3 Catuꞌ jix jin waꞌnen ey jun teꞌ caẍa tuꞌ,

jaꞌ teꞌ acacia jix waoc yin.

Jix jin joson ey caabꞌ chꞌen jenan chꞌen tuꞌ jaxca wan yet sbꞌabꞌelal,

jix wiꞌon atoj chꞌen bꞌey sjolom wonan tuꞌ.

4 Jix tzꞌibꞌele oc wan laonebꞌ chejbꞌanile yin chꞌen caabꞌ jenan chꞌen tuꞌ yu Jehová junelxa,

jaxca jix yun stzꞌibꞌen oc yet sbꞌabꞌelal,

jaꞌton wan kꞌane jix yal Naj ey jon bꞌey snan xol kꞌakꞌ kꞌakꞌ bꞌey sjolom wonan yet yaman jon ecꞌ tituꞌ.

Jix yaontej chꞌen Naj ey jin.

5 Jix lawi tuꞌ,

catuꞌ jix jin paxeytej bꞌey sjolom wonan tuꞌ,

jix waon eytoj chꞌen yul teꞌ caẍa,

jaxca jix yun yalon Jehová ey jin.

Jaꞌ tituꞌ jix eycantoj chꞌen,

ẍi naj Moisés.

6 (Jix el ebꞌ conobꞌ Israel bꞌey Beerot-bené-jaacán,

catuꞌ jix apni oc ebꞌ bꞌey Moserá.

Jaꞌ tituꞌ jix cam naj Aarón,

jaꞌ tituꞌ jix mujle can naj.

Ey jun scꞌaal chi yij Eleazar,

jaꞌ jix oc can sqꞌuexeloj naj yin sat yakꞌomaloj xaambꞌal.

7 Jix lawi tuꞌ xin,

jix el pax ebꞌ conobꞌ Israel tituꞌ,

catuꞌ jix apni oc ebꞌ bꞌey Gudgoda.

Jix el pax ebꞌ tituꞌ,

catuꞌ jix apni oc ebꞌ bꞌey Jotbata.

Caw ey jaꞌ jaꞌ tituꞌ.

8 Jaꞌ yet tuꞌ jix ale oc yopiso ebꞌ yicꞌaal Leví yu Jehová,

yet chi yiꞌontoj teꞌ Scaẍail Swa Kꞌane Dios ebꞌ.

Jaꞌton ebꞌ jix oc yakꞌomaloj servil Jehová,

cꞌal yalon watxꞌ kꞌane ebꞌ yibꞌan ebꞌ ánima yin sbꞌi Dios.

Jaxca tuꞌ chi yun cꞌal ebꞌ tinaniꞌ.

9 Yuxan jaꞌ ebꞌ yicꞌaal Leví ma ẍaꞌ smajul txꞌotxꞌ ebꞌ,

yutol jaꞌ Jehová eyoc smajuloj ebꞌ,

jaxca jix yun yalon Dios.)

10 Jaꞌ yet jun tiempoal tuꞌ,

cawinaj cꞌu cawinaj akꞌbꞌal ey jin ecꞌ bꞌey sjolom jun wonan tuꞌ,

jaxca jix wun yet sbꞌabꞌelal.

Jacꞌalaꞌ pax yet junelxa tiꞌ,

jix ẍaꞌ scꞌul Jehová yabꞌen tzet jix walaꞌ,

yuxan ma jex qꞌueyle el yu Naj.

11 Jix yalon Jehová ey jin jaxca tiꞌ:

Asiꞌ,

catuꞌ cha wiꞌontoj jun conobꞌ tuꞌ,

yet chi too ẍaꞌ txꞌotxꞌ txꞌotxꞌ ebꞌ tol oj oc yetoj ebꞌ,

jaꞌton txꞌotxꞌ bꞌey jix wakꞌcan jin tiꞌ wakꞌon tet ebꞌ je yichmam,

ẍi Jehová.

