Asanne Jun Scalubꞌal Jehová
12
Jix yalon pax naj Moisés jaxca tiꞌ:
Jaꞌton wan chejbꞌanile cꞌal cuybꞌanile tiꞌ sowalil tol che bꞌeybꞌalne yet ey jex xa ecꞌ bꞌey txꞌotxꞌ txꞌotxꞌ oj yakꞌ Jehová cu Diosal ey jex,
jaꞌton Naj sDiosal ebꞌ cu mam icham.
2 Che makꞌwej poꞌo masanil bꞌey chi txali ebꞌ ánima oj je yakꞌ eyqꞌuey tuꞌ.
Catuꞌ che yakꞌon lawoj masanil yet xaambꞌal ebꞌ bꞌey sjolomlaj wonan cꞌal bꞌey yinlaj tzalan,
cꞌal bꞌey yichlaj teꞌ teꞌ yaax xaj.
3 Che makꞌon poꞌotoj masanil yet xaambꞌal ebꞌ,
chꞌen chꞌen cꞌal teꞌ teꞌ bꞌey chi oc ebꞌ yin eyilal tet sdiosal chi yij Aserá.
Che yakꞌon tzꞌaꞌ teꞌ teꞌ tuꞌ,
che makꞌon can poꞌotoj sdiosal ebꞌ,
yet watxꞌ cꞌamxa bꞌakꞌin chi bꞌinale sbꞌi wan comon dios bꞌey wan txꞌotxꞌ tuꞌ.
4 Man jaxca oj tuꞌ chi yun je yoc eyilal tet Jehová cu Diosal,
jaxca chi yun yoc ebꞌ yin eyilal tet sdiosal tuꞌ.
5 Jaꞌ jun lugar oj sicꞌ can el Jehová xol ebꞌ je yicꞌaal tol yet yeocoj,
jaꞌ tituꞌ oj jex toj oc yin eyilal tet.
6 Catuꞌ oj je yakꞌon je xaambꞌal tol oj je yakꞌ tzꞌaꞌoj cꞌal wanojxa xaambꞌal yu je yiꞌon a can sbꞌi Jehová.
Oj je yiꞌon cꞌal pax toj je diezmo,
cꞌal je yofrenda bꞌey jix je yakꞌ can je tiꞌ je yakꞌoni,
cꞌal je yofrenda tol chi el yin je cꞌul je yakꞌoni.
Jacꞌalaꞌ oj je yiꞌon cꞌal pax toj noꞌ bꞌabꞌel yuneꞌ je wacax cꞌal noꞌ bꞌabꞌel yuneꞌ je meꞌ.
7 Jaꞌ tituꞌ oj jex low yin tzalacꞌulal sattaj Jehová yetoj ebꞌ je yuninal.
Queytuꞌ oj yun je loꞌon tzetyetal che yiꞌ yin je mulnail jatacꞌalaꞌ syaaxilal Naj oj yakꞌ ey jex.
8 Jaꞌ tituꞌ manxa oj je yun jaex tiꞌ jaxca tzet chi kun tinaniꞌ,
yutol jaꞌ titiꞌ yal cꞌal tzet chi ẍaꞌ scꞌul junjun ánima,
jaꞌ chi yunne.
9 Jaꞌ tinaniꞌ,
cꞌamto chex apni oc bꞌey jun txꞌotxꞌ bꞌey cꞌamxa tzet oj je naꞌ,
jaꞌton jun txꞌotxꞌ oj yakꞌ Jehová cu Diosal ey jex.
10 Lalanxa yaapnoj scꞌual yet oj jex ecꞌ cantoj bꞌey jaꞌ Jordán,
yet chex apni can oc bꞌey sat txꞌotxꞌ txꞌotxꞌ oj yakꞌ Jehová ey jex,
jaꞌ Naj oj jex colon el yul skꞌabꞌ ebꞌ chi jowi oc je yin,
cꞌamxa xiwcꞌulal oj yun je caey ecꞌ tituꞌ.
11 Jaxa bꞌey jun txꞌotxꞌ tol oj sicꞌ can el Jehová cu Diosal yet chi oc je yetoj tuꞌ,
jaꞌ tituꞌ oj je yakꞌ masanil tzetyetal jix wal ey jex tol oj je yunne.
