Jaꞌ Jun Abꞌil Yet Chi Akꞌle Mimancꞌulal Yibꞌan Chꞌen Jec Tumin Ma Junojxa Tzetyetal
15
Jix yalon pax naj Moisés jaxca tiꞌ:
Yin jujebꞌtaj abꞌil,
catuꞌ che bꞌejon je kꞌanon meltzo je tumin tet ebꞌ ey sjec ey jex.
2 Jaꞌ xolilal mimancꞌulal jaꞌton tiꞌ:
Masanil ebꞌ ánima tol ey junoj tzet chi smaane ey jex,
sowalil che yakꞌ mimancꞌulal yibꞌan yu jun tzet maanebꞌil yu ebꞌ tuꞌ.
Cꞌamxa che kꞌanecꞌ smaan tumin junoj ebꞌ ket conobꞌ tiꞌ,
ma junojxa tzet jecbꞌil yu ebꞌ ey jex,
yutol jaꞌ jun abꞌil tuꞌ jix yal Jehová,
tol cꞌamxa chi kꞌanle ecꞌ tzetyetal eytoj yin maanil.
3 Jal tet junoj ebꞌ txꞌoj conobꞌal xin,
chi skeꞌ je kꞌanon ecꞌ stzetyetal ebꞌ yin tzetyetal jix je yatoj maanil tuꞌ.
Jal pax tet junoj ket conobꞌ xin,
cꞌamxa che kꞌan tet ebꞌ.
4 Yet watxꞌ cꞌamxa junoj ebꞌ ket conobꞌ mebꞌa je xol tuꞌ,
jaxa Jehová cu Diosal,
oj yakꞌ syaaxilal je yibꞌan bꞌey jun txꞌotxꞌ oj yakꞌ ey jex tuꞌ.
5 Ta tol oj je jije,
catuꞌ oj je bꞌeybꞌalne wan chejbꞌanile lalan walon can ey jex tiꞌ,
6 caw oj yakꞌ syaaxilal Jehová cu Diosal je yibꞌan,
jaxca wal jix yun yakꞌon can stiꞌ,
catuꞌ ey cꞌal tzetyetal oj skeꞌ je yakꞌon yin maanil tet wanojxa nación.
Jal jex jaex tiꞌ,
cꞌam bꞌey oj je kꞌan junoj tzetyetal yin maanil tet junojxa.
Caw ecꞌal nación bꞌey oj je yakꞌ yaawilal yibꞌan,
manaj ebꞌ oj yakꞌ yaawilal je yibꞌan.
7 Ta ey junoj ebꞌ ket conobꞌ mebꞌa je xol bꞌey junoj conobꞌ bꞌey jix yakꞌ can stiꞌ Jehová ey jex,
man ojabꞌ pena oj che yute je naꞌbꞌal yin ebꞌ,
tol ojabꞌ chex colwa yin ebꞌ ket conobꞌ tol mebꞌa tuꞌ.
8 Jaꞌ tiꞌ je yet,
tol che saꞌ tzetyetal tet ebꞌ,
catuꞌ che yakꞌon junoj tzetyetal smaane ebꞌ,
yet chi oc yopiso yu ebꞌ.
9 Cꞌam ojabꞌ che chaꞌoc junoj pena naꞌbꞌale yin je naꞌbꞌal,
je yal tala jaxca tiꞌ:
Ilaꞌ tol tuxa chi jul jun abꞌil yet chi oc mimancꞌulal yin junoj jec,
man ojabꞌ je chioj.
Cꞌam chi skeꞌ tol pena che yute je naꞌbꞌal yin junoj ebꞌ ket conobꞌ tiꞌ,
jaxa tala chi yunne,
cꞌamxa niꞌoj tzet che yakꞌ smaane ebꞌ,
ta man oj je yakꞌ junoj tzetyetal smaane ebꞌ je yet animail,
jaxam ya yaw ebꞌ tet Jehová je yu,
catuꞌ chi oc jun tiꞌ je penailoj.
10 Man ojabꞌ penaoj che yabꞌ yet chex colwa tet ebꞌ,
bꞌejan ojabꞌ cꞌal yel yin je cꞌul,
yutol jaꞌ yu tzet watxꞌ che yun tuꞌ,
oj yakꞌ syaaxilal Jehová cu Diosal je yibꞌan yet oj jex bꞌey cꞌaltoj.
11 Ey cꞌaltaꞌ ebꞌ mebꞌa je xol tuꞌ,
yuxan jain chi wal ey jex,
tol bꞌejan ojabꞌ yel je yu tet ebꞌ je yet conobꞌ,
ebꞌ tol lalan yabꞌen syaꞌil mebꞌail bꞌey yul je conobꞌ tuꞌ.
