3 Yuxan jaꞌ tinaniꞌ xin,

otajnewej eloj,

tol jaꞌ Jehová cu Diosal,

jaꞌ oj bꞌabꞌoj je sattaj jaxca jun kꞌakꞌ kꞌakꞌ chi qꞌueyle el tzetyetal yu.

Oj qꞌueyle el ebꞌ conobꞌ cꞌal yiꞌle el ebꞌ je sattaj.

Jaex tiꞌ oj je yiꞌel ebꞌ ánima tuꞌ,

catuꞌ oj je qꞌueyon can el ebꞌ yin eymanil jaxca jix yun yalon Jehová.

4 Jaꞌ yet chi lawi yiꞌle el masanil wan ánima tuꞌ je sattaj yu Jehová,

cꞌam ojabꞌ che naꞌ tol yu je watxꞌil yuxan oj je majcan oc xꞌotxꞌ ebꞌ tuꞌ.

Jaꞌ wan nación tuꞌ oj iꞌle el ebꞌ je sattaj yu Dios,

yutol pena sbꞌeybꞌal ebꞌ.

5 Man yu oj je watxꞌil,

tam wal yu jichan je bꞌeybꞌal,

yuxan oj jex apnoj caey bꞌey jun txꞌotxꞌ tuꞌ.

Yutol yu cꞌal spenail wan conobꞌ tuꞌ,

yuxan oj qꞌueyle el ebꞌ je sattaj,

yet watxꞌ chi yun cꞌal bꞌey jix yakꞌ can stiꞌ Jehová tet ebꞌ kichmam,

jaꞌton tet Abraham,

Isaac cꞌal tet Jacob.

6 Otajnewej el xin,

tol man yu oj je watxꞌil yuxan oj yakꞌ Jehová jun txꞌotxꞌ tol txꞌojxa swatxꞌil yili tuꞌ ey jex,

yet che majon can ocoj,

yutol caw wal pit jix je yute je bꞌa.

7 Naꞌwejtej xin,

cꞌam ojabꞌ chi too qꞌueycꞌulal je yu,

yutol jix je txꞌemtej sjowal scꞌul Jehová je yibꞌan bꞌey txꞌotxꞌ cusiltaj txꞌotxꞌ.

Yet tax jix jex eltej bꞌey txꞌotxꞌ Egipto masantaꞌcꞌal jix jex jul bꞌey jun txꞌotxꞌ tiꞌ,

caw pit cꞌal jix je yute je bꞌa tet Naj.

8 Jaꞌ bꞌey txꞌotxꞌ wonan Horeb,

caw jix je txꞌemtej sjowal scꞌul Jehová,

yuxan jix yoche Naj jix jex yakꞌ qꞌueyle eloj.

9 Jaꞌ yet jix jin atoj bꞌey jun wonan tuꞌ,

yu jin chaꞌon chꞌen caabꞌ jenan chꞌen bꞌey tzꞌibꞌebꞌil oc wan chejbꞌanile,

jaꞌton bꞌey jix yakꞌ can skꞌane Naj je yetoj,

cawinaj cꞌu cawinaj akꞌbꞌal jix jin eecꞌ tituꞌ,

cꞌam cꞌal niꞌoj tzet jix jin loꞌ,

tam wal ey niꞌoj tzet jix wuqꞌue.

10 Jix lawi tuꞌ xin,

catuꞌ jix yakꞌon caabꞌ jenan chꞌen chꞌen Jehová tuꞌ ey jin.

Jaꞌcaw Naj jix stzꞌibꞌen oc skꞌane tuꞌ yin chꞌen,

jaꞌton wan kꞌane jix yal can bꞌey sjolom wonan xol xaj kꞌakꞌ kꞌakꞌ yet yaman jon ecꞌ tituꞌ.

11 Jaꞌ yet jix lawi ecꞌtoj cawinaj cꞌu cꞌal cawinaj akꞌbꞌal tuꞌ,

catuꞌ jix yakꞌon caabꞌ jenan chꞌen chꞌen tuꞌ ey jin,

jaꞌton chꞌen bꞌey tzꞌibꞌebꞌilcan oc bꞌey jix yakꞌ can stiꞌ Dios.

12 Jix yalon Jehová jaxca tiꞌ:

Paxan eytoj yin eymanil,

yutol jaꞌ jun conobꞌ jix wiꞌeltej bꞌey Egipto,

tuxa jix yetnetoj sbꞌa.

Ma cꞌal sjije niꞌoj ebꞌ tzet jix walaꞌ,

tuxa jix swaꞌne a jun chꞌen chꞌen ebꞌ sdiosaloj.

13 Tuxa jix wilaꞌ tol caw pit jix yute sbꞌa jun conobꞌ tiꞌ.

14 Yuxan iꞌel ja bꞌa jin sattaj an,

tol oj jin qꞌueyel wan ánima tiꞌ,

oj jin qꞌueyon el ebꞌ bꞌey sat txꞌotxꞌ txꞌotxꞌ tiꞌ yin junelne.

