7 Jaꞌ Jehová cu Diosal,

caw jix yakꞌ swatxꞌcꞌulal kibꞌan yu jantaj tzet jix kunne.

Jaꞌ yul jun 40 abꞌil tuꞌ,

ey cꞌal oc Naj ketoj,

catuꞌ jix cu steynen cꞌal Naj yet jix cu bꞌeytoj sat jun miman cusiltaj txꞌotxꞌ tuꞌ.

Cꞌam cꞌal tzet jix lawi a ey jon.

8 Jix lawi tuꞌ,

jix cu too taꞌcꞌal stiꞌlaj xꞌotxꞌ ebꞌ kican,

jaꞌton ebꞌ yicꞌaal Esaú caan bꞌey Seír.

Jix cu too bꞌey jun bꞌe chi ecꞌtoj bꞌey Arabá,

chi tit bꞌey Elat,

cꞌal bꞌey Esión-guéber.

Jix cu meltzo bꞌey chi too jun bꞌe chi ecꞌtoj bꞌey txꞌotxꞌ cusiltaj txꞌotxꞌ yul yet Moab.

9 Catuꞌ jix yalon Jehová ey jin jaxca tiꞌ:

Manche je txꞌem ebꞌ Moabita,

tam wal je yakꞌon jowal yetoj ebꞌ yutol yicꞌaal naj Lot ebꞌ.

Cꞌam cꞌal niꞌoj txꞌotxꞌ xꞌotxꞌ ebꞌ tuꞌ oj wakꞌ ey jex.

Jain jix wakꞌ masanil txꞌotxꞌ Ar tet ebꞌ,

ẍi Dios.

10 (Jaꞌ tituꞌ caan ebꞌ Emita yet peyxa.

Caw wal mimej conobꞌ yeoc ebꞌ,

mimej steel ebꞌ,

laan steel ebꞌ jaxca ebꞌ yicꞌaal Anac.

11 Caw yel,

jaꞌ ebꞌ ánima caan bꞌey jun txꞌotxꞌ tuꞌ,

Refaítas ebꞌ yutol caw mimej steel ebꞌ,

caw ey smey ebꞌ,

yuxan Emita sbꞌi yu ebꞌ Moabita.

12 Jaꞌ yul yet txꞌotxꞌ Seír,

jaꞌ tituꞌ jix caey ecꞌ ebꞌ a Horeo.

Jaxa ebꞌ yicꞌaal Esaú jix ujten el ebꞌ,

catuꞌ jix qꞌueyle el ebꞌ yu ebꞌ,

jaxa ebꞌ jix caey ecꞌ bꞌey jun txꞌotxꞌ tuꞌ,

jaxca jix kun jaon Israel jon tiꞌ bꞌey txꞌotxꞌ txꞌotxꞌ jix yakꞌ Jehová ey jon.)

13 Jaxa jix yun xin,

jix yalon Jehová:

Asiꞌwej tinaniꞌ,

catuꞌ chex ecꞌtoj yul jaꞌ jaꞌ chi yij Zéred,

ẍi Dios,

yuxan jix cu kꞌaxbꞌo ecꞌtoj yul jaꞌ jaꞌ tuꞌ.

14 Jatax cꞌal yet jix cu el bꞌey Cadés-barnea,

masantaꞌcꞌal yet jix cꞌu kꞌaxbꞌo ecꞌtoj bꞌey yul jaꞌ Zéred,

jaꞌ yet tuꞌ jix ecꞌtoj 38 abꞌil,

yuxan jaꞌ masanil ebꞌ naj ket conobꞌ tol stiempoal stoo yin akꞌo jowal yet jix cu el bꞌey txꞌotxꞌ Egipto,

xax lawi scamtoj ebꞌ,

jix eloc jaxca bꞌey yakꞌnaj can stiꞌ Dios.

15 Jaꞌ yipalil Jehová jix jul yibꞌan ebꞌ,

catuꞌ jix cam masanil ebꞌ.

