—Jaꞌ tinaniꞌ jaachxa oj ja waꞌne caabꞌoj patxan chꞌen chꞌen,

jaxca chꞌen jix wakꞌ ey jaach yet sbꞌabꞌelal.

Jaꞌ yin chꞌen oj jin tzꞌibꞌe oc wan jin chejbꞌanil jaxca wan chꞌen wakꞌnaj ey jaach yet sbꞌabꞌebꞌal,

chꞌen makꞌbꞌil poꞌo ja wu.

2 Cha wakꞌ lista ja bꞌa yet skꞌinibꞌ yecal,

catuꞌ chach jul jin sattaj bꞌey sjolom atoj jun wonan tiꞌ.

3 Cꞌam cꞌal junoj chi oc tzajan ja wintaj,

cꞌam cꞌal junoj mac chi ecꞌ bꞌey yinlaj jun wonan tiꞌ,

cꞌam chi skeꞌ yecꞌ noꞌ meꞌ cꞌal noꞌ wacax low bꞌey yichlaj wonan tiꞌ,

ẍi Jehová.

4 Catuꞌ jix swaꞌnen caabꞌ patxan chꞌen chꞌen naj Moisés tuꞌ,

laan yili jaxca wan yet sbꞌabꞌelal.

Jaxa yet jix sajbꞌi a yet junxa cꞌu,

jix yiꞌontoj naj Moisés wan chꞌen chꞌen tuꞌ bꞌey sjolom wonan Sinaí,

jaxca jix yun yalon Jehová.

5 Jix lawi tuꞌ,

jix eyol Jehová xol jun asun,

jaꞌ tituꞌ jix ẍaꞌle sbꞌa Moisés yetoj Dios,

catuꞌ jix yakꞌon yotajne el sbꞌi Jehová,

tet Moisés.

6 Jaꞌ yet lalan yecꞌtoj Jehová sattaj Moisés,

caw ip jix yun yalon jaxca tiꞌ:

—Jain ton Jehová jin,

Jehová jin bꞌi.

Caw chi okꞌ jin cꞌul yin ebꞌ ánima,

caw ey jin mimancꞌulal yin ebꞌ,

yutol ey jin camcꞌulal yin ebꞌ.

7 Caw ey jin camcꞌulal yibꞌan masanil ebꞌ ánima.

Ey jin mimancꞌulal yibꞌan spenail ebꞌ.

Miman chi wute jin cꞌul yibꞌan spenail ebꞌ chi oqui,

asan xin,

jaꞌ ebꞌ ey spenail tuꞌ,

man oj can ebꞌ jaxca tuꞌ.

Sowalil oj waoc syaꞌilal yibꞌan ebꞌ mame txutxe,

ebꞌ uninale cꞌal yicꞌaal ebꞌ yet bꞌakꞌin,

ẍi Dios.

8 Yin eymanil jix ey noan naj Moisés sattaj Jehová masantaꞌcꞌal jix ey spalan naj sat txꞌotxꞌ,

jix yalon sbꞌa naj tet Dios jaxca tiꞌ:

9 —Jaach Jehová jin Diosal,

ta caw yel chin ja camcꞌulne,

toon ketoj jon,

yutol jaꞌ ebꞌ conobꞌ tiꞌ caw pit snaꞌbꞌal ebꞌ,

akꞌ mimancꞌulal yin cu penail jon,

chaꞌon oc ja conobꞌoj,

ẍi naj Moisés.

10 Jix yalon Jehová tet Moisés jaxca tiꞌ:

Abꞌ tzet oj walaꞌ:

Jaꞌ tinaniꞌ,

chin waꞌne can jun jin wa kꞌane yetoj masanil ebꞌ ja wet conobꞌ.

Oj wun tzet qꞌueyubꞌtaj yoqui,

tol cꞌam tocꞌal bꞌey chi yun juneloj bꞌey junojxa conobꞌ bꞌey yul yibꞌankꞌinal tiꞌ.

Jaꞌ masanil ebꞌ ánima jaꞌjun je yetoj tiꞌ,

oj yil ebꞌ masanil tzet oj wun je xol,

caw qꞌueyubꞌtaj yili tzet oj wunne.

11 Jijewej masanil tzet jix wal can ey jex.

Jain xa oj wiꞌel ebꞌ conobꞌ tol cꞌam chi jijen tzet chi walaꞌ,

jaꞌton ebꞌ:

Amorreo,

ebꞌ Cananeo,

ebꞌ Hitita,

ebꞌ Ferezeo,

ebꞌ Heveo cꞌal ebꞌ Jebuseo.

