14
Jaex tiꞌ,
yuninal jex xa Jehová cu Diosal.
Cꞌam ojabꞌ che makꞌ yasoj je mimanil,
tam wal je tzujon el xil je jolom yin je palan yet chi cam junoj ánima,
2 yutol jaex tiꞌ,
sconobꞌ jex Jehová cu Diosal je yeocoj.
Jaꞌ Naj jix jex sicꞌon el xol wanojxa conobꞌal bꞌey sat txꞌotxꞌ txꞌotxꞌ tiꞌ,
yet chex oc can sconobꞌoj.
Noꞌ Noꞌ Chi Chiꞌlei, Cꞌal Noꞌ Noꞌ Cꞌam Chi Chiꞌlei
3 Cꞌam ojabꞌ che chiꞌ noꞌ noꞌ yaabꞌetaj jaxca yalon ley.
4 Jaꞌ noꞌ noꞌ chi skeꞌ je chiꞌoni jaꞌton noꞌ tiꞌ:
Noꞌ wacax,
noꞌ meꞌ,
noꞌ chiw,
5 cꞌal junjun tujan noꞌ scꞌultajil che,
noꞌ xol-laj teꞌal chiw,
yetoj cꞌal masanil noꞌ xol-laj teꞌal meꞌ.
6 Chi skeꞌ je chiꞌon masanil noꞌ noꞌ chi sjutxꞌ yan,
noꞌ caabꞌ poꞌoan ye snan xol yiskꞌaj.
7 Jal pax noꞌ cꞌam chi skeꞌ je chiꞌoni:
Jaꞌton noꞌ camello,
noꞌ tejón,
cꞌal noꞌ txitx.
Jaꞌ wan noꞌ noꞌ tuꞌ tzꞌiltaj yeoc noꞌ;
caxcꞌal chi sjutxꞌ yan noꞌ,
noꞌ man caabꞌoj poꞌoan ye snan xol yiskꞌaj.
8 Jaxca noꞌ txitam,
caabꞌ poꞌoan ye snan xol yiskꞌaj noꞌ,
cꞌam chi sjutxꞌ yan noꞌ.
Jaꞌ noꞌ tuꞌ,
sowalil che naꞌ tol man sajoj noꞌ,
yutol tzꞌil noꞌ.
Cꞌam ojabꞌ che chiꞌ wan noꞌ noꞌ tuꞌ,
cꞌam cꞌal chi skeꞌ je mitxꞌon yet camnajxa noꞌ.
9 Jal pax masanil noꞌ noꞌ ey bꞌey yul-laj jaꞌ jaꞌ,
chi skeꞌ je chiꞌon noꞌ,
ta ey xicꞌ noꞌ,
cꞌal wan xoyan oc yinlaj noꞌ.
10 Jal pax noꞌ cꞌam yet xin,
cꞌam chi skeꞌ je chiꞌon noꞌ.
Sowalil che naꞌ tol man sajoj noꞌ.
11 Masanil noꞌ tzꞌiquin tol watxꞌ,
chi skeꞌ je chiꞌon noꞌ.
12 Ey pax wan noꞌ tzꞌiquin cꞌam chi skeꞌ je chiꞌoni,
yutol man sajoj noꞌ:
Jaxca noꞌ mimej chii,
noꞌ mimej xulem,
13 noꞌ saltꞌiw yet jaꞌ mar yetoj noꞌ milano
14 yetoj cꞌal junjun tujan noꞌ joo,
15 yetoj noꞌ avestruz,
noꞌ tonton,
noꞌ gaviota,
cꞌal junjun tujan noꞌ chii,
16 noꞌ sajcꞌucꞌum,
noꞌ calamóm,
noꞌ ibis,
17 noꞌ cisne,
noꞌ pelícano,
noꞌ miij,
18 noꞌ cigüeña,
yetoj cꞌal junjun tujan noꞌ garza,
yetoj noꞌ abubilla,
cꞌal yetoj noꞌ sotzꞌ.
19 Masanil noꞌ kocꞌtaj noꞌ ey xicꞌ chi ecꞌ yin junjun bꞌulan,
man sajoj noꞌ.
Cꞌam chi skeꞌ je chiꞌon noꞌ.
