Abꞌwej tinaniꞌ xin jex wet conobꞌ,

tol oj wal can wan chejbꞌanile cꞌal wan ley je yabꞌe,

chi cam wal je cuyoni,

catuꞌ che bꞌeybꞌalneni.

2 Jaꞌ Jehová cu Diosal,

jix yakꞌ can stiꞌ ketoj bꞌey txꞌotxꞌ wonan Horeb.

3 Man asanne oj tet ebꞌ kichmam yakꞌnaj can stiꞌ;

jix yakꞌ pax can stiꞌ ey jon,

jaon tol yaman jon ecꞌ tinaniꞌ.

4 Jaꞌcaw Jehová jix kꞌanabꞌ ey jon bꞌey sjolom jun wonan tuꞌ,

yin jaccombꞌail jix yun cu kꞌanabꞌ yetoj yet jix kꞌanabꞌ eltej bꞌey xol jun kꞌakꞌ kꞌakꞌ.

5 Jain ey jin ecꞌ snan je xol yetoj Jehová,

yet jix walon masanil ẍejbꞌanil Naj ey jex.

Ilaꞌ tol je masanil jix jex xiwa tet jun kꞌakꞌ tuꞌ,

ma skeꞌ je yatoj bꞌey sjolom jun wonan tuꞌ.

Yuxan jaꞌ tituꞌ jix yal Jehová jaxca tiꞌ:

6 Jain ton Jehová je Diosal jin,

jain jix jex wiꞌeltej bꞌey txꞌotxꞌ Egipto,

bꞌey ey jex taꞌ ecꞌ yin yakꞌomaloj servil.

7 Cꞌam ojabꞌ junojxa comon dios bꞌey chex oc eyilal,

asanne ojabꞌ ey jin.

8 Cꞌam ojabꞌ junoj echele che waꞌne aoj,

tam wal yechel junoj tzetyetal ey bꞌey satcan,

tam wal yechel junoj tzetyetal ey bꞌey sat txꞌotxꞌ txꞌotxꞌ tiꞌ,

tam wal yechel tzetyetal ey bꞌey yul-laj jaꞌ mar cꞌal yalan txꞌotxꞌ txꞌotxꞌ tiꞌ.

9 Cꞌam ojabꞌ chex ey noan tet,

cꞌam ojabꞌ chex oc yin eyilal tet,

yutol jain Jehová je Diosal jin tiꞌ,

caw chi tit jin sjowal jin cꞌul je yin ta tol chex oc yin eyilal tet junojxa tzetyetal,

catuꞌ jain oj waoc syaꞌilal ebꞌ mame,

ebꞌ txutxe,

ebꞌ tol chin intajnen can eloj,

catuꞌ ey sjowal jin cꞌul yibꞌan ebꞌ uninale masantaꞌcꞌal yibꞌan ebꞌ yet yox,

cꞌal ebꞌ yet scan itxiquine.

10 Jal pax ebꞌ chin camcꞌulnen xin,

catuꞌ chi sjijen jin chejbꞌanil ebꞌ,

oj jin camcꞌulne ebꞌ yetoj cꞌal yicꞌaal ebꞌ yet bꞌakꞌin.

11 Man ojabꞌ comonoj che yakꞌ bꞌina jin bꞌi jain Jehová je Diosal jin tiꞌ,

yutol jaꞌ mac comon cꞌal oj yakꞌ bꞌina jin bꞌi,

oj waoc syaꞌilal yibꞌan.

12 Miman ojabꞌ yeloc apnoj yet scꞌual xewilal yul je sat,

yu je yiꞌon a can jin bꞌi,

jaxca jix yun walon can ey jex.

13 Asanne wajebꞌ cꞌu che yil je mulnail.

14 Jaxa yet sjuj cꞌual xin,

scꞌual xewilal,

wet yeoc jun cꞌu tuꞌ.

Cꞌam ojabꞌ junoj mulnail che waꞌne yet jun cꞌual tuꞌ,

tam wal ebꞌ je cꞌaal,

ebꞌ ix je cutzꞌin,

ebꞌ naj je yakꞌomal servil,

ebꞌ ix je yakꞌomal servil,

noꞌ je wacax,

noꞌ je che,

cꞌal wanojxa noꞌ je jobꞌbꞌeal noꞌ,

yetoj cꞌal ebꞌ txꞌoj conobꞌal caan bꞌey je conobꞌ tuꞌ,

masanil ebꞌ chi xew ebꞌ je yetoj.

15 Naꞌwej cꞌal pax tej,

tol yin yakꞌomal servil jix yun je caey ecꞌ bꞌey txꞌotxꞌ Egipto.

Jaxa jin jain Jehová je Diosal jin tiꞌ,

jain jix jex wiꞌeltej tituꞌ yetoj wipalil.

Yuxan chi walaꞌ tol che jije scꞌual xewilal.

16 Ey ojabꞌ yeloc apnoj je mam cꞌal je txutx yul je sat,

jaxca jix yun walon can ey jex,

yet watxꞌ,

oj naatbꞌoj je kꞌinal,

yin cꞌal tzalacꞌulal oj yun je caey ecꞌ sat txꞌotxꞌ txꞌotxꞌ oj wakꞌ ey jex tuꞌ.

17 Cꞌam ojabꞌ che makꞌ cam je yet animail.

18 Cꞌam ojabꞌ che yaoc je mul yul skꞌabꞌ je yistil,

cꞌal yul skꞌabꞌ je yichamil junjun jex.