16 Jaꞌ yet cꞌamxa junoj ebꞌ winaj tuꞌ jix cancanoj,

17 jix yalon Jehová ey jin jaxca tiꞌ:

18 Jaꞌ tinaniꞌ oj jex ecꞌtoj bꞌey smoonal txꞌotxꞌ Moab bꞌey conobꞌ Ar.

19 Yuxan jaꞌ yet che chaꞌlen je bꞌa yetoj ebꞌ Amonita,

tol yicꞌaal Lot ebꞌ,

cꞌam cꞌal che txꞌem ebꞌ,

cꞌam cꞌal che yakꞌ jowal yetoj ebꞌ,

yutol cꞌam cꞌal niꞌoj xꞌotxꞌ ebꞌ oj wakꞌ ey jex,

yutol jain jix wakꞌcan txꞌotxꞌ tet ebꞌ,

ẍi Dios.

20 (Yutol jaꞌ jun txꞌotxꞌ tuꞌ yet ebꞌ Refaíta yet peyxa,

yuxan jix caey ecꞌ ebꞌ tituꞌ;

jaꞌton ebꞌ chi ijon Zamzumitas yu ebꞌ Amonita yet peyxa.

21 Jaꞌ ebꞌ tuꞌ,

caw wal miman sbꞌisil ebꞌ yul sconobꞌ,

caw mimej pax steel ebꞌ jaxca ebꞌ yicꞌaal Anac.

Jaꞌ Jehová jix akꞌon qꞌueyle el ebꞌ yu ebꞌ Amonita.

Jaꞌ ebꞌ jix ujten el ebꞌ,

catuꞌ jix caey can ecꞌ ebꞌ tituꞌ.

22 Jaxca cꞌaltaꞌ yunnaj ebꞌ yicꞌaal Esaú,

jaꞌton ebꞌ jix caey ecꞌ bꞌey txꞌotxꞌ Seír.

Jaꞌ Jehová jix akꞌon eyqꞌuey ebꞌ a Horeo,

catuꞌ jix can xacꞌal can ebꞌ yicꞌaal Esaú sqꞌuexeloj ebꞌ tituꞌ.

23 Quey cꞌal pax tuꞌ jix yun ebꞌ Heveo caan bꞌey wan aldealaj scawilal Gaza.

Jaꞌ ebꞌ tuꞌ,

jix akꞌle lawoj ey ebꞌ junelne yu ebꞌ Filisteo jix tit bꞌey Creta.

Queytuꞌ jix yun scaey can ecꞌ ebꞌ tituꞌ.)

24 Jix yalon Jehová jaxca tiꞌ:

Asiꞌwej xin,

catuꞌ che kꞌaxbꞌone ecꞌtoj jaꞌ Arnón,

jain oj wakꞌ eyqꞌuey ebꞌ Amorreo yul je kꞌabꞌ,

yetoj cꞌal naj Sihón,

jaꞌton sreyal ebꞌ caan bꞌey Hesbón.

Akꞌwej jowal yetoj ebꞌ,

catuꞌ che yiꞌon can oc xꞌotxꞌ ebꞌ.

25 Yuxan jaꞌ tinaniꞌ,

chi el yich waon oc xiwcꞌulal yin masanil ebꞌ conobꞌ bꞌey yul yibꞌankꞌinal tiꞌ.

Jaꞌ yet oj yabꞌen je kꞌumal ebꞌ,

catuꞌ oj bꞌilwoj a ebꞌ,

jaxa cꞌal xiwcꞌulal yetoj somcꞌulal oj oc yin ebꞌ,

ẍi Jehová.

26 Jix yalon pax naj Moisés jaxca tiꞌ:

Jaꞌ yet ey jon ecꞌ bꞌey txꞌotxꞌ cusiltaj txꞌotxꞌ yul yet Cademot,

jix jin chejtoj jaywan jin chejabꞌ bꞌey naj Sihón,

jaꞌton naj rey yeoc bꞌey conobꞌ Hesbón,

yet watxꞌ chi wal tet naj yin watxꞌcꞌulal waloni:

27 Jix jin naꞌ an,

tol jaꞌ yul ja nación tiꞌ oj jin ecꞌtoj yetoj ebꞌ ánima tiꞌ,

asan cꞌal bꞌey yul miman bꞌe oj cu ecꞌtoj jon,

cꞌam cꞌal junojxa bꞌe bꞌey comon cꞌal oj cu toj jon.

