Sleyal Yibꞌan Ebꞌ Chi Oc Yakꞌon Servil Junoj Mactxequel
21
Jix yalon Jehová tet naj Moisés jaxca tiꞌ:
Jaꞌton wan chejbꞌanile tiꞌ oj ja kꞌanbꞌalne xol ebꞌ ja wet Israelal.
2 Ta ey junoj naj je yet conobꞌ che manaꞌ,
yet chi oc je yakꞌomaloj servil,
asanne wajebꞌ abꞌil chi mulna naj je yetoj.
Jaxa yet sjuj abꞌil xin,
catuꞌ che jajon eloj,
yet xa sbꞌa,
cꞌam cꞌal tumin chi yakꞌ naj yet chi jajcha el naj tuꞌ.
3 Ta xꞌojli xacꞌal naj yet jix apni oc yet jix manle tuꞌ,
jacꞌalaꞌ xꞌojli naj chi toi.
Ta ey yistil naj iꞌbꞌil oc xin,
jacꞌalaꞌ chi yiꞌtoj yistil naj tuꞌ.
4 Ta tol jaꞌ naj jix manon naj tuꞌ jix aon oc yistil naj,
catuꞌ chi ali yuneꞌ ix,
yet naj yaaw na tuꞌ chi yun can oc ix ix yetoj ebꞌ unin,
asanne naj chi pax toj xꞌojli.
5 Ta tol jaꞌ naj eyoc yin yakꞌomaloj servil tuꞌ cꞌam chi yal scꞌul chi pax toj,
yutol ey scamcꞌulal naj yin yistil cꞌal yin ebꞌ yuninal,
cꞌal yin mac bꞌey eyoc yin akꞌo servilal tuꞌ,
6 ta jaxca tuꞌ,
chi iꞌletoj yu naj mannen naj tuꞌ sattaj ebꞌ yaaw,
catuꞌ chi quetzletoj naj bꞌey yul stiꞌ sdespacho ebꞌ yaaw tuꞌ,
catuꞌ chi jol-le can xiquin yu naj mannen naj tuꞌ yetoj junoj chꞌen miman acuẍa,
jaꞌ jun tuꞌ chi txꞌoxon eloj tol chi cancan naj yetoj naj yin junelne.
7 Ta ey junoj mactxequel chi xontoj scutzꞌin,
yet chi oc yakꞌomaloj servil junoj mactxequel,
cꞌam chi skeꞌ sjajle el ebꞌ ix jaxca ebꞌ naj winaj.
8 Ta tol ey swa kꞌane ix yetoj naj mannen ix tuꞌ,
ta tol chi oc ix yistiloj naj,
jaxa chi yunne cꞌam chi yiꞌ naj yutol cꞌam chi yal scꞌul naj chi oc yistiloj jaxca yalon ebꞌ tuꞌ,
chi skeꞌ ẍaꞌon pax stumin naj mannen tuꞌ junelxa tet smam ix tuꞌ.
Ta cꞌam chꞌen yu naj smam ix tuꞌ xin,
cꞌam chi skeꞌ xonontoj naj mannen ix tuꞌ tet junojxa txꞌoj conobꞌal.
9 Ta jaꞌ naj mannen ix tuꞌ chi yoche chi oc yistiloj junoj scꞌaal,
jaxca junoj scutzꞌin naj chi yun can oc ix.
10 Ta tol jaꞌ naj mannen ix tuꞌ chi iꞌon yistiloj,
catuꞌ chi yiꞌon pax junojxa ix naj,
cꞌam chi skeꞌ scan ix bꞌabꞌel tuꞌ jaxca tuꞌ.
Sowalil chi akꞌle sloꞌbꞌe cꞌal spichil ix yu naj cꞌal masanil tzetyetal,
ey yalon yet ix yin naj yutol yichamil ix yet yalantoj.
11 Ta cꞌam chi sjije naj yakꞌon oxebꞌ tzetyetal tiꞌ,
chi jajcha el ix,
catuꞌ cꞌamxa tzet chi stoolane ix yet chi jajcha el ix tuꞌ.