19 Cꞌam ojabꞌ chex elkꞌanwi.

20 Cꞌam ojabꞌ che naꞌa kꞌane yin je yet animail.

21 Cꞌam ojabꞌ che yoche oc yistil junojxa mactxequel,

tam wal sna,

tam wal xꞌotxꞌ,

tam wal ebꞌ naj yakꞌomal servil,

tam wal ebꞌ ix yakꞌomal servil,

tam wal swacax,

tam wal ẍe,

tam wal junojxa tzetyetal tol yet ebꞌ je yet animail tuꞌ che yoche ocoj,

ẍi Jehová ey jon.

22 Jaꞌton skꞌane Jehová jix yal yin ipalil bꞌey snan xol kꞌakꞌ kꞌakꞌ bꞌey xol jun kꞌejin asun,

yet yaman jon ecꞌ cu masanil bꞌey yich txꞌotxꞌ miman wonan.

Jix lawi tuꞌ xin,

cꞌamxa tzet jix yal Dios,

jix stzꞌibꞌen oc wan kꞌane tiꞌ yin caabꞌ jenan chꞌen chꞌen,

jix yakꞌon ey jin.

23 Jaxa yet jix je yabꞌen yoc yul snukꞌ Dios tuꞌ chi awi eltej bꞌey xol jun kꞌejkꞌinal tuꞌ,

jix je yiloni tol chi a xaj kꞌakꞌ bꞌey jun wonan tuꞌ,

masanil ebꞌ yaaw yeoc xol yin junjun icꞌaaleal,

cꞌal ebꞌ icham winaj yeoc yul conobꞌ,

jix jul ebꞌ yal ey jin.

24 Jix yalon ebꞌ ey jin jaxca tiꞌ:

Caw yel,

jaꞌ Jehová cu Diosal jix xꞌox wal stzejejial,

cꞌal yipalil ey jon,

jix kabꞌ wal yoc yul snukꞌ Naj bꞌey xol xaj kꞌakꞌ kꞌakꞌ.

Jaꞌ tinaniꞌ,

tuxa wal jix naꞌcha el ku,

yutol chi skeꞌ skꞌanabꞌ Dios yetoj ebꞌ ánima,

catuꞌ cꞌam chi cam ebꞌ yu.

25 Jaxa tinaniꞌ xin,

¿tzet wal yu,

yuxan oj cu cam yu jun kꞌakꞌ tol eyxa smey yili tiꞌ?

Ta oj kabꞌ wal yoc yul snukꞌ Jehová cu Diosal junelxa,

oj cu camoj.

26 Yutol ¿mac wal junoj ánima chi skeꞌ yabꞌen yoc yul snukꞌ jun Dios iquis xol kꞌakꞌ jaxca wal jix yun kabꞌen jaon tiꞌ,

yin cꞌam chi cu cami?

27 Yel xacꞌal watxꞌ ta asanne jaach chach too sattaj Jehová cu Diosal yu ja wabꞌen masanil tzet oj yalaꞌ.

Chi lawi tuꞌ oj ja walon ey jon masanil tzet oj yalaꞌ,

catuꞌ oj cu jijen masanil tzetyetal oj ja wal ey jon,

ẍi ebꞌ ey jin.

28 Jaꞌ yet lalan skꞌanabꞌ ebꞌ ey jin tuꞌ,

lalan cꞌal pax yabꞌen Jehová tzet chi yal ebꞌ,

yuxan jix yal Naj ey jin:

Tuxa jix wabꞌ tzet jix yal wan conobꞌ tuꞌ,

jix ẍaꞌ jin cꞌul tzet jix yal ebꞌ.

29 Toloj wal quey cꞌal tuꞌ snaꞌbꞌal ebꞌ,

yin tol ey cꞌal weloc apnoj yul sat ebꞌ,

catuꞌ chi sjijen cꞌal jin chejbꞌanil ebꞌ junjun cꞌu,

yet watxꞌ,

watxꞌ cꞌal oj yun sbꞌeytoj ebꞌ yetoj yuninal.

30 Yuxan al tet ebꞌ tol chi meltzotoj ebꞌ bꞌey skꞌap na bꞌey bꞌulan ey ebꞌ tuꞌ.

31 Jal jaach,

jaach tiꞌ xin,

canan can wetoj titiꞌ,

yutol oj wal masanil jin chejbꞌanil cꞌal jin ley ey jaach,

catuꞌ oj ja cuyon ebꞌ yin,

yet watxꞌ oj sbꞌeybꞌalne ebꞌ bꞌey sat txꞌotxꞌ txꞌotxꞌ oj wakꞌ tet ebꞌ tuꞌ,

ẍi Jehová.

32 Yu tuꞌ xin,

bꞌeybꞌalnewej masanil ẍejbꞌanil Jehová cu Diosal.

Cꞌam ojabꞌ chi el qꞌuexna je naꞌbꞌal yin.

33 Bꞌeybꞌalnewej bꞌeybꞌale tol jix xꞌox can Jehová cu Diosal,

yet watxꞌ,

watxꞌ cꞌal oj yun je bꞌeytoj,

catuꞌ oj naatbꞌoj je kꞌinal bꞌey sat txꞌotxꞌ txꞌotxꞌ oj yakꞌ ey jex.