13
Jix yalon pax naj Moisés jaxca tiꞌ:
Ta ey junoj mactxequel je xol tol chi yaloc sbꞌa ẍejabꞌoj Dios yaloni,
catuꞌ chi cꞌoli yaloni tol ey tzet chi yil yin weyicheal,
ma chi xꞌox junoj tzetyetal tol qꞌueyubꞌtaj xacꞌal yoqui,
ma chi yalon yin eyojto chi yunen el junoj tzetyetal oj juloj,
2 ta cꞌuxan chi yun jun tzet chi yal tuꞌ,
catuꞌ chi cꞌoli yalon ey jex jaxca tiꞌ:
Titanwej,
ey wal wanojxa dios man je yotaj oj.
Toonwej,
eyoj jon kaan sattaj,
yet chi cu ocwej yin eyilal tet,
ta ẍi ey jex.
3 Cꞌam ojabꞌ che yaoc yin je cꞌul tzet chi yal ebꞌ,
caxcꞌal chi eloc jaxca chi yun yalon ebꞌ tuꞌ.
Yutol jaꞌ Jehová cu Diosal,
oj akꞌon porobꞌal je naꞌbꞌal,
ta yel che camcꞌulne Naj yetoj masanil je cꞌul,
yetoj cꞌal masanil je naꞌbꞌal.
4 Yuxan ocanwej cꞌal tzajan yintaj Jehová cu Diosal xin,
catuꞌ miman ojabꞌ yeloc apnoj Naj yul je sat.
Jijewej ẍejbꞌanil.
Abꞌwej tzet chi yalaꞌ.
Ocanwej yin eyilal tet,
catuꞌ junne ojabꞌ cꞌal je yeoc yetoj Naj.
5 Jal pax ebꞌ chi yaloc sbꞌa ẍejabꞌoj Jehová tuꞌ xin,
ma chi yalaꞌ tol chi yil junoj tzetyetal yin weyicheal yaloni,
jaꞌ jun mactxequel tuꞌ sowalil chi akꞌle camoj,
yutol jaꞌ chi akꞌon je cꞌul yet che yiꞌon el je naꞌbꞌal yin Jehová cu Diosal,
jaꞌton Naj jix jex colon eltej yet ey jex oc yin yakꞌomaloj servilal bꞌey txꞌotxꞌ Egipto.
Yuxan jaꞌ jun tuꞌ,
che makꞌwej camoj,
yet watxꞌ chi qꞌueyel jun spenail tuꞌ je xol.
6 Yuxan,
ta jaꞌ junoj je yuẍtaj,
ma je cꞌaal,
ma je cutzꞌin,
ma je yistil tol camcꞌulnebꞌil je yu,
ma xin junoj je watxꞌil ánima caw watxꞌ je yakꞌon yetoj,
ta jaꞌ chex ijbꞌantoj yin ewantajil yin je yoc yin eyilal tet wan chi al-le oc diosal,
jun tol man je yotaj oj tam wal ebꞌ je mam je txutx otajneni,
7 jaꞌton sdiosal ebꞌ ánima caan je cawilal tuꞌ,
yetoj cꞌal ebꞌ naat eyel je yin bꞌey yul yibꞌankꞌinal tiꞌ,
8 cꞌam ojabꞌ che jije tzet chi yal ebꞌ tuꞌ,
cꞌam ojabꞌ che chaꞌ je yabꞌe,
cꞌam chi skeꞌ junne che yute je naꞌbꞌal yetoj ebꞌ.
Cꞌam cꞌal chi cusoc je cꞌul yin,
tam wal je yewbꞌan el tzet chi yal ebꞌ tuꞌ.
9 Jaꞌ tiꞌ je yet,
tol che makꞌwej camoj.
Jaex bꞌabꞌel jex che yiꞌa chꞌen chꞌen catuꞌ che kꞌojon camoj,
queytuꞌ chi yute pax masanil ebꞌ conobꞌ tuꞌ je yetoj.
10 Kꞌojchꞌennele ojabꞌ cam jun mactxequel tuꞌ,
yutol chi yoche chex yiꞌel yintaj Jehová,
Naj jix jex iꞌon eltej bꞌey txꞌotxꞌ Egipto,
bꞌey ey jex oc yin yakꞌomaloj servilal.
11 Queytuꞌ oj yun yotajnen el masanil ebꞌ conobꞌ,
cꞌal xiw ebꞌ yunen wan tuꞌ,
yet watxꞌ cꞌamxa chi yaoc spenail ebꞌ jaxca wan jix yun tuꞌ.
12 Ta chi abꞌle skꞌumal,
tol jaꞌ bꞌey junoj ebꞌ conobꞌ jix yakꞌ Jehová cu Diosal bꞌey chex caey ecꞌ tituꞌ,
13 ta ey mactxequel cꞌam chi jijen tzet chi yal Jehová,
catuꞌ chi ijbꞌaletoj ebꞌ ánima yu bꞌey caan jex tuꞌ,
yet chex oc yin eyilal tet comon dios tol man otajbꞌiloj,
14 sowalil che kꞌanle je yabꞌe ta yel jun tuꞌ ma cꞌamaj.
Ta tol yel jun kꞌane tuꞌ,
tol ey mac chi bꞌeybꞌalne jun tzetyetal man watxꞌoj tuꞌ je xol,
15 ta jaxca tuꞌ,
jaꞌ masanil ebꞌ caan bꞌey jun conobꞌ tuꞌ chi tzokꞌle cam ebꞌ yetoj cꞌal masanil sjobꞌbꞌeal noꞌ ebꞌ,
catuꞌ che yakꞌon lawoj masanil tzetyetal ey bꞌey jun conobꞌ tuꞌ.
16 Jaꞌ bꞌey snan yul txombꞌal,
jaꞌ tituꞌ che yambꞌa oc bꞌulan masanil sbꞌeomal ebꞌ,
catuꞌ che nuson tzꞌaꞌ jun conobꞌ tuꞌ,
yetoj cꞌal masanil tzetyetal ey tet,
catuꞌ che yakꞌon tzꞌaꞌ masanil,
jaxca junoj ofrenda yu je yiꞌon a can sbꞌi Jehová cu Diosal.
Jaꞌ jun conobꞌ tuꞌ,
chi can xacꞌal can bꞌulan spoꞌoil jaxca tuꞌ.
Junelne cꞌamxa bꞌakꞌin chi caꞌ waꞌnele a junelxa.
17 Jaxa jex jaex tiꞌ xin,
cꞌam ojabꞌ niꞌoj tzetyetal che yiꞌcan oc yin wan che yakꞌ lawoj tuꞌ,
yet watxꞌ cꞌam chi tit sjowal scꞌul Jehová cu Diosal je yin.
Jaꞌ tiꞌ je yet tol ey ojabꞌ watxꞌcꞌulal je yin,
yet watxꞌ jaꞌ Dios oj akꞌon chꞌibꞌ je bꞌisil jaxca jix yun yakꞌon can stiꞌ tet ebꞌ kichmam,
18 ta che jije masanil wan chejbꞌanile chi wal can ey jex tinaniꞌ.
Asanne ojabꞌ tzetyetal watxꞌ yul sat Dios,
jaꞌ ojabꞌ che bꞌeybꞌalne.