—Al wan kꞌane tiꞌ tet ebꞌ ja wet Israelal,

jaꞌton ebꞌ yicꞌaal Jacob,

tol jain Jehová jin chi wal jaxca tiꞌ:

4 Jaex tiꞌ,

je yilnaj wal tzet wutenaj ebꞌ a Egipto,

cꞌal tzet jix yun jex wiꞌon eltej,

yet jix jex wiꞌontej titiꞌ,

jaxca xacꞌal tol yibꞌan xicꞌ junoj noꞌ miman chii ey jex ocoj,

yet jix jex jul titiꞌ.

5 Jaxa tinaniꞌ xin,

jijem cꞌal che yute je bꞌa ey jin,

che jijen cꞌal jin wa kꞌane jix wakꞌ je yetoj,

tol jin conobꞌ jex,

tol sicꞌbꞌil jex el wu xol wanxa conobꞌlaj,

yutol wet masanil txꞌotxꞌ txꞌotxꞌ tiꞌ.

6 Jal jex jaex tiꞌ,

yalomal jin kꞌane che yun can ocoj,

yet chin je yakꞌon servil.

Jaꞌ jun conobꞌal jex tiꞌ,

wet che yun can ocoj,

ẍi Jehová,

ja chi tet ebꞌ,

ẍi Dios,

tet Moisés.

7 Jix lawi tuꞌ xin,

jix paxeytej naj Moisés bꞌey sjolom wonan Sinaí,

catuꞌ jix awtele ebꞌ icham winaj yeoc xol conobꞌ Israel yu naj,

jix cꞌoli yalon naj tzet jix yun yalon Jehová tet.

8 Jix takꞌwi ebꞌ conobꞌ Israel jaxca tiꞌ:

—Jaꞌ masanil tzet chi yal Jehová,

oj cu waꞌne,

oj cu jije jon,

ẍi ebꞌ.

Jix lawi tuꞌ xin,

catuꞌ jix too yalon naj Moisés tet Jehová tzet jix yun yalon ebꞌ ánima tuꞌ.

9 Jix yalon Jehová tet Moisés jaxca tiꞌ:

—Jaꞌ tinaniꞌ,

oj jin txꞌox jin bꞌa ey jaach xol jun miman kꞌejin asun,

catuꞌ oj jin kꞌanabꞌ ey jaach,

yet watxꞌ oj yabꞌ ebꞌ ánima tol oj jin kꞌanabꞌ ja wetoj.

Yet watxꞌ oj sjije ebꞌ,

yet oj ja walon jin chejbꞌanil tet ebꞌ,

tinaniꞌ cꞌal yet oj bꞌey cꞌaltoj,

ẍi Dios.

Jix yalon Moisés tet Jehová,

tzet jix yun yalon ebꞌ conobꞌ tuꞌ.

10 Catuꞌ jix yalon pax Jehová jaxca tiꞌ:

—Asiꞌ al yabꞌ ebꞌ conobꞌ tuꞌ,

tol chi swaꞌne sbꞌa ebꞌ tinaniꞌ,

cꞌal yet yecal,

chi xꞌaon el spichil ebꞌ yutol oj oc ebꞌ yin eyilal jin sattaj.

11 Swaꞌne ojabꞌ sbꞌa ebꞌ,

jaxa yet caabꞌe chin eyoloj,

catuꞌ chin txꞌoxon jin bꞌa tet masanil ebꞌ conobꞌ bꞌey sjolom wonan Sinaí.

12 Cha waey junoj yechel bꞌey yich jun wonan tuꞌ,

yet cꞌam chi skeꞌ yecꞌtej ebꞌ ánima tuꞌ.

Cha walon tet ebꞌ tol miman ojabꞌ yeloc apnoj yul sat ebꞌ,

cꞌam chi skeꞌ yatoj ebꞌ sjolom jun wonan tiꞌ,

cꞌam ojabꞌ chi sjitztej sbꞌa ebꞌ scawilal,

ta tol ey junoj ebꞌ chi sjitztej sbꞌa,

asan tol chi cami.

13 Jaꞌ ebꞌ conobꞌ chi kꞌojon cam yetoj chꞌen ma tol chi jul-le camoj.

Man ojabꞌ yetoj skꞌabꞌ chi smakꞌon camoj,

cꞌam chi skeꞌ yoc mitxꞌan yin smimanil tuꞌ.

Caxcꞌal junoj ánima ma junoj noꞌ noꞌ,

tucꞌal chi akꞌle camoj.

Jato yet oj xuꞌle yucꞌaꞌ noꞌ meꞌ,

chi xa skeꞌ sjitzontej sbꞌa ebꞌ ánima bꞌey scawilal jun wonan tiꞌ,

ẍi Jehová.

14 Jix lawi tuꞌ xin,

jix paxeytej naj Moisés bꞌey sjolom wonan tuꞌ,

catuꞌ jix jul yalon tet ebꞌ yet conobꞌ tuꞌ,

tol chi swaꞌne sbꞌa ebꞌ yet oj oc ebꞌ yin eyilal,

catuꞌ chi xꞌaon el spichil ebꞌ.