Ley Yibꞌan Ebꞌ Comon Cꞌal Chi Makꞌwai
12 Jaꞌ mac chi makꞌon cam junoj ánima,
sowalil chi makꞌle pax camoj.
13 Ta tol man yin oj wal scꞌul chi tita catuꞌ chi smakꞌon camoj,
ta scꞌual scambꞌalxa cꞌaltaꞌ jun ánima tuꞌ,
jain oj wal ey jex bꞌey oj toj yewbꞌa el sbꞌa jun mac jix makꞌwi cam ánima tuꞌ.
14 Ta ey mac comon cꞌal chi tit sjowal catuꞌ chi smakꞌon cam junoj yet animail,
caxcꞌal mi jaꞌ bꞌey yet xaambꞌal chi too scꞌubꞌa el sbꞌa,
chi iꞌle eltej,
catuꞌ chi makꞌle camoj.
15 Jaꞌ mac chi smakꞌ smam ma xutx,
sowalil chi cami.
16 Ta ey mac chi elkꞌanetoj junoj ánima,
caxcꞌal mi tol xax xontoj,
ma eyto ecꞌ yu,
yet chi michꞌchai,
sowalil chi cam jun elkꞌom tuꞌ.
17 Jaꞌ mactxequel chi yal pena kꞌane yin smam ma xutx,
sowalil chi cami.
18 Ta ey cawanoj chi yakꞌ jowal,
catuꞌ ta ey junoj naj chi yasi yu junojxa naj tuꞌ,
ta chꞌen chi yakꞌbꞌalne,
ma tucꞌal chi smakꞌ yetoj skꞌabꞌ,
asan tol tucꞌal chi too telan naj yu yabꞌen syaꞌil,
cꞌam chi makꞌle camoj,
19 ta jaꞌ yet yecal caabꞌe chi xa skeꞌ sbꞌeyecꞌ naj chi yasitoj tuꞌ yetoj junoj kꞌojoch teꞌ,
jaꞌ naj jix makꞌon naj tuꞌ chi akꞌon masanil stool ambꞌal cꞌal stool scꞌu naj yaꞌey tuꞌ.
20 Ta ey junoj mac chi smakꞌ junoj yakꞌomal servil yetoj teꞌ,
winaj ma ix,
ta tol chi cam xacꞌal yin eymanil yu,
jaꞌ jun chi oc spenail tuꞌ,
sowalil chi cam yu spenail tuꞌ.
21 Ta tol chi too ecꞌ caabꞌ ma oxebꞌojxa cꞌu jun yakꞌomal servil tuꞌ,
catuꞌ chi cameloj,
cꞌamxa chi ale oc camich yibꞌan,
yutol eyoc jun ẍejabꞌ tuꞌ yul skꞌabꞌ.
22 Ta ey cawanoj winaj chi yakꞌle jowal,
ta jaꞌ yet lalan yakꞌlen jowal ebꞌ tuꞌ,
catuꞌ chi michꞌchatej junoj ix ix smakꞌon ebꞌ.
Ta mimejalxa ix,
catuꞌ chi el yuneꞌ ix yu ebꞌ,
ta cꞌam cꞌal bꞌey chi yabꞌ syaꞌil niꞌoj ix yetoj yuneꞌ tuꞌ,
jaꞌ naj chi oc spenail tuꞌ,
chi stoolane jantaj chi skꞌan naj yichamil ix tuꞌ,
yetoj pax oj,
jatacꞌalaꞌ tzet chi yun swaꞌnen yeoc ebꞌ naj juez.
23 Ta tol chi yasitoj ix ix tuꞌ,
jaxca chi yun syasitoj ix ix tuꞌ yu naj,
queytuꞌ chi utele pax naj chi makꞌon yasoj ix tuꞌ.
Ta tol chi cam ix,
sowalil chi cam cꞌal pax naj.
