2 Alwej tet masanil ebꞌ je yet Israelal,

tol jaꞌ xol masanil noꞌ noꞌ ey bꞌey sat txꞌotxꞌ txꞌotxꞌ tiꞌ,

jaꞌton wan noꞌ tiꞌ oj skeꞌ je chiꞌoni:

3 Noꞌ chi sjutxꞌ sloꞌbꞌe,

cꞌal noꞌ tol caabꞌ poꞌoan yiskꞌaj.

4 Jal pax junxa tujan noꞌ oj wal tiꞌ an xin,

man oj skeꞌ je chiꞌon noꞌ,

caxcꞌal tol chi scaecꞌne sjutxꞌon sloꞌbꞌe noꞌ,

caxcꞌal man caabꞌoj poꞌoan ye snan yiskꞌaj noꞌ:

Noꞌ camello chi scaecꞌne sjutxꞌon sloꞌbꞌe,

jal noꞌ man caabꞌoj poꞌoan ye snan xol yiskꞌaj xin,

jaꞌ noꞌ tuꞌ cꞌam chi skeꞌ je chiꞌoni.

5 Yetoj pax noꞌ chi yij tejón,

chi scaecꞌne sjutxꞌon sloꞌbꞌe noꞌ,

yutol ecꞌal yiskꞌaj noꞌ,

jaꞌ noꞌ tuꞌ cꞌam chi skeꞌ je chiꞌon noꞌ.

6 Yetoj pax noꞌ txitx,

chi scaecꞌne sjutxꞌon sloꞌbꞌe noꞌ,

jal noꞌ man caabꞌoj poꞌoan ye yiskꞌaj xin,

cꞌam pax chi skeꞌ je chiꞌon noꞌ.

7 Yetoj pax noꞌ txitam,

caxcꞌal caabꞌ poꞌoan ye snan yiskꞌaj noꞌ,

cꞌam chi scaecꞌne sjutxꞌ sloꞌbꞌe noꞌ,

yuxan ma cꞌal skeꞌ je chiꞌon noꞌ.

8 Cꞌam chi skeꞌ je chiꞌon wan noꞌ tuꞌ,

tam wal je mitxꞌon yet chi cam noꞌ,

sowalil che naꞌ tol man watxꞌoj noꞌ.

9 Jaxa pax noꞌ ey yul-laj jaꞌ jaꞌ,

bꞌey yul jaꞌ mar ma bꞌey yul-laj wanojxa jaꞌ jaꞌ,

chi skeꞌ je chiꞌon noꞌ,

noꞌ tol ey xicꞌ cꞌal noꞌ xoyquiltaj yeoc yinlaj snukꞌ.

10 Jal pax noꞌ cꞌam xicꞌ,

cꞌal noꞌ man xoyquiltaj oj yeoc yinlaj snukꞌ,

cꞌam chi skeꞌ je chiꞌon noꞌ.

Jaꞌ noꞌ tuꞌ yaabꞌetaj can el noꞌ,

caxcꞌal jaꞌ bꞌey yul jaꞌ mar ma yul-laj wanojxa jaꞌ jaꞌ ey noꞌ.

11 Yutol yaabꞌetaj can yeoc noꞌ,

manche je chiꞌ noꞌ,

tam wal je mitxꞌon noꞌ yet camnajxa noꞌ.

12 Masanil noꞌ ey yul-laj jaꞌ,

tol cꞌam xicꞌ cꞌal ue eyoc yin snukꞌ,

yaabꞌetaj ojabꞌ cꞌal noꞌ tuꞌ yul je sat.

13 Jacꞌalaꞌ cꞌal pax xol noꞌ tzꞌiquin man oj skeꞌ je chiꞌon wan noꞌ oj wal tiꞌ,^a

yutol man watxꞌoj noꞌ:

Jaxca noꞌ mimej chii,

noꞌ mimej xulem,

noꞌ asor,

14 noꞌ chii ey yul jaꞌ mar,

noꞌ milano,

yetoj masanil noꞌ mimej cꞌucꞌum,

15 cꞌal masanil tujan noꞌ joo,

16 yetoj noꞌ avestruz,

noꞌ tonton,

noꞌ gaviota,

cꞌal masanil tujan noꞌ chii,

17 noꞌ sajcꞌucꞌum,

noꞌ cormorán,

noꞌ ibis,

18 noꞌ cisne,

noꞌ pelícano,

noꞌ miij,

19 noꞌ cigüeña,

yetoj cꞌal masanil tujan noꞌ garza,

noꞌ abubilla,

cꞌal yetoj noꞌ sotzꞌ.

20 Jacꞌalaꞌ pax masanil noꞌ niẍtej tzꞌiquin chi ecꞌ jenenoj yin junjun bꞌulan,

ma noꞌ chi bꞌey sat txꞌotxꞌ,

yaabꞌetaj ojabꞌ cꞌal noꞌ yul je sat.

