2 Al masanil wan tiꞌ tet ebꞌ ja wet Israelal:

Tol jaꞌ junoj ix ix chi ali junoj swinaj unin,

sowalil jujebꞌ cꞌual tzꞌiltaj chi yun can ix jaxca yalon ley,

jaxca cꞌaltaꞌ yet chi yilon sbꞌisbꞌal xꞌaaw ebꞌ ix ix yet junjuntaj el.

3 Jaxa yin sjujubꞌixial yali jun winaj unin tuꞌ,

catuꞌ chi akꞌle circuncidar.

4 Jal pax ix txutxe tuꞌ xin,

chi bꞌey cꞌaltoj junojxa 33 cꞌual yin sajbꞌanen sbꞌa ix,

cꞌam cꞌal chi skeꞌ smitxꞌon junoj tzetyetal tol wet yeocoj,

tam wal chi skeꞌ stoo ix bꞌey snail jin calubꞌal yet cꞌamto chi tzꞌajna sbꞌisil wan cꞌual tuꞌ.

5 Ta ix unin junoj chi ali,

canlajonebꞌ cꞌual chi cancan ix yin tol tzꞌiltaj chi yun canoj,

jaxca cꞌaltaꞌ yet chi yilon sbꞌisbꞌal xꞌaaw ebꞌ ix ix yin junjuntaj el,

catuꞌ chi bꞌey cꞌaltoj yin sajbꞌanen sbꞌa yin junojxa 66 cꞌual.

6 Jaꞌ yet chi tzꞌajna wan cꞌu yet chi sajbꞌanen sbꞌa ix ix tuꞌ,

caxcꞌal winaj unin ma ix unin,

sowalil chi yiꞌtej junoj noꞌ achꞌe meꞌ jun abꞌil skꞌinal ix txutxe tuꞌ,

yetoj junoj noꞌ jobꞌbꞌeal uch bꞌey snail bꞌey chin chaꞌle jin bꞌa je yetoj,

yet watxꞌ chi yakꞌ ix yin xaambꞌaloj,

yet chi can ix yin watxꞌ.

Jaꞌ wan tuꞌ chi akꞌle tet junoj naj yakꞌomal xaambꞌal bꞌey sattaj jun Kꞌap Na.

7 Jaxa naj yakꞌomal xaambꞌal tuꞌ chi akꞌon jun xaambꞌal tuꞌ ey jin,

yet chi sajbꞌanele el ix ix tuꞌ,

jaxca tuꞌ chi yun scan ix yin saj.

Jaꞌton wan chejbꞌanile tiꞌ tet ebꞌ ix ix chi ali yuneꞌ,

winaj unin ma ix unin.

8 Ta jaꞌ ix txutxe tuꞌ cꞌam chi skeꞌ yakꞌon junoj meꞌ,

chi skeꞌ yiꞌontej cacꞌonoj noꞌ paramuch,

ma jobꞌbꞌeal uch ix,

jun noꞌ chi akꞌle tzꞌaꞌ yin xaambꞌalil,

jal junxa noꞌ xin,

chi akꞌle yin xaambꞌalil yu sajbꞌanele el ix.

Queytuꞌ chi yun sajbꞌican el ix ix tuꞌ,

ẍi Jehová.