15 Jix yalon naj Moisés tet ebꞌ jaxca tiꞌ:

—Jaꞌ tinaniꞌ waꞌnewej cꞌal je bꞌa yet chex ocwej yin eyilal tet Dios yet caabꞌe.

Che jijewej cꞌal je bꞌa,

cꞌam chex wey yetoj ix je yistil yul caabꞌ cꞌual tiꞌ.

16 Jaxa yet jix sajbꞌi el yet scaabꞌial xin,

chi ey letzꞌlom cꞌal smakꞌwa nabꞌ,

catuꞌ ey jun miman kꞌejin asun jix oc bꞌey sjolom jun wonan tuꞌ.

Jix yabꞌen ebꞌ ánima tuꞌ caw ip jix yun yokꞌ jun chꞌen trompeta bꞌey sjolom jun wonan tuꞌ.

Masanil ebꞌ ánima eyecꞌ bꞌey yul skꞌap na tuꞌ,

caw jix xiwa ebꞌ.

17 Jix lawi tuꞌ xin,

jix iꞌletoj masanil ebꞌ ánima yu naj Moisés bꞌey yintaj eltoj bꞌey bꞌulan ey ebꞌ tuꞌ,

yu stoo ẍaꞌlen sbꞌa ebꞌ yetoj Dios.

Jaꞌ scawilal yich jun wonan tuꞌ,

jaꞌ tituꞌ jix can linan ebꞌ.

18 Caw chi a smucꞌal txꞌotxꞌ wonan Sinaí tuꞌ,

yutol jix eyol Jehová bꞌey xol jun xaj kꞌakꞌ tuꞌ.

Jaxca xacꞌal ya smucꞌal junoj jorna,

queytuꞌ ya smucꞌal,

caw jix bꞌilwi a jun wonan tuꞌ.

19 Jaꞌ yet chi xuꞌle noꞌ cacho tuꞌ junjuntaj el,

caw ip cꞌal chi yun yel yaw xuꞌle noꞌ,

jaꞌton yet tuꞌ jix kꞌanabꞌ Moisés yetoj Dios,

caw jow jix yun stakꞌwi,

jaxca wal smakꞌwa nabꞌ,

queytuꞌ yul snukꞌ.

20 Jaꞌ bꞌey yel xacꞌal naat eya sjolom wonan tuꞌ,

jaꞌ tituꞌ jix eyol Jehová.

Jix yalon Dios tet Moisés tol chi atoj naj bꞌey eyecꞌ tuꞌ,

yuxan jix atoj naj bꞌey jix awtele tuꞌ.

21 Jix yalon Jehová tet naj jaxca tiꞌ:

—Jaꞌ tinaniꞌ,

eyantoj bꞌey yich jun wonan tiꞌ,

catuꞌ chi too ja walon tet ebꞌ conobꞌ tuꞌ,

tol cꞌam chi ecꞌtej ebꞌ bꞌey joybꞌil can ey ja wu,

jaxa tala chi yunne,

ecꞌal ebꞌ chi cami.

22 Jacꞌalaꞌ ebꞌ yakꞌomal xaambꞌal ebꞌ ánima tol chi oc cꞌaltaꞌ ebꞌ jin cawilal,

sowalil chi sajbꞌane sbꞌa ebꞌ,

ta cꞌamaj,

jaxa tala chi yunne,

jin makꞌ tala cam ebꞌ,

ẍi Jehová.

23 Jix takꞌwi Moisés tet Jehová:

—Cꞌam chi skeꞌ yatej ebꞌ conobꞌ tuꞌ bꞌey sjolom txꞌotxꞌ wonan Sinaí tiꞌ.

Yutol jaach jix ja walaꞌ tol chi joyle eyoj,

yet cꞌam chi skeꞌ yapni oc ebꞌ,

yutol jaꞌ jun txꞌotxꞌ tiꞌ,

caw yel ja wet yeocoj,

ẍi naj Moisés.

24 Jix yalon Jehová tet Moisés jaxca tiꞌ:

—Paxan eytoj junelxa,

jaxa yet chach aol junelxa,

jaxa ojabꞌ jun naj Aarón chi aol ja wetoj.

Jal ebꞌ yakꞌomal xaambꞌal yetoj cꞌal masanil ebꞌ conobꞌ,

cꞌam chi skeꞌ skꞌaxbꞌone ecꞌtej ebꞌ bꞌey joybꞌil can ey ja wu,

yet chi yochen ebꞌ jul bꞌey ey jin ecꞌ tiꞌ,

jaxa tala chi yunne,

chi wakꞌ qꞌueyle ebꞌ,

ẍi Jehová.

25 Jix paxeytej naj Moisés bꞌey sjolom wonan tuꞌ,

jix jul yalon tet ebꞌ yet conobꞌ tuꞌ,

tzet jix yal Jehová tet.