20 Jal pax noꞌ ey xicꞌ albꞌilxa ey jex tol saj noꞌ,
chi skeꞌ je chiꞌon noꞌ.
21 Cꞌam chi skeꞌ je chiꞌon junoj noꞌ noꞌ tucꞌal chi cameloj,
yutol jun conobꞌal jex jaex tiꞌ,
sicꞌbꞌil jex el yu Jehová cu Diosal.
Asan xin,
chi skeꞌ je yakꞌon noꞌ tet ebꞌ txꞌoj conobꞌal caan ecꞌ je xol.
Jaꞌ ebꞌ tuꞌ chi skeꞌ ẍiꞌon ebꞌ,
ma xin,
chi skeꞌ cꞌal pax je txonon noꞌ tet ebꞌ txꞌoj conobꞌal tuꞌ,
ebꞌ tucꞌal chi ecꞌabꞌtoj je xol.
Cꞌam ojabꞌ che txic noꞌ yuneꞌ chiw xol yal yim noꞌ txutxe.
Cuybꞌanile Tzet Chi Yun Yakꞌle Diezmo
22 Junjun cꞌal abꞌil sowalil che yiꞌel sdiezmoal yin sat je yawo che yambꞌa aoj.
23 Jaꞌton diezmo che yiꞌel yin je tiriw,
yin je yal uva,
cꞌal yin je yaceite olivo,
yetoj cꞌal pax yin noꞌ bꞌabꞌel yuneꞌ je wacax,
cꞌal yin noꞌ bꞌabꞌel yuneꞌ je meꞌ.
Jaꞌ noꞌ tuꞌ che chiꞌ noꞌ bꞌey sattaj Jehová cu Diosal,
jaꞌton bꞌey jun lugar,
tol jaꞌ Naj oj sicꞌon can el yet chi cu oc yin eyilal tet,
yet watxꞌ miman yeloc apnoj Naj yul je sat.
24 Ta jaꞌ bꞌey chi oc eyilal tuꞌ,
yel xacꞌal naat chi can bꞌey ey je na,
yuxan ta cꞌam chi skeꞌ je yiꞌontoj sdiezmoal je tzetyetal oj yakꞌ Jehová cu Diosal bꞌey ey jex ecꞌ tuꞌ,
25 chi skeꞌ je txonon el je diezmo bꞌey ey jex ecꞌ tuꞌ,
jaxa chꞌen tumin tuꞌ che yiꞌtoj bꞌey jun lugar oj sicꞌ can el Dios tuꞌ.
26 Jaꞌ yetoj chꞌen tumin tuꞌ chi skeꞌ je manon el tzet chi el yin je cꞌul je yakꞌon tet Jehová:
Jaxca noꞌ wacax,
noꞌ meꞌ,
yal uva,
ma junojxa tujan tzet chi ucꞌlei,
tol jaxca an yeocoj;
ma junojxa tzetyetal chi yoche je cꞌul,
catuꞌ chex low sattaj Jehová tituꞌ,
che yaon oc junoj kꞌin yetoj ebꞌ je yuninal.
27 Cꞌam ojabꞌ che yintajne can el ebꞌ Levita caan ecꞌ je xol bꞌey je conobꞌ tuꞌ.
Ilaꞌ tol ma yiꞌ smajul txꞌotxꞌ ebꞌ jaxca je yet jaex tiꞌ.
28 Yin oxox abꞌil chi yun je poꞌon el sdiezmoal sat je yawo che yambꞌa a yet jun abꞌil tuꞌ.
Jatuꞌ che yambꞌa oc bꞌey yul je conobꞌ tuꞌ,
29 yuxan jaꞌ yet oj apnoj oc ebꞌ Levita tol ma ẍaꞌ smajul txꞌotxꞌ je yetoj,
ma ebꞌ txꞌoj conobꞌal caan ecꞌ je xol,
cꞌal ebꞌ mebꞌa cꞌamxa smam cꞌal xutx,
cꞌal ebꞌ ix ix camnajxa yichamil,
chi skeꞌ sloꞌon ebꞌ wan je diezmo yaman ecꞌ je yu tuꞌ.
Queytuꞌ oj yun yakꞌon syaaxilal Jehová cu Diosal yibꞌan masanil tzet che yunne.