21 Jal pax noꞌ tol ey yip yajan yecꞌ tꞌujlabꞌoj,

caxcꞌal tol chi ecꞌ jenenoj noꞌ,

ma chi bꞌey noꞌ sat txꞌotxꞌ,

chi skeꞌ je chiꞌon noꞌ.

22 Jaꞌ xol noꞌ tuꞌ,

chi skeꞌ je chiꞌon masanil tujan noꞌ kochiꞌ,

noꞌ mimej kochiꞌ.

23 Jal pax masanil wanxa noꞌ niẍtej noꞌ chi ecꞌ jenenoj,

ma noꞌ chi ecꞌ sat txꞌotxꞌ tiꞌ,

jaꞌ wan noꞌ tuꞌ,

yaabꞌetaj ojabꞌ cꞌal noꞌ yul je sat.

24 Ta che mitxꞌ wan noꞌ noꞌ chi wal tiꞌ yet camnajxa noꞌ,

tzꞌil che yun canoj masantaꞌcꞌal yet chi kꞌejbꞌi eyoj.

25 Jaꞌ junoj mactxequel chi chiꞌon junoj noꞌ camnaj noꞌ tuꞌ,

sowalil chi xꞌael spichil,

tzꞌil che yun canoj masantaꞌcꞌal yet chi kꞌejbꞌi eyoj.

26 Masanil noꞌ ey yiskꞌaj ta man caabꞌoj poꞌoan ye snan yiskꞌaj,

ta cꞌam chi scaecꞌne sjutxꞌon sloꞌbꞌe noꞌ,

jaꞌ wan noꞌ tuꞌ che naꞌ tol man watxꞌoj noꞌ.

Ta ey junoj mactxequel chi mitxꞌon wan noꞌ tuꞌ,

tzꞌil che yun canoj jaxca yalon ley.

27 Yal cꞌal tzet noꞌal tol canebꞌ yajan ta ey ecꞌaloj yiskꞌaj,

jaꞌ wan noꞌ noꞌ tuꞌ,

yutol tzꞌil noꞌ yul je sat;

yuxan yal cꞌal mactxequel chi mitxꞌon junoj noꞌ tuꞌ ta camnajxa noꞌ,

tzꞌilto cꞌal che yun canoj masantaꞌ chi kꞌejbꞌi eyoj.

28 Quey cꞌal pax tuꞌ junoj mactxequel chi mitxꞌon jun camnaj noꞌ tuꞌ,

sowalil chi xꞌael spichil,

man tocꞌal pax sajbꞌanebꞌiloj masantaꞌcꞌal chi kꞌejbꞌi eyoj.

29 Jal masanil noꞌ tol chi ecꞌ jutxutxoj sat txꞌotxꞌ xin,

sowalil che naꞌ tol cꞌam chi skeꞌ ẍiꞌle wan noꞌ noꞌ tuꞌ:

Jaxca noꞌ saabꞌen,

noꞌ txꞌow,

yetoj cꞌal masanil tujan noꞌ patzaꞌ.

30 Yetoj masanil noꞌ chi sjutx sbꞌa,

noꞌ qꞌuix patix,

noꞌ lagarto,

noꞌ intam,

noꞌ patix,

yetoj cꞌal noꞌ tzalacabꞌ.

31 Jaꞌ xol masanil wan noꞌ noꞌ tiꞌ,

sowalil che naꞌ tol man watxꞌoj noꞌ,

yuxan yal cꞌal mactxequel chi mitxꞌon wan noꞌ tuꞌ yet camnajxa noꞌ,

tzꞌil chi yun can jun mactxequel tuꞌ masantaꞌcꞌal yet chi kꞌejbꞌi eyoj.

32 Ta ey junoj noꞌ camnaj noꞌ tuꞌ,

chi eyqꞌuey yibꞌan junoj tzetyetal,

man watxꞌoj chi yun can jun tzetyetal tuꞌ,

caxcꞌal junoj teꞌ ma junoj an pichile,

ma stzꞌuumal noꞌ,

ma junoj coẍtal,

ma junoj mitxꞌkꞌabꞌe yet mulnail,

ta chi eyqꞌuey yibꞌan junoj wan mitxꞌkꞌabꞌe tuꞌ,

sowalil chi ale eytoj xol jaꞌ.

Jaꞌ jun tzetyetal tuꞌ tzꞌilto cꞌal chi yun canoj,

masantaꞌcꞌal yet chi kꞌejbꞌi eyoj;

catuꞌ chi waꞌxi pax can eloj.

33 Ta ey bꞌey chi eyqꞌuey junoj noꞌ camnaj noꞌ tuꞌ yul junoj txꞌotxꞌ xi,

jaꞌ jun tzetyetal eeytoj yul jun xi tuꞌ,

tzꞌiltaj chi yun canoj;

sowalil chi makꞌle can poꞌo jun xi tuꞌ.

34 Yal cꞌal tzet loꞌbꞌeal eeytoj yul jun xi tuꞌ ma ucꞌbꞌeal jaꞌ,

tzꞌiltaj chi yun canoj.