Chejbꞌanile Yibꞌan Ebꞌ Chi Oc Yin Yakꞌomaloj Servil
12 Ta ey junoj ebꞌ je yet Israelal,
ebꞌ winaj,
ma junoj ebꞌ ix ix chi txonle ey jex yin yoc je yakꞌomaloj servilal,
asan wajebꞌ abꞌil chex akꞌle servil yu ebꞌ.
Jaxa yet sjuj abꞌil xin,
che jajon el ebꞌ.
13 Jaꞌ yet chi el ebꞌ ey jex tuꞌ,
man ojabꞌ tucꞌal oj chi too ebꞌ jaxca tuꞌ,
sowalil ey cꞌaltaꞌ tzet che yakꞌ tet ebꞌ.
14 Tol che yakꞌ jaycꞌonoj smeꞌ ebꞌ,
che yakꞌon mimanoj tiriw cꞌal yal uva tet ebꞌ.
Chi yal yeloc apnoj tol chi yiꞌ cꞌal pax yet yin masanil tzetyetal jix yakꞌ Jehová cu Diosal ey jex.
15 Cꞌam ojabꞌ chi too qꞌueycꞌulal je yu,
ilaꞌ tol jix jex ecꞌ cꞌal pax yin yakꞌomaloj servilal bꞌey txꞌotxꞌ Egipto,
yuxan jaꞌ Jehová cu Diosal jix jex colon eltej.
Yuxan chi wal jun chejbꞌanile tiꞌ ey jex tinaniꞌ.
16 Yuxan ta ey junoj ebꞌ je yakꞌomal servil chi aloni tol cꞌamxa chi yal scꞌul chex bꞌejlecan yu,
yutol caw ey scamcꞌulal je yin,
cꞌal yin ebꞌ je yuninal,
yetoj cꞌal pax oj,
yutol watxꞌ cꞌal che yute je naꞌbꞌal yin,
17 ta jaxca tuꞌ,
che yiꞌtej junoj chꞌen miman acuẍa,
catuꞌ chi sjitzontoj sbꞌa ebꞌ bꞌey smajil stiꞌ je na,
catuꞌ che jolon can xiquin jun je yakꞌomal servil tuꞌ yetoj chꞌen acuẍa tuꞌ.
Queytuꞌ chi yun scan xacꞌal can jun je yakꞌomal servil tuꞌ je yetoj yin junelne.
Quey pax tuꞌ chi utele ebꞌ ix ix chi yaoc sbꞌa yin je yakꞌomaloj servil yin junelne.
18 Man ojabꞌ pena oj che yabꞌe yet che jajon el ebꞌ je yakꞌomal servil,
yutol ey wajebꞌ abꞌil jix jex akꞌle servil yu ebꞌ,
catuꞌ asan chꞌan nan stool ebꞌ jix je yakꞌa jaxca stool junoj mulnawom.
Jaxa Jehová cu Diosal,
oj yakꞌ syaaxilal je yibꞌan yin masanil tzet che yunne.
Ley Yin Bꞌabꞌel Yuneꞌ Noꞌ Noꞌ
19 Masanil noꞌ bꞌabꞌel yuneꞌ je wacax,
cꞌal noꞌ bꞌabꞌel yuneꞌ je meꞌ,
noꞌ icham,
jaꞌ noꞌ che sicꞌ can el yu yoc can noꞌ yetoj Jehová cu Diosal.
Cꞌam che yakꞌ mulna noꞌ bꞌabꞌel yuneꞌ je wacax,
tam wal che tzujel xil noꞌ bꞌabꞌel yuneꞌ meꞌ tuꞌ.
20 Junjun cꞌal abꞌil oj je chiꞌ noꞌ yetoj ebꞌ je yuninal sattaj Jehová cu Diosal,
bꞌey jun txꞌotxꞌ tol jaꞌ Naj oj sicꞌon can eloj.
21 Ta ey bꞌey man watxꞌoj niꞌoj smimanil noꞌ xin,
ta kꞌail,
ma pena sbꞌakꞌ sat noꞌ,
ta man watxꞌoj yili noꞌ,
cꞌam che yakꞌ noꞌ yin xaambꞌalil tet Jehová.
22 Jaꞌ noꞌ tuꞌ chi skeꞌ je chiꞌon noꞌ yul je conobꞌ bꞌey caan jex ecꞌ tuꞌ.
Yal cꞌal mactxequel chi skeꞌ ẍiꞌoni,
ta saj yeocoj,
ma man sajoj yeoc ebꞌ,
jatacꞌalaꞌ yalon ley,
jaxca cꞌaltaꞌ chi yun je chiꞌon masanil tujan noꞌ scꞌultajil che.
23 Cꞌam cꞌal chi skeꞌ je chiꞌon ẍiqꞌuil noꞌ,
asan tol che sec can ey sat txꞌotxꞌ,
jaxca cꞌal chi yun secle ey jaꞌ jaꞌ.