Man Asanne Oj Yu Loꞌbꞌe Chi Skeꞌ Kiquisbꞌi Ecꞌoj
8
Jix yalon naj Moisés jaxca tiꞌ:
Watxꞌ ojabꞌ chi yun je jijen masanil wan chejbꞌanile chi wal can ey jex tinaniꞌ,
yet watxꞌ,
watxꞌ oj jex elocoj.
Catuꞌ oj chꞌibꞌ cꞌal je bꞌisil,
oj je yiꞌon oc txꞌotxꞌ txꞌotxꞌ bꞌey jix yakꞌ can stiꞌ Jehová yakꞌon tet ebꞌ cu mam icham.
2 Naꞌwejtej sicꞌlebꞌil,
ilaꞌ tol cawinaj abꞌil jix cu ecꞌ yu Jehová cu Diosal bꞌey txꞌotxꞌ cusiltaj txꞌotxꞌ.
Jix yaoc syaꞌtajilal Naj kibꞌan,
jix yakꞌon porobꞌal cu naꞌbꞌal,
ta tol yel chi cu jije ẍejbꞌanil Naj,
ma cꞌamaj.
3 Caw kilnajwej syaꞌtajilal,
jix kakꞌonwej pax wail,
jaxa Jehová cu Diosal jix akꞌon maná cu loꞌ.
Jaꞌton wan loꞌbꞌe tol man kotajoj,
jaꞌ jix cu loꞌ,
man yotaj oj pax ebꞌ cu mam icham.
Jaxca tuꞌ jix cu yute yet watxꞌ chi kotajne eloj tol man asanne oj yu loꞌbꞌe yuxan chi skeꞌ kiquisbꞌi ecꞌoj,
chi skeꞌ kiquisbꞌi pax ecꞌ yu tzet chi yal skꞌane Dios.
4 Jaꞌ cu pichil jix cu kꞌan yin cawinaj abꞌil tuꞌ,
ma cꞌal lawoj eloj,
cꞌam bꞌey jix mala kajan yet jix cu bꞌeyi.
5 Naꞌwejtej yin je naꞌbꞌal tol jaxca junoj mame chi yakꞌ cuenta yuninal,
jaxca tuꞌ jix cu yute Jehová cu Diosal.
6 Yuxan sowalil che jijewej masanil ẍejbꞌanil Naj,
miman ojabꞌ yeloc apnoj wan cuybꞌanile tiꞌ yul je sat.
7 Yutol jaꞌ Jehová oj jex iꞌon apnoj bꞌey sat txꞌotxꞌ txꞌotxꞌ tol caw wal watxꞌ yili.
Caw ey txꞌotxꞌ pananlaj bꞌey chi aol jaꞌ snukꞌ jaꞌ,
cꞌal jaꞌ mimej jaꞌ chi tit bꞌey wan mimej wonan.
8 Jaꞌ bꞌey jun txꞌotxꞌ tuꞌ caw chi yakꞌ ixim tiriw,
ixim cebada,
an uva,
teꞌ higo,
teꞌ granada cꞌal teꞌ olivo.
Ey cꞌal pax noꞌ yal awcabꞌ.
9 Jaꞌ yet ey jex xa ecꞌ bꞌey sat txꞌotxꞌ txꞌotxꞌ tuꞌ,
cꞌamxa tzet oj je naꞌ yu je loꞌbꞌe,
cꞌamxa bꞌey oj je yakꞌ bꞌiscꞌulal yu je loꞌbꞌe cꞌal yu junojxa tzetyetal.
Jaꞌ xol chꞌen chꞌen ey tituꞌ,
caw ey chꞌen hierro,
jaxa bꞌey yichlaj wonan ey chꞌen cobre.
10 Caw watxꞌ oj yun je lowi,
caw oj no je cꞌul sicꞌlebꞌil,
catuꞌ oj je yalon yu diosalil tet Jehová cu Diosal,
yu txꞌotxꞌ txꞌotxꞌ caw watxꞌ jix yakꞌ ey jex tuꞌ.
