Jix Akꞌle Wan Laonebꞌ Chejbꞌanile Yu Jehová
20
Jix kꞌanabꞌ Dios tet ebꞌ Israel,
jix yalon tet ebꞌ jaxca tiꞌ:
2 Jain ton Jehová je Diosal jin,
tol jix jex wiꞌeltej bꞌey yul yet Egipto,
bꞌey ey jex oc yin yakꞌomaloj servilal,
bꞌey man je yetoj je bꞌa.
3 Cꞌam ojabꞌ junojxa je diosal bꞌey che yiꞌey je bꞌa,
yutol asanne jin je Diosal jin.
4 Cꞌam ojabꞌ yechel junoj tzetyetal che waꞌne oc je diosaloj:
Tam wal junoj ey bꞌey satcan,
junoj ey bꞌey sat txꞌotxꞌ tiꞌ,
junoj ey yul jaꞌ mar,
cꞌal yalan txꞌotxꞌ txꞌotxꞌ tiꞌ.
5 Cꞌam ojabꞌ chex ey noan tet,
cꞌam che yakꞌ eyilal tet jun echele tuꞌ,
yutol jain Jehová je Diosal jin,
caw chi tit jin jowal je yin ta tol chex oc eyilal tet junojxa mactxequel.
Oj waoc je yaꞌilal jaex mame jex ta tol cꞌam weloc apnoj yul je sat,
catuꞌ oj waontej syaꞌilal yibꞌan ebꞌ je yuninal,
cꞌal yibꞌan ebꞌ yet yox cꞌal yibꞌan ebꞌ yet scan tujan itxiquine.
6 Jal pax ebꞌ chin camcꞌulneni cꞌal ebꞌ chi jijen jin chejbꞌanil,
oj jin camcꞌulne ebꞌ yetoj yicꞌaal ebꞌ yet bꞌakꞌin.
7 Man comonoj che yakꞌ bꞌina jin bꞌi,
jain Jehová je Diosal jin tiꞌ,
xol comon kꞌane,
yutol oj waoc syaꞌilal ebꞌ comon cꞌal chi yakꞌ bꞌina jin bꞌi.
8 Miman ojabꞌ yeloc apnoj scꞌual xewilal yul je sat.
Jaꞌ yet jun cꞌu tuꞌ,
jatuꞌ smoo che yiꞌon a can jin bꞌi,
jain Jehová jin tiꞌ.
9 Wajebꞌ cꞌu chex mulnai,
yet che waꞌnen masanil je mulnail;
10 jaxa yet sjuj cꞌual chex xewi,
yutol scꞌual xewilal.
Cꞌam chi skeꞌ chex mulna yet jun cꞌual tuꞌ yutol wet yeoc jun cꞌu tuꞌ.
Cꞌam chi skeꞌ smulna ebꞌ je yuninal,
ebꞌ ix je cutzꞌin,
ebꞌ naj je chejabꞌ,
cꞌal ebꞌ ix je yakꞌomal servil,
noꞌ je jobꞌbꞌeal noꞌ,
ma ebꞌ txꞌoj conobꞌal tucꞌal eyecꞌ je yetoj,
cꞌam ojabꞌ chi mulna ebꞌ.
11 Yutol jain Jehová jin tiꞌ,
wajebꞌ cꞌu jix jin mulna yet jix jin waꞌnen satcan,
txꞌotxꞌ txꞌotxꞌ,
jaꞌ mar,
cꞌal yetoj masanil tzetyetal ey bꞌey,
jaxa yet sjuj cꞌual,
tol jix jin xewi.
Yu tuꞌ xin,
jaꞌ jun sjuj cꞌual tuꞌ,
wet yeocoj,
yuxan miman ojabꞌ yeloc apnoj yul je sat.
12 Ey ojabꞌ yeloc apnoj je mam cꞌal je txutx yul je sat,
yet watxꞌ chi naatbꞌi je kꞌinal bꞌey sat txꞌotxꞌ txꞌotxꞌ oj wakꞌ ey jex.