Asanxane ja wetoj oj jin waꞌne junoj miman nación yin ebꞌ ja wicꞌaal,

yel xacꞌal ey yip,

catuꞌ cꞌamxa chi alcha jantaj sbꞌisil ebꞌ yintaj ebꞌ tiꞌ,

ẍi Jehová.

15 Catuꞌ jix jin paxeytej bꞌey sjolom wonan bꞌey chi chaw skꞌakꞌal tuꞌ,

iꞌbꞌil oc caabꞌ jenan chꞌen chꞌen tuꞌ wu an,

bꞌey tzꞌibꞌebꞌil oc swa kꞌane Dios tuꞌ.

16 Jaxa yet jix jin eyoloj,

jix wiloni tol xax oc je penail yul sat Jehová cu Diosal,

yu jix je waꞌne jun yechel wacax je diosaloj.

Yin junne txolan jix je yiꞌel je bꞌa yintaj chejbꞌanile jix yal Naj ey jex.

17 Yuxan jix jin kꞌojon ey chꞌen chꞌen tuꞌ jin sattaj,

jix poꞌotoj chꞌen.

18 Jix lawi tuꞌ,

jix jin ey kaan sattaj Jehová,

jaxca bꞌeybꞌanebꞌil wu,

yin cawinaj cꞌu cꞌal yin cawinaj akꞌbꞌal,

ma cꞌal jin lowoj tam wal wuqꞌuen jaꞌ,

je yaꞌiloj yuxan queytuꞌ jix wunne,

yutol caw pena tzet jix je yunne,

jix je txꞌemontej sjowal Dios.

19 Caw jix jin xiwa yu jix tit sjowal scꞌul Jehová je yibꞌan yet chex qꞌueyle el yu.

Asan xin,

jix too ẍaꞌ yabꞌ Jehová tzet jix wal yet junelxa tuꞌ.

20 Jix tit cꞌal pax sjowal Naj yin naj wuẍtaj Aarón,

niꞌanxane ma qꞌueyle el naj,

yuxan jix jin kꞌan tet Dios tol chi akꞌle mimancꞌulal yin.

21 Yin jun txolan jix jin makꞌey wejna jun yechel wacax tuꞌ,

jun bꞌey jix oc je penail tuꞌ.

Eyman jix jin kꞌojtoj xol kꞌakꞌ.

Jix lawi tuꞌ,

catuꞌ jix jin chacꞌon poꞌotoj,

jix jin tiẍon eytoj xol jaꞌ jaꞌ chi eytej satlaj chꞌen tuꞌ.

22 Quey cꞌal pax tuꞌ jix je yun bꞌey txꞌotxꞌ Taberá,

bꞌey Masah cꞌal bꞌey Quibrot-hataavá.

Jaꞌton yet tuꞌ jix je txꞌemtej sjowal scꞌul Jehová.

23 Jaꞌton yet jix yalon Naj tol chex too bꞌey Cadés-barnea,

catuꞌ chi oc can txꞌotxꞌ txꞌotxꞌ tuꞌ je yetoj,

jacꞌalaꞌ ma je yaoc yin je cꞌul,

tam wal jix je jije tzet jix yalaꞌ.

24 Jaꞌ yet tax jix jex wotajne eloj,

jix cꞌoli wiloni tol caw pit cꞌal che yute je bꞌa tet Jehová.

25 Yuxan jix yal Jehová tol oj jex qꞌueyle eloj,

yuxan jix jin ey noan sattaj Naj yin cawinaj cꞌu cꞌal yin cawinaj akꞌbꞌal.

26 Jix jin kꞌanon tet Naj,

jix waloni:

Jaach Jehová,

jin Diosal,

cꞌam ojabꞌ cha qꞌueyel jun ja conobꞌ tiꞌ.

Jaach jix ja colel yetoj ja wipal,

jix ja wiꞌon eltej bꞌey Egipto yetoj masanil ja wipalil.

27 Naꞌtej ebꞌ naj ja chejabꞌ,

jaꞌton Abraham,

Isaac cꞌal Jacob.

Cꞌam ojabꞌ cha waoc spitalil cꞌal spenail jun conobꞌ tiꞌ yin ja cꞌul,

yetoj yecꞌnajil ebꞌ,

28 yet watxꞌ cꞌam chi yal ebꞌ ánima bꞌey jix cu eltej ja wu tuꞌ:

Ma skeꞌ yu Jehová yiꞌon apnoj jun conobꞌ tuꞌ bꞌey txꞌotxꞌ txꞌotxꞌ,

bꞌey jix yakꞌ can stiꞌ yakꞌon tet ebꞌ,

asan tol jix iꞌletoj ebꞌ yu yet chi to akꞌle cam ebꞌ yu bꞌey txꞌotxꞌ cusiltaj txꞌotxꞌ,

yutol jix yakꞌle yalon tet ebꞌ,

ẍi mi ebꞌ,

yet oj yalon ebꞌ.

29 Akꞌ mimancꞌulal yin ebꞌ ánima tiꞌ xin,

yutol ja conobꞌ yeoc ebꞌ.

Jaach jix ja wiꞌeltej ebꞌ bꞌey txꞌotxꞌ Egipto yetoj ja wipal.

Jaxca tuꞌ jix yun yalon naj Moisés tet Jehová.