35 Yuxan ta chi eyqꞌuey junoj noꞌ noꞌ tiꞌ yet camnajxa yibꞌan junoj tzetyetal,

tzꞌiltaj chi yun canoj,

caxcꞌal junoj jorna ma junoj bꞌey chi oc kꞌakꞌ kꞌakꞌ,

sowalil chi uchle eyoj.

Yutol jaꞌ jun mitxꞌkꞌabꞌe tuꞌ tzꞌiltaj chi yun canoj.

36 Ta ey junoj jaꞌ snukꞌ jaꞌ ma kꞌobꞌ jaꞌ chi ukꞌlei,

catuꞌ chi eytoj junoj noꞌ camnaj noꞌ tuꞌ yul jaꞌ,

watxꞌ cꞌal ye jaꞌ jayebꞌoj cꞌu,

asan jun mactxequel chi iꞌon atej noꞌ camnaj noꞌ tuꞌ yul jaꞌ,

jaꞌ jun tuꞌ tzꞌiltaj chi yun canoj.

37 Ta chi eyqꞌuey junoj noꞌ camnaj noꞌ tuꞌ yibꞌan junoj tujan jinat chi awlei,

jaꞌ jun jinat tuꞌ cꞌam chi etex eloj.

38 Ta tol jaꞌ jun jinat tuꞌ laan xa ey xol jaꞌ,

catuꞌ chi eyqꞌuey junoj camnaj noꞌ tuꞌ yibꞌan,

sowalil che naꞌ tol tzꞌiltaj chi yun can jun jinat tuꞌ.

39 Tala cꞌuxan ey junoj noꞌ chiꞌbꞌeal noꞌ chi cameloj,

jaꞌ mactxequel chi mitxꞌon jun camnaj noꞌ tuꞌ,

tzꞌiltaj chi yun canoj masantaꞌcꞌal yet chi kꞌejbꞌi eyoj.

40 Jaꞌ mactxequel chi chiꞌon ẍiꞌbꞌeal junoj noꞌ tucꞌal chi cameloj,

sowalil chi xꞌael spichil,

tzꞌiltaj chi yun can jun mactxequel tuꞌ masantaꞌcꞌal yet chi kꞌejbꞌi eyoj.

Jaꞌ mactxequel chi iꞌon a junoj noꞌ camnaj noꞌ tuꞌ,

jaꞌ jun tuꞌ sowalil chi xꞌael spichil,

tzꞌiltaj chi yun canoj masantaꞌcꞌal yet chi kꞌejbꞌi eyoj.

41 Cꞌam ojabꞌ che chiꞌ masanil noꞌ noꞌ chi sjutx sbꞌa sat txꞌotxꞌ,

yutol yaabꞌetaj can el noꞌ.

42 Jaꞌ masanil noꞌ chi ecꞌ jutxutxoj sat txꞌotxꞌ,

cꞌal noꞌ chi bꞌey yetoj scanebꞌal yajan,

ma noꞌ ecꞌal yajan,

jaꞌ masanil wan noꞌ noꞌ tzꞌiltaj tuꞌ,

yuxan cꞌam chi skeꞌ je chiꞌon noꞌ yutol yaabꞌetaj can el noꞌ.

43 Cꞌam che yetne el je bꞌa jaex tiꞌ yu noꞌ noꞌ tzꞌiltaj tuꞌ,

yutol chex etex can el yu noꞌ.

44 Jain ton Jehová je Diosal jin,

yuxan watxꞌ che bꞌosel je bꞌa yin tzetyetal tzꞌiltaj tuꞌ,

yutol jain tiꞌ watxꞌ jin cꞌal,

yuxan caw cꞌam chi skeꞌ je yetnentoj je bꞌa yetoj wan noꞌ noꞌ tuꞌ.

45 Jain tiꞌ Dios jin,

jain jix jex wiꞌeltej bꞌey txꞌotxꞌ Egipto,

yutol je Diosal jin,

yu jun tuꞌ xin,

caw watxꞌ ojabꞌ cꞌal che yute je bꞌa,

yutol jain tiꞌ watxꞌ jin cꞌal,

ẍi Dios.

46 Jaꞌton masanil wan jin chejbꞌanil tiꞌ yibꞌan masanil noꞌ noꞌ,

noꞌ tzꞌiquin,

yetoj cꞌal masanil noꞌ ey yul-laj jaꞌ jaꞌ,

cꞌal masanil noꞌ chi sjutx sbꞌa sat txꞌotxꞌ txꞌotxꞌ tiꞌ,

yuxan chi wal can ey jex,

47 yet watxꞌ chi naꞌcha el junjun tujan noꞌ noꞌ je yu,

noꞌ watxꞌ yetoj cꞌal noꞌ yaabꞌetaj can eloj,

noꞌ chi skeꞌ ẍiꞌlei,

cꞌal noꞌ tol cꞌam chi skeꞌ ẍiꞌlei,

ẍi Dios.