Jaꞌ tituꞌ oj je yakꞌ je xaambꞌal tol chi tzꞌaꞌi,
yetoj cꞌal wanojxa xaambꞌal,
yu je yiꞌon a can sbꞌi Dios,
oj je yakꞌ je diezmo,
cꞌal je yofrenda tol chi el yin je cꞌul je yakꞌon tet Naj,
cꞌal bꞌey che yakꞌ can je tiꞌ je yakꞌoni.
12 Catuꞌ che yaon oc kꞌin sattaj Jehová cu Diosal,
yetoj ebꞌ je yuninal,
yetoj ebꞌ je yakꞌomal servil,
cꞌal yetoj ebꞌ Levita oj caey ecꞌ je xol tuꞌ.
Ilaꞌ tol cꞌam smajul txꞌotxꞌ ebꞌ Levita tuꞌ oj ẍaꞌ je yetoj bꞌey jun txꞌotxꞌ tuꞌ.
13 Che yil cꞌal je bꞌa,
man comonoj che yakꞌ tzꞌaꞌ noꞌ je xaambꞌal yin yal cꞌal bꞌey chi ẍaꞌ je cꞌul,
14 asanne ojabꞌ bꞌey jun lugar sicꞌbꞌil el yu Jehová xol ebꞌ je yicꞌaal.
Jaꞌ tituꞌ che yiꞌtoj je xaambꞌal yin je yakꞌon tzꞌaꞌoj,
cꞌal je jijen masanil tzet chi wal can ey jex tiꞌ an.
15 Jaꞌ yet oj je yochen je chiꞌon chiꞌbꞌe,
chi skeꞌ je makꞌon cam junoj je yet,
catuꞌ che chiꞌon bꞌey ey jex ecꞌ tuꞌ,
jatacꞌalaꞌ tzet chi yakꞌ Jehová ey jex.
Caxcꞌal ey jex watxꞌ je yeocoj ma cꞌamaj jaxca yalon ley,
chi skeꞌ je chiꞌoni jaxca cꞌal chi yun je chiꞌon junoj noꞌ scꞌultajil che.
16 Asan ẍiqꞌuil noꞌ,
caw cꞌam chi skeꞌ je chiꞌoni ma je yuqꞌueni,
asan tol che sec can ey bꞌey sat txꞌotxꞌ jaxca jaꞌ.
17 Jaꞌ yul je conobꞌ cꞌam chi skeꞌ je loꞌon eytoj sdiezmoal je tiriw,
je yal uva,
cꞌal je yaceite olivo,
tam wal noꞌ bꞌabꞌel yuneꞌ je wacax cꞌal noꞌ bꞌabꞌel yuneꞌ je meꞌ,
cꞌal je yofrenda bꞌey che yakꞌ can je tiꞌ je yakꞌoni yetoj cꞌal junojxa tzetyetal tol chi el yin je cꞌul je yakꞌon yin ofrendail tet Jehová.
18 Asan bꞌey jun lugar oj sicꞌ can el Jehová cu Diosal,
jaꞌ tituꞌ oj skeꞌ je chiꞌon wan xaambꞌal tuꞌ,
jaꞌjun ebꞌ je yuninal je yetoj cꞌal ebꞌ je yakꞌomal servil,
yetoj cꞌal ebꞌ Levita eyecꞌ je xol.
Jaꞌ tituꞌ che yakꞌ tzalabꞌoj je cꞌul sattaj Naj yu tzet che yiꞌ yin je mulnail tuꞌ.
19 Yajbꞌan ey jex ecꞌ bꞌey jun txꞌotxꞌ tuꞌ,
cꞌam ojabꞌ chi too qꞌueycꞌulal ebꞌ Levita je yu.
20 Jaꞌ yet oj mimanbꞌoj txꞌotxꞌ je txꞌotxꞌ bꞌey jix yakꞌ can stiꞌ Jehová cu Diosal yakꞌoni,
ta oj yoche je cꞌul oj je chiꞌ chiꞌbꞌe,
oj skeꞌ je chiꞌon yal cꞌal tzet cꞌual.
21 Ta naat caan jex bꞌey jun lugar jix sicꞌ can el Jehová cu Diosal bꞌey chi oc eyilal tuꞌ,
chi skeꞌ je makꞌon cam noꞌ je wacax cꞌal noꞌ je meꞌ chi yakꞌ Naj ey jex bꞌey caan jex tuꞌ,
catuꞌ che chiꞌoni jatacꞌalaꞌ jantaj chi yoche je cꞌul je chiꞌoni,
jaxca cꞌal jix yun walon can ey jex.