12 Jaꞌ yet oj jex apnoj oc bꞌey sat txꞌotxꞌ txꞌotxꞌ tuꞌ,

cꞌam ojabꞌ junoj je wa kꞌane che yal yetoj ebꞌ ánima tuꞌ,

cꞌal je junbꞌanen je bꞌa yetoj ebꞌ,

yet watxꞌ cꞌam che bꞌeybꞌalne spena sbꞌeybꞌal ebꞌ tuꞌ.

13 Jaꞌ tzet oj je yunne tol oj je makꞌ poꞌo yet xaambꞌal ebꞌ,

yetoj wan chꞌen chꞌen bꞌey chi txali ebꞌ,

yetoj pax jun teꞌ comon dios chi yij Aserá.

14 Manche jex oc eyilal bꞌey junojxa comon dios,

yutol jain Jehová jin,

caw jow jin yin wan tuꞌ.

15 Cꞌam cꞌal junoj je wa kꞌane che waꞌne yetoj ebꞌ ánima caan bꞌey sat txꞌotxꞌ txꞌotxꞌ tuꞌ,

jaxa tala chi yunne,

chex iꞌletoj yu ebꞌ yet chi oc ebꞌ yin eyilal tet sdiosal tuꞌ.

16 Yetoj pax oj,

cꞌam ojabꞌ che yakꞌ nupoj ebꞌ naj je cꞌaal yetoj scutzꞌin wan ánima tuꞌ,

jaxa tala yet chi ey noan ebꞌ ix tet sdiosal tuꞌ,

catuꞌ chi ijbꞌale ey noan ebꞌ naj je cꞌaal tuꞌ yu ebꞌ ix bꞌey wan comon dios tuꞌ.

Yuxan cꞌam ojabꞌ junoj je wa kꞌane che yal yetoj ebꞌ.

17 Cꞌam che waꞌne junoj chꞌen chꞌen je diosal bꞌey chex oc yin eyilal tet.

18 Che yawej oc skꞌinal ixim pan cꞌam yich;

yin jujebꞌ cꞌual che loꞌwej ixim pan tuꞌ,

jaxca jix yun walon can yin xolilal ey jex.

Yul xꞌaaw Abib che yaoc jun kꞌin tuꞌ,

yutol jaꞌ yet jun xꞌaaw tuꞌ jix jex wiꞌeltej bꞌey Egipto.

19 Masanil ebꞌ je bꞌabꞌel winaj unin,

wet chi yun can oc ebꞌ,

quey cꞌal pax tuꞌ noꞌ yuneꞌ je wacax,

noꞌ icham,

noꞌ yuneꞌ meꞌ,

cꞌal noꞌ yuneꞌ chiw.

20 Jaxa pax noꞌ bꞌabꞌel yuneꞌ je bꞌuru,

chi skeꞌ yakꞌle junoj noꞌ yuneꞌ meꞌ sqꞌuexeloj noꞌ.

Ta tol cꞌam junoj sqꞌuexel noꞌ che yakꞌ xin,

sowalil chi makꞌle kꞌa snukꞌ noꞌ.

Jacꞌalaꞌ pax yu ebꞌ je bꞌabꞌel winaj unin,

sowalil che yakꞌ junoj noꞌ yuneꞌ meꞌ sqꞌuexeloj ebꞌ.

Cꞌam junoj mac chi jul ey jin yet kꞌin yin tol cꞌam niꞌoj saꞌbꞌeal iꞌbꞌil oc yu.

21 Yin wajebꞌ cꞌu chex mulnai,

jaxa yet sjuj cꞌual xin,

chex xewi,

caxcꞌal stiempoal mulnail,

ma yet chi yambꞌale a sat awo,

sowalil chex xewi.

22 Che yaon pax oc kꞌin yet che yiꞌon el ixim bꞌabꞌel tiriw chi kꞌanbꞌi eloj.

Che yaon pax oc junxa kꞌin yet chi lawi scꞌuple a ixim yet lawi abꞌil.

23 Masanil ebꞌ winaj,

sowalil oxel chi oc ebꞌ yin eyilal jin sattaj yul abꞌil;

jain Jehová je Diosal jin chi walaꞌ.

24 Jain oj wiꞌel masanil wan conobꞌ je sattaj,

yet watxꞌ oj chꞌibꞌ cantoj je txꞌotxꞌ.

