Smimanbꞌilal Yeoc Jehová
11
Camcꞌulnewej Jehová cu Diosal,
jijewej cꞌal masanil tzet chi ẍej Naj je yunne,
jaꞌton scuybꞌanil cꞌal ẍejbꞌanil cꞌal sley.
2 Jaꞌ tinaniꞌ,
naꞌwejtej jantaj tzet jix yun Jehová je yu.
Jaex tiꞌ jix je yilaꞌ,
manaj ebꞌ je yuninal jix ilon tzet jix yun Naj,
yuxan sowalil che yal tet ebꞌ.
Jaex tiꞌ jix je yil stzejejial cꞌal miman yipal cꞌal wan milagro jix xꞌoxoꞌ.
3 Jix je yil tzet jix yun Jehová bꞌey txꞌotxꞌ Egipto,
cꞌal yin naj sreyal jun conobꞌ tuꞌ,
cꞌal yibꞌan masanil ebꞌ ánima.
4 Jix je yil tzet jix yun Jehová yetoj ebꞌ soldado naj sreyal Egipto,
cꞌal jantaj carruaje yet jowal iꞌbꞌil oc yu noꞌ che.
Masanil wan tuꞌ jix muji cantoj yu Jehová bꞌey yul jaꞌ Cajin Mar yet jix cu ujtele yu ebꞌ,
jaxa Naj jix qꞌueyon can el ebꞌ yin junelne.
5 Naꞌwejtej jantaj swatxꞌcꞌulal jix yun Naj kin bꞌey txꞌotxꞌ cusiltaj txꞌotxꞌ masantaꞌcꞌal jix cu julwej titiꞌ.
6 Che naꞌon cꞌal pax tej tzet jix yun Naj yetoj naj Datán cꞌal yetoj Abiram scꞌaal Eliab,
titnaj yin yicꞌaal Rubén.
Jix spoꞌo sbꞌa txꞌotxꞌ txꞌotxꞌ,
jix muji can eytoj ebꞌ yetoj yuninal,
yetoj skꞌap na ebꞌ,
cꞌal sjobꞌbꞌeal noꞌ ebꞌ yetoj jantaj masanil tzetyetal ey tet ebꞌ.
Je sattaj wal jix qꞌueyle can el ebꞌ yu Jehová.
7 Jaex tiꞌ,
testigo jex yin masanil tzet jix yun Naj,
tol qꞌueyubꞌtaj xacꞌal yili.
Jaꞌ jun tuꞌ,
ma yil ebꞌ je yuninal,
yuxan sowalil che yalwej tet ebꞌ tinaniꞌ.
Caw Ey Syaxilal Oj Yakꞌ Dios Bꞌey Jun Txꞌotxꞌ Jix Yakꞌ Can Stiꞌ Yakꞌon Tet Ebꞌ
8 Yuxan jijewej masanil ẍejbꞌanil Jehová chi wal can ey jex tinaniꞌ,
yet watxꞌ che yiꞌ je yip,
catuꞌ chex too caey bꞌey txꞌotxꞌ txꞌotxꞌ tol oj je majcan oc tuꞌ.
9 Yetoj cꞌal pax oj,
tol naatil oj jex caey ecꞌ bꞌey jun txꞌotxꞌ txꞌotxꞌ caw yaax sat tuꞌ,
jaꞌton txꞌotxꞌ bꞌey jix yakꞌ can stiꞌ Jehová tol oj yakꞌ tet ebꞌ kichmam cꞌal ey jon,
jaꞌton jaon yicꞌaal jon ebꞌ tiꞌ,
bꞌey ey noꞌ lech cꞌal noꞌ yal awcabꞌ.
10 Jaꞌ txꞌotxꞌ txꞌotxꞌ oj akꞌle ey jex tuꞌ,
man laan oj jaxca txꞌotxꞌ Egipto bꞌey jix cu tita.
Jaꞌ tituꞌ chi lawi je yaon ey je yawo,
catuꞌ che yaon oc yaal jaxca junoj joyan txꞌotxꞌ bꞌey chi awle an ita.
11 Jal pax txꞌotxꞌ bꞌey oj jex apnoj oc tuꞌ xin,
ey swonanil txꞌotxꞌ.
Ey cꞌal pax spananil,
oj ale cꞌal pax oc yaal txꞌotxꞌ yu nabꞌ chi yakꞌ Jehová.
12 Jaꞌ jun txꞌotxꞌ tuꞌ teynebꞌil yu Jehová cu Diosal,
ey cꞌal oc sat Naj yin txꞌotxꞌ masanil tiempo.
13 Yuxan ta che jije masanil wan ẍejbꞌanil Naj lalan walon can ey jex yet jun cꞌu tiꞌ.
Catuꞌ che camcꞌulnewej Jehová cu Diosal,
che yakꞌon servil yetoj masanil je cꞌul,
cꞌal masanil je naꞌbꞌal.
14 Ta jaxca tuꞌ oj je yunne,
oj yakꞌ cꞌal bꞌabꞌel nabꞌ cꞌal tzunan nabꞌ,
yuxan caw watxꞌ cꞌal oj yun sat je yawo,
je tiriw,
cꞌal uva yetoj je aceite olivo.
15 Caw ey cꞌal an cꞌultaj oj sloꞌ noꞌ je jobꞌbꞌeal noꞌ,
catuꞌ miman oj yun yakꞌon sat je yawo,
yet watxꞌ caw ey je loꞌbꞌe.
16 Naꞌan ojabꞌ cꞌal je yu xin,
cꞌam ojabꞌ chi qꞌueytoj yin je naꞌbꞌal,
cꞌam ojabꞌ che poꞌoel je bꞌa yintaj Jehová,
jaxa tala bꞌey junojxa comon dios bꞌey chex oc yin eyilal,
cꞌal je yoc tzajan yintaj.