Cꞌam Ojabꞌ Chi Too Qꞌueycꞌulal Jehová Yu Ebꞌ
11 Cꞌam ojabꞌ chi too qꞌueycꞌulal Jehová cu Diosal je yu.
Sowalil che jije ẍejbꞌanil cꞌal sley,
cꞌal cuybꞌanile chi wal can ey jex tinaniꞌ.
12 Jaꞌ yet chex lowi catuꞌ chi no je cꞌul,
che waꞌnen a je na caw wal watxꞌ bꞌey chex caey ecꞌoj,
tala chi too qꞌueycꞌulal Jehová je yu,
13 catuꞌ che yiloni tol caw watxꞌ ẍꞌibꞌ noꞌ je wacax cꞌal noꞌ je meꞌ,
yetoj cꞌal pax oj,
yet caw mimanxa chꞌen plata cꞌal chꞌen oro ey,
ey jex,
14 jaxa tala chi yunne,
chi oc meynebꞌail yin je naꞌbꞌal,
catuꞌ chi too qꞌueycꞌulal Jehová cu Diosal je yu,
jaꞌton Naj jix jex iꞌon eltej bꞌey txꞌotxꞌ Egipto,
bꞌey ey jex oc yin yakꞌomaloj servilal.
15 Jaꞌ Jehová jix jex iꞌon bꞌeyoj,
bꞌey jun miman cusiltaj txꞌotxꞌ tol caw ey smey,
bꞌey ey noꞌ labꞌa caw jow,
cꞌal noꞌ sinam,
catuꞌ caw ey pax kꞌakꞌ tituꞌ,
bꞌey ey tajin tiꞌal,
bꞌey cꞌam jaꞌ jaꞌ chi ukꞌlei.
Jaꞌton Naj jix iꞌon eltej jaꞌ jaꞌ bꞌey sat jun chꞌen chꞌen,
catuꞌ jix je yuqꞌueni.
16 Jix yakꞌon maná je loꞌbꞌeoj bꞌey txꞌotxꞌ cusiltaj txꞌotxꞌ tuꞌ,
jun loꞌbꞌe tol man otajbꞌiloj yu ebꞌ kichmam.
Jix oc syaꞌilal je yibꞌan cꞌal yakꞌle porobꞌal je naꞌbꞌal,
yet watxꞌ,
watxꞌ xacꞌal chex elocoj.
17 Jix yun Naj jaxca tuꞌ,
yuxan cꞌam ojabꞌ bꞌey che naꞌ,
tol yu je yipal yul je yet,
cꞌal yu je mulnail yuxan jix jex oc yin bꞌeomal,
je naꞌ tala jun tuꞌ yin je naꞌbꞌal.
18 Yuxan sowalil che naꞌwejtej tol jaꞌ Jehová cu Diosal,
jaꞌ chi akꞌon je naꞌbꞌal cꞌal je yip yet chi skeꞌ je yoc yin bꞌeomal,
yet watxꞌ chi yun jaxca bꞌey jix yakꞌ can stiꞌ tet ebꞌ kichmam.
19 Yuxan ta chi too qꞌueycꞌulal Jehová cu Diosal je yu,
catuꞌ chex oc tzajan yintaj wanojxa chi al-le oc diosal,
catuꞌ oj je yakꞌon servil cꞌal je yey noan yin eyilal tet,
ta jaxca tuꞌ oj je yute je bꞌa,
jain chi wal ey jex tinaniꞌ,
tol oj jex qꞌueyle el yu Naj.
20 Jaxca oj yun sqꞌueyle el wan conobꞌ yu Naj bꞌey oj jex apnoj oc tuꞌ,
jaxca tuꞌ oj yun je qꞌueyle el jaex tiꞌ,
ta man oj je jije tzet chi yalaꞌ,
ẍi naj Moisés tet ebꞌ.