28 Oj cu toolane cꞌal masanil cu loꞌbꞌe ey jex jon,

asan jun chi cu kꞌan ey jaach tol chon ja chaꞌ ecꞌtoj bꞌey yul ja conobꞌ tiꞌ,

29 masantaꞌcꞌal chi cu kꞌaxbꞌone ecꞌtoj jaꞌ Jordán,

jaxa kapni oc bꞌey txꞌotxꞌ txꞌotxꞌ oj yakꞌ Jehová cu Diosal ey jon,

jaxca jix yun cu ẍaꞌon ecꞌtej ebꞌ yicꞌaal Esaú caan bꞌey txꞌotxꞌ Seír,

yetoj cꞌal ebꞌ Moabita caan bꞌey txꞌotxꞌ Ar,

jin chi toj tet naj.

30 Jaxa naj rey Sihón tuꞌ xin,

ma yal scꞌul naj jix cu ẍaꞌ ecꞌtoj bꞌey yul sconobꞌ tuꞌ,

yutol jaꞌ Jehová cu Diosal jix aon oc yin snaꞌbꞌal yet cꞌam chi cu chaꞌle ecꞌtoj yu naj;

yet watxꞌ chi ale oc ebꞌ yul cu kꞌabꞌ.

31 Yuxan jix yalon Jehová ey jin jaxca tiꞌ:

Jaꞌ yet jun txolan tiꞌ chi waoc naj rey Sihón yul ja kꞌabꞌ,

yetoj cꞌal snación.

Ocanwej yul sconobꞌ naj tinaniꞌ,

catuꞌ che yiꞌon can oc masanil txꞌotxꞌ xꞌotxꞌ naj,

ẍi Dios.

32 Jix eltej naj rey Sihón yetoj masanil ebꞌ soldado,

yet chi yakꞌon jowal ebꞌ ketoj bꞌey Jahas.

33 Yutol jaꞌ Jehová cu Diosal,

jaꞌ jix akꞌon eyqꞌuey naj yul cu kꞌabꞌ.

Jix kakꞌon lawoj naj yetoj yuninal,

yetoj cꞌal masanil ebꞌ soldado.

34 Jix kakꞌ eyqꞌuey masanil sconobꞌ ebꞌ,

catuꞌ jix kakꞌon lawoj ey ebꞌ yin junelne.

Jix cu makꞌ cam masanil ebꞌ,

jix cu makꞌ cam ebꞌ winaj,

ebꞌ ix ix,

yetoj cꞌal ebꞌ unin.

Cꞌamxa junoj ebꞌ jix colcha can el yul cu kꞌabꞌ.

35 Asan wan tzetyetal jix kiꞌcan ocoj,

jaꞌton masanil noꞌ noꞌ,

yetoj wan tzetyetal caw ey stool jix ilcha oc ku bꞌey wan conobꞌ jix kakꞌ eyqꞌuey tuꞌ.

36 Jix el yich cu qꞌueyon el ebꞌ bꞌey conobꞌ Aroer,

bꞌey jun acꞌal bꞌey spananil stiꞌ jaꞌ Arnón,

masantaꞌcꞌal bꞌey Galaad.

Cꞌamxa cꞌal junoj conobꞌ jix skeꞌ scolon sbꞌa ey jon,

yutol jaꞌ Jehová cu Diosal jix aon oc ebꞌ yul cu kꞌabꞌ.

37 Ey jayebꞌ xa conobꞌ ma kakꞌ jowal yetoj,

jaꞌton ebꞌ Amonita,

ey bꞌey junxa skꞌaxepal ecꞌtoj jaꞌ Jaboc,

yetoj cꞌal wanxa conobꞌ ey bꞌey sjolomlaj wonan,

yetoj cꞌal wanxa conobꞌ jix yal Jehová,

tol cꞌam chi kakꞌ jowal yetoj ebꞌ.