12 Jaꞌ tinaniꞌ xin,

jex wet conobꞌ Israel,

¿tzet chi skꞌan Jehová cu Diosal ey jon?

Jaꞌton tzet chi skꞌan Naj tiꞌ,

tol ey ojabꞌ yeloc apnoj Naj yul cu sat,

catuꞌ tzajan ojabꞌ jon cꞌal oc yintaj Naj,

catuꞌ chi cu camcꞌulnen pax oj,

cꞌal koc yin eyilal tet,

yetoj masanil cu cꞌul yetoj cꞌal masanil cu naꞌbꞌal.

13 Ta che jije masanil scuybꞌanil cꞌal ẍejbꞌanil,

watxꞌ cꞌal oj jex eloc yin masanil.

14 Chi cam wal je naꞌoni,

tol jaꞌ Jehová cu Diosal,

jaꞌ ey yet satcan yetoj cꞌal bꞌey yibꞌan atoj satcan tuꞌ,

txꞌotxꞌ txꞌotxꞌ yetoj masanil tzet ey sat txꞌotxꞌ.

15 Yutol jaꞌ Jehová ey scamcꞌulal yin ebꞌ kichmam,

yuxan jix sicꞌle can el yicꞌaal ebꞌ yu Naj,

yel toni,

jix cu sicꞌle el xol wanojxa nación yu Naj,

jaxca lalan kilonwej tinaniꞌ.

16 Yuxan awej oc yin je cꞌul bꞌey jix yakꞌ can stiꞌ Naj,

cꞌam ojabꞌ che yakꞌ cawbꞌoj cꞌal je naꞌbꞌal.

17 Yutol jaꞌ Jehová cu Diosal,

Miman Yeloc Apnoj Naj yibꞌan tzet chi al-le oc diosal,

yaaw Naj yibꞌan ebꞌ yaaw.

Ey smey,

smoo Miman Yeloc Apnoj.

Cꞌam cꞌal bꞌey qꞌuexan chi yute snaꞌbꞌal yin ebꞌ ánima.

Cꞌam chi ẍaꞌ tumin ma junoj saꞌbꞌeal yet chi naꞌle oc yin junoj mactxequel yu.

18 Chi okꞌ scꞌul yin ebꞌ mebꞌa,

cꞌal yin ebꞌ ix ix camnajxa yichamil.

Ey cꞌal pax scamcꞌulal yin ebꞌ txꞌoj conobꞌal eyecꞌ cu xol,

chi akꞌle sloꞌbꞌe cꞌal spichil ebꞌ yu Naj.

19 Jaxca ojabꞌ tuꞌ chi kunwej,

cu camcꞌulne ebꞌ,

yutol queytuꞌ jix kunne tol txꞌoj conobꞌal jix yun cu caey ecꞌ bꞌey txꞌotxꞌ Egipto.

20 Asanne ojabꞌ Jehová cu Diosal ey ojabꞌ yeloc apnoj yul cu sat.

Asan tet Naj chi cu oc yin eyilal,

catuꞌ jijem cꞌal chi kute cu bꞌa tet.

Ta ey bꞌey chi kakꞌ cu tiꞌ yin junoj tzetyetal,

asanne ojabꞌ yin sbꞌi Naj chi kalaꞌ.

21 Kiꞌwej a can sbꞌi Jehová cu Diosal.

Kuwej,

yuxan ecꞌal tzet qꞌueyubꞌtaj yili tzet jix yun Naj,

jaxca wal jix yun kiloni.

22 Jaꞌ yet jix apni oc ebꞌ kichmam bꞌey txꞌotxꞌ Egipto,

asanne 70 sbꞌisil ebꞌ,

jaxa tinaniꞌ xin,

jaꞌ Jehová jix akꞌon chꞌibꞌ cu bꞌisil,

jaxca xacꞌal sbꞌisil weycan bꞌey satcan.