24 Ta chi eltej junoj sbꞌakꞌ sat ma yee junoj mactxequel,
ma skꞌabꞌ,
ma yajan,
25 ma tol chi tzꞌaꞌtoj,
ma chi yasitoj,
ma tucꞌal chi yaaxbꞌi el smimanil,
jaxca chi utele tuꞌ,
queytuꞌ chi utele pax mac chi oc spenail tuꞌ.
26 Ta ey junoj mactxequel chi makꞌon poꞌo sbꞌakꞌ sat junoj yakꞌomal servil,
winaj ma ix,
chi jajle el naj winaj ma ix ix tuꞌ sqꞌuexeloj jun sbꞌakꞌ sat chi makꞌle poꞌo tuꞌ.
27 Ta ey junoj mac chi makꞌon eltej junoj yee junoj winaj ma ix yakꞌomal servil tuꞌ,
sowalil chi jajle el jun mactxequel tuꞌ,
yu sqꞌuexeloj jun yee tuꞌ.
Ley Yibꞌan Junoj Camich Tol Man Naꞌanoj Eloj Catuꞌ Chi Oqui
28 Ta ey junoj noꞌ wacax chi tejon cam junoj winaj ma ix,
sowalil chi kꞌojle cam noꞌ,
cꞌam chi chiꞌle ẍiꞌbꞌeal noꞌ,
cꞌam cꞌal tzet chi oc yibꞌan mac ey yet noꞌ tuꞌ.
29 Ta yotaj xacꞌaltaꞌ yaaw noꞌ tuꞌ,
tol jow cꞌaltaꞌ noꞌ yin ánima,
catuꞌ cꞌam chi xubꞌa oc noꞌ,
ta chi tejle cam junoj ánima yu noꞌ.
Sowalil chi kꞌojle cam noꞌ catuꞌ chi cam pax jun yaaw noꞌ tuꞌ.
30 Tala cꞌuxan xin,
ta jaꞌ naj ey yet jun noꞌ wacax tuꞌ,
chi chaꞌle stoolane jun camich tuꞌ,
jatacꞌalaꞌ jantaj chi skꞌan ebꞌ ey yuninal jun chi cam tuꞌ,
catuꞌ cꞌamxa chi cam naj.
31 Jaꞌton jun ley tiꞌ chi oc yopiso,
ta ey junoj cꞌaale ma cutzꞌine chi tejle cam yu noꞌ.
32 Ta jaꞌ junoj naj eyoc yin yakꞌomal servil ma junoj ix yakꞌomal servil chi tejle cam yu noꞌ,
sowalil chi akꞌle 30 sbꞌisil chꞌen tumin plata tet naj ey yet jun yakꞌomal servil tuꞌ,
catuꞌ chi kꞌojle cam noꞌ.
33 Ta ey junoj mactxequel cꞌam chi smajche stiꞌ skꞌobꞌ yet ucꞌbꞌal jaꞌ,
ma tol chi sjot junoj jolan catuꞌ cꞌam chi smajche pax stiꞌ,
ta chi too junoj noꞌ wacax,
ma junoj noꞌ bꞌuru yul,
34 sowalil chi stoolane naj ey yet jun jolan tuꞌ tet naj ey yet noꞌ noꞌ tuꞌ,
catuꞌ chi cancan noꞌ jix cam tuꞌ yul skꞌabꞌ naj.
35 Ta ey junoj noꞌ wacax chi tejon cam junoj swacax junojxa mactxequel,
sowalil chi txonle el noꞌ jix tejwa tuꞌ,
catuꞌ chi spoꞌon ey chꞌen stool noꞌ ebꞌ tuꞌ yin;
jacꞌalaꞌ chi spoꞌon pax ey snan noꞌ jix tejle cam tuꞌ ebꞌ.
36 Ta yotaj naj ey yet noꞌ jix tejwa tuꞌ tol jow cꞌaltaꞌ noꞌ,
ta cꞌam chi steyne swacax tuꞌ,
ta jaxca tuꞌ,
sowalil chi yakꞌ naj junojxa noꞌ iquis sqꞌuexeloj noꞌ jix cam tuꞌ,
catuꞌ chi can noꞌ camnaj tuꞌ tet naj.