13 Cꞌam ojabꞌ che makꞌ cam je yet animail.
14 Cꞌam ojabꞌ che yaoc je mul yul skꞌabꞌ je yistil ma je yichamil junjun jex.
15 Cꞌam ojabꞌ chex elkꞌanwi.
16 Cꞌam ojabꞌ che naꞌa kꞌane yin je yet animail.
17 Cꞌam ojabꞌ che yoche oc sna ebꞌ je yet animail.
Cꞌam ojabꞌ che yoche oc yistil junojxa winaj,
ma yichamil junojxa ix ix.
Cꞌam ojabꞌ che yoche oc ẍejabꞌ ma ebꞌ ix eyoc yakꞌomaloj servil ebꞌ,
cꞌal swacax,
ma sbꞌuru,
cꞌal junojxa tzet ey bꞌey ebꞌ je yet animail che yoche ocoj,
ẍi Jehová.
Caw Jix Xiwa Ebꞌ Israel Yet Jix Yabꞌen Skꞌanabꞌ Dios Ebꞌ
18 Masanil ebꞌ Israel,
jix yabꞌ ebꞌ smakꞌwa nabꞌ,
cꞌal xuꞌle noꞌ cacho,
jix yilon ebꞌ yey kopna letzꞌlom,
cꞌal yilon ebꞌ ya smucꞌal txꞌotxꞌ wonan Sinaí.
Caw jix xiwa ebꞌ sicꞌlebꞌil,
catuꞌ jix sjitzon el sbꞌa ebꞌ.
19 Jix yalon ebꞌ tet Moisés jaxca tiꞌ:
—Jaach ojabꞌ chach kꞌanabꞌ ey jon,
caw oj cu jije tzet oj yal Dios ey jaach,
cꞌam ojabꞌ xacꞌal chi kꞌanabꞌ Naj ey jon,
ta cꞌamaj,
oj cu cam jon,
ẍi ebꞌ ánima tuꞌ.
20 Jix takꞌwi Moisés tet ebꞌ jaxca tiꞌ:
—Cꞌam ojabꞌ chex xiwi,
tucꞌal chi julecꞌ Naj yet chex yakꞌon porobꞌal,
yet watxꞌ ey cꞌal je xiwcꞌulal tet,
catuꞌ cꞌamxa chi oc je penail tet,
ẍi Moisés.
21 Yajbꞌan naat yeel ebꞌ conobꞌ tuꞌ,
jaꞌ naj Moisés jix tocꞌal bꞌey scawilal jun kꞌejin asun bꞌey eyecꞌ Dios.
Sleyalil Jun Yet Xaambꞌal
22 Jix yalon Jehová tet naj Moisés:
Al masanil wan kꞌane tiꞌ tet ebꞌ ja wet Israelal,
tol jain Jehová jin chi wal jaxca tiꞌ:
Jix je yilaꞌ tzet jix wute kꞌanabꞌ eytej jin bꞌa ey jex bꞌey satcan.
23 Cꞌam ojabꞌ che waꞌne je diosal tol oro ma plata yet chex oc yin eyilal tet,
jaxca chi yun je yoc yin eyilal ey jin.
24 Waꞌnewej junoj yet xaambꞌal;
naꞌbꞌa txꞌotxꞌ cꞌal che yaoc yin,
tol wet chi yun can ocoj.
Jatuꞌ che yakꞌ tzꞌaꞌ noꞌ meꞌ,
ma noꞌ wacax yin xaambꞌalil ey jin.
Catuꞌ che yakꞌon tzꞌaꞌ je yofrenda yet je camcꞌulal wetoj.
Yal cꞌal bꞌey oj wal ey jex tol che yal je bꞌa ey jin,
jaꞌ tituꞌ oj jin txꞌox jin bꞌa ey jex,
catuꞌ oj wakꞌon cꞌal jin yaxilal je yibꞌan.
25 Ta che waꞌne junoj yet xaambꞌal tuꞌ,
cꞌam che yaoc chꞌen chꞌen tol josbꞌil,
yutol ta che yaoc chꞌen tol josbꞌil tuꞌ,
man smoo oj yoc yin yet xaambꞌalil.
26 Jaꞌ jun yet xaambꞌal oj je waꞌne tuꞌ,
man latzꞌquiltaj oj che yute jaxca kꞌooch bꞌey chex atoj,
yet watxꞌ cꞌam chi il-le je mimanil,
ẍi Jehová.