17 Jaxa tala che yunne chi tit sjowal scꞌul Naj je yin.
Cꞌamxa chi yakꞌ nabꞌ,
manxa oj yakꞌ sat je yawo,
eyman chex cam yu wail bꞌey sat txꞌotxꞌ txꞌotxꞌ caw yaax sat lalan yakꞌon Naj ey jex tiꞌ.
18 Chi cam je yabꞌen wan kꞌane tiꞌ xin,
catuꞌ che cꞌubꞌan can yin je naꞌbꞌal.
Che kꞌalwej oc yin je kꞌabꞌ cꞌal yin snan je sat.
19 Jaꞌ wan tiꞌ oj je yakꞌ scuy ebꞌ je yuninal junjun cꞌu.
Junjun ojabꞌ cꞌal cꞌu chi yun je yalon tet ebꞌ,
yet ey jex ecꞌ bꞌey je na,
cꞌal yul-laj bꞌe bꞌey chex ecꞌabꞌi,
cꞌal yet chex wey can aoj,
cꞌal yet chex a pax waanoj.
20 Catuꞌ che tzꞌibꞌen oc yin spilaliẍal cꞌal yin smajil stiꞌ je na,
21 yet watxꞌ chi naatbꞌi je kꞌinal yetoj ebꞌ je yuninal,
bꞌey sat txꞌotxꞌ txꞌotxꞌ bꞌey jix yakꞌ can stiꞌ Jehová cu Diosal yakꞌon tet ebꞌ kichmam.
Oj jex caey cꞌal ecꞌ tituꞌ yajbꞌan eyecꞌ satcan cꞌal txꞌotxꞌ txꞌotxꞌ tiꞌ.
22 Ta tol che jije cꞌal je bꞌeybꞌalne masanil wan chejbꞌanile chi wal can ey jex tinaniꞌ,
tol che camcꞌulnewej cꞌal pax Jehová cu Diosal,
jijem ojabꞌ cꞌal je yunen masanil tzet chi yal Naj,
23 ta jaxca cꞌal tuꞌ che yunne,
jaꞌ Naj oj iꞌon el masanil wan mimej nación tuꞌ je sattaj,
catuꞌ oj jex can caey sat xꞌotxꞌ wan conobꞌ ecꞌbꞌan sbꞌisil cꞌal yipal ey jex.
24 Masanil cꞌal txꞌotxꞌ txꞌotxꞌ bꞌey oj jex ecꞌoj,
je yet oj yun can ocoj;
chi too tacꞌal txꞌotxꞌ bꞌey txꞌotxꞌ cusiltaj txꞌotxꞌ masantaꞌcꞌal chi apni oc bꞌey txꞌotxꞌ Líbano,
catuꞌ chi too tacꞌal bꞌey jaꞌ miman jaꞌ Éufrates masantaꞌcꞌal chi apni oc bꞌey jaꞌ mar Mediterráneo.
25 Cꞌam mac oj skeꞌ stecꞌbꞌan sbꞌa je sattaj.
Jaꞌ Jehová oj aon oc xiwcꞌulal cꞌal taccꞌulal xol ebꞌ ánima bꞌey oj jex ecꞌoj,
jaxca jix yun yakꞌon can stiꞌ Naj ey jex.
26 Abꞌwej xin,
jaꞌ yet jun cꞌual tiꞌ chi wakꞌ je sicꞌle,
jaꞌ mi syaaxilal che yoche,
ma tol jaꞌ sjowal scꞌul Dios.
27 Oj je chaꞌ swatxꞌcꞌulal cꞌal syaaxilal Jehová cu Diosal,
ta tol oj je jije ẍejbꞌanil lalan walon can ey jex tiꞌ.
28 Jaꞌ sjowal scꞌul Dios oj tit je yibꞌan ta tol man oj je jije wan chejbꞌanile tiꞌ,
catuꞌ che yiꞌon can el je bꞌa yintaj Naj,
catuꞌ che yaon oc je naꞌbꞌal yin comon dios tol man je yotaj oj,
catuꞌ chex oc tzajan yintaj.
29 Jaꞌ yet xax jex iꞌle octoj yu Jehová cu Diosal bꞌey txꞌotxꞌ txꞌotxꞌ tol oj yakꞌ ey jex tuꞌ,
oj je yalon el watxꞌ kꞌane bꞌey yibꞌan wonan Guerizim,
catuꞌ che kꞌanon can syaꞌilal yibꞌan txꞌotxꞌ wonan Ebal.
30 Jaꞌ wan wonan tuꞌ,
jatuꞌ ey ebꞌ sattaj ecꞌtoj miman bꞌe chi ecꞌtoj bꞌey skꞌaxepal ecꞌtoj jaꞌ Jordán,
yetcꞌulal bꞌey chi too cꞌu,
bꞌey xꞌotxꞌ ebꞌ Cananeo caan bꞌey spananil stiꞌ jaꞌ miman Jordán,
bꞌey sattaj ecꞌtoj conobꞌ Guilgal.
Jaꞌton bꞌey ey teꞌ jii bꞌey yul yet Moré.
31 Yutol lalanxa yapni oc stiempoal yet oj jex kꞌaxbꞌo ecꞌtoj yul jaꞌ Jordán,
yet chi akꞌle can txꞌotxꞌ txꞌotxꞌ tuꞌ ey jex yu Jehová cu Diosal,
jaꞌ yet oj je yiꞌon oc txꞌotxꞌ txꞌotxꞌ tuꞌ,
jaxa je caey sat txꞌotxꞌ.
32 Yuxan sowalil tol oj je jije masanil chejbꞌanile cꞌal ley chi wal can ey jex tinaniꞌ.