolom jun wonan tuꞌ;

jaꞌ tituꞌ jix cam xacꞌal naj Aarón.

Jix cꞌal lawi tuꞌ xin,

catuꞌ jix paxeytej naj Moisés yetoj naj Eleazar.

29 Jaxa yet jix yabꞌen masanil ebꞌ Israel tol jix cam naj Aarón,

jun xꞌaaw jix oc ebꞌ yin cuscꞌulal yu scamichal naj Aarón.