Cꞌam junoj mactxequel chi yaloc je txꞌotxꞌ tuꞌ yetoj,

yajbꞌan chi oc ebꞌ winaj yin eyilal jin sattaj,

yin oxel yul abꞌil.

25 Jaꞌ yet che yakꞌon je xaambꞌal ey jin,

cꞌam che yakꞌ ẍiqꞌuil noꞌ yetoj ixim pan tol eey yich.

Jaꞌ noꞌ xaambꞌal yet snaꞌbꞌaniltej yet jix jex jajcha eltej bꞌey Egipto,

ta tol cꞌam chi lawi noꞌ je chiꞌoni,

cꞌamxa che cꞌubꞌa can noꞌ yet junxa cꞌu yet yecal.

26 Masanil sbꞌabꞌel sat je yawo chi el bꞌey sat je txꞌotxꞌ,

sowalil che yiꞌtej bꞌey jin calubꞌal.

Cꞌam che txic noꞌ yuneꞌ chiw xol yal yim noꞌ txutxe,

ẍi Jehová.

27 Jix yalon Jehová tet Moisés jaxca tiꞌ:

Tzꞌibꞌe masanil wan kꞌane tiꞌ,

yutol jaꞌ eyoc yichbꞌaniloj jun yet jin wa kꞌane jix wal can je yetoj,

cꞌal yetoj ebꞌ ja wet conobꞌ,

ẍi Jehová.

28 Cawinaj cꞌu,

cꞌal cawinaj akꞌbꞌal jix cancan naj Moisés yetoj Jehová.

Cꞌam cꞌal niꞌoj tzet jix sloꞌ,

tam wal niꞌoj tzet jix yuqꞌueꞌ.

Jaꞌ tituꞌ jix stzꞌibꞌe oc skꞌaneal laonebꞌ ẍejbꞌanil Dios yin chꞌen chꞌen tuꞌ.

29 Jix lawi tuꞌ xin,

jix paxeytej naj Moisés bꞌey sjolom wonan Sinaí,

iꞌbꞌil oc caabꞌ patxan chꞌen chꞌen tuꞌ yu,

bꞌey tzꞌibꞌebꞌil oc wan laonebꞌ chejbꞌanile tuꞌ.

Man yotaj oj naj ta tol tuxa cꞌal chi kopopi yili sat,

yutol jix kꞌanabꞌ yetoj Jehová.

30 Jaxa yet jix yilon naj Aarón yetoj masanil ebꞌ yet conobꞌ,

tol tuxa cꞌal chi kopopi yili sat Moisés tuꞌ,

caw jix xiwa masanil ebꞌ.

Cꞌamxa chi sjitztoj sbꞌa ebꞌ scꞌatan naj.

31 Catuꞌ jix awteletej ebꞌ ánima yu Moisés,

jix sjitzontej sbꞌa Aarón yetoj ebꞌ icham winaj yeoc yul conobꞌ,

scꞌatan naj,

catuꞌ jix kꞌanabꞌ naj xol ebꞌ.

32 Jix lawi tuꞌ,

jix sjitzontej sbꞌa masanil ebꞌ ánima tuꞌ,

catuꞌ jix oc ian naj yalon masanil wan chejbꞌanile jix yakꞌ Jehová tet,

jaꞌton wan jix bꞌet ẍaꞌeytej bꞌey sjolom wonan Sinaí.

33 Jaꞌ yet jix lawi skꞌanabꞌ xol ebꞌ ánima tuꞌ,

jix smajchen ey sat yetoj jun an kꞌap.

34 Jaxa yet chi octoj naj Moisés kꞌanabꞌ yul snail scalubꞌal Jehová,

chi yiꞌel jun kꞌap naj tuꞌ yin sat.

Jaxa yet chi meltzo eltej naj,

catuꞌ chi yalon pax tet ebꞌ conobꞌ tzet chejbꞌanile chi yal Jehová tet ebꞌ.

35 Jaꞌ yet lalan skꞌanabꞌ naj xol ebꞌ tuꞌ,

chi yil ebꞌ tol chi kopopi yili sat naj.

Yet chi lawi yalon wan ẍejbꞌanil Jehová tuꞌ tet ebꞌ,

catuꞌ chi smajchen pax el sat yetoj jun kꞌap tuꞌ.

Jato cꞌal yet chi octoj naj kꞌanabꞌ sattaj Jehová,

catuꞌ chi yiꞌon pax el yin sat.