22 Jaxca cꞌal chi yun je chiꞌon noꞌ scꞌultajil che,
queytuꞌ chi yun je chiꞌoni,
ta watxꞌ je yeoc jaxca yalon ley ma cꞌamaj,
chi cꞌal skeꞌ je chiꞌoni.
23 Cꞌam chi skeꞌ je chiꞌon noꞌ chiꞌbꞌe tol eyto oc ẍiqꞌuil,
yutol jaꞌ yin ẍiqꞌuil noꞌ tuꞌ eyoc skꞌinal noꞌ.
24 Asan tol che sec can ey ẍiqꞌuil noꞌ bꞌey sat txꞌotxꞌ jaxca jaꞌ jaꞌ.
25 Cꞌam ojabꞌ che chiꞌ ma je yuqꞌuen ẍiqꞌuil noꞌ noꞌ yet watxꞌ,
watxꞌ cꞌal chex eloc yetoj ebꞌ je yuninal yu che jije tzet chi yal Jehová.
26 Jal pax masanil tzetyetal tol yet xa Jehová yeoc je yu xin,
cꞌal tzetyetal tol jix je yakꞌ je tiꞌ je yakꞌoni,
sowalil che yiꞌtoj bꞌey jun lugar jix sicꞌ can el Naj.
27 Jaꞌ yibꞌan jun yet xaambꞌal yet Jehová cu Diosal,
jaꞌ tituꞌ che yakꞌ je xaambꞌal tol chi akꞌle tzꞌaꞌ masanil ẍiꞌbꞌeal cꞌal yetoj ẍiqꞌuil.
Jal pax junxa tujan noꞌ xaambꞌal xin,
chi skeꞌ je chiꞌon ẍiꞌbꞌeal noꞌ,
asanne ojabꞌ ẍiqꞌuil noꞌ che sec can oc yin yet xaambꞌal bꞌey sattaj Naj.
28 Chi cam je yabꞌeni cꞌal je jijen masanil tzet chi walaꞌ,
yet watxꞌ,
watxꞌ cꞌal oj yun je bꞌeytoj yetoj ebꞌ je yuninal,
yutol che jije tzet chi ẍaꞌ scꞌul Jehová cu Diosal,
catuꞌ watxꞌ jex cꞌal yul sat Naj.
Chi Akꞌle Snaꞌbꞌal Ebꞌ Yet Cꞌam Chi Oc Ebꞌ Yin Eyilal Tet Echele
29 Jaꞌ yet oj akꞌle eyqꞌuey masanil wan nación yu Jehová cu Diosal je sattaj jaex tiꞌ,
jaꞌ yet oj lawoj yeyqꞌuey ebꞌ tuꞌ je yu,
jaxa je caey can bꞌey sat xꞌotxꞌ ebꞌ tuꞌ.
30 Caw wal chi cam je yiloni tol cꞌam chex oc tzajan yintaj sbꞌeybꞌal ebꞌ jaxca chi yun yoc ebꞌ yin eyilal tet comon dios,
ta jaxca tuꞌ oj je yute je bꞌeybꞌal,
oj tit sjowal scꞌul Naj je yibꞌan.
Cꞌam chi skeꞌ je kꞌanlen ecꞌ tet ebꞌ,
tzet chi yun yoc ebꞌ yin eyilal tet sdiosal tuꞌ,
man ojabꞌ queytuꞌ che yute pax je bꞌa jaex tiꞌ.
31 Man ojabꞌ queytuꞌ chi yun je yoc yin eyilal sattaj Jehová cu Diosal,
yutol jaꞌ masanil tzetyetal tol yaabꞌil el yu Dios,
junelne cꞌam chi yoche Naj,
jaꞌton wan chi sbꞌeybꞌalne ebꞌ yet chi oc ebꞌ yin eyilal tet sdiosal.
Ilaꞌ ey ebꞌ chi yakꞌ tzꞌaꞌ yuninal yin xaambꞌal tet sdiosal tuꞌ.
32 Yu tuꞌ xin,
jijewej cꞌal,
catuꞌ che bꞌeybꞌalne masanil tzet chi wal can ey jex.
Cꞌam chi skeꞌ je yiꞌon el niꞌoj,
cꞌam pax chi skeꞌ je yaon oc stzꞌajil wan chejbꞌanile tiꞌ.